Jesus Ada Uyo ye Iyak Ifan̄ Ọnọ Ediwak Owo Udia

Mme apostle 12 ẹma ẹkekwọrọ ikọ ke ofụri Galilee ẹnyụn̄ ẹdi ẹditịn̄ “kpukpru n̄kpọ emi mmọ ẹkenamde ẹnyụn̄ ẹkpepde” mme owo ẹnọ Jesus. Idem emem mmọ idahaemi. Mmọ inyeneke ini idia n̄kpọ sia ediwak owo ẹdedi ẹnyọnyọn̄. Emi anam Jesus ọdọhọ mmọ ete: “Mbufo ẹdi ke idem mbufo ikpọn̄ ke ndobo ndobo ebiet ẹdiduọk odudu esisịt.”—Mark 6:30, 31.

Etie nte mmọ ẹdụk ubom ke esụk emi ekperede Capernaum ẹwat ẹka ebiet kiet emi etiede ndobo ndobo ke n̄kan̄ Akpa Jordan. Bethsaida ekpere do n̄ko. Ediwak owo ẹkụt ini emi mmọ ẹdahade, ẹnyụn̄ ẹtịn̄ ẹnọ mbon eken. Mmọ ẹfehe ke mbenesụk oro ẹkesịm ke ini ubom emi emende Jesus ebehede.

Ke ini Jesus ọwọrọde ke ubom okụt otuowo, mbọm mmọ anam enye koro mmọ ẹsuanade nte erọn̄ emi mînyeneke andikpeme. Ntre enye “ọtọn̄ọ ndikpep mmọ ediwak n̄kpọ” mban̄a Obio Ubọn̄ Abasi. (Mark 6:34) Enye n̄ko “anam udọn̄ọ okụre mmọ emi ẹyomde usọbọ.” (Luke 9:11) Ke ini eyo osụhọrede, mbet esie ẹdidọhọ enye ẹte: “Ebiet emi edi ndobo ndobo ebiet ndien eyo ọsọn̄; nọ otuowo emi ẹnyọn̄ọ, man mmọ ẹkpeka mme obio-in̄wan̄ ẹkedep udia eke mmọ ẹdidiade.”—Matthew 14:15.

Jesus ọbọrọ mmọ ete: “Mmọ inyeneke ndinyọn̄: mbufo ẹnọ mmọ n̄kpọ ẹdia.” (Matthew 14:16) Kpa ye oro Jesus ọdiọn̄ọde se enye aduakde ndinam, enye obụp Philip mbụme man okop se Philip edibọrọde. Enye obụp ete: “M̀mọ̀n̄ ke nnyịn ididep uyo inọ mmọ emi ẹta?” Ẹbụp Philip sia enye oto Bethsaida. Edi owo idikemeke ndidep uyo nnọ kpukpru owo emi sia mmọ ẹwak ẹsịm n̄kpọ nte irenowo 5,000 ndien ẹkpedian iban ye nditọwọn̄, ọwọrọ ke ẹkeme ndiwak nsịm owo tọsịn duop. Philip ọbọrọ Jesus ete: “Uyo denarius ikie iba ikemke mmọ ndita nsịtnsịt.” Ini oro, ẹkesikpe owo denarius kiet ke utom usen.—John 6:5-7.

Andrew etịn̄ ikọ ndiwụt ke owo idikemeke ndinọ utọ uwak owo emi udia. Enye ọdọhọ ete: “Ekpri eyeneren kiet mmọmi emi enyenede uyo barley ition ye n̄kpri iyak iba. Edi oro ekem adan̄a ediwak owo emi nso?”—John 6:9.

Mbiet ọyọyọhọ ebiet oro sia ini utọ edi emi, ndien ibịghike ẹmọn̄ ẹnịm usọrọ Passover isua 32 eyo Christ. Jesus ọdọhọ mbet esie ẹdọhọ mme owo oro ẹsụhọde ẹtie ke otu ke otu. Ndusụk otu, owo 50 mbon eken owo 100. Enye ọbọ uyo ition ye iyak iba oro onyụn̄ ọbọn̄ akam. Ekem enye obụn̄ uyo oro onyụn̄ edeme iyak oro ọnọ mme mbet, ndien mmọ ẹdeme ẹnọ mme owo ẹta. Kpukpru owo ẹdia ẹyụhọ!

Ke ẹma ẹkedia ẹma, Jesus ọdọhọ mbet esie ete: “Ẹtan̄ mben̄e emi ẹsụhọde ẹbon ọtọkiet, man n̄kpọ ndomokiet okûtak.” (John 6:12) Se mmọ ẹtan̄de ọyọhọ akpasa 12!