Mme Mbụme Ẹtode Mme Andikot
Jesus akakpak ete: “Mbufo ẹn̄wana eti-eti ndibe ke mfafaha inua-otop ndụk: koro ndọhọ mbufo nte, ediwak owo ẹyeyom ndidụk, ndien idikemeke.” (Luke 13:24) Nso ke ikọ esie ọkọwọrọ, ndien didie ke enye enyene ebuana mfịn?
Nnyịn imekeme nditịm mfiọk udịmikọ emi edide n̄kpọ udọn̄ mi ebe ke ndikere mban̄a idaha oro ẹkewetde enye. N̄kpọ nte ọfiọn̄ itiokiet mbemiso n̄kpa esie, Jesus okodu ke Jerusalem ke ini usọrọ edifiak nyak temple nnọ. Enye ama etịn̄ nte idide andikpeme erọn̄ Abasi edi osio owụt ete ke mme Jew ke ofụri ofụri ikodụhe ke utọ erọn̄ oro koro mmọ ẹkesịnde ndikpan̄ utọn̄. Ke ini enye ọkọdọhọde ete ke imọ ye Ete imọ idi “kiet,” mme Jew ẹma ẹyom nditọn̄ọ enye ke itiat. Enye ama efehe aka Perea ke edem Jordan oko.—John 10:1-40.
Do eren kiet ama obụp ete: “Ọbọn̄, nte mmọ ẹmi ẹnyan̄ade iwakke?” (Luke 13:23) Eti mbụme ekedi oro enye ndibụp, sia mme Jew ini oro ẹkekerede ẹte ke sụk ibat ibat owo ẹdibọ edinyan̄a. Ye edu oro mmọ ẹkenyenede, idịghe ọkpọsọn̄ n̄kpọ ndifiọk mbon oro mmọ ẹkekerede nte ẹdidide ekpri ibat oro. Nso ndudue ke mmọ ẹkenam ntem, nte mme ukperedem n̄kpọntịbe ẹdiwụtde!
Ke n̄kpọ nte isua iba, Jesus ama odu ke otu mmọ, ekpep n̄kpọ, anam mme utịben̄kpọ, onyụn̄ ọnọ mmọ idotenyịn edikabade ndi mme ada udeme Obio Ubọn̄ heaven nnyene. Ye nso utịp? Mmọ, akpan akpan ye mme adausụn̄ mmọ, ẹma ẹtan̄ idem ẹban̄a edidi mme andito ubon Abraham ye edidi mbon oro ẹkenọde Ibet Abasi. (Matthew 23:2; John 8:31-44) Edi mmọ ikọfiọkke ikonyụn̄ ikopke uyo Eti Ekpemerọn̄ oro. Eketie nte n̄kpọ eke ana-in̄wan̄ usụn̄ ekebererede ọnọ mmọ, ye edidi mme andibuana ke Obio Ubọn̄ nte akpan utịp ke ndisan̄a ke esịt mbe, edi mmọ ẹma ẹsịn. Sụk esisịt ibat owo, ẹtode mme usụhọde otu akpan akpan, ẹkekop etop akpanikọ Jesus, ẹnam n̄kpọ ẹban̄a, ẹnyụn̄ ẹsọn̄ọ ẹda ye enye.—Luke 22:28-30; John 7:47-49.
Ke usen Pentecost 33 E.N., mme owo eke ukperedem emi ẹkedu ke udịm ndidi se ẹyetde aran ke spirit. (Utom 2:1-38) Mmọ ikesịneke ke otu mme anam ukwan̄n̄kpọ oro Jesus eketịn̄de aban̄a nte ẹdituade ẹdinyụn̄ ẹtade edet ke ntak ẹkekpude ndida ifet oro ekebererede ọnọ mmọ nnam n̄kpọ.—Luke 13:27, 28.
Mmọdo, ke akpa isua ikie “ediwak” owo oro ẹkedi mme Jew ke ofụri ofụri, ndien akpan akpan mme adaiso ido ukpono. Mmọ ẹmi ẹkedọhọ ke iyom mfọn Abasi—edi n̄kukụre nte ekemde ye mme idaha ye mme usụn̄ idemmọ, idịghe eke Abasi. Ke edide isio, esisịt “ibat” owo oro ẹkenamde n̄kpọ ẹban̄a ke ntak ata udọn̄ ndidi ubak Obio Ubọn̄ oro ẹma ẹkabade ẹdi mme andibuana ke esop Christian oro ẹkeyetde aran.
Ke emi kere ban̄a nte emi enyenede ebuana ke ntatara usụn̄ ke eyo nnyịn. Ẹkpep mme anana-ibat owo ẹmi ẹsikade mme ufọkabasi Christendom nte ke mmọ ẹdika heaven. Nte ededi, ọkpọsọn̄ udọn̄ emi ikọn̄ọke ke mme nnennen ukpepn̄kpọ N̄wed Abasi. Nte ekedide ye mme Jew ke ntọn̄ọ, mmọ ẹmi ẹyom mfọn Abasi ke usụn̄ idemmọ.
Nte ededi, odu esisịt ibat owo ke eyo nnyịn ẹmi ke nsụhọdeidem ẹnamde n̄kpọ ẹban̄a etop Obio Ubọn̄, ẹyakde idem ẹnọ Jehovah, ẹnyụn̄ ẹdide ẹdidu ke udịm ndibọ mfọn esie. Emi ada ekesịm mmọ ndikabade ndi “nditọ Obio Ubọn̄.” (Matthew 13:38) Ẹketọn̄ọ ndinọ utọ “nditọ” oro ẹyetde aran do ikot ke Pentecost 33 E.N. Mme Ntiense Jehovah ẹnịm ke anyan ini ẹte ke uyarade ke nte Abasi anamde n̄kpọ ye ikọt esie ọnọ ekikere akpan akpan nte ke ẹma ẹkot mme andibuana ke otu eke heaven ẹkem ibat. Ntem, an̄wan̄a mbon oro ẹkpepde akpanikọ Bible ke mme isua ndondo emi nte ke ẹnam idotenyịn nsinsi uwem ke paradise isọn̄ atara. Mmọ ẹmi ẹwak ke ibat ẹkan nsụhọ Christian oro ẹyetde aran ẹmi ẹkade-ka iso ẹsụhọde, oro ẹnyenede idotenyịn ndika heaven. Luke 13:24 inen̄ekede inyene n̄kpọ ndinam ye mbon oro mîdorike enyịn ndika heaven, edi enye ke akpanikọ esịne eti item ọnọ mmọ.
Ke ndikpak nnyịn ndin̄wana etieti, Jesus ikọdọhọke ke enye m̀mê Ete esie ẹnịm n̄kpọ ubiọn̄ọ ke usụn̄ nnyịn man ẹbiọn̄ọ nnyịn. Edi an̄wan̄a nnyịn oto Luke 13:24 nte ke mme n̄kpọ oro Abasi oyomde ẹdi mme orụk oro ẹdinamde ẹsion̄o mbon oro mîdotke ẹfep. “Mbufo ẹn̄wana eti-eti” abuana nnyịn ndisịn̄ede idem, ndinyanade. Ntem nnyịn imekeme ndibụp idem nnyịn, ‘Nte ami ke nnyanade?’ Ẹkeme ndifiak ntịn̄ Luke 13:24 ke ibio ibio usụn̄ ẹte, ‘Ana ami n̄n̄wana etieti ndibe ke mfafaha inuaotop ndụk koro ediwak owo ẹyeyom ndibe ndụk edi idikemeke. Ntre ndi ami ke nnen̄ede n̄n̄wana etieti? Ndi ami mmebiet efehe mbuba ke an̄wambre eset emi ekesịnde ofụri ukeme esie man ọbọ utịp? Idụhe utọ efehe mbuba oro emi edinamde n̄kpọ ke ubak esịt, efende efen. Ndi ami ntie ntre?’
Mme ikọ Jesus ẹnọ ekikere nte ke ndusụk owo ẹkeme ndidomo ‘ndibe ndụk inuaotop’ sụk ke ini oro ọfọnde mmọ ke idem, ẹsio ukot ẹsan̄a sụn̄sụn̄ nte mmọ ẹmade. Utọ edu oro ekeme nditụk Mme Ntiense kiet kiet. Ndusụk owo ẹkeme ndikere, ‘Mmọfiọk mme esịn-ifịk Christian oro ẹma ẹkesịn̄ede idemmọ ke ediwak isua, ẹnamde ediwak n̄waidem; kpa ye oro, ke ini n̄kpa mmọ, utịt idiọk editịm n̄kpọ emi ikosụk idịghe. Ntre ekeme ndidi eyetịm ọfọn ami nditehede ube, ndu uwem ke ndammana usụn̄.’
Edi mmemmem ndikere n̄kpọ ke usụn̄ oro, edi nte enen̄ede owụt eti ibuot? Ke uwụtn̄kpọ, ndi mme apostle ẹma ẹkere n̄kpọ ke usụn̄ oro? Ke akpanikọ ikekereke. Mmọ ẹma ẹsịn ofụri ukeme mmọ ke utuakibuot akpanikọ—tutu esịm n̄kpa mmọ. Paul, ke uwụtn̄kpọ, ama ekeme ndidọhọ ete: ‘Christ ke nnyịn ikwọrọ. Mmonyụn̄ n̄kpa utom mban̄a n̄kpọ emi, nda odudu Abasi, emi ọsọn̄ọde anam utom ke idem mi, n̄n̄wana ndinam.’ Ekem enye ama ewet ete: “Edi emi esịn nnyịn ikpa utom ye en̄wan, koro nnyịn ikodoride enyịn ke odu-uwem Abasi, emi edide Andinyan̄a kpukpru owo, akpan akpan Andinyan̄a mbon mbuọtidem.”—Colossae 1:28, 29; 1 Timothy 4:10.
Nnyịn imọfiọk ite ke Paul akanam ata nnennen n̄kpọ ke ndisịn̄ede idemesie. Nnyịn owo kiet kiet idikop uyụhọ didie ntem ndikeme ndidọhọ nte Paul ọkọdọhọde: “Mma n̄n̄wana eti en̄wan, mma mfehe mbuba mi mma, mma nsọn̄ọ mmụm mbuọtidem n̄kama.” (2 Timothy 4:7) Ntre ke n̄kemuyo ye mme ikọ Jesus ke Luke 13:24, nnyịn owo kiet kiet imekeme ndibụp, ‘Nte ami ke ntịn̄ enyịn nnyụn̄ nsịn ifịk? Ih, ndi ami mmọnọ uyarade oro ekemde, kpukpru ini nte ke ami ke nnam item Jesus oro: “Mbufo ẹn̄wana eti-eti ndịbe ke mfafaha inua-otop ndụk”?’