Mme Mbụme Ẹtode Mme Andikot

Ndi Mary emi akakabarede edi eka Jesus ama oyoyomo ke ini enye akakade ndikese Elizabeth iman esie?

Ih, etie nte enye ama oyomo.

Ke Luke ibuot 1, nnyịn ibemiso ikot iban̄a uyomo idịbi Elizabeth, n̄wan Zechariah oku, emi akamande John (Andinịm Owo Baptism). Ke ini Elizabeth ‘akasan̄ade ye idịbi ọfiọn̄ itiokiet angel Gabriel’ ama aka ekese Mary nditọt enye nte ke enye eyeyomo onyụn̄ aman “Eyen Andikon̄ N̄kan.” (Luke 1:26, 30-33) Edi ini ewe ke Mary okoyomo?

Mbụk Luke akaiso ndibụk ete ke oro ama ekebe Mary ama anam isan̄ aka Judah ndikese Elizabeth iman esie emi okoyomode. Ke ini iban iba ẹmi ẹkesobode, nsekeyen ke idịbi Elizabeth (John) ama ọfrọ. Elizabeth ama etịn̄ otụk ‘mfri idịbi Mary,’ onyụn̄ okot Mary “eka Ọbọn̄ mi.” (Luke 1:39-44) Ubiere oro owụtde ifiọk ke ntre edi nte ke Mary ama oyoyomo, nte ke enye akasan̄a ye idịbi ke ini enye akakade ndikese Elizabeth.

Luke 1:56 okot ete: “Mary adan̄ ye enye n̄kpọ nte ọfiọn̄ ita, ndien ọnyọn̄ ufọk.” Ufan̄ikọ emi inọhọ nnennen ibat ndida ndiọn̄ọ ata usenọfiọn̄. Enye ọdọhọ “n̄kpọ nte ọfiọn̄ ita,” emi Elizabeth asan̄ade ye idịbi ọfiọn̄ usụkkiet.

Ke ama akan̄wam Elizabeth ke utịt utịt ini uyomo idịbi esie, Mary ama ọnyọn̄ ufọk esie ke Nazareth. Ekeme ndidi Mary ama ọfiọk ete ke ndondo oro Elizabeth amande (John), ediwak isenowo ẹyedi, ẹmi ndusụk ẹdikam ẹdide mme iman. Oro ekeme ndidi n̄kpọ bụt ọnọ eyenan̄wan oro mîdọhọ ndọ emi oyomode idịbi. Mary okoyomo ebịghi adan̄a didie ke ini enye akafiakde ọnyọn̄ Nazareth? Sia enye okodude ye Elizabeth “n̄kpọ nte ọfiọn̄ ita,” eyedi Mary okodu ke idịbi utịt utịt ọfiọn̄ ita m̀mê ntọn̄ọ ntọn̄ọ idịbi ọyọhọ ọfiọn̄ inan̄ ke ini enye akafiakde ọnyọn̄ aka Nazareth.—Sịghisịghi ubọkn̄wed edi eke nnyịn.