Uyai Oro Mîkpaha Mmọn̄

“UYAI omosop; uyai emebe efep,” ntre ke ewet-uto oro, Walter De la Mare, ọkọdọhọ. Emi ke akpanikọ edi ntre ye ata ndiye frawa cactus oro ẹwụtde mi. Ubọn̄ mmọ esisọp akpa mmọn̄.

Christian mbet oro James ekewet ete: “Nte ndiye ikọn̄ ikọt ke owo inyene eyebe efep. Koro utịn asiahade asan̄a ye ufiop ufiop ofụm ọfọp mbiet; ndien ndiye ikọn̄ esie ẹkịbe ẹduọn̄ọ, uyai mmọ onyụn̄ abiara: ntre ke owo inyene edinyụn̄ eyemede ke mbubịne esie.”—James 1:10, 11.

Ke anana-iwụk ererimbot emi, inyene ke akpanikọ ekeme ndisop ke okoneyo kiet. Akande oro, owo inyene—ukem nte kpukpru owo eken—‘omụhọ usen, nte ikọn̄.’ (Job 14:1, 2) Jesus ama otop n̄ke aban̄a owo oro ekesịnde idem ndikọ inyene mbon man enye okposụhọde etie ọduọk odudu. Edi ke ini enye ekekerede ke imọ ima inyene kpukpru n̄kpọ oro iyomde kaban̄a inem uwem, enye ama akpa. Jesus ama odụri owo utọn̄ ete: “Ntem ke etie ye owo eke ọkọde inyene ọnọ idemesie, edi mînyeneke inyene ke n̄kan̄ Abasi.”—Luke 12:16-21.

“Inyene ke n̄kan̄ Abasi.” Ikọ Jesus oro ọkọwọrọ nso? Owo emi enyenede inyene ke usụn̄ emi enyene ‘n̄kpọuto ke heaven’—kpa eti enyịn̄ ye Abasi. Utọ n̄kpọuto emi ikpaha mmọn̄ tutu amama. (Matthew 6:20; Mme Hebrew 6:10) Utu ke nditie nte frawa oro eyemerede, ke Bible ẹmen utọ owo oro ẹdomo ye eto, emi ikọn̄ esie mîken̄eke. Ndien, nte ẹsọn̄ọde ẹnọ nnyịn, “kpukpru se enye anamde ọwọrọ usụn̄.”—Psalm 1:1-3, 6.