Anam Utịben̄kpọ, Edi Mbon Nazareth Idaha Enye ke N̄kpọ

Jesus ananam ediwak n̄kpọ mfịn. Ke ẹma ẹkewat ẹto Decapolis ẹdisịm, enye ama anam idem ọsọn̄ mma kiet emi iyịp ekesiwọrọde onyụn̄ anam eyen Jairus eset. Edi itreke do. Ke ini Jesus ọkpọn̄de ufọk Jairus, nnan iba ẹtiene enye, ẹfiori ẹte: “Tua nnyịn mbọm, Eyen David.”—Matthew 9:27.

Mmọ ndikot Jesus “Eyen David” owụt ke mmọ ẹnịm ke Jesus editie ke ebekpo David ye nte ke enye edi Messiah. Jesus anam nte imọ ikopke uyo mmọ. Ekeme ndidi enye anam ntre man ese m̀mê mmọ ẹyedop uyo, edi mmọ idopke. Ke ini Jesus odụkde ufọk owo kiet, mmọ ẹtiene enye ẹdụk. Enye obụp mmọ ete: “Ndi mbufo ẹmenyene mbuọtidem ẹte ke ami mmekeme ndinam emi?” Mmọ ẹbọrọ ẹte: “Ih, Ọbọn̄.” Jesus otụk mmọ enyịn onyụn̄ ọdọhọ ete: “Yak ọwọrọ ọnọ mbufo nte mbuọtidem mbufo edide.”—Matthew 9:28, 29.

Enyịn atara mmọ kpa idahaoro, mmọ ẹnyụn̄ ẹkụt usụn̄! Jesus ọdọhọ mmọ ẹkûmen se imọ inamde inọ mmọ usan̄a utịn̄ unọ mme owo kpa nte enye esinyụn̄ ọdọhọde mbon en̄wen. Edi sia esịt enemde mmọ etieti, mmọ ẹketịn̄ n̄kpọ emi ke ofụri edem oro.

Ke ini owo iba emi ẹyomde ndiwọrọ nnyọn̄, mme owo ẹmen ete kiet emi demon esịnede ke idem ẹdi. Enye ikemeke nditịn̄ ikọ. Jesus ebịn demon oro osio, ndien ete oro ọtọn̄ọ nditịn̄ ikọ kpa idaha oro. Idem akpa mbon emi ẹdude do tutu mmọ ẹdọhọ ẹte: “Akananam owo ikwe mbiet n̄kpọ ntem ke Israel.” Mme Pharisee ẹdu do n̄ko. Edi sia mmọ mîkemeke ndinam nte mmimọ ikwe mme utịben̄kpọ emi, mmọ ẹtịn̄ se mmọ ẹma ẹketetịn̄ akpa ẹban̄a ebiet emi Jesus adade odudu anam mme utịben̄kpọ oro. Mmọ ẹdọhọ ke “enye ada odudu andikara mme demon ebịn mme demon.”—Matthew 9:33, 34.

Esisịt ini ke oro ebede, Jesus asan̄a ye mbet esie afiak ọnyọn̄ Nazareth obio emana esie. N̄kpọ nte isua kiet ke edem, enye ama ekpep mme owo n̄kpọ ke synagogue emi odude do. Idem ama akpa mbon obio mmọ ke nte enye eketịn̄de ikọ, edi ekem se enye ekekpepde ayat mmọ esịt anam mmọ ẹyom ndiwot enye. Idahaemi, Jesus afiak oyom ndin̄wam mbon obio mmọ emi.

Enye afiak aka synagogue ndikpep mme owo n̄kpọ ke usen Sabbath. Idem akpa ediwak owo tutu mmọ ẹbụp ẹte: “Owo emi ada utọ ọniọn̄ ye mme utom odudu emi ke m̀mọ̀n̄? Nte enye idịghe eyen anamusọ eto? Nte eka esie ikereke Mary, nditọeka esie iren inyụn̄ ikereke James ye Joseph ye Simon ye Judas? Nte kpukpru nditọeka esie iban inyụn̄ idụhe ye nnyịn? Ke m̀mọ̀n̄, ndien, ke owo emi ada ofụri n̄kpọ emi?”—Matthew 13:54-56.

Mmọ ikereke ke Jesus edi n̄kpọ ndomokiet, ẹnyụn̄ ẹda enye nte owo emi onyụn̄ amanade n̄kpọn̄ n̄kpọn̄ ke obio mmimọ. Mmọ ẹkere ẹte: ‘Eyen emi inyụn̄ ikụtde n̄kpọn̄ n̄kpọn̄ emi akpanam didie edidi Messiah?’ Ndikere n̄kpọ ntem iyakke mmọ ẹda enye ke n̄kpọ kpa ye kpukpru utịben̄kpọ emi mmọ ẹkopde nte enye anamde ye ifiọk emi enye enyenede. Idem mbon esie n̄ko idaha enye ke n̄kpọ sia mmọ ẹnen̄erede ẹdiọn̄ọ enye. Emi akanam enye ọdọhọ ke “prọfet inanake ukpono ke mîbọhọke ke obio emana esie ye ke ufọk esie.”—Matthew 13:57.

Idem enen̄ede akpa Jesus ke nte mmọ ẹnanade mbuọtidem ntem. Emi iyakke enye anam utịben̄kpọ ndomokiet do “ibọhọke ndidori owo ifan̄ emi ẹdọn̄ọde ubọk nnyụn̄ n̄kọk mmọ udọn̄ọ.”—Mark 6:5, 6.