Ke ini Jesus, Peter, James, ye John ẹsụhọrede ke obot ẹdi, mmọ ẹkụt akwa otuowo. Edi enyene se itịbede. Mme scribe ke ẹda ẹkanade mme mbet eken ẹnyụn̄ ẹneni eneni ye mmọ. Ke ini mme owo ẹkụtde Jesus esịt enem mmọ, mmọ ẹnyụn̄ ẹfehe ẹkekọm enye. Jesus obụp ete: “Nso ke mbufo ẹneni ye mmọ?”—Mark 9:16.

Ekeme ndidi mme scribe oro ẹketịn̄ ikọ ye mme mbet Jesus m̀mê ẹsak mmọ sia mmọ mîkekemeke ndibịn demon nsio eyen oro ke idem. Utu ke ndibọrọ kan̄a ete oro, Jesus ọdọhọ otuowo ete: “O emana unana mbuọtidem ye eke ukwan̄ido, adan̄a didie ke ndika iso ye mbufo? Adan̄a didie ke ndiyọ mbufo?” Enye etịn̄ ikọ emi ye mme scribe emi ẹkenamde mfịna ye mme mbet esie ke ini enye mîkodụhe. Ekem Jesus ọwọn̄ọde ese ete eyen oro demon afịnade onyụn̄ ọdọhọ ete: “Da eyen fo di mi.”—Luke 9:41.