Mbọm Anam Jesus Anam Owo Akpamfia Asana

Nte Jesus ye mbet esie inan̄ ẹkwọrọde ikọ ke “mme synagogue . . . ke ofụri Galilee,” etop utịben̄kpọ Jesus asuana etieti. (Mark 1:39) Etop emi ekesịm obio kiet emi owo akpamfia kiet odude. Luke emi ekedide abiausọbọ ọdọhọ ke ‘akpamfia ọkọyọyọhọ owo emi idem.’ (Luke 5:12) Idiọk udọn̄ọ emi esibiat owo idem etieti ke ini enen̄erede adia owo idem.

Owo akpamfia emi enyene mbọm tutu, n̄ko Ibet ikenyịmeke enye odụn̄ ekpere mme owo. N̄kpọ en̄wen edi nte ke ini enye odude ke otuowo, akana enye ofiori ete: “Edidehe, edidehe!” mbak mme owo ẹdinen̄ede ẹsan̄a ẹkpere enye ẹnyụn̄ ẹmen udọn̄ọ esie. (Leviticus 13:45, 46) Edi nso ke owo akpamfia emi anam ke ini enye okụtde Jesus? Enye asan̄a ekpere Jesus, onụhọ ọnọ enye, onyụn̄ ekpe ubọk ete: “Ọbọn̄, edieke afo akam amade, emekeme ndinam mi nsana.”—Matthew 8:2.

Owo emi enen̄ede ọbuọt idem ye Jesus. Udọn̄ọ emi anam enye enen̄ede enyene mbọm. Nso ke Jesus edinam? Edieke afo okpokodude do, nso ke akpakanam? Mbọm owo emi anam Jesus, ntre enye anyanade ubọk otụk enye ete: “Mmama. Sana.” (Matthew 8:3) Okposụkedi emi ọsọn̄de ndusụk owo emi ẹdude do ndinịm se itịbede emi, kpa idaha oro, owo akpamfia oro asana, oro edi, idem ọsọn̄ enye.

Ndi ukpûmaha ndinyene edidem emi enyenede odudu onyụn̄ atuade owo mbọm nte Jesus? Nte Jesus akanamde n̄kpọ ye owo akpamfia emi owụt ke ini enye edikarade ofụri isọn̄, ke prọfesi Bible emi oyosu: “Enye ayatua usụhọde owo ye ubuene mbọm, oyonyụn̄ anyan̄a ukpọn̄ mme ubuene.” (Psalm 72:13) Ke akpanikọ, Jesus ayan̄wam kpukpru mbon n̄kpọnnam. Se idọn̄de enye ndinam edi oro.

N̄kọ ke eteti nte utom ukwọrọikọ Jesus akanamde mme owo ẹkop nduaidem idem mbemiso enye anamde owo akpamfia emi asana. Idahaemi, mme owo ẹmọn̄ ẹkop ke Jesus anam utịben̄kpọ en̄wen. Edi Jesus iyomke mme owo ẹbuọt idem ye imọ ke ntak n̄kpọ oro mmọ ẹkopde kpọt. Enye ọfiọk ke ẹma ẹtetịn̄ ke imọ ‘idiyakke ẹkop uyo imọ ke efak,’ oro edi, ke imọ idisioho idem etop. (Isaiah 42:1, 2) Oro anam Jesus odụri owo akpamfia oro enye anamde idem ọsọn̄ utọn̄ ete: “Kụt ete ke utịn̄ke unọ owo ndomokiet, edi ka kowụt oku idemfo, nyụn̄ nọ enọ oro Moses okowụkde.”—Matthew 8:4.

Esịt ama enen̄ede enem ete emi tutu enye ikemeke aba ndimụm idem n̄kama. Ntem, enye adaha akasuan mbụk n̄kpọ emi ke kpukpru ebiet. Mbụk utịben̄kpọ emi anam ediwak owo ẹnen̄ede ẹyom ndikụt Jesus. Ke ntak emi Jesus ikekemeke aba ndiwọrọ nsan̄a ke obio. Enye okodu ke ndobo ndobo itie oro mme owo mîdụn̄ke. Kpa ye oro, mme owo ẹto nsio nsio itie ẹka ẹbịne enye man enye ọkọk udọn̄ọ mmọ onyụn̄ ekpep mmọ n̄kpọ.