Idem Ọsọn̄ Mma Emi Otụkde Ọfọn̄ Jesus

Mme Jew emi ẹdụn̄de ke mben Inyan̄ Galilee ẹkop ke Jesus oto Decapolis edi. Etie nte ediwak mmọ ẹkop ke Jesus anam ofụm ye mmọn̄ odobo ana sụn̄, ekeme n̄ko ndidi ndusụk mmọ ẹkop ke enye anam demon ọwọrọ owo iba ke idem. Emi anam “akwa otuowo” ẹda ke esụk ẹbet enye man ẹkọm enye ke ini enye edide edibehe. Etie nte mmọ ẹbet enye ke Capernaum. (Mark 5:21) Mme owo ẹda mbembe ẹbet enye ke ini enye ọwọrọde ke ubom.

Owo kiet emi oyomde Jesus ke mbrenyịn edi Jairus, emi edide akwa owo emi etiede ibuot ke synagogue do. Enye ọduọ Jesus ke ukot ekpe enye ubọk ediwak ini ete: “Ekpri eyen mi an̄wan odu ke ata idiọk idaha. Mbọk di didori enye ubọk man enye okpokop nsọn̄idem onyụn̄ odu uwem.” (Mark 5:23) Nso ke Jesus edinam inọ Jairus emi osụk ekpede enye ubọk mi ete an̄wam n̄kukụre eyen esie emi edide isua 12 kpọt?—Luke 8:42.

Nte Jesus osụk asan̄ade aka ufọk Jairus, n̄kpọ en̄wen emi enen̄erede anam owo mbọm etịbe. Idem adaduai ediwak owo emi ẹsan̄ade ye Jesus; mmọ ke ẹkere m̀mê enye ọmọn̄ afiak anam utịben̄kpọ en̄wen. Edi mma kiet emi etienede asan̄a ye mmọ ikereke oro, akam ekere idiọk udọn̄ọ emi otụhọrede enye.

Mma emi edi eyen Jew emi iyịp ọwọrọde ke idem ke isua 12. Enye aka ebịne ediwak mbiausọbọ onyụn̄ atahade kpukpru okụk esie ama ke usọbọ, edi ibuot idụhe. Mfịna esie akam “ọdọdiọk akan” se ekedide.—Mark 5:26.

Ekeme ndidi ọmọdiọn̄ọ ke mfịna mma emi idịghe mmemidem kpọt, ke bụt ye esuene ẹsan̄a do n̄ko. Owo emi utọ n̄kpọ emi ọwọrọde isikụbọkede inua itịn̄ inọ owo. Se ikam idiọkde ikan edi ke Ibet Moses ọkọdọhọ ke n̄wan emi iyịp ọwọrọde ke idem edehe. Ana owo ekededi emi otụkde enye m̀mê ọfọn̄ esie emi iyịp eyerede eyere mmọn̄ onyụn̄ edehe tutu esịm mbubreyo.—Leviticus 15:25-27.

Mma emi okop ediwak ‘n̄kpọ aban̄a Jesus’ onyụn̄ oyom enye okụt. Sia enye ọdiọn̄ọde ke imọ imedehe, enye ededịbe asan̄a odụk otuowo, ke etịn̄ ke esịt esie ete: “Mma n̄kam ntotụk ekpedi ewụra esie nyokop nsọn̄idem.” Ke ini enye otụkde mbenọfọn̄ Jesus, enye okop nte uwọrọiyịp esie etrede inikiet inikiet! Ọwọrọ idiọk udọn̄ọ oro okụre enye ndien.—Mark 5:27-29.

Ini oro ke Jesus osioro uyo ete: “Anie okotụk mi?” Afo ekere ke idem etie mma oro didie ke ini enye okopde ikọ emi? Peter osioro uyo, edi se enye etịn̄de etie nte ke ikpanaha Jesus obụp utọ mbụme oro. Enye ọdọhọ ete: “Otuowo ẹkan fi ẹkụk ẹnyụn̄ ẹberi fi ọkpọsọn̄.” Nso ikpanam Jesus obụp m̀mê anie okotụk imọ? Jesus etịn̄ ntak ete: “Owo ama otụk mi, koro mmokop ke odudu ọwọrọ mi ke idem.” (Luke 8:45, 46) Odudu emi ọwọrọde Jesus ke idem akanam idem ọsọn̄ mma oro.

Mma emi okụt ke ẹfiọk se imọ ikanamde, ntre idem enyek enye, enye onyụn̄ edi ediduọ Jesus ke iso. Enye etịn̄ utọ udọn̄ọ emi enye ọkọdọn̄ọde ye ufen emi enye ọkọbọde ọnọ kpukpru owo, onyụn̄ etịn̄ nte idem asan̄ade ọsọn̄ enye. Jesus etịn̄ ikọ sụn̄sụn̄ ye enye onyụn̄ ọdọn̄ enye esịt ete: “Eyenan̄wan, mbuọtidem fo amanam idem ọsọn̄ fi. Nyọn̄ ke emem, bọhọ idiọk udọn̄ọ fo nyụn̄ kop nsọn̄idem.”—Mark 5:34.

Omokụt do ke owo emi Abasi emekde ete akara ererimbot enyene esịtmbọm, ọfọn ido, ekere aban̄a owo, onyụn̄ ekeme ndinyan̄a owo!