Mmọ Ẹka Jerusalem

Ini ndaeyo edi emi. Ini ekem Joseph ndisan̄a ye ubon esie ye mme ufan ye iman mmọ n̄ka Jerusalem nte mmọ ẹsikade kpukpru isua. Mmọ ẹka ndidia usọrọ Passover nte Ibet ọdọhọde ẹnam. (Deuteronomy 16:16) To ke Nazareth sịm Jerusalem edi n̄kpọ nte itiat 75. Kpukpru owo ke ẹben̄e idem ẹnọ isan̄ emi, esịt onyụn̄ enem mmọ n̄ko. Ata ini nduaidem edi emi. Jesus edi isua 12 idahaemi, enen̄ede ọdọn̄ enye ndika usọrọ emi sia oro ọmọn̄ anam enye afiak ekesịm temple.

Jesus ye ete ye eka ye nditọeka esie idaha usọrọ Passover nte n̄kpọ usen kiet. Ẹsitọn̄ọ Usọrọ Uyo Eke Leaven Mîdụhe ke ndan̄nsiere Passover. Usọrọ emi esidi usen itiaba. Bible okot ndan̄nsiere emi “akpa usen usọrọ uyo eke leaven mîdụhe.” (Mark 14:12) Kpukpru emi osụk edi ini usọrọ Passover. Esida mmọ urua iba ndito edem mmọ ke Nazareth n̄ka Jerusalem n̄kodụk usọrọ emi nnyụn̄ mfiak nnyọn̄ ufọk. Edi isua enye emi, ke ntak Jesus, mmọ ẹbiat ini ẹkan nte ekpedide. Ẹkedi ẹdifiọk se iketịbede ke ini mmọ ẹnyọn̄de Jerusalem.

Ofụri emi Joseph ye Mary ẹsan̄ade mi ẹnyọn̄ ufọk, mmọ ẹkere ke Jesus odu ye mme ufan ye iman mmọ. Edi ke ini mmọ ẹsịmde ebiet emi mmọ ẹdinade okoneyo oro, mmọ ikwe enye. Mmọ ẹka ẹbịne mme ufan ye iman mmọ edi enye idụhe ye mmọ. Owo ikwe eyen oro ke ebiet ndomokiet! Joseph ye Mary ẹfiak ẹka Jerusalem ndiyom enye.

Mmọ ẹda ofụri usen kiet ẹyom enye edi ikwe. Ẹnyụn̄ ẹfiak ẹyom enye ọyọhọ usen iba edi isụk ikwe. Ke akpatre, ke ọyọhọ usen ita, mmọ ẹkụt enye ke ubet kiet ke esịt temple. Mmọ ẹkụt nte enye etiede ye ikpọ mme andikpep; ke akpan̄ utọn̄ ọnọ mmọ, ke onyụn̄ obụp mmọ mbụme, onyụn̄ ọnọ mmọ ibọrọ oro akpade mmọ idem.

Eka esie obụp enye ete: “Eyen, ntak emi afo anamde n̄kpọ ntem ye nnyịn? Sese ami ye usọ imasan̄a iyom fi ye mfụhọ.”—Luke 2:48.

Idem akpa Jesus ke emi mmọ mîfiọkke ebiet emi enye okpodude. Ntre enye obụp mmọ ete: “Ntak emi mbufo ẹkpesan̄ade ẹyom mi? Nte mbufo ikọfiọkke ite nnyene ndidu ke ufọk Ete mi?”—Luke 2:49.

Idahaemi Joseph ye Mary ẹma ẹkekụt eyen mmọ mi, enye asan̄a ye mmọ ọnyọn̄ ufọk ke Nazareth, onyụn̄ aka iso osụk ibuot ọnọ mmọ. Jesus aka iso okpon onyụn̄ enyene ọniọn̄. Okposụkedi emi enye edide eyenọwọn̄, Abasi ye mme owo ẹma enye. Ke akpanikọ, toto ke ini eyenọwọn̄, Jesus enịm eti uwụtn̄kpọ, enye esima ndinam n̄kpọ Abasi onyụn̄ okpono ete ye eka esie.