Mme Ufọn Ẹtode Ndima Ikọ Abasi
“Ma [ọniọn̄], ndien enye ayakama fi. . . . Enye ọyọnọ fi ubọn̄ ke ini afo afatde enye.”—MME N̄KE 4:6, 8.
1. Nso ke ndinen̄ede mma Ikọ Abasi abuana?
NDIKOT Bible edi akpan n̄kpọ ọnọ Christian. Nte ededi, ikpîkpu edikot enye iwụtke ima ẹnyenede ẹnọ Ikọ Abasi. Nso edieke owo esikotde Bible edi enye anam mme n̄kpọ oro Bible obiomde ikpe? Nte an̄wan̄ade, enye imaha Ikọ Abasi ke usụn̄ oro andiwet Psalm 119 akamade. Ndima Ikọ Abasi ama anam enye odu uwem ke n̄kemuyo ye se Ikọ Abasi oyomde.—Psalm 119:97, 101, 105.
2. Mme ufọn ewe ẹto ọniọn̄ emi ọkọn̄ọde ke Ikọ Abasi?
2 Ndidu uwem ke n̄kemuyo ye Ikọ Abasi oyom owo enen̄ede ekikere ye usụn̄ uwem esie kpukpru ini. Utọ usụn̄ uwem oro owụt ọniọn̄ Abasi, emi ọwọrọde ndida ifiọk ye mbufiọk oro ẹkọde ẹto edikpep Bible nsịn ke edinam. “Ma [ọniọn̄], ndien enye ayakama fi. Kpono enye, ndien enye oyofori fi: enye ọyọnọ fi ubọn̄ ke ini afo afatde enye. Enye ayayara fi ediye mbana n̄kpọ ke ibuot: ọyọnọ fi anyanya eke enyenede uyai.” (Mme N̄ke 4:6, 8, 9) Nso eti nsịnudọn̄ ke emi edi ntem ndikọri ima nnọ Ikọ Abasi nnyụn̄ ndi se enye adade usụn̄! Anie mîyomke ẹkpeme, ẹfori, m̀mê ẹnọ imọ ubọn̄?
Ẹkpeme Ẹsio ke Nsinsi Unan
3. Ntak oyomde ẹkpeme mme Christian ẹkan nte akanam edide, ndien ẹkpeme ẹbiọn̄ọ anie?
3 Ke nso usụn̄ ke ọniọn̄ oro ẹnyenede ẹto edikpep ye edida Ikọ Abasi nsịn ke edinam ekpeme owo? Akpa n̄kpọ edi, ẹkpeme enye ẹbiọn̄ọ Satan kpa Devil. Jesus ama ekpep mme anditiene enye ete ẹbọn̄ akam ẹben̄e edisio ke ubọk andidiọk, kpa Satan. (Matthew 6:13) Mfịn, enen̄ede oyom isịn eben̄e emi ke akam nnyịn. Ẹma ẹsion̄o Satan ye mme demon esie ẹfep ke heaven ke 1914 ebede, ndien nte utịp Satan “asan̄a ye akwa ifụtesịt, sia enye ọdiọn̄ọde ete ini imọ edi ibio.” (Ediyarade 12:9, 10, 12) Ke akpatre ini emi, anaedi ifụtesịt esie ofiop etieti nte enye an̄wanade ekọn̄ ye unana edikụt unen ye mmọ “ẹmi ẹnịmde mme item Abasi, ẹnyụn̄ ẹyịrede ẹmụm ikọ-ntiense Jesus ẹkama.”—Ediyarade 12:17.
4. Didie ke ẹkpeme mme Christian ẹbiọn̄ọ mme mfịghe ye mme afia Satan?
4 Satan aka iso ke iyatesịt esie ndida mfịna nsọk mme asan̄autom Christian ẹmi nnyụn̄ ndemede afai afai ukọbọ m̀mê ndida mme n̄kpọ ubiọn̄ọ eken mbiọn̄ọ utom mmọ. Enye oyom n̄ko nditap mme anditan̄a Obio Ubọn̄ nsịn ke ediwụk ntịn̄enyịn ke mme utọ n̄kpọ nte uwọrọiso ke ererimbot, uma mbre, edikọ mme inyene obụkidem, ye edibịne inemesịt, utu ke ndiwụk ntịn̄enyịn ke utom edikwọrọ Obio Ubọn̄. Nso ikpeme mme anam-akpanikọ asan̄autom Abasi ibiọn̄ọ ediyak idem nnọ mfịghe Satan m̀mê ndidi se afia esie omụmde? Edi akpanikọ, akam, n̄kpet n̄kpet itie ebuana ye Jehovah, ye mbuọtidem nte ke mme un̄wọn̄ọ esie iditreke ndisu ẹdi akpan n̄kpọ. Edi kpukpru ẹmi ẹnyene ebuana ye ifiọk ye ubiere ndinam mme n̄kpọ editi eke Ikọ Abasi. Mme n̄kpọ editi ẹmi ẹto edikot Bible ye mme un̄wam ukpep Bible, edidụk mme mbono esop Christian, edinam item N̄wed Abasi otode ekemmọ andinịm ke akpanikọ, m̀mê edikam n̄kere ke akam mban̄a mme edumbet Bible oro spirit Abasi etide owo.—Isaiah 30:21; John 14:26; 1 John 2:15-17.
5. Ke mme usụn̄ ewe ke ọniọn̄ emi ọkọn̄ọde ke Ikọ Abasi ekpeme nnyịn?
5 Mbon oro ẹmade Ikọ Abasi ẹnyene ukpeme ke mme usụn̄ en̄wen. Ke uwụtn̄kpọ, mmọ ẹfep mfụhọ eke ntụk ye ata ata udọn̄ọ otode mme utọ n̄kpọ nte edida ibọk ke idiọk usụn̄, edida un̄wọn̄, ye oburobụt ido idan̄. (1 Corinth 5:11; 2 Corinth 7:1) Mmọ itịpke isịn ke ndibiat mme itie ebuana ebe ke ikọ-edem m̀mê ikọ oro mîwụtke mfọnido. (Ephesus 4:31) Mmọ inyụn̄ inyeneke eyịghe ebe ke ndisịn idem ke mme abian̄a abian̄a ukpepn̄kpọ akwaifiọk eke ifiọk ererimbot. (1 Corinth 3:19) Ebede ke ndima Ikọ Abasi, ẹkpeme mmọ ẹbiọn̄ọ mme n̄kpọ oro ẹkemede ndinam mmọ ẹtaba itie ebuana mmọ ye Abasi ye idotenyịn nsinsi uwem. Mmọ ẹka iso ẹsịn ifịk ẹn̄wam mme mbọhọidụn̄ mmọ man ẹnyene mbuọtidem ke mme utịbe utịbe un̄wọn̄ọ oro ẹdude ke Bible, ẹfiọkde ẹte ke mmimọ ke ntem ‘iyanyan̄a idem mmimọ ye mmọ ẹmi ẹkopde uyo mmimọ.’—1 Timothy 4:16.
6. Didie ke ọniọn̄ ọkọn̄ọde ke Ikọ Abasi ekpeme nnyịn idem ke ini idude ke n̄kpọsọn̄ idaha?
6 Edi akpanikọ, “ini ye unọmọ” ẹtetịbe ẹnọ kpukpru owo—idem mbon oro ẹmade Ikọ Abasi. (Ecclesiastes 9:11) Edi se owo mîkemeke ndifep nte ke ndusụk owo ke otu nnyịn ẹyesobo mme oto-obot afanikọn̄, ọkpọsọn̄ udọn̄ọ, mbabuat n̄kpọntịbe, m̀mê n̄kpa unana idotenyịn. Kpa ye oro, nnyịn imenyene ukpeme. Idụhe afanikọn̄ ndomokiet emi ekemede ndinọ owo emi enen̄erede ama Ikọ Abasi nsinsi unan. Ntem, nnyịn ikpetịmekede esịt ikaha iban̄a se ikemede nditịbe ke ini iso. Ke ima ikọnọ ofụri ntịn̄enyịn nte owụtde ọniọn̄, etịm ọfọn ndiyak mme n̄kpọ nsịn Jehovah ke ubọk nnyụn̄ ntre ndiyak unana ifụre ke uwem mfịn ọbọ nnyịn emem nnyịn. (Matthew 6:33, 34; Philippi 4:6, 7) Nyene ke ekikere nte idotenyịn ediset ke n̄kpa ye eti uwem ke ini Abasi ‘edinamde kpukpru n̄kpọ ẹdi mbufa,’ ẹdide akpanikọ.—Ediyarade 21:5; John 11:25.
Wụt ke Afo Edi “Eti Isọn̄”
7. Nso n̄ke ke Jesus okotop ọnọ otuowo emi ẹkedide ndikop se enye etịn̄de?
7 Ẹma ẹwụt ufọn edinyene nnennen ekikere mban̄a Ikọ Abasi ke kiet ke otu n̄ke Jesus. Nte Jesus akatan̄ade eti mbụk ke ofụri Palestine, mme otuowo ẹma ẹbono ẹkpan̄ utọn̄ ẹnọ enye. (Luke 8:1, 4) Nte ededi, idịghe kpukpru owo ẹkenen̄ede ẹma Ikọ Abasi. Nte eyịghe mîdụhe, ediwak ẹkedi ndikpan̄ utọn̄ nnọ enye koro mmọ ẹkeyomde ndikụt mme utịben̄kpọ m̀mê koro mmọ ẹkemade utịbe utịbe usụn̄ ukpepn̄kpọ esie. Ntem, Jesus ama otop n̄ke ọnọ otuowo oro: “Asuan-n̄kpasịp ọwọrọ aka ndisuan n̄kpasịp esie: ndien nte enye asuande, ndusụk n̄kpasịp ẹduọn̄ọ ke mben ọkpọusụn̄; ndien ẹdịghi mmọ, mme inuen enyọn̄ ẹnyụn̄ ẹtan̄ mmọ ẹta. N̄kpasịp ndusụk ẹduọn̄ọ ke akwa itiat; ndien ke ini mmọ ẹtịbede, ẹyemede, koro mînyeneke mmọn̄. Ndusụk ẹduọn̄ọ ke ufọt ikọt n̄kukịm; ndien n̄kukịm ẹkọri ntre ye mmọ, ẹbaba mmọ ẹwot. Mmọ eken ẹnyụn̄ ẹduọn̄ọ ke eti isọn̄, ẹtịbe, ẹnyụn̄ ẹn̄wụm mfri utịm ikikie.”—Luke 8:5-8.
8. Ke n̄ke Jesus, nso idi n̄kpasịp?
8 N̄ke Jesus ama owụt ke ẹdinam n̄kpọ ke nsio nsio usụn̄ ẹban̄a edikwọrọ eti mbụk, ọkọn̄ọde ke idaha esịt andikop. N̄kpasịp oro ẹsuande edi “ikọ Abasi.” (Luke 8:11) Mîdịghe nte n̄wetnnịm n̄kpọ efen aban̄ade n̄ke oro ọdọhọde, n̄kpasịp edi “ikọ Obio Ubọn̄ Heaven.” (Matthew 13:19) Jesus ama ekeme ndida ekededi ke otu ikọ iba oro, sia ibuotikọ Ikọ Abasi edide Obio Ubọn̄ eke heaven ke idak Jesus Christ nte Edidem emi Jehovah edidade owụt unen itie edikara esie onyụn̄ anam enyịn̄ esie asana. (Matthew 6:9, 10) Do, ke nditịm ntịn̄, n̄kpasịp edi etop eti mbụk odude ke Ikọ Abasi kpa Bible. Mme Ntiense Jehovah ẹwụt etop Obio Ubọn̄ emi nte mmọ ẹsuande n̄kpasịp ke ndikpebe akpasarade Andisuan n̄kpasịp, Jesus Christ. Mmọ ẹkụt nte mme owo ẹnamde n̄kpọ didie ẹban̄a emi?
9. Nso ke n̄kpasịp emi ọduọde ke (a) mben usụn̄? (b) akwa itiat? (c) n̄kukịm ada aban̄a?
9 Jesus ọkọdọhọ ke ndusụk n̄kpasịp ẹduọn̄ọ ke mben ọkpọusụn̄ ẹnyụn̄ ẹdịghi mmọ. Emi etịn̄ aban̄a mme owo ẹmi ẹnanade ifet tutu n̄kpasịp Obio Ubọn̄ ikemeke ndinyene orụn̄ ke esịt mmọ. Mbemiso mmọ ẹkemede ndikọri ima nnọ Ikọ Abasi, “Satan edi editan̄ ikọ ke esịt mmọ efep, mbak mmọ ẹdinịm ke akpanikọ ẹnyụn̄ ẹbọhọ.” (Luke 8:12) Ndusụk n̄kpasịp ẹduọn̄ọ ke akwa itiat. Emi etịn̄ aban̄a mme owo ẹmi etop Bible edemerede mmọ udọn̄ edi mîyakke otụk mmọ esịt. Ke ini ubiọn̄ọ edide m̀mê ke ini ọsọn̄de mmọ ndida item Bible nsịn ke edinam, mmọ “ẹfiak edem” koro mmọ mînyeneke orụn̄. (Luke 8:13) Ndien odu mbon oro ẹkopde ikọ emi edi “ekikere ye inyene ye inemesịt uwem” ẹkan mmọ ubọk. Ke akpatre, ukem nte eto emi n̄kukịm ọkọride ofụk, “ẹbaba mmọ ẹwot.”—Luke 8:14.
10, 11. (a) Mmanie ke eti isọn̄ ada aban̄a? (b) Nso ke ana nnyịn inam man ‘imụm’ Ikọ Abasi ikama ke esịt nnyịn?
10 Ke akpatre, odu n̄kpasịp emi ọduọde ke eti isọn̄. Emi etịn̄ aban̄a mme owo ẹmi ẹbọde etop emi ke “eti esịt akpanikọ.” Nte ido edide, kpukpru nnyịn ikpama ndinịm ke akpanikọ nte ke nnyịn idu ke otu enye emi. Nte ededi, ke akpatre ndụn̄ọde, ekikere Abasi edi akpan n̄kpọ. (Mme N̄ke 17:3; 1 Corinth 4:4, 5) Ikọ esie ọdọhọ ete ke nnyịn ndinyene “eti esịt akpanikọ” edi n̄kpọ emi nnyịn idade mme edinam nnyịn iwụt ọtọn̄ọde ke idahaemi tutu esịm n̄kpa m̀mê tutu Abasi ada utịt ọsọk idiọk editịm n̄kpọ emi. Edieke nte nnyịn inamde n̄kpọ ke akpa ini iban̄a etop Obio Ubọn̄ edide eti, oro ọfọn. Nte ededi, mbon oro ẹnyenede eti esịt akpanikọ ẹnyịme Ikọ Abasi ẹnyụn̄ “ẹmụm ẹkama . . . , ẹn̄wụm mfri ke ime.”—Luke 8:15.
11 Ata n̄kukụre usụn̄ ndimụm Ikọ Abasi n̄kama ke esịt nnyịn edi ndikot nnyụn̄ n̄kpep enye ọkpọkpọ ye ke otu mme ekemmọ andinịm ke akpanikọ. Emi esịne ndibọ ọyọhọ ufọn nto udia eke spirit oro ẹnọde ebe ke usụn̄ oro ẹmekde ndise mban̄a mme udọn̄ eke spirit ata mme anditiene Jesus. (Matthew 24:45-47) Ebede ke utọ usụn̄ oro, ima onụk mbon oro ẹmụmde Ikọ Abasi ẹkama ke esịt mmọ “ẹn̄wụm mfri ke ime.”
12. Nso idi mfri emi anade nnyịn in̄wụm ke ime?
12 Nso orụk mfri ke eti isọn̄ on̄wụm? Ke ata ererimbot, n̄kpasịp ẹsikọri ẹkabade eto oro ẹn̄wụmde mfri emi enyenede ukem orụk n̄kpasịp oro, ẹmi ndien ẹkemede ndisuan man ẹn̄wụm mfri efen efen. Ukem ntre, ye mbon oro ẹnyenede eti esịt akpanikọ, n̄kpasịp ikọ emi esikọri ke esịt mmọ, anamde mmọ ẹkọri ke n̄kan̄ eke spirit tutu mmọ, nte utịp, ẹkeme ndisuan n̄kpasịp emi ke esịt mbon en̄wen. (Matthew 28:19, 20) Ndien ime edi idiọn̄ọ utom usuan n̄kpasịp mmọ. Jesus ama owụt nte ime edide akpan n̄kpo ke ndisuan n̄kpasịp ke ini enye ọkọdọhọde ete: “Ẹyenyan̄a owo eke edimede ime tutu esịm akpatre. Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:13, 14.
“Ẹn̄wụm Mfri ke Edinam Kpukpru Nti Utom”
13. Nso akam ke Paul ọkọbọn̄ emi akabuande mfri ye ifiọk Ikọ Abasi?
13 Apostle Paul n̄ko ama etịn̄ ke oyom ẹn̄wụm mfri, ndien enye akabuan edin̄wụm mfri ye Ikọ Abasi. Enye ọkọbọn̄ akam ete mme ekemmọ andinịm ke akpanikọ “ẹyọhọ ye ifiọk uduak [Abasi] ke kpukpru eti ibuot ye ikike ke n̄kpọ Spirit; man [mmọ] ẹsan̄a ke ido nte odotde Ọbọn̄, ẹnem Enye esịt ke kpukpru usụn̄, ẹnyụn̄ ẹn̄wụm mfri ke edinam kpukpru nti utom.”—Colossae 1:9, 10; Philippi 1:9-11.
14-16. Ke n̄kemuyo ye akam Paul, nso mfri ke mbon oro ẹmade Ikọ Abasi ẹn̄wụm?
14 Paul ke ntem owụt ete ke ndinyene ifiọk Bible ke idemesie idịghe utịtmbuba. Utu ke oro, ima inyenede inọ Ikọ Abasi onụk nnyịn ‘ndisan̄a ke ido nte odotde Ọbọn̄’ ebe ke ndika iso ‘n̄n̄wụm mfri ke edinam kpukpru nti utom.’ Ewe nti utom? Edikwọrọ eti mbụk Obio Ubọn̄ edi n̄wọrọnda utom ọnọ mme Christian ke ukperedem ini emi. (Mark 13:10) Ke adianade do, mbon oro ẹmade Ikọ Abasi ẹsịn ofụri ukeme mmọ ke ndida okụk nnọ utom emi ibetedem kpukpru ini. Mmọ ẹkop idatesịt ẹban̄a ifet emi, ẹfiọkde ẹte ke “Abasi amama owo eke ọnọde ke inemesịt.” (2 Corinth 9:7) Etịbe mmọ an̄wam ke ndise mban̄a se ibede ufọkutom Bethel ikie ẹmi ẹdade ẹnọ ndausụn̄ ke utom edikwọrọ Obio Ubọn̄, ẹmi ẹnamde Bible ye mme n̄wed Bible ke ndusụk. Etịbe mmọ n̄ko an̄wam ke ndise mban̄a ikpọ mbono Christian nnyụn̄ nnọ mme esenyịn oro ẹsan̄ade-san̄a, mme isụn̄utom, ye mme ọkwọrọikọ uyọhọ ini eken ẹkenam utom.
15 Nti utom efen abuana edibọp ye edise mban̄a mme iwụk ebiet utuakibuot akpanikọ. Ima ẹnyenede ẹnọ Ikọ Abasi onụk mme andituak ibuot nnọ ndikụt nte ke owo ifụmike Mme Ufọk Mbono ye Mme Ufọkmbono Obio Ubọn̄. (Men Nehemiah 10:39 domo.) Sia enyịn̄ Abasi odude ke iso mme utọ ufọk oro, edi akpan n̄kpọ nte ẹnịm esịt ye an̄wa mmọ ẹsana ẹnyụn̄ ẹye, ndien inaha edu uwem mbon oro ẹtuakde ibuot ke esịt mme utọ ufọkmbono oro edi n̄kpọ esuene. (2 Corinth 6:3) Ndusụk Christian ẹkeme ndinam mme n̄kpọ efen efen. Ima ẹnyenede ẹnọ Ikọ Abasi onụk mmọ ndika mme ebiet ẹyomde usụn̄ man ẹkebuana ke ndibọp mbufa itie utuakibuot ke mme ikpehe ererimbot ẹmi udọn̄ odude ke ntak ubuene m̀mê unana usọ.—2 Corinth 8:14.
16 ‘Ndin̄wụm mfri ke edinam kpukpru nti utom’ esịne n̄ko edise mban̄a mme mbiomo ubon ye ediwụt edikere mban̄a nnọ mme ekemmọ Christian. Ima inyenede inọ Ikọ Abasi onụk nnyịn ndifiọk mme udọn̄ mbon oro “ẹtode ke ufọk mme andinịm ke akpanikọ” nnyụn̄ ‘n̄kpep ndibem iso nnam se idotde ye mbon ufọk’ nnyịn. (Galatia 6:10; 1 Timothy 5:4, 8) Ke afan̄ emi, ndika n̄kese mbon udọn̄ọ nnyụn̄ ndọn̄ mbon oro ẹtuan̄ade esịt edi eti utom. Ndien nso eti utom ke mbiowo esop ye Mme Kọmiti Unyene Nneme ye Mbon Ufọkibọk ẹnam ntem ke ndin̄wam mme owo ẹmi ẹsobode mme idaha usọbọ oro ẹkamade n̄kpọ-ata! (Utom 15:29) Ndien mme afanikọn̄ oro ẹkọride-kọri ke ibat ẹdu—ndusụk mmọ ẹdi mme oto-obot ndien ndusụk ẹto nditen̄ edu owo. Ye un̄wam spirit Abasi, Mme Ntiense Jehovah ẹmenyene eti etop ke ediwak ikpehe isọn̄ ke ndinọ mme ekemmọ andinịm ke akpanikọ ye mbon en̄wen oro ẹdide mbon unọmọ afanikọn̄ ye mme mbabuat n̄kpọntịbe, usọp usọp un̄wam. Kpukpru ẹmi ẹdi nti mfri ẹmi mbon oro ẹmade Ikọ Abasi ẹwụtde.
Mme Ubọn̄ Ubọn̄ Ufọn Ini Iso
17, 18. (a) Nso ke ẹnam ebe ke ndisuan n̄kpasịp Obio Ubọn̄? (b) Mme n̄kpọntịbe ewe oro ẹnyen̄ede isọn̄ ke mme andima Ikọ Abasi ẹdisọp ndikụt?
17 Edisuan n̄kpasịp Obio Ubọn̄ aka iso ndida ekese ufọn nsọk ubonowo. Ke mme isua ndondo emi se iwakde ibe owo 300,000 ke isua kiet kiet ẹmeyak etop Bible ọdọn̄ n̄kam ke esịt mmọ tutu esịm udomo oro mmọ ẹyakde uwem mmọ ẹnọ Jehovah ẹnyụn̄ ẹyarade emi ebe ke baptism mmọn̄. Nso ubọn̄ ubọn̄ ini iso ina ibet mmọ ntem!
18 Ke mîbịghike, mme andima Ikọ Abasi ẹfiọk ẹte ke Jehovah Abasi ayadaha ada ndinọ enyịn̄ esie ubọn̄. Ẹyesobo “Akwa Babylon,” kpa ukara ererimbot eke nsunsu ido ukpono. (Ediyarade 18:2, 8) Ekem Edidem, Jesus Christ, oyowot mbon oro ẹsịnde ndidu uwem nte ekemde ye Ikọ Abasi. (Psalm 2:9-11; Daniel 2:44) Ke oro ebede, Obio Ubọn̄ Abasi ayada nsinsi ubọhọ edi kaban̄a ubiatibet, ekọn̄, ye mme afanikọn̄ eken. Idiyomke ẹdọn̄ mme owo esịt aba ke ntak ubiak, udọn̄ọ, ye n̄kpa.—Ediyarade 21:3, 4.
19, 20. Nso ubọn̄ ubọn̄ ini iso ina ibet mbon oro ẹnen̄erede ẹma Ikọ Abasi?
19 Nso ubọn̄ ubọn̄ nti utom ke mbon oro ẹmade Ikọ Abasi ẹdinam ntem adan̄aoro! Mbon oro ẹbọhọde Armageddon ẹditọn̄ọ ye utom idatesịt edide ndinam isọn̄ emi akabade edi paradise. Mmọ ẹyenyene aduai-owo-idem ifet nditịm mme n̄kpọ ẹmi mbon oro ẹkpan̄ade ẹmi idahaemi ẹduọkde odudu ke udi ẹnyụn̄ ẹdude ke ibuot uti n̄kpọ Abasi ye idotenyịn edibuana ke ediset ke n̄kpa ẹdiyomde. (John 5:28, 29) Ke ini oro, mfọnmma ndausụn̄ oyoto Ọbọn̄ Andikara, Jehovah, ebe ke Eyen esie oro ẹmenerede ke enyọn̄, Jesus Christ, esịm mme andidụn̄ isọn̄. ‘Ẹyekụbọde mme n̄wed,’ ẹyararede mme item oro Jehovah ọnọde kaban̄a uwem ke obufa ererimbot.—Ediyarade 20:12.
20 Ke ekemini Jehovah, ẹyenam kpukpru otu mme anam-akpanikọ Christian oro ẹyetde aran ẹset ẹkebọ utịp eke heavan mmọ nte ‘nsan̄a mme ada udeme nnyene ye Christ.’ (Rome 8:17) Ke Tọsịn Isua Ukara Christ, ẹyenam mme owo ke isọn̄ ẹmi ẹmade Ikọ Abasi ẹnyene mfọnmma ekikere ye ikpọkidem. Ke ẹma ẹkenam akpanikọ ke akpatre udomo, ẹyenọ mmọ utịp nsinsi uwem ndien mmọ ẹyenyene “itie eyenisọn̄ emi enyenede ubọn̄ eke nditọ Abasi.” (Rome 8:21; Ediyarade 20:1-3, 7-10) Nso utịbe utịbe ini ke oro edidi ntem! Ke akpanikọ, edide Jehovah ọnọ nnyịn idotenyịn eke heaven m̀mê eke isọn̄, ima anyan ini inyenede inọ Ikọ esie ye ubiere ndidu uwem nte ekemde ye ọniọn̄ Abasi eyekpeme nnyịn. Ndien ke ini iso enye ‘ọyọnọ nnyịn ubọn̄ koro nnyịn ifatde enye.’—Mme N̄ke 4:6, 8.
Nte Afo Emekeme Ndinam An̄wan̄a?
◻ Didie ke ima inyenede inọ Ikọ Abasi edikpeme nnyịn?
◻ Nso idi n̄kpasịp eke n̄ke Jesus, ndien didie ke ẹsuan enye?
◻ Didie ke nnyịn ikeme ndidi “eti isọn̄”?
◻ Mme ufọn ewe ke mme andima Ikọ Abasi ẹkeme ndidori enyịn mban̄a?
[Ndise ke page 16]
N̄kpasịp eke n̄ke Jesus ada aban̄a etop eti mbụk oro odude ke Ikọ Abasi
[Ebiet Ẹdade N̄kpọ Ẹto]
Garo Nalbandian
[Ndise ke page 17]
Mme Ntiense Jehovah ẹkpebe Akwa Asuan-N̄kpasịp
[Mme Ndise ke page 18]
Mme andibọhọ Armageddon ẹyedara mbun̄wụm isọn̄