Akan̄ Oro Ẹkebemde Iso Ẹtịn̄
KE MME isua ndondo emi mfịna akan̄ amakabade enyene itie idiọk idiọk ke mme ntọt mbụk n̄kpọntịbe ererimbot. Ọtọn̄ọde ke Ethiopia ye ke mme itie en̄wen ẹmesobo onịm-mbụk ndutụhọ. Ke 1992 mbon oro ẹkesobode akan̄ ke Somalia ke ntak unana edịm ye ekọn̄ ẹma ẹmụm ntịn̄enyịn ofụri ererimbot. International Herald Tribune ọkọtọt ke September 1992 ete: “Owo ndomokiet ifiọkke ibat mbon Somalia oro ẹkekpan̄ade, edi n̄ka Red Cross ẹbat nte ke awak akan owo 100,000. Ediwak ke mme itie ikie, edieke mîdịghe ke mme itie tọsịn, ke ẹkpan̄a kpukpru usen.”
Ibat oro inamke n̄kpọ ndomokiet ndiwụt unana inemesịt ye ubiak eke mme owo kiet kiet oro ẹbuanade. Yvette Pierpaoli, andida ke ibuot mbon Europe ke N̄ka Ofụri Ererimbot Esede Aban̄a Mbonitọk Ekọn̄, ama ewet ke magazine EM oro, Refugees ete: “Ke New York m̀mê ke Geneva, n̄kpọ aban̄ade mbonitọk ekọn̄ ana ata in̄wan̄în̄wan̄; ẹma ẹsiak ibat ndien anyan udịm ikpîkpu oro etienede awak akan se ẹkemede ndidiọn̄ọ. Edi ke ẹbede ẹkpọn̄ do ke ediwak tọsịn itiat, ke mme adan̄a obio eke mme idụt oro ẹdude ke ndutịme, uyo eyekak fi ndisioro ke itọn̄ ndien udomo ndutụhọ oro odude eyenam fi oyom ndifiori n̄kpo.”
Ke adan̄aemi n̄ka Red Cross ọdọhọde ete ke ukeme imọ ndin̄wam mbon Somalia edi n̄kponkan edinam unọ un̄wam oro enye akanam ọnọde, ediwak mme andikụt ẹkam ẹdọhọ ete ke ofụri ofụri ke enye edi n̄kpri n̄kan un̄wam oro ẹnọde, n̄ko ke adan̄aemi ini ama ekebe. Pierpaoli eseme ete: “Mme idụt oro ẹnọde un̄wam iyomke aba ndikaiso, mmọ ẹmekpa mba ke ndin̄wam Africa oro abaharede. . . . Mmọ ẹduọhọ mbon Africa ke idiọk usụn̄ ukama n̄kpọ mmọ, idiọkitọn̄ eke mme andikara mmọ, ye mme en̄wan mmọ oro ẹtiede nte inyeneke utịt.”
Bible ama ebemiso etịn̄ aban̄a ini oro akan̄ edidude “ke nsio nsio ebiet.” Akan̄ emi, ọkọrọ ye ediwak mme n̄kpọ eken, utọ nte mme ekọn̄, mme unyekisọn̄, ye ndiọi udọn̄ọ, ẹwụt nte ke Obio Ubọn̄ Abasi emekpere. (Luke 21:11, 31) Bible akaiso owụt ete ke idak Obio Ubọn̄ Abasi oro edidade ufọn idi, ke udia eyedu barasuene ọnọ ofụri ubonowo. Andiwet psalm ekewet ete, “Uwak ibokpot ẹyedu ke isọn̄ ke nsom ikpọ obot; mfri esie eyenyen̄e nte Lebanon.”—Psalm 72:16.