6, 7. Nso iwụt ke Jesus ama esisịn idem anam utom?

⁶ Jesus n̄ko esinam utom etieti, ndien ebịghi enye ọkọtọn̄ọ ndinam emi. Mbemiso enye ekedide isọn̄, enye ekedi “ata anamutom,” emi Abasi akadade obot kpukpru n̄kpọ ke “heaven ye ke isọn̄.” (Mme N̄ke 8:​22-31; Colossae 1:​15-17) Jesus ama aka iso esịn idem anam utom ini enye okodude isọn̄. Enye ama ekpep utom usọeto ini edide ekpri, ẹma ẹnyụn̄ ẹdiọn̄ọ enye nte “anamusọ eto.”a (Mark 6:3) Utom usọeto idịghe ekpri utom. Utom emi ama esinen̄ede ọsọn̄ ke eyo Jesus sia itie usiaketo, itie udep n̄kpọutom, ye ediwak n̄kpọutom ilektrik ikodụhe. Kere nte Jesus ọwọrọde aka ndiyom eto emi enye edidade inam utom, ekek eto oro, asiak, ekem obiom aka ebiet oro enye editiede inam utom! Kere nte enye osụk ọbọpde ufọk​—asiak eto, ọkọn̄ ọkọm, anam usụn̄ufọk, onyụn̄ ọkọn̄ okpokoro, n̄kpọitie, ye mme n̄kpọ eken. Imenịm ke ama esinem Jesus ndikụt eti utom emi enye ekesịnde idem anam.