Ẹmụm Edidianakiet Ẹkama Ke Mme Ukperedem Ini Ẹmi
“Ẹdu uwem ke otu mbio-obio mbufo nte odotde ye gospel . . . , ẹsọn̄ọ ẹda ẹnyene spirit kiet, . . . ẹnyụn̄ ẹda esịt kiet ẹn̄wana en̄wan ẹban̄a mbuọtidem emi odude ke gospel.”—PHILIPPI 1:27.
1. Nso ukpụhọde idu ke ufọt Mme Ntiense Jehovah ye ererimbot?
“UKPEREDEM ini” ẹdi emi. Ye unana mfan̄a, “ndiọkeyo” ẹdu idahaemi. (2 Timothy 3:1-5) Ke “utịt ini” emi, ye ndutịme esie ke n̄ka owo, Mme Ntiense Jehovah ẹwọrọ ẹda ata isio isio ke ntak emem ye edidianakiet mmọ. (Daniel 12:4) Edi oyom owo kiet kiet emi odude ke ubon ofụri ererimbot eke mme andituak ibuot nnọ Jehovah an̄wana ọkpọsọn̄ ndimụm edidianakiet emi n̄kama.
2. Nso ke Paul eketịn̄ aban̄a edimụm edidianakiet n̄kama, ndien nso mbụme ke nnyịn idikere iban̄a?
2 Apostle Paul ama ọnọ ekemmọ mme Christian item ete ẹmụm edidianakiet ẹkama. Enye ekewet ete: “Ẹdu uwem ke otu mbio-obio mbufo nte odotde ye gospel Christ, man ye ndidide ndise mbufo ye mmonyụn̄ ndịghe, nyekop mban̄a itie mbufo, nte, mbufo ẹsọn̄ọ ẹda ẹnyene spirit kiet, ke ẹnyụn̄ ẹda esịt kiet ẹn̄wana en̄wan ẹban̄a mbuọtidem emi odude ke gospel; mme asua mbufo ẹkûsịn mbufo ndịk ke idem ke baba n̄kpọ kiet: emi edinyụn̄ edide idiọn̄ọ nsobo ọnọ mmọ, edi edidi idiọn̄ọ edinyan̄a ọnọ mbufo; idiọn̄ọ oro onyụn̄ oto Abasi.” (Philippi 1:27, 28) Mme ikọ Paul ẹwụt in̄wan̄în̄wan̄ nte ke ana nnyịn inam utom ọtọkiet nte mme Christian. Ntre, ndien, nso idin̄wam nnyịn ndimụm edidianakiet Christian nnyịn n̄kama ke mme ini afanikọn̄ ẹmi?
Sụk Ibuot nọ Uduak Abasi
3. Ini ewe ndien didie ke mme akpa Gentile oro mîkanaha mbobi ẹkekabade ẹdi mme anditiene Christ?
3 Usụn̄ kiet ndimụm edidianakiet nnyịn n̄kama edi ndisụk ibuot nnọ uduak Abasi kpukpru ini. Emi ekeme ndiyom inam edinen̄ede ke ekikere nnyịn. Kere ban̄a mme akpa mbet Jesus Christ ẹkedide mme Jew. Ke ini apostle Peter ke akpa ọkọkwọrọde ikọ ọnọ mme Gentile oro mîkanaha mbobi ke 36 E.N., Abasi ama ọnọ mme owo eke mme idụt ẹmi edisana spirit, ndien ẹma ẹnịm mmọ baptism. (Utom, ibuot 10) Tutu osịm ini oro, sụk mme Jew, mme okpono Abasi ke ido mme Jew ke Ido Ukpono Mme Jew, ye mbon Samaria ẹkekabade ẹdi mme anditiene Jesus Christ.—Utom 8:4-8, 26-38.
4. Ke ama akanam an̄wan̄a se ikadade itie kaban̄a Cornelius, nso ke Peter ọkọdọhọ, ndien nso idomo ke emi akada ọsọk mme mbet Jesus oro ẹkedide mme Jew?
4 Ke ini mme apostle ye nditọete eken ke Jerusalem ẹkekopde ẹban̄a edikabade esịt Cornelius ye mme Gentile eken, mmọ ẹma ẹnyene udọn̄ ndikop mbụk oro Peter ọkọnọde. Ke ama akanam an̄wan̄a se ikadade itie kaban̄a Cornelius ye mme Gentile eken oro ẹkenịmde ke akpanikọ, apostle oro ama eberi ye mme ikọ ẹmi ete: “Mmọdo edieke Abasi ọnọde mmọ [mme Gentile oro ẹnịmde ke akpanikọ] kpa orụk enọ [edisana spirit] emi Enye ọkọnọde nnyịn ke adan̄aemi nnyịn inịmde Ọbọn̄ Jesus Christ ke akpanikọ, ami ndi anie nte n̄kpọbiọn̄ọde Abasi?” (Utom 11:1-17) Emi ama esịn mme Jew ẹmi ẹkedide mme anditiene Christ ke idomo. Nte mmọ ẹyesụk ibuot ẹnọ uduak Abasi ẹnyụn̄ ẹnyịme mme Gentile oro ẹkenịmde ke akpanikọ do nte ekemmọ mme andituak ibuot? Mîdịghe nte ẹyesịn edidianakiet mme asan̄autom Jehovah eke isọn̄ ke itiendịk?
5. Didie ke mme apostle ye nditọete eken ẹkenam n̄kpọ ẹban̄a akpanikọ oro nte ke Abasi ama ayak mme Gentile ẹkabade esịt, ndien nso ke nnyịn ikeme ndikpep nto edu emi?
5 Mbụk oro ọdọhọ ete: “Edi ke ini mmọ [mme apostle ye nditọete eken] ẹkopde n̄kpọ emi, mmọ ẹdop uyo, ẹnyụn̄ ẹnọ Abasi itoro, ẹte, Ama edi ntre ndien, Abasi ayak mme Gentile n̄ko ẹkabade esịt ẹdụk uwem.” (Utom 11:18) Edu oro ama ekpeme onyụn̄ esịn udọn̄ ọnọ edidianakiet eke mme anditiene Jesus. Ke esisịt ini kpọt, utom ukwọrọikọ ama aka iso ke otu mme Gentile, m̀mê mme owo eke mme idụt, ndien edidiọn̄ Jehovah ama odu ke utọ utom oro. Nnyịn ke idem nnyịn ikpenyene ndinyịme ke ini ẹyomde edidianakiet nnyịn ke n̄kpọ aban̄ade edisiak obufa esop m̀mê ke ini ẹnamde ndusụk edinen̄ede ukara Abasi ke idak ndausụn̄ edisana spirit Abasi. Edidianakiet ofụri esịt nnyịn eyenem Jehovah esịt eyenyụn̄ an̄wam nnyịn ndimụm edidianakiet nnyịn n̄kama ke mme utịt usen ẹmi.
Ẹsọn̄ọ Ẹyịre ke Akpanikọ
6. Nso utịp ke akpanikọ enyene ke edidianakiet eke mme andituak ibuot nnọ Jehovah?
6 Nte ubak ubon Jehovah eke mme andituak ibuot, nnyịn imomụm edidianakiet ikama koro kpukpru nnyịn idi mbon oro ‘Jehovah ekpepde’ inyụn̄ isọn̄ọ imụm akpanikọ esie oro ẹyararede ikama. (John 6:45; Psalm 43:3) Sia mme ukpepn̄kpọ nnyịn ẹkọn̄ọde ke Ikọ Abasi, kpukpru nnyịn itịn̄ ikọinua kiet. Nnyịn ke idatesịt imesibọ udia eke spirit emi ẹnamde odu ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Utọ ukpepn̄kpọ oro asan̄ade kiet mi esin̄wam nnyịn ndimụm edidianakiet nnyịn eke ofụri ererimbot n̄kama.
7. Edieke odude akpan n̄kpọ oro ọsọn̄de ndin̄wan̄a nnyịn owo kiet kiet, nso ke ikpanam, ndien nso ke nnyịn mîkpanamke?
7 Nso edieke nnyịn owo kiet kiet inyenede mfịna ndifiọk m̀mê ndinyịme ndusụk n̄kpọ? Nnyịn ikpenyene ndibọn̄ akam nyom ọniọn̄ nnyụn̄ nnam ndụn̄ọde ke N̄wed Abasi ye mme n̄wed Christian. (Mme N̄ke 2:4, 5; James 1:5-8) Edinyene nneme ye ebiowo ekeme ndin̄wam. Edieke n̄kpọ oro mîsụk in̄wan̄ake, ọkpọfọn ndiyak n̄kpọ oro ebet kan̄a. Ndusụk ẹyemịn̄ ntọt efen efen ke ibuot nneme oro, ndien adan̄aoro ifiọk nnyịn eyetara. Nte ededi, akpakwan̄a ndidomo ndikpek mbon en̄wen ke esop ndinyịme isio isio ekikere nnyịn. Emi ọkpọwọrọ nditọ ubahade, idịghe ndinam utom ndimụm edidianakiet n̄kama. Ọfọn didie ntem ‘ndika iso nsan̄a ke akpanikọ’ nnyụn̄ nsịn udọn̄ nnọ mbon en̄wen ndinam ntre!—3 John 4.
8. Nso edu odot ndinyene mban̄a akpanikọ?
8 Ke akpa isua ikie, Paul ọkọdọhọ ete: “Idahaemi nnyịn imokụt n̄kpọ ntre ntịmede-ntịmede, nte owo okụtde n̄kpọ ke ukụtiso: edi adan̄aoro iyekụt n̄kpọ iso ye iso; idahaemi mmọfiọk n̄kpọ ubak-ubak, edi adan̄aoro nyefiọk ọyọhọ-ọyọhọ, kpa nte ẹfiọkde mi.” (1 Corinth 13:12) Okposụkedi mme akpa Christian mîkọfiọkke kpukpru n̄kpọ ọyọhọ ọyọhọ, mmọ ẹma ẹka iso ẹdiana kiet. Nnyịn idahaemi imenyene ifiọk uduak Jehovah ye eke Ikọ esie oro an̄wan̄ade akan. Ẹyak nnyịn ke ntre iwụt esịtekọm iban̄a akpanikọ oro nnyịn ibọde ebe ke “asan̄autom emi anamde akpanikọ.” Ẹnyụn̄ ẹyak nnyịn idat esịt nte ke Jehovah ada nnyịn usụn̄ ebe ke esop esie. Okposụkedi nnyịn kpukpru ini mîsinyeneke ukem udomo ifiọk, nnyịn ikopke biọn̄ m̀mê nsatitọn̄ eke spirit. Utu ke oro, Ekpemerọn̄ nnyịn, Jehovah, amadian nnyịn ọtọkiet omonyụn̄ ese aban̄a nnyịn nte ọfọnde.—Psalm 23:1-3.
Da Edeme Nam N̄kpọ Nte Ọfọnde!
9. Didie ke ẹkeme ndida edeme nnam n̄kpọ ndisịn udọn̄ nnọ edidianakiet?
9 Ndida edeme nnam n̄kpọ ke ndisịn udọn̄ nnọ mbon en̄wen edi akpan usụn̄ kiet ndisịn udọn̄ nnọ edidianakiet ye edu otu nditọete. Leta oro ekebierede mfịna una mbobi, oro otu ukara eke akpa isua ikie ọkọnọde, ekedi n̄kpọ nsịnudọn̄. Ke ẹma ẹkekot enye, mme mbet ẹkedide Gentile ke Antioch ‘ẹma ẹdara ke ndọn̄esịt oro.’ Judas ye Silas, ẹmi ẹkesiode ke Jerusalem ẹdọn̄ ye leta oro, ẹma “ẹtịn̄ ediwak ikọ, ẹnọ nditọ-ete item, ẹnyụn̄ ẹsọn̄ọ mmọ idem.” Nte eyịghe mîdụhe, Paul ye Barnabas n̄ko ndidu do ama ọnọ nsịnudọn̄ onyụn̄ ọsọn̄ọ ekemmọ mme andinịm ke akpanikọ idem ke Antioch. (Utom 15:1-3, 23-32) Nnyịn imekeme ndinam ekese ukem ntre ke ini nnyịn isopde idem kaban̄a mme mbonoesop Christian inyụn̄ ‘isịn udọn̄ inọ kiet eken’ ebe ke nnyịn ndidu do ye ke mme ibọrọ nnyịn oro ẹbọpde-bọp.—Mme Hebrew 10:24, 25.
10. Man imụm edidianakiet ikama, nso idi se ẹkemede ndinam edieke isụn̄i otịbede?
10 Nte ededi, ndida edeme nnam n̄kpọ ke idiọk usụn̄ ekeme ndisịn edidianakiet nnyịn ke itiendịk. Mbet oro James ekewet ete: “Edeme edi ekpri ndido, edi enye obụre ata akamba mbụre. Se nte ata ekpri ikan̄ obuberede ata akwa akai.” (James 3:5) Jehovah asasua mbon oro ẹdemerede utọk. (Mme N̄ke 6:16-19) Utọ ikọ oro ekeme ndida unana edidianakiet edi. Ntre, ndien, nso edieke ẹsụn̄ide isụn̄i, oro edi, ẹnamde n̄kpọ esuene ye owo m̀mê ẹtịn̄de ikọ usọn̄enyịn ye enye? Mbiowo ẹyedomo ndin̄wam anamidiọk oro. Nte ededi, ẹkpenyene ndisio osụn̄i isụn̄i oro mîkabakede esịt mfep man ẹkpemụm emem, ndutịm, ye edidianakiet esop ẹkama. Kamse, Paul ama ewet ete: “Ẹkûdụk ndụk ye owo ekededi emi ẹkotde enye eyen-ete, emi edide . . . owo idiọk inua . . . ; ẹkûnyụn̄ ẹdia n̄kpọ ye orụk owo oro.”—1 Corinth 5:11.
11. Ntak emi nsụhọdeidem edide akpan n̄kpọ edieke nnyịn iketịn̄de n̄kpọ emi adade mfịna edi ke ufọt nnyịn ye ekemmọ andinịm ke akpanikọ?
11 Ndifara edeme an̄wam nnyịn ndimụm edidianakiet n̄kama. (James 3:10-18) Edi edieke ikọ oro iketịn̄de adade mfịna edi ke ufọt nnyịn ye ekemmọ Christian. Nte ikpenenke ndinam usio-ukot ke ndinam emem ye eyenete nnyịn, ikpede ubọk edieke oro edide se ẹyomde? (Matthew 5:23, 24) Edi akpanikọ, emi oyom nsụhọdeidem, m̀mê nsụhọde esịt, edi Peter ama ewet ete: “Ẹbọbọ nsụk-idem ke idem nte mbọbọ, ẹnam n̄kpọ ẹnọ kiet eken: koro Abasi an̄wan̄wana ye mbon iseri, edi ọfọn ido ye mbon nsụkidem.” (1 Peter 5:5) Nsụhọdeidem eyenụk nnyịn ‘ndibịne emem’ ye nditọete nnyịn, inyịmede ndudue nnyịn inyụn̄ inamde n̄kpeubọk oro odotde. Emi an̄wam ke ndimụm edidianakiet ubon Jehovah n̄kama.—1 Peter 3:10, 11.
12. Didie ke ikeme ndida edeme nnam n̄kpọ ndisịn udọn̄ nnọ nnyụn̄ mmụm edidianakiet ikọt Jehovah n̄kama?
12 Nnyịn imekeme ndifori edu ubon ke otu mbon oro ẹdude ke esop Jehovah edieke nnyịn idade edeme nnyịn inam n̄kpọ nte ọfọnde. Sia oro edide se Paul akanamde, enye ama ekeme nditi mbon Thessalonica ete: “Mbufo ẹmenyụn̄ ẹfiọk ẹte, nnyịn ikanam n̄kpọ ye mbufo, kpa nte ete anamde n̄kpọ ye nditọ esie mmọ; ikọnọ mbufo item, inyụn̄ isọn̄ọ mbufo esịt, inyụn̄ isọn̄ọ inọ mbufo uyo, man mbufo ẹsan̄a ẹdu uwem nte odotde Abasi.” (1 Thessalonica 2:11, 12) Ke onịmde eti uwụtn̄kpọ ke afan̄ emi, Paul ama ekeme ndikpak ekemmọ mme Christian ete “ẹsọn̄ọ mbon iduọ-esịt idem.” (1 Thessalonica 5:14) Kere adan̄a eti n̄kpọ oro nnyịn ikemede ndinam ebe ke ndida edeme nnyịn ndọn̄ owo esịt, nsịn udọn̄ nnọ owo, nnyụn̄ nnam mmọ en̄wen ẹkọri. Ih, “ikọ ke ekem ini nsifọn ntem.” (Mme N̄ke 15:23) Akan oro, mme utọ ikọ oro ẹsin̄wam ndisịn udọn̄ nnọ nnyụn̄ mmụm edidianakiet ikọt Jehovah n̄kama.
Fen Nọ!
13. Ntak emi nnyịn ikpefende inọ owo?
13 Ndifen nnọ andidue emi ekpede ubọk edi akpan n̄kpọ edieke anade nnyịn imụm edidianakiet Christian ikama. Ndien nnyịn ikpefen awak ini adan̄a didie? Jesus ọkọdọhọ Peter ete: “Ndọhọke fi nte, tutu osịm utịm ikatiaba, edi tutu osịm ikatiaba ke itie ata ye duop.” (Matthew 18:22) Edieke nnyịn mîwụtke edifen nnọ, nnyịn ke idem nnyịn idibọhọ ufọn. Didie ke edi ntre? Ọfọn, usua ye edikama udu eyebọ nnyịn emem eke ekikere. Ndien edieke ẹdiọn̄ọde nnyịn nte isinamde n̄kpọ ke ibak ibak usụn̄ unana edifen, nnyịn imekeme ndida ndutụhọ isọk idem nnyịn. (Mme N̄ke 11:17) Ndikama udu inemke Abasi esịt ndien ekeme ndida n̄kosịm akwa idiọkn̄kpọ. (Leviticus 19:18) Ti ete ke ẹkebịghi John Andinịm Owo Baptism ibuot ke ntak idiọk uduak emi idiọk Herodias akaduakde, emi ‘akayatde esịt’ ye enye.—Mark 6:19-28.
14. (a) Nso ke Matthew 6:14, 15 ekpep nnyịn aban̄a edifen nnọ? (b) Nte ana nnyịn ibet tutu ẹkpekpe nnyịn ubọk kpukpru ini mbemiso ifende inọ owo?
14 Akam uwụtn̄kpọ Jesus esịne mme ikọ ẹmi: “Nyụn̄ dahado ke mme idiọk-n̄kpọ nnyịn, koro nnyịn ke idem nnyịn idahadedo inọ kpukpru owo emi ẹkamade nnyịn isọn.” (Luke 11:3b, 4) Edieke nnyịn mîdahakedo inọ owo, n̄kpọndịk odu nte ke usen kiet Jehovah idifenke idiọkn̄kpọ nnyịn aba, koro Jesus ọkọdọhọ ete: “Edieke mbufo ẹdahadedo ẹnọ owo ke ndudue mmọ, Ete mbufo ke heaven eyenyụn̄ adahado ọnọ mbufo. Edi edieke mbufo mîdahakedo inọ owo ke ndudue mmọ, Ete mbufo idinyụn̄ idahakedo ke ndudue mbufo.” (Matthew 6:14, 15) Ntre edieke nnyịn inen̄erede iyom ndinam udeme nnyịn ke ndimụm edidianakiet n̄kama ke ubon Jehovah eke mme andituak ibuot, nnyịn iyefen, ndusụk ikam ifrede ndudue oro ekemede ndidi okoto ntak unana editịm n̄kere mînyụn̄ inyeneke idiọk uduakesịt. Paul ọkọdọhọ ete: “Ẹme ime ye kiet eken, ẹnyụn̄ ẹfen kiet eken, edieke owo mbufo ekededi enyenede ikọ ye owo; kpa nte Ọbọn̄ ekefende mbufo, ẹfen mmọ en̄wen kpasụk ntre.” (Colossae 3:13) Ke ini nnyịn ifende owo, nnyịn iman̄wam ndimụm ọsọn̄urua edidianakiet esop Jehovah n̄kama.
Edidianakiet ye Ọkpọkpọ Ubiere
15. Nso in̄wam ikọt Jehovah ndimụm edidianakiet n̄kama ke ini ẹnamde mme ọkpọkpọ ubiere?
15 Abasi akanam nnyịn ndidi mbon oro ibierede n̄kpọ inọ idem nnyịn emi inyenede ifet ye mbiomo edinam ọkpọkpọ ubiere. (Deuteronomy 30:19, 20; Galatia 6:5) Edi, nnyịn ikeme ndimụm edidianakiet nnyịn n̄kama koro nnyịn inamde mme ibet ye mme edumbet Bible. Nnyịn imesikere iban̄a mmọ ke ini inamde mme ọkpọkpọ ubiere. (Utom 5:29; 1 John 5:3) Yak idọhọ ke mbụme edemede aban̄a edida san̄asan̄a. Nnyịn imekeme ndinam ọkpọkpọ ubiere oro esịnede ifiọk ebe ke nditi nte ke nnyịn “idịghe eke ererimbot” ye nte ke ima ‘ida ofụt nnyịn idom n̄kpọ ufụn̄isọn̄.’ (John 17:16; Isaiah 2:2-4) Ukem ntre, ke ini anade inam ọkpọkpọ ubiere aban̄ade itie ebuana nnyịn ye Ukara, nnyịn ikere iban̄a se Bible etịn̄de aban̄a edinọ “Abasi se inyenede Abasi,” ke adan̄aemi isụkde idem inọ “mme enyene-odudu ẹmi ẹkarade” ke mme n̄kpọ ererimbot. (Luke 20:25; Rome 13:1-7; Titus 3:1, 2) Ih, edikere mban̄a mme ibet ye mme edumbet Bible ke ini inamde mme ọkpọkpọ ubiere esin̄wam ndimụm edidianakiet Christian nnyịn n̄kama.
16. Didie ke nnyịn ikeme ndin̄wam ndimụm edidianakiet n̄kama ke ini inamde mme ubiere oro ibet ye edumbet N̄wed Abasi mîbuanake? Nam an̄wan̄a.
16 Nnyịn imekeme ndin̄wam ndimụm edidianakiet Christian n̄kama idem ke ini inamde ubiere oro ẹdide ọkpọkpọ ubiere mînyụn̄ ibuanake ibet m̀mê edumbet N̄wed Abasi. Didie ke edi ntre? Ebe ke ndiwụt ima ima edikere mban̄a nnọ mbon en̄wen ẹmi ubiere nnyịn ekemede nditụk. Ke ndinam an̄wan̄a: Ke esop eke Corinth eset, mbụme ama edemede kaban̄a unam oro ẹkewade ẹnọ ndem. Nte ededi, Christian iditieneke ibuana ke usọrọ ukpono ndem. Nte ededi, ikedịghe idiọkn̄kpọ ndita unam oro ẹkewotde ke usụn̄ oro ọfọnde emi okosụhọde oro ẹkenyamde ke urua. (Utom 15:28, 29; 1 Corinth 10:25) Edi, ubieresịt ama afịna ndusụk Christian aban̄a edita unam emi. Paul ke ntre ama akpak mme Christian eken ete ẹtre ndinam mmọ ẹtuak ukot ẹduọn̄ọ. Ke akpanikọ, enye ekewet ete: “Edieke unam edisịnde eyen-ete mi atuak ukot ọduọ, nditaha unam tutu amama, mbak ndinam eyen-ete mi atuak ukot ọduọ.” (1 Corinth 8:13) Ntre idem edieke ibet ye edumbet Bible ekededi mîbuanake, edi ima ima n̄kpọ didie ntem ndikere mban̄a mbon en̄wen ke ini inamde mme ọkpọkpọ ubiere oro ẹkemede nditụk edidianakiet ubon Abasi!
17. Owụt ifiọk ndinam nso ke ini anade nnyịn inam mme ọkpọkpọ ubiere?
17 Edieke nnyịn mîtịmke ifiọk se ikpanamde, owụt ifiọk ndibiere n̄kpọ ke usụn̄ oro anamde nnyịn inyene edisana ubieresịt, ndien mbon en̄wen ẹkpenyene ndikpono ubieresịt nnyịn. (Rome 14:10-12) Nte ededi, ke ini anade inam ọkpọkpọ ubiere, nnyịn ikpenyene ndiyom ndausụn̄ Jehovah ke akam. Ukem nte andiwet psalm, nnyịn imekeme ndibọn̄ akam ye mbuọtidem ite: “Kpan̄ utọn̄ fo nọ mi; . . . Koro afo edide akwa itiat mi ye edikon̄ ufọk mi; teme mi nsan̄a ke usụn̄, ndien, ban̄a enyịn̄ fo.”—Psalm 31:2, 3.
Mụm Edidianakiet Christian Kama Kpukpru Ini
18. Didie ke Paul akanam edidianakiet esop Christian an̄wan̄a?
18 Ke 1 Corinth ibuot 12, Paul akada idem owo ndinam edidianakiet esop Christian an̄wan̄a. Enye ama ọsọn̄ọ etịn̄ aban̄a ediberi edem ye kiet eken ye nte ndido kiet kiet edide akpan n̄kpọ. Paul ama obụp ete: “Edi edieke mmọ kpukpru ẹkpedide ndido kiet, ikpọkidem enye? Edi nte n̄kpọ ẹbonode ke emi, ndido ẹwak, edi ikpọkidem edi kiet. Enyịn ikemeke ndidọhọ ubọk, ete, Nyomke fi; ibuot inyụn̄ ikemeke ndidọhọ ukot, ete, Nyomke mbufo.” (1 Corinth 12:19-21) Ukem ntre, idịghe kpukpru nnyịn ke ubon eke mme andituak ibuot nnọ Jehovah inam ukem utom. Edi, nnyịn imadiana kiet, nnyịn imonyụn̄ iyom kiet eken.
19. Didie ke nnyịn ikeme ndibọ ufọn nto mme ndutịm eke spirit oro Abasi anamde, ndien nso ke akamba eyenete kiet eketịn̄ aban̄a emi?
19 Nte ikpọkidem oyomde udia, ntịn̄enyịn, ye ndausụn̄, nnyịn imoyom mme ndutịm eke spirit oro Abasi ọnọde nnyịn ebe ke Ikọ, spirit, ye esop esie. Man ibọ ufọn ito mme ndutịm ẹmi, ana nnyịn idi ubak ubon Jehovah eke isọn̄. Ke ama akanam utom Abasi ke ediwak isua, eyenete kiet ama ewet ete: “Mmokop inemesịt etieti nte ke mmodu uwem ekekem ye ifiọk uduak Jehovah toto ke mme ntọn̄ọ ntọn̄ọ usen oro esisịt ini mbemiso 1914 ke ini emi kpukpru n̄kpọ mîketịmke in̄wan̄a . . . tutu osịm mfịn emi akpanikọ ayamade nte utịn uwemeyo. Edieke odude n̄kpọ oro edide ata akpan n̄kpọ ọnọ mi, enye edi n̄kpọ aban̄ade edisịk n̄kpere esop Jehovah oro ẹkụtde ke enyịn. Ntọn̄ọ ntọn̄ọ ifiọk n̄kpọntịbe mi ama ekpep mi adan̄a nte mîwụtke ifiọk ndiberi edem ke ekikere owo. Ndondo oro esịt mi ebierede n̄kpọ oro, mma mbiere ndidu ye esop oro anamde akpanikọ. Ewe usụn̄ efen ke owo ekeme ndinyene mfọn ye edidiọn̄ Jehovah?”
20. Nso ke nnyịn ikpebiere ndinam mban̄a edidianakiet nnyịn nte ikọt Jehovah?
20 Jehovah omokot ikọt esie osio ke ekịm ye unana edidianakiet ererimbot. (1 Peter 2:9) Enye amada nnyịn edisịn ke eti itie edidianakiet ye enye ye ekemmọ mme andinịm ke akpanikọ. Edidianakiet emi eyedu ke obufa editịm n̄kpọ oro otịmde ekpere mi kemi. Ke ntre, ke ndiọkeyo ukperedem ini ẹmi, ẹyak nnyịn ika iso ‘isịne ima’ inyụn̄ inam ofụri se ikekeme ndisịn udọn̄ nnọ nnyụn̄ mmụm ọsọn̄urua edidianakiet nnyịn n̄kama.—Colossae 3:14.
Didie ke Afo Ọkpọbọrọ?
◻ Ntak emi edinam uduak Abasi ye ediyịre ye akpanikọ ekemede ndin̄wam nnyịn ndimụm edidianakiet n̄kama?
◻ Didie ke edidianakiet enyene ebuana ye edida edeme nnam n̄kpọ nte enende?
◻ Nso ibuana ke ndifen nnọ owo?
◻ Didie ke nnyịn ikeme ndimụm edidianakiet n̄kama ke ini inamde mme ọkpọkpọ ubiere?
◻ Ntak imụmde edidianakiet Christian ikama?
[Ndise ke page 16]
Kpa nte ekpemerọn̄ emi onịmde otuerọn̄ esie ọtọkiet, ntre Jehovah adian ikọt esie ọtọkiet
[Mme Ndise ke page 18]
Ebede ke ndisụhọde idem n̄kpe ubọk ke ini nnyịn iduede, nnyịn in̄wam ndisịn udọn̄ nnọ edidianakiet