Mme Mbụme Ẹtode Mme Andikot

◼ Ndi nnyịn ikpebiere ito Matthew 7:13, 14 ye Luke 13:24 ite idem ke ediset ke n̄kpa, ediwak owo ẹyesịn utuakibuot akpanikọ?

Baba, ufan̄ikọ ẹmi isọn̄ọke utọ ubiere oro. Utu ke oro, mmọ ẹtịn̄ n̄kpọ akpan akpan ẹban̄a edinyene uwem ke Obio Ubọn̄ eke heaven.

Ikọ Jesus ke Matthew 7:13, 14 ẹdi ubak Ukwọrọikọ oro ke Obot. Enye ọkọdọhọ ete: “Ẹbe ke mfafaha inuaotop ẹdụk: koro inuaotop emi adade owo aka nsobo atara, ọkpọusụn̄ onyụn̄ an̄wan̄a; mme andidụk ke esịt ẹnyụn̄ ẹwak. Koro inuaotop emi adade owo osịm uwem afafaha, usụn̄ onyụn̄ esịre; ndien mme andikụt enye iwakke.”

Ekese ikọ oro Jesus eketịn̄de ke ọtọ emi ekenyene ebuana akpan akpan ye Obio Ubọn eke heaven. Ke uwụtn̄kpọ, enye ọkọtọn̄ọ ye ikọ ẹmi ete: “Ọfọfọn ọnọ mmọ eke ẹbuenede ke spirit: koro Obio Ubọn̄ Heaven enyene mmọ.” Enye ama ọdọhọ ke mmọ eke esịt mmọ asanade “eyekụt Abasi” ye nte ke “Obio Ubọn̄ Heaven” enyene mmọ eke “ẹkọbọde . . . kaban̄a edinen ido.” (Matthew 5:3, 8, 10) Ekem kpa ke nneme oro, Jesus ama etịn̄ aban̄a ntatara usụn̄ emi adade owo osịm nsobo ye mfafaha usụn̄ emi adade owo osịm uwem. Ke ubak ubak, enye ama adian ete: “Idịghe kpukpru owo ẹmi ẹkotde Mi ẹte, Ọbọn̄, Ọbọn̄, ẹdidụk ke Obio Ubọn̄ Heaven, edi owo eke anamde uyo Ete Mi ẹmi odude ke heaven.”​—Matthew 7:13, 14, 21.

Se Luke 13:24 etịn̄de aban̄a edi ukem ye emi, nte udọn̄ikọ owụtde. Jesus ama ọnọ uwụtn̄kpọ iba aban̄a ‘Obio Ubọn̄ Abasi.’ Ke ukperedem, ẹma ẹbụp enye ẹte: “Ọbọn̄, nte mmọemi ẹnyan̄ade iwakke?” Jesus ama ọbọrọ ete: “Ẹn̄wana etieti ndibe ke mfafaha inuaotop ndụk: koro ndọhọ mbufo nte, ediwak owo ẹyeyom ndidụk, ndien idikemeke.” “Ediwak owo” ada aban̄a mbon oro ẹkeben̄ede ẹte ẹyak mmimọ ibe idụk ke ẹma ẹkeberi ẹnyụn̄ ẹkọbi usụn̄. Mmọemi edi ‘mme anam-ukwan̄ n̄kpọ” ẹmi mîkodotke ndidu ye “Abraham ye Isaac ye Jacob, ye kpukpru mme prọfet ke Obio Ubọn̄ Abasi.” “Ediwak owo” ẹmi ẹkekere ke mmimọ ididi akpa ke “Obio Ubọn̄ Abasi,” edi mmọ ke akpanikọ ẹdidi akpatre, emi nte an̄wan̄ade, ọwọrọde ke mmọ idikam idụkke-dụk do.​— Luke 13:18-30.

Udọn̄ikọ emi owụt ke Jesus ekeneme aban̄a edidụk Obio Ubọn̄ Abasi eke heaven. Mme adaiso Jew ko ke inioro ẹma ẹnyene ifetutom ke anyanini ye ifet edineme ikọ Abasi. Mmọ ẹkekere ke mmimọ imenyene inyene ke n̄kan̄ eke spirit imonyụn̄ inen ke enyịn Abasi, ke edide isio ye mme ọsọ owo, ẹmi mmọ ẹkenịmde ke usụhọde itie. (John 9:24-34) Edi, Jesus ọkọdọhọ ke mme ọbọ a-tax ye mme akpara ẹmi ẹkenyịmede etop imo ẹnyụn̄ ẹkabarede esịt ẹkeme ndinyene unyịme Abasi.​—Men Matthew 21:23-32; Luke 16:14-31 domo.

Mme ọsọ owo ẹmi ẹkekabarede ẹdi mbet Jesus mi ẹkedu ke idaha ndidi se ẹnyịmede nte ndito eke spirit ke ini ẹketon̄ode ikot eke heaven ke Pentecost eke 33 C.E. (Mme Hebrew 10:19, 20) Okposụkedi ata ediwak owo ẹkekopde iko Jesus, mbon oro ẹkenyịmede enye ẹnyụn̄ ẹnyenede idotenyịn eke heaven ke ukperedem, ikawakke. Edi ẹkeme ndimen ekpri otuerọn̄ ẹdide mme owo oro ẹbonde ke spirit, emi ẹbọde utịp emi ndomo ye Jacob etiede ke okpokoro udia ke heaven ye Jehovah (Akamba Abraham) ye Eyen esie (emi Isaac akadade aban̄a). Oro ke akpanikọ ama odot se owo esịnde idemesie ọkpọsọn̄, edi ediwak mbon oro ẹkekopde iko Jesus ikanamke ntre.

Mmọdo, otode ke udọn̄ikọ emi nnyịn imekeme ndikụt ke idaha mbiba ẹmi nte ke utịn̄ikọ Jesus (emi aban̄ade esisịt ibatowo ẹmi ẹdude ke mfafaha usụn̄ oro adade osịm uwem ẹnyụn̄ ẹdide se ẹnyan̄ade) ẹbuana akpan akpan ke edinyene unyịme Abasi ke ini oro Enye okosụk ọnọde idotenyịn uwem eke heaven. Ata esisịt ibat mbon oro ẹkekopde etop akpanikọ oro ẹnyụn̄ ẹdiọn̄ọde se ẹkeyomde ẹma ẹyere ikot ẹnyụn̄ ẹwụt mbuọtidem.​—Matthew 22:14; 24:13; John 6:60-66.

Edi inem n̄kpo ndifiọk nte ke idem mfịn, emi ofụri Bible odude ye akpakịp edisu oro mme prọfesi Abasi emi aban̄ade utịt eyo ẹsude, ata esisịt ibatowo ẹnam n̄kpọ ẹban̄a etop Christian oro ẹnyụn̄ ẹyo ke ndinam n̄kpọ Jehovah. Emi ekem ye uwụtn̄kpọ Jesus aban̄ade nsio nsio orụk isọn̄. Enye ọkọdọhọ ete ke ndusụk owo ẹyekop “ikọ Obio Ubọn̄,” edi Satan eyetan̄ se ẹkesuande ke esịt owo oro efep. Mmọ eken ẹyekop ikọ oro ye idatesịt edi nte ini akade mmọ ẹyeduọn̄ọ ke ntak ukọbọ m̀mê isịnenyịn. Edi mmọ en̄wen idin̄wụmke mfri ke ntak “ẹkikere n̄kpọ eyo emi ye abian̄a inyene.”​—Matthew 13:18-23.

Nnyịn imekeme ndinịm ke akpanikọ nte ke emi edidi ata isio ke ini ediwak million owo ẹdisetde ke Usen Ikpe. Adan̄aoro Satan ididụhe nditan̄ n̄kpasịp akpanikọ ẹmi ẹdisuande ke esịt mmọ ifep. Mmọ idinyeneke ndin̄wana ye ukọbọ m̀mê ekikere n̄kpọ uwem eke idiọk editịm n̄kpọ oro odude kemi. Edinọ mmọ ukpep ke eti n̄kann̄kụk, emi utịbe utịbe utom Abasi ẹkande ẹkụk, ẹsịnede edinam mme akpan̄kpa eset ye edikọk mme idụt udọn̄ọ. Edi, ndusụk owo idikam inamke n̄kpọ iban̄a emi adan̄aoro. (Men John 11:45-53 domo.) Edi eti ntak odu ndikere nte ke ediwak owo ẹyediọn̄ọ se ikọ oro ọwọrọde, ẹnam n̄kpọ ẹban̄a enye, ẹnyụn̄ ẹbọ edinyan̄a.