Uwem ye Utom Jesus

Mmọ Ikemeke Ndimụm Jesus

JESUS ke ekpep n̄kpọ ke temple, ndien enye ndisụk ntịn̄ nnọ mme asua esie ẹdide mbon ido ukpono uwụtn̄kpọ ita oro ayararede idiọkn̄kpọ mmọ, edi oro. Mme Pharisee ẹkop iyatesịt ẹnyụn̄ ẹdụk odu ke nte edinamde enye etịn̄ n̄kpọ oro mmọ ẹdikemede ndida mmụm enye. Mmọ ẹdụk idiọk odu ẹnyụn̄ ẹsio mbet mmọ ẹdọn̄, ọkọrọ ye mme Herodian, man ẹnam enye edue.

Iren ẹmi ẹdọhọ ẹte, “Andikpep, nnyịn imọfiọk ite Afo edi akpanikọ, onyụn̄ ekpep owo usụn̄ Abasi ke akpanikọ, unyụn̄ ukereke owo; koro Afo uten̄eke owo enyịn. Sian nnyịn ndien; Afo ese didie? Nte enen ndinọ Caesar utomo, m̀mê inenke?”

Nneminua mmọ inamke Jesus odu ke ndueidem. Enye ọfiọk ete ke edieke imọ idọhọde ite, ‘Baba, ikemke ye ibet mîdịghe inenke ndikpe utomo emi,’ imọ iyedue ke nditịn̄ ikọ mbiat ukara Rome. Edi, edieke imọ idọhọde ite, ‘Ih, mbufo ẹkpenyene ndikpe utomo emi,’ mme Jew, ẹmi ẹsede edidu oro mmọ ẹdude ke idak ukara Rome ke ndek, ẹyesua imọ. Ntre enye ọbọrọ ete: “Nsinam ẹdomode Mi, mbufo mbio mbubịk? Ewụt Mi okụk utomo.”

Ke ini mmọ ẹdade okụk kiet ẹsọk enye, enye obụp ete: “Mbiet ye n̄wed ẹmi ẹnyene anie?”

Mmọ ẹte, “Enyene Caesar.”

“Enọ Caesar ndien n̄kpọ eke enyenede Caesar; ẹnyụn̄ ẹnọ Abasi n̄kpọ eke enyenede Abasi.”

Kamse, ke ini iren ẹmi ẹkopde usọ usọ ibọrọ emi, idem akpa mmọ. Mmọ ẹnyụn̄ ẹkpọn̄ enye ẹnyọn̄ọ

Ke ẹkụtde ke mme Pharisee ikemeke nditịbi ikọ ntịn̄ ndian Jesus, mme Sadducee, ẹmi ẹdọhọde ke ediset ke n̄kpa idụhe, etiene enye ẹnyụn̄ ẹbụp ẹte: “Andikpep, Moses ọkọdọhọ ete, Edieke owo akpade, ndien mînyeneke eyen, yak eyenete esie ada n̄wan esie ọdọ, asiak ubon ọnọ eyenete esie. Nditoete itiaba ẹkedu ye nnyịn: akpan ọdọ n̄wan, akpa, ndien, sia enye mînyeneke eyen, ọkpọn̄ n̄wan esie ọnọ eyenete esie. Ọwọrọ kpasụk ntre ye udiana, ye ọyọhọ ita, tutu osịm ọyọhọ itiaba. Ndien ke akpatre n̄wan nde akpa. Mmọdo ke ediset ke n̄kpa, enye eyedi n̄wan anie ke otu mmọ mbitiaba, koro kpukpru mmọ ẹkedade enye nte n̄wan?”

Ke ibọrọ Jesus ete: “Nte idịghe ntak emi [esịn] mbufo ẹdue, emi mbufo mîfiọkke N̄wed Abasi ye odudu Abasi? Koro ke adan̄aemi owo esetde ke n̄kpa, mmọ idọhọ ndọ, inyụn̄ idaha mmọ inọ ndọ, edi mmọ ẹtie nte mme angel ẹmi ẹdude ke heaven. Edi kaban̄a mme akpan̄kpa, nte ẹnamde mmọ ẹset; nte mbufo ikokotke ke n̄wed Moses, ke itie emi etịn̄de aban̄a eto, ite Abasi ọkọdọhọ enye ete, Ami ndi Abasi Abraham, ye Abasi Isaac, ye Abasi Jacob. Enye idịghe Abasi mme akpan̄kpa, edi eke mme odu-uwem. Mbufo ẹmedue etieti.”

Idem afiak akpa otuowo oro ke ibọrọ Jesus. Idem ndusụk mme scribe ẹbọrọ ete: “Andikpep, Afo omotịm ọdọhọ.”

Ke ini mme Pharisee ẹkụtde ẹte ke Jesus okịbi mme Sadducee inua, mmọ ẹdi ke otu ẹbịne enye. Man ẹkaiso ẹdomo enye, owo mmọ kiet obụp ete: “Andikpep, ewe edi akamba item ke mbet?”

Jesus ọbọrọ ete: “Ebeiso edi, Ekop O Israel, Jehovah Abasi nnyịn, edi Jehovah kiet. Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo. Udiana akpa edi emi, Ma mbọhọidụn̄ fo nte idemfo. Ibet en̄wen eke okponde akan mmọemi idụhe.” Ke akpanikọ, Jesus adian do ete: “Ofụri mbet ye mme prọfet ẹsịne ke mme item iba oro.”

Scribe kiet onyịme efe, “Andikpep, omotịm etịn̄ ete Abasi edi kiet; efen inyụn̄ idụhe ke mîbọhọke Enye: ndien owo ndima Enye ke ofụri esịt, ye ke ofụri asian ye ke ofụri odudu, ndinyụn̄ mma mbọhọidụn̄ esie nte idemesie omotịm okpon akan kpukpru edifọp enọ ye uwa.”

Ke okụtde ete ke scribe emi ọbọrọ ọniọn̄ ọniọn̄, Jesus ete enye: “Afo uyomke usụn̄ ye Obio Ubọn̄ Abasi.”

Ke usen ita idahaemi​—Sunday, Monday, ye Tuesday​—Jesus ekpep n̄kpọ ke temple. Mme owo ye inemesịt ẹmekpan̄ utọn̄ ẹnọ enye, edi mme adaiso ido ukpono oro ẹkụtde edikpu ẹyom ndiwot enye. Matthew 22:15-40; Mark 12:13-34; Luke 20:20-40.

◆ Nso idiọk odu ke mme Pharisee ẹdụk man ẹmụm Jesus, ndien nso ikpotịbe edieke enye ọkpọbọrọde ih m̀mê ihih?

◆ Didie ke Jesus n̄ko abiat ukeme oro mme Sadducee ẹsịnde ndimụm enye?

◆ Nso n̄kaiso ukeme ke mme Pharisee ẹsịn ndidomo Jesus, ndien nso idi utịp?

◆ Ke akpatre utom ukwọrọikọ esie ke Jerusalem, usen ifan̄ ke Jesus ẹkpep n̄kpọ ke temple, ndien ye nso utịp?