Ndise Mban̄a Inyene Eteufọk

¹ Ke mme ini Bible akama-ukpọhọde akakama akwa ifetutom. Abraham ama ọnọ akama-ukpọhọde esie utom ediyom n̄wan nnọ eyen esie, Isaac. (Gen. 24:1-4) Ke nditịm ntịn̄, akama-ukpọhọde oro ekenyene mbiomo edikụt nte ke udịm ubon Abraham aka iso. Nso mbiomo ke emi ekedi ntem! Eyịghe idụhe apostle Paul ọkọdọhọde ete: “Ẹyom ẹte mme akama-ukpọhọde ẹdi mme anam-akpanikọ”!—1 Cor. 4:2.

Itie Akama-Ukpọhọde Christian

² Ẹtịn̄ ẹban̄a ndusụk ikpehe utom ukwọrọikọ Christian ke Bible nte edikama ukpọhọde. Ke uwụtn̄kpọ, apostle Paul ama etịn̄ ọnọ mbon Ephesus aban̄a ‘ufọn emi Abasi ekesịnde enye ke ubọk ete ada akama ọnọ mmọ.’ (Eph. 3:2; Col. 1:25) Enye akada utom esie ndida eti mbụk nsọk mme idụt nte edikama ukpọhọde oro enye ekenyenede ndikama ke edinam akpanikọ. (Utom 9:15; 22:21) Apostle Peter ama ewet ọnọ nditọete esie oro ẹyetde aran ete: “Ẹda kiet eken ẹdụk ufọk, ẹkûsụk uyo. Adan̄a nte mbufo kiet kiet ẹma ẹkebọ enọ ke ubọk Abasi, ẹda ẹnam n̄kpọ ẹnọ kiet eken nte nti mme akama-ukpọhọde nsio-nsio ufọn Abasi.” (1 Pet. 4:9, 10; Heb. 13:16) Se ededi oro mme Christian akpa isua ikie oro ẹkenyenede ke n̄kan̄ obụkidem ekedi utịp mfọn Jehovah oro owo mîdotke. Ke ntre, mmọ ẹkedi mme andikama mme n̄kpọ oro ama onyụn̄ oyom ẹda mmọ ẹnam n̄kpọ ke usụn̄ Christian.

³ Mfịn, Mme Ntiense Jehovah ẹse mme n̄kpọ ke ukem usụn̄ oro. Mmọ ẹma ẹyak idemmọ ẹnọ Jehovah Abasi ẹnyụn̄ ẹse kpukpru se mmọ ẹnyenede—uwem mmọ, ukeme mmọ, inyene mmọ—nte utịp “nsio-nsio ufọn Abasi.” Nte nti mme akama-ukpọhọde, mmọ ẹnam ibat ẹnọ Jehovah Abasi ke nte mmọ ẹdade mme n̄kpọ ẹmi ẹnam n̄kpọ. Ke adianade do, ẹnọ mmọ ifiọk aban̄ade eti mbụk. Emi n̄ko edi enọ emi ọdọn̄de mmọ ndida nnam n̄kpọ ke mfọnn̄kan usụn̄ oro ẹkemede: nditoro enyịn̄ Jehovah ndinyụn̄ n̄n̄wam mbon efen ẹdibọ ifiọk akpanikọ.—Matt. 28:19, 20; 1 Tim. 2:3, 4; 2 Tim. 1:13, 14.

⁴ Didie ke Mme Ntiense Jehovah ẹnam utom mmọ nte mme akama-ukpọhọde? Ibatutom eke isua ke isua owụt ete ke isua oko kpọt, ke ofụri ererimbot mmọ ẹma ẹbiat se ibede biliọn hour kiet ndikwọrọ “gospel Ubọn̄ Abasi” ẹnyụn̄ ẹnịm se ibede ukpepn̄kpọ Bible 4,500,000 ye mme owo oro ẹnyenede udọn̄. (Matt. 24:14) Etịbe ntatubọk mmọ kaban̄a utom ofụri ererimbot ye ke ndin̄wam mme Ufọkmbono Obio Ubọn̄ n̄kann̄kụk, ediwụt mme esenyịn oro ẹsan̄ade-san̄a ye mbon efen ntatubọk, ye n̄wọrọnda mfọnido mmọ ye mbon oro ẹdude ke unana—utọ nte mbon unọmọ ekọn̄—ẹma ẹwụt edinam akpanikọ mmọ nte mme akama-ukpọhọde Jehovah. Nte otu, mme ata Christian ke ẹse nte ọfọnde ẹban̄a inyene Eteufọk mmọ.

“Akama-Ukpọhọde, Emi Anamde Akpanikọ Onyụn̄ Edide Ọniọn̄”

⁵ Edikama ukpọhọde idụhe ke idaha owo kiet kiet kpọt edi odu n̄ko nte otu. Jesus okokot esop Christian oro ẹyetde aran oro odude ke isọn̄ “akama-ukpọhọde, emi anamde akpanikọ onyụn̄ edide ọniọn̄.” (Luke 12:42) Mbiomo “akama-ukpọhọde, emi anamde akpanikọ” mi edi ndinọ “udia” ndinyụn̄ nda usụn̄ ke edikwọrọ eti mbụk ke ofụri ererimbot. (Edi. 12:17) Enyenede ebuana ke emi, otu akama-ukpọhọde emi anamde akpanikọ, emi Otu Ukara adade ke ibuot esie, enyene mbiomo oro Abasi ọnọde ndikama mme “talent” esie eke spirit ye eke obụkidem nte ọfọnde. (Matt. 25:15) Ke n̄kemuyo ye uwụtn̄kpọ “akama-ukpọhọde, emi anamde akpanikọ,” n̄kọk itieutom kiet kiet esịn ofụri ukeme ndida mme etịbe okụk ke usụn̄ oro ọfọnde nnam udọn̄ n̄kpọ Obio Ubọn̄ aka iso. Ẹnam mme utọ etịbe oro ke ubiọn̄, ndien “akama-ukpọhọde, emi anamde akpanikọ onyụn̄ edide ọniọn̄” enyene mbiomo edikụt nte ke ẹda enye ẹnam uduak emi akanade ẹda ẹnam ye nte ke ẹkama enye ke ọniọn̄, ke ẹfam, ye uforo uforo.

⁶ Ẹkụt uwụtn̄kpọ edikama okụk ẹmi ẹtịpde ke ọniọn̄ ke n̄kọri ke utom umịn̄ n̄wed Mme Ntiense Jehovah ke ọyọhọ isua ikie 20. Edisuan mme Bible ọkọrọ ye mme n̄wed Bible—mme magazine, mme n̄wed, ndiye uduot n̄kpri n̄wed, n̄kpri n̄wed, mme tract, ye Mbụk Obio Ubọn̄—emenyene akpan udeme ke edisuan “gospel” ke “ukperedem ini” emi. (Mark 13:10; 2 Tim. 3:1) Ndien magazine Enyọn̄-Ukpeme edi akpan n̄kpọutom ke ndinọ “mbon ufọk Abasi” ye nsan̄a mmọ, “akwa otuowo” eke “mme erọn̄ en̄wen” “udia ke edikem ini.”—Matt. 24:45; Eph. 2:19; Edi. 7:9; John 10:16.

⁷ Ke ntọn̄ọ ntọn̄ọ, mme emịn̄ n̄wed ke ukpeokụk ẹkesimịn̄ kpukpru n̄wed Mme Ntiense Jehovah. Edi ke iduọk isua 1920, ẹma ẹbiere ẹte ke ekpetịm ọfọn onyụn̄ enyene ufọn ke n̄kan̄ eke spirit edieke mme asan̄autom Jehovah ẹkpemịn̄de n̄wed mmọ. Ọtọn̄ọde ke esisịt udomo ke 1920, utom umịn̄ n̄wed ama ọkọri sụn̄sụn̄ ke Brooklyn, New York, tutu enye akabade okpon. Ke 1967 itieutom umịn̄ n̄wed ama ada itie isọn̄ inan̄. Ẹma ẹtọn̄ọ umịn̄ n̄wed ke mme idụt en̄wen n̄ko, edi ke ata ediwak mmọ, Ekọn̄ Ererimbot II ama ọbiọn̄ọ.

⁸ Inamke n̄kpọ m̀mê ndutịm umịn̄ n̄wed ke United States ọkọkọri adan̄a didie, enye ikpokponke ikem ndinọ ofụri ererimbot n̄wed. Ke ntre, ke mme isua oro ẹketienede ekọn̄ oro, ẹma ẹtịm m̀mê ẹma ẹtọn̄ọ utom umịn̄ n̄wed ke mme idụt efen, esịnede Canada, Denmark, England, Greece, South Africa, Switzerland, ye West Germany. N̄ko ke ntọn̄ọ ntọn̄ọ iduọk isua 1970, ẹma ẹdian Australia, Brazil, Finland, Ghana, Japan, Nigeria, ye Philippines. Ndusụk ke otu idụt ẹmi ẹma ẹnam ikpọ n̄wed n̄ko. Ke ntọn̄ọ ntọn̄ọ iduọk isua 1970, ẹma ẹnọ mme isụn̄utom Gilead ukpep ke usọ umịn̄ n̄wed ẹnyụn̄ ẹnọ ẹka ndusụk ke otu idụt ẹmi ndin̄wam nditọete n̄kann̄kụk ke utom umịn̄ n̄wed.

⁹ Ke iduọk isua 1980, ibat idụt ẹmi ẹmịn̄de magazine ama ọdọk esịm 51.a Nso edida inyene Eteufọk nnam n̄kpọ ke eti usụn̄ ke kpukpru ẹmi ẹkedi ntem! Nso ọkpọsọn̄ uyarade n̄kọri utom Obio Ubọn̄ ke emi edi ntem! Ndien nso okopodudu ikọ ntiense ke emi edi ntem ọnọ ibetedem ntatubọk ediwak miliọn Mme Ntiense Jehovah ẹmi ‘ẹkekponode Jehovah ke inyene mmọ’! (N̄ke 3:9) Ntem, mmọ ẹma ẹwụt idemmọ nte idide nti akama-ukpọhọde n̄kpọ ẹmi Jehovah adade ọdiọn̄ mmọ ke nsio nsio usụn̄.

Ukpụhọde ke Idaha Use N̄kpọ

¹⁰ Ke mme iduọk isua 1970 ye ntọn̄ọ ntọn̄ọ iduọk isua 1980, ẹma ẹnam ikpọ n̄kọri ke ifiọk umịn̄ n̄wed, ndien Mme Ntiense Jehovah ẹma ẹda ata mbufa ifiọk umịn̄ n̄wed. Ke mbemiso, mmọ ẹkeda usụn̄ umịn̄ n̄wed eset. Emi ama okpụhọde nsịtnsịt nte mmọ ẹketọn̄ọde ndida mme usụn̄ umịn̄ n̄wed eke ata ndondo emi. Nte utịp, ẹmịn̄ ndiye n̄wed ye ọyọhọ uduot ndise, utu ke ndise uduot iba (obubịt ye uduot kiet efen) emi ekesinyenede ke akani usụn̄ umịn̄ n̄wed. Ke adianade do, ifiọk ubotn̄kpọ kọmputa ama okpụhọde ofụri edinam kaban̄a edimịn̄ (ntịmidem kaban̄a edimịn̄). Mme Ntiense Jehovah ẹma ẹnam Ndutịm Usion̄o Ikọ ke Uwak Usem ke Ukwakutom Ndise Ilektrik (MEPS), ndutịm kọmputa emi ọnọde edimịn̄ n̄wed ke se ibede nsio nsio usem 370 ibetedem. Ndutịm eke ukpeokụk ndomokiet itiehe nte MEPS ke ukeme esie ndinyene ufọn ke ata ediwak usem ntre.

¹¹ Ke ntak ifiọk ubotn̄kpọ kọmputa MEPS ye edida utọ n̄kpọ eken oro ẹsiode nte edida ilektrọnik nnọ etop, ẹma ẹnam akwa n̄kọri efen ke ndision̄o udia ke edikem ini. Ke ntọn̄ọ, ke ẹdade ifiọk ubotn̄kpọ eset, ẹkemịn̄ mme ntọt ke mme magazine ẹmi mîkedịghe eke Ikọmbakara ke ediwak ọfiọn̄ m̀mê ke isua kiet ama ekebe tọn̄ọ nte ẹkemịn̄ eke Ikọmbakara. Idahaemi, Enyọn̄-Ukpeme odu ke ukem ini ke nsio nsio usem 115, Awake! onyụn̄ odu ke 62. Emi ọwọrọ ke ofụri ererimbot se iwakde ibe mbahade 95 eke ikie ke otu mbon oro ẹsidụkde Ukpepn̄kpọ Enyọn̄-Ukpeme eke urua ke urua eke Mme Ntiense Jehovah ẹkpep ukem ibuotikọ ke ukem ini. Nso edidiọn̄ ke emi edi ntem! Ekenen̄ede edi edida inyene Eteufọk nnam n̄kpọ ke eti usụn̄ ke ndidep kpukpru obufa ifiọk ubotn̄kpọ oro!

Nsio Nsio Udọn̄ Esop

¹² Mbufa ndutịm ẹmi ẹma ẹkpụhọde mme udọn̄ edinam umịn̄ n̄wed Mme Ntiense Jehovah ke ofụri ererimbot. Mme ukwakutom umịn̄ n̄wed web offset ẹnen̄ede ẹsọp ẹkan n̄kani ukwak umịn̄ n̄wed, edi mmọ ẹnen̄ede ẹsọn̄ urua n̄ko. Mme ndutịm kọmputa oro ẹnọde mme utom ẹmi ibetedem, utọ nte ediwewet, edikabade, ediwet ndise, ye editan̄ mbok, ke adan̄aemi ọnọde nti utịp ẹkan n̄kani ndutịm, ẹnen̄ede ẹsọn̄ urua n̄ko. Ama ana in̄wan̄în̄wan̄ nte ke iketịmke imem urua ndimịn̄ mme magazine ke nsio nsio idụt 51. Ntem, ke mme iduọk isua 1990, “akama-ukpọhọde, emi anamde akpanikọ” ama ese mme n̄kpọ ke usụn̄ en̄wen. Nso ikedi ubiere?

¹³ Mme ndụn̄ọde ẹma ẹwụt ẹte ẹyetịm ẹkama “inyene” ẹmi Mme Ntiense Jehovah ye mme ufan mmọ ẹtịpde edieke ẹdiande utom umịn̄ n̄wed ọtọkiet. Ntre ẹma ẹsụhọde ibat n̄kọk itieutom ẹmi ẹmịn̄de n̄wed sụn̄sụn̄. Germany emịn̄ mme magazine ye mme n̄wed ọnọ ediwak idụt ke N̄kan̄ Edem Usiahautịn ye N̄kan̄ Edem Usoputịn Europe, esịnede ndusụk ẹmi ẹkesede ẹban̄a umịn̄ n̄wed mmọ. Italy ọnọ magazine ye mme n̄wed ẹka ndusụk ikpehe Africa ye n̄kan̄ ufọt edem usụk ye edem usiahautịn Europe, esịnede Greece ye Albania. Ke Africa, Nigeria ye South Africa kpọt ẹmịn̄ mme magazine. Ukem edidian ọtọkiet emi ama ada itie ke ofụri ererimbot.

Mme N̄kpọ Ndidomo Nse

¹⁴ Etisịm July 1998, anaedi ẹma ẹtre ndimịn̄ mme magazine ke ndusụk idụt Europe, esịnede Austria, Denmark, France, Greece, Netherlands, ye Switzerland. Britain, Finland, Germany, Italy, Spain, ye Sweden ẹdibiom mbiomo edimịn̄ n̄wed ke Europe. Ke usụn̄ emi, ẹyefep mme ubiatokụk ẹmi mîdịghe se ẹyomde ẹnyụn̄ ẹda mme etịbe ẹnam n̄kpọ ke usụn̄ oro enyenede ufọn akan kaban̄a utom ofụri ererimbot. Didie ke ẹkebiere m̀mê ewe idụt edika iso inam n̄kpọ nte itie umịn̄ n̄wed m̀mê ewe editre ndimịn̄? Ke ndinam ikọ esie ndida ọniọn̄ nse mban̄a inyene Eteufọk nte ọfọnde, “akama-ukpọhọde, emi anamde akpanikọ” ama etịn̄ enyịn odụn̄ọde ekọmurua edimịn̄ n̄wed ke itie kiet kiet.

¹⁵ Akpan ntak emi ẹketrede edimịn̄ n̄wed ke ndusụk idụt ẹkenyụn̄ ẹdiande mmọ ọtọkiet ye mbon en̄wen ekedi ke ntak ufọn oro odude. Ndiyak idụt kiet emịn̄ n̄wed ọnọ ediwak idụt efen etịm ọfọn akan onyụn̄ edi edida mme ọsọn̄urua n̄kpọutom nnam n̄kpọ ke usụn̄ oro ọfọnde. Ẹmịn̄ n̄wed idahaemi ke itie emi ekọmurua osụhọrede akan, mme n̄kpọutom ẹdude, usụn̄ edinọ n̄kpọ ọwọrọ ẹnyụn̄ ẹfọnde. Ntem, ẹda inyene Eteufọk ẹnam n̄kpọ nte ọfọnde. Nte ededi, editre ndimịn̄ n̄wed ke idụt kiet iwọrọke ite ke utom ukwọrọikọ eyetre do. Akpakịp n̄kpọ ẹmi ẹmịn̄de-mịn̄ ẹyesụk ẹdu, ndien ediwak tọsịn Mme Ntiense Jehovah ke mme itie ikie ke mme idụt oro ẹyeka iso ‘ẹkwọrọ emem’ ẹnọ mme mbọhọidụn̄ mmọ ifịk ifịk. (Eph. 2:17) Akan oro, edifiak ntịm emi osụn̄ọ ke mme ufọn efen.

¹⁶ Ke ndisiak ufọn kiet, ẹma ẹnọ ata ediwak ke otu ukwakutom umịn̄ n̄wed eyomfịn ẹtode Denmark, Greece, Netherlands, ye Switzerland ẹka Nigeria ye Philippines. Mme akama ukwakutom nnam utom oro ẹnyenede usọ ẹtode mme idụt Europe ẹma ẹnyịme ikot ndisan̄a ye mme ukwakutom umịn̄ n̄wed ẹmi n̄kọnọ mbon oro ẹdikamade mmọ inam utom ke n̄kann̄kụk ukpep. Ntem, mme idụt oro idahaemi ẹnyene ukem nti uduot magazine ẹmi mme idụt eken ẹkenyenede.

¹⁷ Kere ban̄a ufọn efen: Ẹkpe ekọmurua edimịn̄ mme magazine idahaemi ke ibat ibat idụt oro umịn̄ n̄wed osụk akade iso. Nte utịp, ke mme idụt ẹmi ẹketrede umịn̄ n̄wed, okụk odu idahaemi ndida nnam mme n̄kpọ efen, utọ nte edibọp mme Ufọkmbono Obio Ubọn̄ ye edin̄wam ke ndise mban̄a udọn̄ nditọete nnyịn ke mme idụt ẹmi ẹbuenede. Ntem, edida inyene Eteufọk nnam n̄kpọ ye ntịn̄enyịn ọwọrọ ete ke ẹkeme nditịm nda mme ikọ ẹmi Paul eketịn̄de ọnọ mbon Corinth nsịn ke edinam ke udomo eke ofụri ererimbot: “Se ntịn̄de iwọrọke ite, ẹbiomode mmọ en̄wen mbiomo, ẹda ẹfịk mbufo; edi ọwọrọ ete, mbufo ẹkpedụk aku ye mmọ; nyọhọ-nsụhọ mbufo ke ini emi aka ndin̄wam mmọ ke unana mmọ . . . man ọkpọwọrọ nte ‘ubọk aka ubọk ọnyọn̄’ edide.”—2 Cor. 8:13, 14.

¹⁸ Nte utịp edidian ọtọkiet emi, ẹdian Mme Ntiense Jehovah ke ofụri ererimbot akan nte akanam edide. Idịghe mfịna inọ Mme Ntiense ke Denmark ndinam ẹmịn̄ magazine mmọ ke Germany, okposụkedi mmọ ẹkesimịn̄de eke mmọ. Mmọ ẹwụt esịtekọm ẹnọ utom nditọete mmọ ke Germany. Nte Mme Ntiense Jehovah ke Germany ẹyat esịt ẹban̄a edida mme etịbe mmọ mmịn̄ mme n̄wed Bible nnọ Denmark—m̀mê nnọ Russia, Ukraine, ye mme idụt eken? Ke akpanikọ iyatke! Mmọ ẹnem esịt ndifiọk nte ke ẹkeme ndida etịbe nditọete mmọ ke mme idụt oro nnam mme n̄kpọ efen idahaemi.

Ndise Mban̄a Inyene

¹⁹ Ke kpukpru Ufọkmbono Obio Ubọn̄ Mme Ntiense Jehovah ke ofụri ererimbot, ekebe etịbe odu emi ẹwetde “Contributions for the Society’s Worldwide Work—Matthew 24:14.” Mme etịbe ẹmi owo mîben̄eke-ben̄e ẹmi ẹsịnde ke mme ekebe oro ẹdu ndida nnam n̄kpọ ke ebiet emi udọn̄ odude. “Akama-ukpọhọde, emi anamde akpanikọ” ye mme n̄kọk itieutom kiet kiet ẹbiere nte ẹdade mme etịbe oro ẹnam n̄kpọ. Ntem, ke mme itie oro ibet enyịmede, okụk emi ẹsịnde ke ekebe etịbe ke idụt kiet ekeme ndin̄wam utom Mme Ntiense Jehovah ke idụt efen emi oyomde usụn̄ ke ediwak kilomita ke mme itie tọsịn. Ẹda mme etịbe ndinọ mme ekemmọ andinịm ke akpanikọ ẹmi ẹbọde ufen ke ntak oyobio, idio, unyekisọn̄, ye mme ekọn̄ mbio obio, un̄wam. Ẹnyụn̄ ẹda mme utọ etịbe oro ẹn̄wam ediwak mme isụn̄utom ke se ibede idụt 200.

²⁰ Nte ido edide, ke mme esop Mme Ntiense Jehovah, ẹsitịn̄ n̄kpọ ẹban̄a okụk ini kiet kpọt ke ọfiọn̄—ndien ke minit ifan̄ kpọt. Owo imenke usan etịbe isan̄a ke mme Ufọkmbono Obio Ubọn̄ m̀mê ke mme mbono. Owo inọhọ mme eben̄e okụk ẹsọk mme owo. Owo ikpehe mme owo isịn ẹbọ okụk. Nte ido edide, Enyọn̄-Ukpeme akama ibuotikọ kiet kpọt ke isua ndinam an̄wan̄a nte mbon ẹmi ẹyomde ndinam ntre ẹkemede nditịp okụk nnọ Watch Tower Bible and Tract Society man ẹda ẹn̄wam utom ofụri ererimbot. Owo iwakke ndisiak nte ẹkpenọde N̄ka okụk ke Awake! Didie, ndien, ke ẹyọhọ akwa utom ofụri ererimbot eke edikwọrọ eti mbụk, edibọp mme Ufọkmbono Obio Ubọn̄ oro ẹyomde, edise mban̄a mbon oro ẹdude ke san̄asan̄a utom uyọhọ ini, ye edinọ mme Christian oro ẹdude ke unana, un̄wam? Jehovah ada edu ntatubọk ọdiọn̄ ikọt esie ke utịbe utịbe usụn̄. (2 Cor. 8:2) Nnyịn ida ifet emi ikọm kpukpru owo ẹmi ẹkebuanade ke ‘ndikpono Jehovah ke inyene mmọ.’ Mmọ ẹkeme ndinịm ke akpanikọ nte ke “akama-ukpọhọde, emi anamde akpanikọ” ayaka iso ndise mban̄a inyene Eteufọk. Ndien nnyịn ibọn̄ akam ite Jehovah aka iso ọdiọn̄ kpukpru ndutịm ẹmi ẹnamde kaban̄a editat utom ofụri ererimbot.

[Mme Ikọ idakisọn̄]