JOSEPH OWO ARIMATHEA ikpekereke-kere ke imọ ikpenyene uko iketịn̄ ikọ ye Pontius Pilate. Pilate ke Rome ẹkemek akara Judea; enye ama ọsọn̄ esịt akan itiat. Owo mînyeneke esịt ika ikọdọhọ Pilate ayak ẹmen okpo Jesus ẹkebụk, ẹdibụk Jesus nte ẹmama. Edi ikọsọn̄ke Joseph nditịn̄ ikọ ye Pilate nte enye ekekerede. Ke ẹma ẹkedọhọ Pilate ke Jesus akpa, enye ama enyịme Joseph ekemen okpo Jesus okobụk. Kpa ye oro Joseph okofụhọde, enye ama efehe aka itie oro ẹkekọn̄de Jesus.​—Mark 15:​42-45.

ENYE EKEDI OWO ESOP SANHEDRIN

Gospel Mark ọdọhọ ke Joseph ekedi “owo Akwa Esop eke ẹtịmde ẹkpono.” Akwa Esop oro ekedi esop Sanhedrin. Esop Sanhedrin ekedi n̄kponn̄kan esopikpe mme Jew, mmọ ẹkesinyụn̄ ẹse ẹban̄a n̄kpọ ekededi oro aban̄ade ibet mme Jew. (Mark 15:​1, 43) Joseph ama esịne ke otu ikpọ owo Judea. Ntak edi oro enye ekekemede ndika mbịne Pilate. Joseph ekedi imọ owo.​—Matt. 27:57.

Esop Sanhedrin ikamaha Jesus. Mbon esop oro ẹma ẹdụk odu man ẹwot Jesus. Edi Joseph iketiehe nte mmọ. Bible okot enye “eti ye edinen owo.” (Luke 23:50) Joseph ikedịghe mbubịk nte ata ediwak mbon esop Sanhedrin mmọ, enye ama odu eti uwem, onyụn̄ odomo ndinịm ibet Abasi. Enye eketie “ebet obio ubọn̄ Abasi.” Ekeme ndidi emi akanam enye akabade edi mbet Jesus. (Mark 15:43; Matt. 27:57) Joseph ama ama akpanikọ ye unenikpe. Etie nte oro akanam enye ama ukwọrọikọ Jesus.

JOSEPH IKEDỊBEKE ABA

Etisịm ini emi Jesus akpade, etie nte Joseph ikefeheke mme Jew aba; enye ama enyịme ndinam mme owo ẹdiọn̄ọ ke imọ itiene idi mbet Jesus. Se ẹwetde ke Mark 15:43 anam idọhọ ntre. Itien̄wed oro ọdọhọ ke “enye [ama] ada uko odụk ebịne Pilate ekeben̄e okpo Jesus.”