‘Bụt Inamke Mi Iban̄a Eti Mbụk’
“Bụt inamke mi ye gospel [eti mbụk, NW]; koro enye edide odudu Abasi, emi ọwọrọde edinyan̄a ọnọ kpukpru owo eke ẹbuọtde idem.”—ROME 1:16.
1. Nte ido edide, didie ke esise eti mbụk, edi didie ke mbon ererimbot oro ẹnanade mbuọtidem ẹsise eti mbụk Obio Ubọn̄ Abasi?
SE OWO kiet adade nte eti mbụk ekeme nditre ndidi eti mbụk nnọ owo en̄wen. Nte ido edide, ẹsidara owo emi akamade eti mbụk, ndien owo emi oyomde ndikop eti mbụk oro eyenọ enye n̄kpan̄utọn̄. Nte ededi, Bible ama ebemiso etịn̄ ete ke mbon unana mbuọtidem ke ererimbot emi idisehe eti mbụk Obio Ubọn̄ Abasi ye etop edinyan̄a esie nte n̄kpọ idatesịt.—Men 2 Corinth 2: 15, 16 domo.
2. Nso ke apostle Paul eketịn̄ aban̄a eti mbụk oro enye akatan̄ade, ndien ntak emi eti mbụk oro enye akatan̄ade osụk edide eti mbụk mfịn-e?
2 Apostle Paul ekedi kiet oro ẹsiode ẹdọn̄ ndikọnọ mbonan̄wa eti mbụk. Didie ke enye ekese utom esie? Enye ọkọdọhọ ete: “Ke n̄kan̄ mi, mmeben̄e idem ndikwọrọ gospel nnọ mbufo nde ẹmi ẹdude ke Rome. Koro bụt inamke mi ye gospel.” (Rome 1:15, 16) Man mbụk oro osụk edi eti mfịn, ke ekperede ndisịm isua 2,000 ke apostle Paul ama ekewet mme Christian ẹkedude do ke Rome, enye ke akpanikọ ekpenyene ndidi nsinsi eti mbụk. Enye, ke editịm ntịn̄, edi “nsinsi gospel.”—Ediyarade 14:6.
3, 4. Ntak emi apostle Paul ọkọdọhọde ete ke imo ikopke bụt iban̄a eti mbụk-e?
3 Ntak emi apostle Paul ọkọdọhọde ete ke bụt inamke imọ ye eti mbụk-e? Ntak emi enye okpokokopde bụt aban̄a eti mbụk-e? Sia enye ekedide etop oro owo mîmaha, koro enye akaban̄ade owo oro ẹkekọn̄de ke eto ndutụhọ ke ido oro ẹkesikọn̄de obukpo abiatibet, ẹnịmde enye nte ata idiọk owo ke iso kpukpru mbon oro ẹsede n̄kpọ enyọn̄ enyọn̄. Ke isua ita ye ubak, owo emi ama anam isan̄ ọdọk, osụhọde Palestine ye eti mbụk onyụn̄ osobo ikan̄ ikan̄ ubiọn̄ọ otode mme Jew, akpan akpan mme adaiso ido ukpono. Ndien idahaemi Paul, ke ekerede enyịn̄ owo oro ẹkesịnde ke ndek mi, ama osobo mbiet usua oro.—Matthew 9:35; John 11:46-48, 53; Utom 9:15, 20, 23.
4 Ke ntak ubiọn̄ọ ntre, ekeme ndidi ẹkese Paul ye ekemmọ mbet Jesus Christ nte ẹnyenede n̄kpọ oro ẹkpekopde bụt ẹban̄a. Ke akpanikọ, Paul kemi ọkọsọn̄ọ eyịre ke n̄kpọ oro enye ke idemesie ke akpa ekesede nte n̄kpọ o-bụt. Enye ke idemesie ama abuana ke ndisuene mme anditiene Jesus Christ. (Utom 26:9-11) Edi enye ama etre usụn̄ edinam oro. Nte utịp, enye, ke adianade ye mbon enwen oro ẹkekabarede ẹdi Christian, ẹma ẹsobo afai afai ukọbọ.—Utom 11:26.
5. Didie ke Paul akanam ikọ esie aban̄ade editre ndikop bụt mban̄a eti mbụk an̄wan̄a?
5 Edieke owo ayakde bụt anam enye ke ndidi mbet Jesus Christ, enye ekpetiene usụn̄ ukere n̄kpọ eke owo. Apostle Paul iketiehe ntre. Utu ke oro, ke ndinam an̄wan̄a nte ke imọ ikokopke bụp iban̄a eti mbụk oro imọ ikọkwọrọde, enye ọkọdọhọ ete: “Koro enye edide odudu Abasi, emi ọwọrọde edinyan̄a ọnọ kpukpru owo eke ẹbuọtde idem.” (Rome 1:16) Odudu Abasi inamke owo okop bụt ndomokiet edieke odudu emi odude ke edinam ke idem mbet Jesus ndiyọhọ uduak oro odotde itoro ubọn̄ Abasi emi Jesus Christ ke idemesie akatuakde ibuot ọnọ onyụn̄ otoro.—Men 1 Corinth 1:18; 9:22, 23 domo.
Eti Mbụk oro Ẹtan̄ade ke Ofụri Ererimbot
6, 7. (a) Nso mbiomo kaban̄a eti mbụk ke Mme Ntiense Jehovah ẹdomo ndidu uwem ekekem, ndien ye nso utịp? (b) Okposụkedi nnyịn mîdehedei iyom ndiyak ndịk anam nnyịn itre ndinọ ikọ ntiense, nso ikeme ndidi se ẹyomde ke ndusụk ini? (Se ikọ idakisọn̄.)
6 Nte Paul, Mme Ntiense Jehovah mfịn ẹdi mbet Eyen Esie oro ẹnọde ubọn̄, Jesus Christ. Ye Mme Ntiense esie ẹmi, Jehovah ama ayak ọsọn̄urua “ubọn̄ ubọn̄ eti mbụk” emi esịn mmọ ke ubọk. (1 Timothy 1:11, NW) Mme Ntiense Jehovah ikpụhe ndidu uwem ekekem ye ndodobi mbiomo emi, ndien ẹkpak mmọ ẹte ẹkûkop bụt ẹban̄a enye. (2 Timothy 1:8) Edi akpan n̄kpọ nte ikûdedei iyak ndịk m̀mê bụt anam nnyịn itre ndinọ ikọ ntiense nnyụn̄ nnam ẹdiọn̄ọ nnyịn nte Mme Ntiense Jehovah.a
7 Utọ uko uko ye unana ndịk unọ ikọ ntiense ntre omosụn̄ọ ke editan̄a enyịn̄ N̄kon̄ N̄kan Abasi ke ofụri isọn̄ ye ke edikwọrọ eti mbụk Obio Ubọn̄ esie ke udomo ofụri ererimbot. Eyen Abasi ọkọdọhọ ete: “Eyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi,” ndien owo ikpedehedei iyak ntịn̄nịmikọ esie okpu. (Matthew 24:14) Ẹkwọrọ eti mbụk emi idahaemi ke se iwakde ibe idụt 210, ndien owo isịmke utịt utom ukwọrọikọ emi kan̄a. Sia mîkopke bụt iban̄a eti mbụk inyụn̄ isakde iso ise ini iso ye mbuọtidem, nnyịn ibọn̄ akam nte mme akpa mbet Jesus Christ ẹkebọn̄de ite: “Ndien kemi, Jehovah, . . . nọ mme asan̄autom Fo odudu nditịn̄ ikọ Fo ke ofụri uko.”—Utom 4:29.
8. Ntak emi mîkpanaha Mme Ntiense Jehovah ẹtek ke ifịk ke ntak ubiọn̄ọ oro odude ke ofụri idut isọn̄-ọ?
8 Ke adan̄aemi edide akpanikọ nte ke ẹsua ẹnyụn̄ ẹbiọn̄ọ Mme Ntiense Jehovah ke ofụri idụt isọn̄, emi osu se ẹkebemde iso ẹtịn̄ nte n̄kpọ oro ẹdidade ẹdiọn̄ọ ata mbon oro ẹtuakde ibuot ẹnọ odu-uwem ye Abasi akpanikọ kierakiet. (John 15:20, 21; 2 Timothy 3:12) Ntre utu ke nditek ke ifịk ye mbuọtidem ke ntak emi, ẹma ẹfiak ẹsọn̄ọ mbuọtidem mme anditan̄a eti mbụk ẹte ke mmọ ẹmenyene unyịme Abasi ẹnyụn̄ ẹsịne ke esop oro Andikara Ofụri Ekondo, Jehovah, onyịmede.
9. Ntak emi mînamke n̄kpọ okposụkedi ofụri ererimbot ẹn̄wanade ye nnyịn-e?
9 Ẹkûdedei ẹfre ẹte: Nnyịn imenyene ibetedem N̄kon̄ N̄kan Abasi ofụri ekondo. Ntre, ndi anam n̄kpọ edieke ererimbot ye kpukpru otu ido ukpono ye n̄ka ukaraidem esie ẹn̄wanade ye nnyịn? Ofụri ererimbot ama an̄wana ye ikpọn̄îkpọn̄ edibon Eyen Abasi, ndien bụt inamke nnyịn ndikụt idem nnyịn ke ukem itie oro. Nte enye ọkọdọhọde mme apostle esie ete: “Edieke ererimbot asuade mbufo, mbufo ẹmefiọk ẹte, enye ama ebemiso asua Mi, ndien edisua mbufo. Edieke mbufo ẹkpedide mbon ererimbot, ererimbot akpama ikọt esie; edi sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo.”—John 15:18, 19.
10. Ekese ukọbọ oro ẹkọbọde Mme Ntiense ẹto ebiet ewe, ndien ntak emi mmọ mîkopke bụt iban̄a emi-e?
10 Mme Ntiense Jehovah ke ntre ẹmeyọ ukọbọ ke ofụri ererimbot edi ke ata n̄wọrọnda usụn̄ ke mme idụt mbon oro ẹdọhọde ke idi Christendom. Utọ ukọbọ oro otode Christendom mi iwụtke ite ke Mme Ntiense idịghe Christian. Utu ke oro, enye ọsọn̄ọ edidọhọ oro mmọ ẹdọhọde ke idi mme Christian akpanikọ, Mme Ntiense Abasi ye Ete Jesus Christ, oro edi, Jehovah. Sia mmọ ẹdide Mme Ntiense Abasi, bụt inamke mmọ ke ini ukọbọ osịmde mmọ ke mme utọ ntak ido ukpono oro. Ntre, item oro apostle Paul ọkọnọde mme Christian akpa isua ikie ete ẹkûkop bụt nte odotde abuana Mme Ntiense Jehovah idahaemi.—Se Philippi 1: 27-29.
Mfọn N̄kan Mbụk oro Ẹkpetan̄ade
11. Ke ndida enyin oro Mme Ntiense Jehovah, ntak emi nnyịn mîtreke ndidi mme anditiene Jesus Christ?
11 Mme Ntiense Jehovah ẹmenyịme enyịn̄ mmọ uko uko ke edisu un̄wọn̄ọ oro Jehovah ọkọn̄wọn̄ọde ọnọ ikọt ediomi esie ke Isaiah 43:10. Nte ededi, emi iwọrọke ite ke mmọ itieneke Jesus Christ aba. Jesus edi Adausụn̄ mmọ, kpa enyeemi mmọ ẹtienede uwụtn̄kpọ esie. Enye ke idemesie edi kiet ke otu ntiense Jehovah. Ke akpanikọ, enye edi akpa Ntiense Jehovah.—1 Timothy 6:13; Ediyarade 1:5.
12. Nso orụk mbụk ke Mme Ntiense Jehovah ẹkwọrọ ke ofụri ererimbot, ndien ntak-a?
12 Etop oro Mme Ntiense Jehovah ẹmi ẹkwọrọde ke ofụri ererimbot edi ata mfọn n̄kan mbụk oro akanam ẹtan̄ade. Idụhe ukara oro ọkpọfọnde ye ubonowo akan Obio Ubọn̄ Messiah oro Jehovah okowụkde ndikara ererimbot ubonowo, ndifak ubonowo emi enye okosiode ikpọn̄îkpọn̄ edibon Eyen esie ọdọn̄. (Isaiah 9:6, 7) Ye mme andidụn̄ isọn̄ ẹmi ẹkwọrọde eti mbụk Obio Ubọn̄ ẹnọ, ẹmenọ mmọ ifet ndinyịme enye nnyụn̄ nyarade nwụt nte idotde ndibọ enọ nsinsi uwem ke idaha mfọnmma owo ke paradise isọn̄.
13. Ntak emi nnyịn ikemede ndinịm ke akpanikọ nte ke Obio Ubọn̄ Messiah edidi mfọn n̄kan ukara, ndien nso ke Mme Ntiense ye unana edikop bụt ẹtoro ẹte ẹnam?
13 Ke akpanikọ, edieke Jesus okonyịmede ndikpa ubiak ubiak n̄kpa man afak mbon oro ẹdikabarede ẹdu ke idak ukara esie, enye eyekụt ete ke imọ inọhọ mmọ n̄kpọ efen ikan ata mfọn n̄kan ukara. Se nnyịn itorode inọ edibotn̄kpọ kiet kiet edide owo ke isọn̄ edi: Kabade di anam-akpanikọ, osụkibuot owo ke idak ukara oro. Bụt inamde nnyịn iban̄a ukara oro nnyịn ke ofụri esịt itorode inọ kpukpru ubonowo. Nnyịn ifiakde edem ikpọn̄ edikwọrọ Obio Ubọn̄, okposụkedi edinam emi ekemede ndida ukọbọ nsọk nnyịn. Ukem nte apostle Paul, nnyịn owo kiet kiet idọhọ ite: “Bụt inamke mi ye gospel.”
14. Nte Jesus ọkọdọhọde, edikwọrọ Obio Ubọn̄ ke usen nnyịn akpatara adan̄a didie?
14 Jesus ama ebemiso etịn̄ ete ke edikwọrọ eti mbụk Obio Ubọn̄ edidi ke udomo ofụri ererimbot, ndien in̄wan̄înwan̄, ntatara prọfesi emi ama ekem ye utọ etop oro. (Mark 13:10) Enye ikemen̄eke ndibemiso ntịn̄ mban̄a edikwọrọ Obio Ubọn̄ Jehovah ke ntatara udomo—ih, tutu osịm ata utịt isọn̄. (Utom 1:8) Jesus ama ọdiọn̄ọ ete ke ebiet ekededi oro ẹdikụtde mme owo, mme anam-akpanikọ mbet imọ ẹyesịn ukeme ofụri esịt ndisịm mmọ ye eti mbụk Obio Ubọn̄.
15, 16. (a) Mmanie ẹdot se ẹdade eti mbụk ẹsịm? (b) Ntak anade ẹkụre utom ukwọrọikọ kpa ye ukọbọ otode esop Devil?
15 Mme andidụn̄ isọn̄ mfịn ẹwak ẹsịm ediwak million tọsịn ẹnyụn̄ ẹsuana ẹyọhọ ofụri ikpọ mbak isọn̄ ye ikpọ isuo inyan̄ibom. Kpa ye oro, idụhe ubak isọn̄ oro owo odụn̄de emi oyomde usụn̄ akaha edi se Mme Ntiense Jehovah mîsịnke ukeme ndisịm enye ye eti mbụk. Ofụri isọn̄ oro owo ẹdụn̄de edi ndamban̄a udoriukot Jehovah Abasi. (Isaiah 66:1) Mme edibotn̄kpọ ẹdide owo oro ẹdụn̄de ke ikpehe udoriukot esie ekededi ẹdot se ẹdade etop edinyan̄a emi ẹsịm.
16 Mfịn eti mbụk emi edi mbụk idatesịt aban̄ade ubọn̄ ubọn̄ ukara oro ẹma ẹkewowụk ke ubọk Messiah. Jesus ama ọdiọn̄ọ ete ke kpa ye ata afai afai ukọbọ otode esop Devil, spirit Abasi eyedemede mme ata mbet Messiah ndiwọrọ n̄ka n̄kosịm ata akpatre man otodo “ẹkwọrọ gospel Ubọn̄ Abasi” nte akpanikọ enyenede nsọn̄ọ “ẹnọ kpukpru mme idụt.”—Matthew 24:14.
Ikopke Bụt Iban̄a Jesus Christ ye Jehovah
17. (a) Kaban̄a nso ke ata mme andituak ibuot mîkopke bụt? (b) Nso ewụhọ ke Jesus akanam ẹdiọn̄ọ ke Mark 8:37b, ndien nso akpan n̄kpọ ke enye osio owụt?
17 Ata Edikon̄ Abasi ikemen̄eke ndinọ idemesie enyịn̄, Jehovah; bụt ikponyụn̄ inamke mme anam-akpanikọ owo oro ẹtuakde ibuot ẹnọ enye iban̄a enyịn̄ oro. Ata mme andituak ibuot ẹkop inemesịt owo ndikot nnyụn̄ ndiọn̄ọ mmọ nte mbon oro ẹnọde enye utuakibuot ye n̄kopitem oro mîbahakede. Kaban̄a idemesie, Jesus ama onịm ewụhọ, m̀mê edumbet, ke Mark 8:37b ete: “Owo ekededi eke okopde bụt ye Ami ye ikọ Mi ke idiọk emana use emi, Eyen owo eyekop bụt ye enye, ke ini Enye edide ke ubọn̄ Ete Esie ye ndisana angel Esie.” Ukem oro nko, owo ekededi eke edikopde bụt ye Abasi ye Ete Ọbọn̄ Jesus Christ, Jehovah nte enende eyekop bụt ye utọ owo oro. Ndien edibotn̄kpọ ekededi oro Jehovah edikopde bụt aban̄a ke ntak usụn̄ unana edinam akpanikọ esie ididotke ndidu ke ikpehe ukara Abasi ekededi ke heaven m̀mê ke isọn̄.—Luke 9:26.
18. (a) Ntak akpanade ikọ Jesus ke Matthew 10:32, 33 ọsọn̄ọ odu nnyịn ke esịt ye ekikere? (b) Nso isitịbe inọ mbon oro ẹkande Jesus ye Jehovah ke ntak ẹfehede owo enyịn? (Nọ mme uwụtn̄kpọ ẹtode ikọ idakisọn̄.)
18 Yak ikọ Jesus Christ ẹtienede mi ẹsọn̄ọ ẹwụhọ ke esịt ye ekikere nnyịn: “Mmọdo owo ekededi eke edinyịmede ke iso owo ete, idi okịm, Ami nyenyụn̄ nnyịme enye ke iso Ete Mi emi odude ke heaven. Edi owo ekededi eke edikande Mi ke iso owo, ete, idịghe okịm, Ami nyenyụn̄ n̄kan enye ke iso Ete Mi emi odude ke heaven.” (Matthew 10: 32, 33; Luke 12:8, 9) Ke ukem isọn̄ ntak oro, Abasi eyekan owo ekededi oro edikande Abasi ye Ete Ọbọn̄ Jesus Christ. Enye ididotke ndidi andibuana ke ufọk emi Jesus Christ edide Akpan. Ke ntre ẹyesobo enye ẹfep ke edikem ini Abasi.b
19, 20. (a) Ntak emi mbon oro ẹbọn̄de akam ẹte ẹnam enyịn̄ Jehovah asana mînyeneke n̄kpọ ndomokiet ndikop bụt mban̄a-a? (b) Nso ke mme anditan̄a Obio Ubọn̄ oro mîkopke ndịk ẹnam ẹma, ndien ye nso ibetedem?
19 Eyebọrọ akam uwụtn̄kpọ oro Jesus ekekpepde mme mbet esie ete: “Ete nnyịn emi odude ke heaven; yak ikpono enyịn̄ Fo, yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:9, 10) Ke ini oro adade itie, mme mbet oro Jesus amade idinyeneke n̄kpọ ndomokiet ndikop bụt mban̄a. Idịghe ediwak million owo ẹdude uwem idahaemi oro mîdikpaha tutu amama kpọt ẹdikpono ẹnyụn̄ ẹnam enyịn̄ Jehovah asana, edi nko ediwak million tọsịn ubonowo ẹmi enye edikotde osion̄o ke udi ke idak tọsịn-isua ukara Obio Ubọn̄ esie. Mmọ ẹyenyene ifet ẹdidu uwem ke paradise isọn̄ ke nsinsi.
20 Ye unana edikop bụt, mme anditan̄a eti mbụk Obio Ubọn̄ ẹmi mîkopke ndịk mi ẹma ẹkeme ndinọ ikọ ntiense ke ofụri ekondo kpa ye ubiọn̄ọ ofụri ererimbot koro mmọ ẹnyenede odudu oro akande eke owo ke edem mmọ—kpa ibetedem mme angel ke heaven. Ntre, Mme Ntiense Jehovah “ẹten̄e Abasi, ẹnyụn̄ ẹnọ enye ubọn̄.”—Ediyarade 14:6, 7.
Ikopke Bụt Nditen̄e Abasi Nnyụn̄ Nnọ Enye Ubọn
21. Nso ke Mme Ntiense Jehovah mîsikopke bụt ndinam, ndien ye nso utịp?
21 Mme Ntiense Jehovah ẹmewụt ẹte ke mmimọ ikopke bụt nditen̄e Abasi nnyụn̄ nnọ enye ubọn̄, idem ndikama ọkpọ ọkpọ enyịn̄ esiemọ, Jehovah. Emi amada mme edidiọn̄ oro inua mîkemeke nditịn̄ ọsọk mmọ. Mme edidiọn̄ ẹmi ẹto edisu oro mme un̄wọn̄ọ akpanikọ Ata Edikọn̄ Abasi ẹsude. Nso ubọn̄ ke emi ọnọ enye ntem nte odu-uwem ye Abasi akpanikọ kierakiet, Andikara ofụri ekondo!
22. Ntak emi Mme Ntiense Jehovah ẹdisobode ikan ikan ukọbọ, edi nso idara edinyene mmọ?
22 Ke ini iso oro edide, mme ukara ererimbot ẹyewọn̄ọde ẹn̄wana ye mme ukara ido ukpono ẹyenyụn̄ ẹsobo kpukpru mmọ—esịnede Christendom—ẹfep ke iso isọn̄. (Ediyarade 17:16, 17) Mmọdo, Mme Ntiense Jehovah ẹyesobo ikpehe ini ikan̄ ikan̄ ukọbọ otode mbon ererimbot. Mmọ ikpekemeke ndiyọ nnyụn̄ mbọhọ edieke nsinsi Abasi mîkpodụhe ye mmọ. Edi enye odu, ndien ke ntre mmọ ẹyekop inemesịt edikụt nte Abasi oro Mme Ntiense ẹtuakde ibuot ẹnọ ye unana ediyok, owotde kpukpru utọ asua oro ẹbiọn̄ọde mme Christian ye Jehovah. Mmọ ididiaha bụt ke ndidi se ẹyararede ẹnyụn̄ ẹsobo nte mme asua ata ukara Abasi, edi ẹyenyene idatesịt oro inua mîkemeke nditịn̄ ke ndikwọ nnọ Jehovah nte: “Kpa ke nsinsi nsinsi afo edi Abasi.”—Psalm 90:2.
23. Ntak emi Mme Ntiense Jehovah mînyeneke n̄kpọ ndomokiet ndikop bụt mban̄a, ndien nso ididi utịp?
23 Mmọ ẹyenọ Abasi ubọn̄, kpa Ete Jesus Christ, emi ebede ke enye ẹfak ekpụk ubonowo man ẹnyene nsinsi uwem ye inemesịt nte mfọnmma owo ke paradise isọn̄. Didie ke Jehovah owụt ntem nte idide okopodudu Abasi ebe ke Christ Jesus! Jehovah owụt idemesie ediye ediye didie ntem nte idide andikama ata ọkpọsọn̄ odudu esie ke eti ibuot ye ke ima ima usụn̄, idịghe andikama ke idiọk usụn̄! Nte odotde, nnyịn inyeneke n̄kpọ ndomokiet ndikop bụt ke ebuana ye enye m̀mê edibon Eyen esie kierakiet, Jesus Christ. Bụt inamke nnyịn ndidi mme anditan̄a ubọn̄ ubọn̄ eti mbụk, emi anamde ẹdiọn̄ọ akakan odudu Jehovah Abasi ebe ke Christ Jesus, emi ọkọdọhọde ke utịt utịt ini uwem esie ke isọn̄ ete: “Esọn̄ esịt; Ami n̄kakan ererimbot.” (John 16:33) Ke nditiene usụn̄uwem emi, ẹyak nnyịn kpukpru ini isitiene uwụtn̄kpọ apostle Paul, emi tutu amama mîkokopke bụt iban̄a eti mbụk. Edieke nnyịn inamde oro, Ata Ọkpọsọn̄ Abasi idikopke bụt iban̄a nnyịn.
[Mme Ikọ Idakisọn̄]
a Okposụkedi nnyịn mîyomke ndikop bụt ke ndinyịme akpanikọ oro nte ke nnyịn idi Mme Ntiense, ini odu emi anade nnyịn inyene “ibuot nte urụkikọt.” (Matthew 10:16) Mme Ntiense ke idak ukara Nazi eke Germany ẹma ẹdiọn̄ọ ẹte ke ini ama odu ndinam ẹdiọn̄ọ mmimọ ye ini oro mînaha inam ntre.—Men Utom 9:23-25 domo.
b Ata ediwak ini, mbon oro ẹsikan̄de Jesus ye Jehovah sia ẹfehede owo enyịn isinyeneke unyịme ererimbot. Ke uwụtn̄kpọ, se Enyọn̄-Ukpeme eke May 1, 1989, page 12; 1982 Yearbook, page 168; 1977 Yearbook, page 174-176; 1974 Yearbook, page 149-150, 177-178. Ke n̄kan eken, idem mbon oro ẹbierede ndibiọn̄ọ eti mbụk ẹsidiọn̄ọ ẹte ke Mme Ntiense Jehovah idikan̄ke Jesus ye Jehovah. (1989 Yearbook, page 116-118) Se nko Matthew 10:39 ye Luke 12:4.
Mme Mbụme Ndụn̄ọde
◻ Ukem nte apostle Paul, nso edu ke nnyịn ikpenyene ke se iban̄ade editan̄a eti mbụk, ndien ntak-a?
◻ Ntak emi etop oro Mme Ntiense Jehovah ẹtan̄ade edide mfọn n̄kan mbụk oro akanam mîdụhe?
◻ Nso ntọt ke Jesus ọkọnọ aban̄a owo ekededi oro edikopde bụt aban̄a imọ ke imọ idide ke ukara Obio Ubọn̄?
◻ Nso isitịbe inọ mbon oro ẹkan̄de Jesus ye Jehovah?
◻ Nso ke mme anditan̄a eti mbụk ẹkeme ndinam ye unana edikop bụt, ndien ntak-a?