“Ẹda Mammon Ukwan̄ido Ẹkọ Mme Ufan”
“Ẹda mammon ukwan̄ido ẹkọ mme ufan ẹnịm ẹnọ idem mbufo . . . Owo eke anamde akpanikọ ke ata ekpri n̄kpọ onyụn̄ anam akpanikọ ke akamba n̄kpọ.”—LUKE 16:9, 10.
1. Didie ke Moses ye nditọ Israel ẹketoro Jehovah ke mmọ ẹma ẹkewọrọ ẹkpọn̄ Egypt?
ẸKEFAK ẹsio ke utịbe utịbe usụn̄—nso ifiọk n̄kpọntịbe oro ọsọn̄ọde mbuọtidem ke emi edi ntem! Owo ikemeke ndibuan uwọrọidụn̄ emi Israel ẹkewọrọde ke Egypt ye owo en̄wen akan Jehovah, Ata Ọkpọsọn̄. Ikpaha owo idem ntak emi Moses ye nditọ Israel ẹkekwọde ẹte: “Jehovah edi odudu mi ye ikwọ, omonyụn̄ edi edinyan̄a mi: enye edi Abasi mi, ndien nyekpono enye; Abasi ete mi, ndien nyetoro enye.”—Exodus 15:1, 2; Deuteronomy 29:2.
2. Nso ke ikọt Jehovah ẹkeda ẹwọn̄ọ ke adan̄aemi ẹkekpọn̄de Egypt?
2 Didie ke obufa ifụre emi Israel ẹkenyenede okokpụhọde ntem ye idaha oro mmọ ẹkedude ke Egypt! Idahaemi mmọ ẹma ẹkeme ndikpono Jehovah ye unana ubiọn̄ọ. Ndien mmọ ikọkpọn̄ke Egypt ubọk ubọk. Moses obụk ete: “Nditọ Israel . . . ẹben̄e nditọ Egypt n̄kpọ silver, ye n̄kpọ gold, ye edisịnen̄kpọ. Ndien Jehovah esịn nditọ Egypt ẹnen iso ye mmọ, ẹnyụn̄ ẹnọ mmọ ke ima. Ntre ke mmọ ẹbụme n̄kpọ nditọ Egypt.” (Exodus 12:35, 36) Edi didie ke mmọ ẹkeda mme inyene Egypt ẹmi ẹnam n̄kpọ? Nte emi ama osụn̄ọ ke ‘nditoro Jehovah’? Nso ke nnyịn ikpep ito uwụtn̄kpọ mmọ?—Men 1 Corinth 10:11 domo.
“Enọ Jehovah”
3. Israel ndikada gold ke nsunsu utuakibuot ekedemede Jehovah ndinam nso?
3 Ke ufan̄ usen 40 oro Moses okodude ke Obot Sinai ndibọ mme item Abasi nsọk Israel, mbon oro ẹkedude ẹbet ẹma ẹkabade ẹsọn̄ ibuot. Ke ẹsion̄ode n̄kpanuen utọn̄ gold mmọ ẹdi, mmọ ẹma ẹdọhọ Aaron anam mbiet ọnọ mmimọ ndituak ibuot nnọ. Aaron n̄ko ama ọbọp itieuwa ọnọ mmọ, ndien ke tụhi tụhi edem usen oro, mmọ ẹma ẹwa uwa do. Nte usụn̄ emi mmọ ẹkedade gold mmọ ẹnam n̄kpọ mi ama anam Andifak mmọ ama mmọ? Ikanamke! Jehovah ama ọdọhọ Moses ete, “Kam yak mi, ndien man iyatesịt mi asak nte ikan̄ ye mmọ, man nnyụn̄ nsobo mmọ.” Ekedi n̄kukụre ke n̄kpeubọk Moses ke Jehovah ekefen idụt oro, okposụkedi emi mme adaibuot ke nsọn̄ibuot oro ẹkekpan̄ade ke ufen emi okotode Abasi.—Exodus 32:1-6, 10-14, 30-35.
4. Nso ikedi “enọ Jehovah,” ndien mmanie ẹkenọ enye?
4 Ekem, Israel ẹma ẹnyene ifet ndida mme inyene oro mmọ ẹkenyenede nnam n̄kpọ ke usụn̄ oro ekenemde Jehovah esịt. Mmọ ẹma ẹda “enọ . . . ẹsọk Jehovah.”a Gold, silver, okpoho, awawa, mme n̄kpọ oro ẹdebide ke nsio nsio orụk mbuwet, ikpa okukịm, ikpa badger, ye eto shittim ẹma ẹsịne ke otu mme enọ oro ẹkedade ẹbọp ẹnyụn̄ ẹbana ataya. Mbụk oro odụri ntịn̄enyịn nnyịn owụt edu mbon oro ẹketịpde etịbe. “Yak kpukpru owo eke esịt mmọ ẹnyịmede, ẹda enye ẹdi nte enọ Jehovah.” (Exodus 35:5-9) Israel ẹma ẹnam n̄kpọ tutu akaha. Ntem, ataya oro ekedi ufọk oro enyenede “uyai ye akwa ubọn̄,” ke ndikot nto mme ikọ eyen ukpepn̄kpọ kiet.
Mme Etịbe Ẹnyenede Temple
5, 6. Ke se iban̄ade temple, didie ke David akada inyene esie anam n̄kpọ, ndien didie ke mmọ en̄wen ẹkenam n̄kpọ?
5 Okposụkedi Edidem Solomon eke Israel akadade usụn̄ ke ndibọp ufọk oro edibịghide ọnọ utuakibuot Jehovah, ete esie, David, ama anam akwa ntịmidem aban̄a oro. David ama ọbọ akwa udomo gold, silver, okpoho, ukwak, eto, ye mme ọsọn̄urua itiat. “Koro mmade ufọk Abasi mi,” ntre ke David ọkọdọhọ ikọt esie, “mmenyene gold ye silver eke ẹdide okịmmọ, nda nnọ ufọk Abasi mi, n̄kọrọ ye kpukpru se n̄ketịmde nnọ edisana ufọk. Kpa tọsịn talent gold ita . . . ye tọsịn talent eti silver itiaba eke ẹdidade ẹfụk ibibene ufọk.” David ama esịn udọn̄ ọnọ mbon en̄wen nditat ubọk n̄ko. Ẹma ẹnam n̄kpọ uwouwo: ediwak gold, silver, okpoho, ukwak, ye mme ọsọn̄urua itiat. “Ke ofụri esịt,” mbon oro ẹma ‘ẹtat ubọk ẹnọ Jehovah.’—1 Chronicles 22:5; 29:1-9.
6 Ebede ke mme enọ ntatubọk ẹmi, nditọ Israel ẹma ẹwụt ntotụn̄ọ esịtekọm ẹnọ utuakibuot Jehovah. David ke nsụhọdeidem ama ọbọn̄ akam ete: “Ami ndi anie, ikọt mi ẹnyụn̄ ẹdi mmanie, eke nnyịn ikemede nditat ubọk ntem?” Ntak-a? “N̄kọm kpukpru n̄kpọ ẹto fi, nnyịn inyụn̄ inọ fi se itode fi ke ubọk. . . . Ami n̄katat ubọk mi nnọ kpukpru n̄kpọ ẹmi ke edinen esịt.”—1 Chronicles 29:14, 17.
7. Nso ntọt ukpepn̄kpọ ke nnyịn ikpep ito usen Amos?
7 Edi, mme esien Israel ẹma ẹkpu ndikaiso nnịm utuakibuot Jehovah ke ebeiso n̄kpọ ke ekikere ye esịt mmọ. Etisịm ọyọhọ isua ikie usụkkiet M.E.N., Israel oro akabaharede ada ama akabade enyene ubiomikpe edifụmi n̄kpọ eke spirit. Kaban̄a obio ubọn̄ esien Israel duop eke n̄kan̄ edem edere, Jehovah ama atan̄a ebe ke Amos ete: “Osụk ọdọdiọk ọnọ mmọemi ẹtiede ke ifụre ke Zion, ẹnyụn̄ ẹbuọtde idemmọ ke obot Samaria.” Enye eketịn̄ aban̄a mmọ nte irenowo oro “ẹnade ke bed odụk-enịn . . . ẹnyanarede ẹna ke n̄kpana mmọ, . . . ẹtade nditọ-erọn̄ eke ẹtode ke n̄kpri ufene, ye nditọ-enan̄ eke ẹtode ke ebiet n̄kụhọ; . . . ẹn̄wọn̄de bowl wine.” Edi uforo mmọ ikedịghe n̄kpọ ukpeme. Abasi ama ọtọt ete: “Ẹyetan̄ mmọ ẹfep ke idahaemi ye mbemiso owo eke ẹtan̄de ẹfep: ndien n̄kpo mmọ emi ẹnyanarede ẹna, eyedop.” Ke 740 M.E.N., Israel ama ọbọ ufen ke ubọk Assyria. (Amos 6:1, 4, 6, 7) Ndien ekem obio ubọn̄ Judah eke n̄kan̄ edem usụk n̄ko ama ọduọ odụk uma-inyene obụkidem.—Jeremiah 5:26-29.
Edida Mme Inyene Nnam N̄kpọ ke Eti Usụn̄ ke Eyo Christian
8. Nso eti uwụtn̄kpọ ke Joseph ye Mary ẹkenọ kaban̄a edida mme inyene nnam n̄kpọ?
8 Ke edide isio ye oro, idiọk idaha eke mme asan̄autom Abasi ke ukperedem eyo ke ndimen ndomo ikakpanke mmọ ndiwụt ifịk nnọ utuakibuot akpanikọ. Kere ban̄a Mary ye Joseph. Ke n̄kopuyo nnọ ewụhọ Caesar Augustus, mmọ ẹma ẹnam isan̄ ẹka Bethlehem, isọn̄ emana ubon mmọ. (Luke 2:4, 5) Do ke Jesus akamana. Usen 40 ke ukperedem, Joseph ye Mary ẹma ẹka temple ke n̄kpet n̄kpet Jerusalem man ẹkenọ uwa edinam asana oro ẹkeyomde. Ke ndiwụt ke mmọ ẹkedi ubuene, Mary ọkọnọ n̄kpri inuen iba. Enye m̀mê Joseph ikadaha unana mmọ nte ntak nditre ndinọ enọ. Utu ke oro, mmọ ke n̄kopuyo ẹma ẹda esisịt inyene mmọ ẹnam n̄kpọ.—Leviticus 12:8; Luke 2:22-24.
9-11. (a) Mme ikọ Jesus ke Matthew 22:21 ẹnọ nso ndausụn̄ kaban̄a nte nnyịn ikpadade okụk inam n̄kpọ? (b) Ntak emi ekpri okụk emi ebeakpa oro ọkọnọde mîkedịghe ke ikpîkpu?
9 Ekem, mme Pharisee ye n̄ka mme anditiene Herod ẹma ẹdomo ndibre Jesus n̄kari, ẹdọhọde ẹte: “Sian nnyịn ndien; Afo ese didie? Nte enen ndinọ Caesar utomo, m̀mê inenke?” Ibọrọ Jesus ama owụt mbufiọk esie. Ke etịn̄de aban̄a okụk oro mmọ ẹkenọde enye, Jesus ama obụp ete: “Mbiet ye n̄wed emi enyene anie?” Mmọ ẹma ẹbọrọ ẹte: “Enyene Caesar.” Enye ke ọniọn̄ ama eberi ete: “Ẹnọ Caesar ndien n̄kpọ eke enyenede Caesar; ẹnyụn̄ ẹnọ Abasi n̄kpọ eke enyenede Abasi.” (Matthew 22:17-21) Jesus ama ọfiọk ete ke odudu oro osiode okụk emi edi ama oyom ẹkpe utomo. Edi enye do ama an̄wam mme anditiene enye ye mme asua esie ukem ukem ndifiọk nte ke ata Christian esiyom n̄ko ndinọ “Abasi n̄kpọ eke enyenede Abasi.” Emi abuana edida mme inyene obụkidem owo nnam n̄kpọ ke eti usụn̄.
10 N̄kpọntịbe kiet oro Jesus okokụtde ke temple anam emi an̄wan̄a. Enye ndisụk mbiom mme ọdiọkitọn̄ scribe ẹmi “ẹdiade ufọk mme ebeakpa” ikpe edi oro. “Jesus emenede enyịn okụt nte mbon inyene ẹsịnde enọ mmọ ke usịn-etịbe,” nte Luke obụkde. “[Jesus] onyụn̄ okụt ubuene ebeakpa kiet nte esịnde n̄kpri okûdọk iba ke esịt. Ndien Enye ete, Ke akpanikọ ke ndọhọ mbufo nte, Ebeakpa emi ama esịn okụk akan kpukpru mmọ: koro kpukpru mmọ ẹkesiode n̄kpọ ke nyọhọ nsụhọ mmọ ẹsịn ke etịbe: edi ke unana esie enye osio kpukpru se enye akpadade odu uwem ọnọ.” (Luke 20:46, 47; 21:1-4) Ndusụk owo ẹma ẹtịn̄ ẹte ke ẹkeda mme ọsọn̄urua itiat ẹbana temple oro. Jesus ama ọbọrọ ete: “Amaedi mme n̄kpọ ẹmi mbufo ẹkụtde mi, mme usen ẹyedi eke mîdikpọn̄ke itiat kiet ke enyọn̄ itiat efen, eke mîdidorokede enye iduọk.” (Luke 21:5, 6) Nte ekpri etịbe ebeakpa oro ekedi ke ikpîkpu? Ke akpanikọ ikedịghe. Enye ama ọnọ ibetedem ke ndutịm oro Jehovah ekenyenede adan̄aoro.
11 Jesus ama asian mme ata anditiene enye ete: “Baba eyenufọk kiet ikemeke ndisan̄a utom mme ete iba: koro enye eyesua kiet, ama eken; mîdịghe ntre, enye eyesọn̄ọ ada ye kiet, esịn enye eken ke ndek. Mbufo ikemeke ndisan̄a utom Abasi ye eke mammon.” (Luke 16:13) Ntem, didie ke nnyịn ikeme ndiwụt edida ukem ukem oro enende ke ndida okụk nnyịn nnam n̄kpọ?
Mme Akama Ukpọhọde Ẹmi Ẹnamde Akpanikọ
12-14. (a) Nso inyene ke mme Christian ẹdi mme akama ukpọhọde? (b) Ke mme ewe n̄wọrọnda usụn̄ ke ikọt Jehovah mfịn ke edinam akpanikọ ẹnam utom ukama ukpọhọde mmọ? (c) M̀mọ̀n̄ ke okụk oro ẹdade ẹn̄wam utom Abasi mfịn ẹsito?
12 Ke ini nnyịn iyakde uwem nnyịn inọ Jehovah, nnyịn ke nditịm ntịn̄ idọhọ ke akpaimọ n̄kpọ oro nnyịn inyenede, kpukpru inyene nnyịn, ẹnyene enye. Didie, ndien, ke nnyịn ikpada se nnyịn inyenede inam n̄kpọ? Ke enemede aban̄a utom Christian ke esop, Brọda C. T. Russell, akpa etieibuot Watch Tower Society, ekewet ete: “Owo kiet kiet enyene ndikere mban̄a idemesie nte ke Ọbọn̄ emek imọ ndidi akama ukpọhọde ini, odudu, okụk esiemmọ, ye ntre ntre, owo kiet kiet okponyụn̄ oyom ndida mme enọ ẹmi nnam n̄kpọ ke ofụri ukeme esie, kaban̄a ubọn̄ Eteufọk.”—The New Creation, page 345.
13 “Ẹyom ẹte mme akama ukpọhọde ẹdi mme anam akpanikọ,” ntre ke 1 Corinth 4:2 ọdọhọ. Nte esop ofụri ererimbot, Mme Ntiense Jehovah ẹdomo ndidu uwem ekekem ye se ẹtịn̄de oro, ẹsịnde ekese ini mmọ nte ẹkekeme ke utom Christian, ẹforide mme ukeme unọ ukpep mmọ ye ntịn̄enyịn. Akande oro, otu mbon unyịmesịt ke idak ndausụn̄ Kọmiti Ubọpufọk eke Ikpehe ke Ikpehe ẹnọ ini, odudu, ye ifiọkusọ mmọ unyịme unyịme ke ndinam ndiye ufọkmbono ẹdu kaban̄a utuakibuot. Kpukpru ẹmi ẹnem Jehovah esịt etieti.
14 M̀mọ̀n̄ ke okụk ndida n̄n̄wam akpakịp ubịnikọt unọ ukpep ye utom ubọpn̄kpọ emi oto? Oto mbon oro esịt mmọ onyịmede, idem nte ekedide ke ini ubọp ataya. Nte owo kiet kiet, ndi nnyịn imenyene ebuana? Nte usụn̄ oro idade okụk nnyịn inam n̄kpọ owụt ke utom Jehovah edi akpan n̄kpọ akan ọnọ nnyịn? Ke mme n̄kpọ ẹban̄ade okụk, ẹyak nnyịn idi mme akama ukpọhọde ẹmi ẹnamde akpanikọ.
Uwụtn̄kpọ Ntatubọk
15, 16. (a) Didie ke mme Christian eke eyo Paul ẹkewụt edu ntatubọk? (b) Didie ke nnyịn ikpese iban̄a nneme nnyịn emi?
15 Apostle Paul ama ewet aban̄a edu ntatubọk eke mme Christian ke Macedonia ye Achaia. (Rome 15:26) Okposụkedi mmọ ke idemmọ ẹkedude ke afanikọn̄, mmọ ke mben̄eidem ẹma ẹsitịp n̄kpọ ndida n̄n̄wam nditọete mmọ. Paul ama esịn udọn̄ ọnọ mme Christian ke Corinth ndinọ ke ntatubọk kpasụk ntre, ẹnọde nyọhọ nsụhọ mmọ ndida nyọhọ unana mbon en̄wen. Owo ndomokiet ikemeke nte enende ndidori Paul ikọ mban̄a n̄kanubọk. Enye ekewet ete: “Owo eke ọtọde ke ufat eyenyụn̄ ọdọk ke ufat; owo eke ọtọde ke ntatubọk, uwak uwak ke enye eyenyụn̄ ọdọk. Yak kpukpru owo kiet kiet ọnọ nte enye akaduakde ke esịt esie: okûnọ ye mfụhọ-esịt, okûnyụn̄ ọnọ oto ke edinyenyịk; koro Abasi amama owo eke ọnọde ke inemesịt.”—2 Corinth 8:1-3, 14; 9:5-7, 13.
16 Mme etịbe ntatubọk oro nditọete nnyịn ye mbon ẹmi ẹnyenede udọn̄ ẹnọde mfịn kaban̄a utom Obio Ubọn̄ ofụri ererimbot ọnọ uyarade aban̄a nte mmọ ẹnen̄erede ẹda ifetutom emi ke ọsọn̄urua n̄kpọ. Edi, nte Paul eketide mbon Corinth, nnyịn iyenam ọfọn ndikere mban̄a nneme emi nte n̄kpọ editi.
17. Ewe usụn̄ edinọ enọ ke Paul ekesịn udọn̄ ọnọ, ndien nte ẹkeme ndisịn emi ke edinam mfịn?
17 Paul ama ọdọhọ nditọete ete ẹnyene eti ndutịm ke mmọ ndinọ enọ. Enye ọkọdọhọ ete, “Ke akpa usen urua, mbufo owo kiet kiet ẹsio n̄kpọ ke udori eke ẹkụtde, ẹkpọnọde ẹnịm n̄kan̄ kiet.” (1 Corinth 16:1, 2) Oro ekeme nditie nte uwụtn̄kpọ nnọ nnyịn ye nditọ nnyịn ke nnyịn nditịp etịbe, edide nnyịn inọ ebe ke esop m̀mê inọ nnennen aka ọfis n̄kọk itieutom Watch Tower Society oro ekperede akan. Isụn̄utom ebe ye n̄wan emi ẹkenọde ẹkekwọrọ ikọ ke obio kiet ke Edem Usiahautịn Africa ẹma ẹnọ mbon oro ẹnyenede udọn̄ ikot ndibuana ye mmọ ke ukpepn̄kpọ Bible. Ke utịt akpa mbonoesop emi, mme isụn̄utom ẹmi ke ọniọn̄ ẹma ẹsịn okụk ke ekebe oro ẹkediande idiọn̄ọ oro “Mme etịbe kaban̄a utom Obio Ubọn̄.” Mme andidụk eken ẹma ẹnam kpasụk ntre. Ekem, ke ẹma ẹketịm mbufa owo ẹmi ẹdọn̄ ke esop Christian, esenyịn circuit ama aka ekese mmọ onyụn̄ etịn̄ aban̄a mme etịbe oro mmọ ẹsinọde kpukpru ini.—Psalm 50:10, 14, 23.
18. Didie ke ikeme ndin̄wam nditọete nnyịn emi ẹdude ke nnanenyịn?
18 Nnyịn n̄ko imenyene ifet edida mme inyene nnyịn ke ndin̄wam mbon oro ẹsobode oto-obot afanikọn̄ ye mbon oro ẹdụn̄de ke mme ikpehe oro ekọn̄ ọnọmọde. Didie ke nnyịn ikokop inemesịt ntem ndikot mban̄a mme n̄kpọ un̄wam oro ẹkenọde ẹka Edem Usiahautịn Europe nte ndutịme eke ndutịm uforo ye eke ukara okosịmde ikpehe n̄kan̄ ererimbot oro! Mme n̄kpọ ye okụk oro ẹtịpde owụt ntatubọk ye edidianakiet oro nditọete nnyịn ẹnyenede ye mme Christian ẹmi n̄kpọ ọdiọkde.b—2 Corinth 8:13, 14.
19. Nso mme n̄kpọ oro ẹnamde-nam ẹwụt ke nnyịn ikeme ndinam man in̄wam mbon oro ẹdude ke utom uyọhọ ini?
19 Nnyịn imenen̄ede ibat utom nditọete nnyịn ẹmi ẹdude ke utom uyọhọ ini nte mme asiakusụn̄, mme esenyịn oro ẹsan̄ade-san̄a, mme isụn̄utom, ye mbon unyịmesịt Bethel ke ọsọn̄urua n̄kpọ, nte nnyịn ibatke? Nte mme idaha nnyịn ẹyakde, nnyịn imekeme ndinọ mmọ ndusụk un̄wam n̄kpọ obụkidem nnennen nnennen. Ke uwụtn̄kpọ, ke ini esenyịn circuit edide edise esop mbufo, afo emekeme ndinọ enye itieidụn̄, udia, mîdịghe an̄wam ke okụk ukpeusụn̄ esie. Ete nnyịn eke heaven, emi oyomde ẹse mme asan̄autom esie enyịn, okụt orụk ntatubọk oro. (Psalm 37:25) Ndusụk isua ko ke edem eyenete kiet emi ekekemede n̄kukụre ndinọ ekpri n̄kpọ ndida mbịt itọn̄ ama ọnọ esenyịn oro asan̄ade-san̄a ye n̄wan esie ikot ẹdi ufọk esie. Ke ini ebe ye n̄wan emi ẹkedahade utom an̄wautom mbubịteyo, eyenete oro ama ayak efọkn̄wed esịn isenowo esie ke ubọk. Babru uda mbọ okụk ke ban̄k ama odu ke esịt (edide ukem ye dollar America kiet) ọkọrọ ye n̄wed oro ẹwetde ẹdian ẹte: “Da dep cup tea kiet mîdịghe galọn aranuwat kiet.” Nso eti esịtekọm ke ẹkewụt ntem ke usụn̄ nsụhọdeidem emi!
20. Nso ifetutom ye mbiomo ke nnyịn mîdiyomke ndifụmi?
20 Ke n̄kan̄ eke spirit, ẹmediọn̄ ikọt Jehovah! Nnyịn imesidara udia eke spirit ke ikpọ ye n̄kpri mbono nnyịn, ke ọtọ emi ibọde mbufa n̄wed, eti ukpepn̄kpọ, ye nti item. Ye esịt ọyọhọde ye esịtekọm kaban̄a mme edidiọn̄ eke spirit nnyịn, nnyịn ifreke ifetutom ye mbiomo nnyịn nditịp okụk man ẹda ẹnam mme udọn̄ n̄kpọ Obio Ubọn̄ Abasi eke ofụri ererimbot akaiso.
“Ẹda Mammon Ukwan̄ido Ẹkọ Mme Ufan”
21, 22. Nso iditịbe inọ “mammon ukwan̄ido” ke mîdibịghike, oyomde inam nso idahaemi?
21 Ke akpanikọ, akpakịp usụn̄ ẹdu ẹmi nnyịn ikemede ndiwụt ke utuakibuot Jehovah edi ebeiso n̄kpọ ke uwem nnyịn, onyụn̄ otịmde edi akpan n̄kpọ edi ndinam item Jesus emi: “Ẹda mammon ukwan̄ido ẹkọ mme ufan ẹnịm ẹnọ idem mbufo; man ke ini oro ebede efep, mmọ ẹkpeda mbufo ẹdụk ke nsinsi idụn̄.”—Luke 16:9.
22 Tịmfiọk ke Jesus ama etịn̄ aban̄a mammon ukwan̄ido ndikpu. Ih, usen ke edi emi okụk editịm n̄kpọ emi mîdinyeneke ufọn. Ezekiel ama etịn̄ prọfesi ete, “Mmọ ẹyemen silver mmọ ẹduọk ke esien; gold mmọ eyenyụn̄ akabade edi ndek: silver mmọ ye gold mmọ idikemeke ndinyan̄a mmọ ke usen ifụtesịt Jehovah.” (Ezekiel 7:19) Tutu emi otịbe, ana nnyịn iwụt ọniọn̄ ye mbufiọk ke nte idade mme inyene obụkidem nnyịn inam n̄kpọ. Ntem nnyịn idisemeke ke ndikpu ndinam ntọt Jesus emi: “Edieke mbufo mîdaha ukwan̄ mammon inam akpanikọ, anie edisịn mbufo ata inyene ke ubọk? . . . Mbufo ikemeke ndisan̄a utom Abasi ye eke mammon.”—Luke 16:11-13.
23. Nso ke nnyịn ikpada inam n̄kpọ ke ọniọn̄, nso idinyụn̄ idi utịp nnyịn?
23 Ẹyak kpukpru nnyịn, ndien, ke edinam akpanikọ inam mme n̄kpọ editi ẹmi ndinịm utuakibuot Jehovah akpa ke uwem nnyịn nnyụn̄ nda kpukpru inyene nnyịn nnam n̄kpọ ọniọn̄ ọniọn̄. Ntem nnyịn imekeme ndimụm itieufan nnyịn ye Jehovah ye Jesus ikama, ẹmi ẹn̄wọn̄ọde ke iyeda nnyịn idụk “ke nsinsi idụn̄” ke ini okụk okpude, ye idotenyịn uwem nsinsi edide ke Obio Ubọn̄ heaven m̀mê ke paradise isọn̄.—Luke 16:9.
[Mme Ikọ idakisọn̄]
a Ikọ Hebrew oro ẹkabade “enọ” oto ikọedinam emi ke ataata usụn̄ ọwọrọde “ndikon̄; ndimenede itie; ndimenede ke enyọn̄.”
b Se Jehovah’s Witnesses—Proclaimers of God’s Kingdom, page 307-315, emi Watchtower Bible and Tract Society of New York, Inc., ekemịn̄de ke 1993.
Nte Afo Emeti?
◻ Didie ke Israel ẹkenam n̄kpọ ẹban̄a ikot oro Jehovah ọkọnọde kaban̄a editịp etịbe man ẹda ẹbọp ataya?
◻ Ntak emi etịbe ebeakpa oro mîkedịghe ke ikpîkpu?
◻ Nso mbiomo ke mme Christian ẹnyene kaban̄a nte mmọ ẹdade mme inyene mmọ ẹnam n̄kpọ?
◻ Didie ke nnyịn ikeme ndifep eseme ke nte nnyịn idade okụk nnyịn inam n̄kpọ?
[Ndise ke page 15]
Etịbe ebeakpa oro, okposụkedi ekekpride, ikedịghe ke ikpîkpu
[Mme ndise ke page 16, 17]
Mme etịbe nnyịn ẹsin̄wam utom Obio Ubọn̄ ofụri ererimbot