7. Eren oro ke uwụtn̄kpọ Jesus ekese aban̄a mfịna esie didie?

⁷ Ke uwụtn̄kpọ Jesus oro, nso ke eren oro akanam ke ini in̄wan̄ esie okon̄wụmde n̄kpọ tutu enye inyeneke ebiet emi okpobonde idọk esie? Enye ama ọdọhọ ke imọn̄ iwụri ufọk ubonn̄kpọ imọ inyụn̄ ibọp ikpọ ufọk ubonn̄kpọ man ikpatan̄ kpukpru mfri ye nti n̄kpọ imọ idọn̄. Etie nte emi ama anam enye ekere ke imọ idinyeneke mfịna ke ini iso, onyụn̄ okop inemesịt tutu oro anam enye ekere ete: “Nyọdọhọ ukpọn̄ mi nte: ‘Ukpọn̄, afo emenyene ediwak nti n̄kpọ emi obonde ọnọ ediwak isua; duọk odudu, dia, n̄wọn̄, kop inemesịt.’”—Luke 12:19.

Ntak Emi Enye ‘Ananade Ibuot’?

8. Nso akpan n̄kpọ ke eren oro ke uwụtn̄kpọ Jesus okofụmi?

⁸ Nte ededi, nte Jesus okobonde ikọ owụt ke nte eren oro akaduakde n̄kpọ ama anam enye ekere ke imọ idinyeneke mfịna ke ini iso. Okposụkedi uduak esie eketiede nte enen̄ede ọfọn, enye ama ofụmi ata akpan n̄kpọ—oro edi, uduak Abasi. Eren emi ekekere aban̄a idemesie ikpọn̄-ikpọn̄, nte imọ idikemede ndinyene ifụre nnyụn̄ ndia, n̄n̄wọn̄, nnyụn̄ nnọ uwem se uwem oyomde. Enye ekekere ke sia imọ inyenede “ediwak nti n̄kpọ,” ke emi n̄ko ayanam imọ idu uwem “ediwak isua.” Edi mbọm esie do, ikedịghe nte enye ekekerede. Kpa nte Jesus ekebemde iso etịn̄, “idem ke ini owo enyenede n̄kpọ barasuene, uwem esie itoho ke mme n̄kpọ emi enye enyenede.” (Luke 12:15) Kpa ke okoneyo oro, kpukpru n̄kpọ oro eren oro ọkọkọde obon ikenyeneke aba ufọn inọ enye, koro Abasi akasian enye ete: “Afo anana-ibuot owo, ẹyekpak ukpọn̄ fo ke ubọk fo ke okoneyo emi. Anie, ndien, edinyene mme n̄kpọ eke afo ọkọkọde obon?”—Luke 12:20.

10. Ntak emi edinyene “ediwak nti n̄kpọ” mîwọrọke ke owo oyodu uwem “ediwak isua”?

¹⁰ Oyom nnyịn inen̄ede itie ikere se emi ekpepde nnyịn. Ndi nnyịn itie nte eren oro ke uwụtn̄kpọ oro—oro edi, inam utom ọkpọsọn̄ man ikụt ite ke imenyene “ediwak nti n̄kpọ” edi itre ndinam n̄kpọ oro anade inam man inyene idotenyịn ndidu uwem “ediwak isua”? (John 3:16; 17:3) Bible ọdọhọ ete: “Inyene ididoroke ke usen iyatesịt,” n̄ko “owo eke ọbuọtde idem ke inyene esie ọyọduọ.” (Mme N̄ke 11:4, 28) Mmọdọ, Jesus ama adian akpatre item emi ke uwụtn̄kpọ oro: “Ntem ke etie ye owo eke ọkọde n̄kpọuto obon ọnọ idemesie edi mînyeneke inyene ke n̄kan̄ Abasi.”—Luke 12:21.