Mme Mbụme Ẹtode Mme Andikot
Nso edu ke ẹkpewụt ke baptism Christian?
Oro edi inem inem mbụme, koro idem okposụkedi ediwak mme andikot n̄wed nnyịn ẹma ẹkenana baptism, abuana mmọ, kpa nte abuanade mbon oro ẹnade baptism. Ẹyak nnyịn ibem iso itịn̄ iban̄a mbon oro ẹnade baptism, ẹbụkde mmọ ke mmọn̄ ofụri ofụri. Nso ikpenyene ndidi edu mmọ?
Ke Matthew 28:19, 20, Jesus ọkọdọhọ mme anditiene enye ete ẹka ẹkenam mme owo ẹdi mbet, ẹkpep ẹnyụn̄ ẹnịm mmọ baptism. Enye ikowụtke baptism nte n̄kpọntịbe oro enen̄ede abuana ntụk, edinam oro otode nduaidem ekpri ibio ini. Enye edi akpan usio-ukot, nte nnyịn ikụtde ito uwụtn̄kpọ Jesus. Luke 3:21 (NW) ọdọhọ ete: “Jesus n̄ko ama ana baptism ndien, nte enye ọkọbọn̄de akam, enyọn̄ ama eberede.” Ih, Uwụtn̄kpọ nnyịn akada baptism ke akpan n̄kpọ, ekerede aban̄a ke akam. Nnyịn ikemeke ndikere nte enye, ke ama ọkọwọrọ ke mmọn̄ ọdọk, anamde idiọn̄ọ edikan, ofioride n̄kpo edikan, m̀mê ofụn̄de ubọk ke enyọn̄, okposụkedi ndusụk owo ẹnamde mme n̄kpọ ẹbietde oro ke ndondo emi. Baba, ye John Baptist ikpọn̄ odude, Jesus ama aka ebịne Ete esie ke akam.
Bible, nte ededi, inọhọ ekikere ite ke akpana baptism edi mfụhọ mfụhọ edinam, oyomde san̄asan̄a idaha m̀mê ikọ, nte ndusụk ufọkabasi ke Christendom ẹyomde mfịn. Kamse, kere ban̄a usen Pentecost, ke ini ediwak tọsịn mme Jew ye mme okpono Abasi ke ido mme Jew ẹkenade baptism Christian. Mmọ ẹma ẹkpekpep Ibet Abasi ẹnyụn̄ ẹnyene itie ebuana ye enye. Ntre okoyom mmọ n̄kukụre ẹkpep ẹban̄a ẹnyụn̄ ẹnyịme Messiah, Jesus. Ndondo oro mmọ ẹkenamde ntre, mmọ ẹma ẹkeme ndina baptism.
Utom Mme Apostle 2:41 ọtọt ete: “Mmọemi ẹnyịmede ikọ Esie ẹna baptism.” Bible emi Weymouth akabarede okot ete: “Ke ntre, mmọemi ẹkenyịmede ikọ esie idara idara ẹma ẹna baptism.” Mmọ ẹma ẹkop idatesịt ke inem inem eti mbụk aban̄ade Messiah, ndien ke akpanikọ idatesịt oro ama atara osịm baptism ke idemesie, kpa baptism ke iso mme okop-idatesịt mme andida nse ke ediwak itie ikie. Idem mme angel ke heaven ke ẹkese ẹnyụn̄ ẹdat esịt. Ti mme ikọ Jesus ẹmi: “Ndọhọ mbufo nte, Kpasụk ntre ke idara odu ke iso mme angel Abasi aban̄a owo kiet emi akabarede esịt.”—Luke 15:10.
Nsio nsio usụn̄ ẹdu emi owo nnyịn kiet kiet ekemede ndiwụt idatesịt ye nte baptism edide akpan n̄kpọ. Ke ndusụk ufọkabasi mbon oro ẹyomde ndina baptism ẹsisịne mfia m̀mê mbubịt ọfọn̄idem. Isọn̄ N̄wed Abasi ikam idụhe kaban̄a mme utọ n̄kpọ oro ẹyomde do. Edi, ọfọn̄ uyeremmọn̄ oro adianade owo ke idem m̀mê oro owụtde mme ndido idemowo idotke, edide ye irenowo m̀mê ye iban. Ndien nte ẹwụtde, ke ọwọrọde ke mmọn̄, obufa Christian oro ikpenyeneke ndinam mme san̄asan̄a idiọn̄ọ m̀mê ndinam nte n̄kpọ eke ẹdọhọde ke enye ekenyene akwa edikan. Mbon eken ke otu nditọete Christian ẹkop inemesịt nte ke obufa owo emi ana baptism. Enye ekpenyene ndifiọk nte ke edinam uwụt mbuọtidem emi edi sụk ntọn̄ọ usio-ukot ke usụn̄ edinam nsọn̄ọnda anyanini emi adade okosịm edinyene unyịme Abasi.—Matthew 16:24.
Nnyịn, nte mme andida nse ke baptism emi ẹnịmde an̄wan̄wa, imabuana ke idatesịt edinam emi, akpan akpan edieke owo oro anade baptism edide iman m̀mê owo oro nnyịn ikekpepde Bible. Nte ededi, man ibuana ọyọhọ ọyọhọ, nnyịn inyene ndikpan̄ utọn̄ ke ofụri utịn̄ikọ oro ye mbon baptism, ikop nte mmọ ẹbọrọde mme mbụme oro ẹbụpde mmọ an̄wan̄wa, inyụn̄ ibuana ke akam. Ndinam ntre eyen̄wam nnyịn inyene nnennen ekikere iban̄a baptism; nnyịn iyenyene ekikere oro Abasi enyenede aban̄a enye. Ke ẹkụrede edinịm baptism, idatesịt nnyịn iyomke isan̄ edikan, mme etuek flawa, m̀mê usọrọ ndida ndara owo oro anade baptism. Edi nnyịn imekeme ndisan̄a n̄kpere obufa eyenete nnyịn eren m̀mê n̄wan oro ndiwụt idatesịt ke utịbe utịbe usio-ukot oro enye anamde nnyụn̄ ndara enye ata ufiop ufiop nsịn ke otu nditọete Christian nnyịn.
Do, ke nditịn̄ ibio ibio, kpukpru nnyịn, esịnede mbon oro ẹbụkde ke mmọn̄, ikpenyene ndida baptism ke akpan n̄kpọ nte odotde. Enye idịghe ini mfiori, ini usọrọ, m̀mê ini mbre. Edi enye inyụn̄ idịghe ini editie mfụhọ mfụhọ. Nnyịn imekeme ndidat esịt nte enende nte ke mbufa owo ẹmediana ye nnyịn ke usụn̄ nsinsi uwem. Ndien nnyịn imekeme ndidara mbufa nditọete nnyịn iren ye iban idara idara.
[Ndise ke page 31]