Ntak Emi Mme Mbet Jesus Mîtiehe Utreudia?

John Andinịm Owo Baptism osụk odu ke ufọk-n̄kpọkọbi toto ke ini oro Jesus okodụkde Passover eke isua 30 eyo Christ. John oyom mme mbet esie ẹdi mme mbet Jesus, edi idịghe kpukpru mmọ ẹma ndikabade ndi mbet Jesus toto ke ini oro ẹkesịnde John ke ufọk-n̄kpọkọbi.

Idahaemi nte Passover eke isua 31 eyo Christ asan̄ade ekpere, ndusụk mbet John ẹdi ẹbịne Jesus ẹdibụp enye ẹte: “Ntak emi nnyịn ye mme Pharisee itiede utreudia edi mme mbet fo itiehe?” (Matthew 9:14) Mme Pharisee ẹsitie utreudia nte mbet ido ukpono mmọ etemede. Nte ini akade, Jesus ọnọ uwụtn̄kpọ aban̄a Pharisee kiet emi akadade idemesie ke edinen owo okonyụn̄ ọbọn̄de akam ete: “O Abasi, mmọkọm fi koro mmentiehe nte mmọ en̄wen, . . . Ntetre udia utịm ikaba ke urua.” (Luke 18:11, 12) Ekeme ndidi edi ido mme mbet John ndisitie utreudia n̄ko. Mîdịghe, ekeme ndidi mmọ ẹsitie utreudia man ẹfụhọ ẹban̄a John emi odude ke ufọk-n̄kpọkọbi. Mbet John n̄ko ẹkeme ndikere m̀mê nso ikpanam mbet Jesus ẹkûtie utreudia ẹnyụn̄ ẹtiene ẹfụhọ ẹban̄a se itịbede inọ John.

Jesus ada uwụtn̄kpọ emi ọbọrọ mbụme emi ete: “Ndi mme ufan ebendọ ẹnyene ntak ndifụhọ adan̄a nte ebendọ odude ye mmọ? Edi mme usen ẹyedi eke ẹdibọde mmọ ebendọ, ndien adan̄aoro mmọ ẹyetie utreudia.”—Matthew 9:15.

John ke idemesie ama etịn̄ ke Jesus edi ebendọ. (John 3:28, 29) Mmọdo, ke ini Jesus osụk odude ye mbet esie, mmọ itiehe utreudia. Edi Jesus ama akpa mbet esie ẹyetua enye, idinyụn̄ imaha ndidia udia. Edi oro oyokpụhọde ke ini Jesus esetde! Ini oro, mmọ idinyeneke ntak ndomokiet aba nditie utreudia nnyụn̄ mfụhọ.

Jesus afiak ọnọ uwụtn̄kpọ iba emi: “Baba owo kiet idaha ubak obufa ọfọn̄ ikịm idian ke akani ewụra; koro odudu esie oyodụri ewụra oro ndien nde n̄waha esie etetịm ọdiọk. Owo isinyụn̄ isịnke obufa wine ke n̄kani ikpa wine; edieke ẹsịnde, ikpa wine oro ẹyesiaha ndien wine ọduọhọ, ikpa wine ẹnyụn̄ ẹtak. Edi mme owo ẹsisịn obufa wine ke mbufa ikpa wine.” (Matthew 9:16, 17) Nso ke ikọ Jesus ọwọrọ?

Jesus anam mme mbet John Andinịm Owo Baptism ẹfiọk ke ikpanaha ẹdọhọ mbet imọ ẹka iso ẹnam n̄kani edinam Ido Ukpono Mme Jew, utọ nte utreudia. Enye ikedịghe ndituak ibuot nnọ Abasi ke akani usụn̄ oro mbon eset ẹkesituakde, emi ẹkekam ẹyomde nditetre ini oro. Jesus ikọdọhọke mme owo ẹtuak ibuot ẹnọ Abasi ke ido mme Jew eyo esie emi ẹkesikpepde item owo ke ukpepn̄kpọ mmọ. Nsa-o, enye idomoke ndikịm obufa ọfọn̄ ndian ke akani, inyụn̄ idomoke ndisịn obufa wine ke akani nsọsọn̄ ikpa.