“Owo kiet akanam akamba udia mbubreyo, onyụn̄ okot ediwak owo. Ndien . . . enye ọdọn̄ ofụn esie ọkọdọhọ mmọ emi ẹkekotde ete, ‘Ẹdi, koro ẹma ẹnam n̄kpọ ẹma.’ Edi kpukpru mmọ ye esịt kiet ẹtọn̄ọ ndiyom ikọ ndibọrọ. Akpa owo ọdọhọ enye ete, ‘Mma ndep in̄wan̄ ndien nnyene ndika n̄kese; mbọk, ndikemeke ndidi.’ Owo efen onyụn̄ ọdọhọ ete, ‘Mmedep enan̄ duop ndien nyom ndika n̄kese nte mmọ ẹtiede; mbọk, ndikemeke ndidi.’ Owo efen nde ọdọhọ ete, ‘Ami ndisụk ndọ n̄wan edi oro ndien ke ntak emi n̄kemeke ndidi.’”—Luke 14:16-20.

Se mmọ ẹtịn̄de emi iwọrọke n̄kpọ ndomokiet! Owo esisese in̄wan̄ m̀mê ufene mbemiso edepde, idịghe n̄kpọ emi ẹdọhọde ke ana ẹfiak ẹkese ke ẹma ẹkekpe okụk ẹma. Idịghe nte ọyọhọ owo ita oro okoyom ndidọ n̄wan. Enye ama ọdọdọ n̄wan oro ama, ntem ndọ ikpetreke enye ndika utọ akpan ikot oro. Ke ini ete emi okopde se mmọ ẹtịn̄de emi, esịt ayat enye, enye onyụn̄ ọdọhọ ofụn esie oro ete:

Se Jesus adade ọnọ uwụtn̄kpọ emi owụt nte Jehovah Abasi ye Jesus Christ ẹkotde mme owo man mmọ ẹkpedi ẹdidụk Obio Ubọn̄ heaven. Mme Jew, akpan akpan mme adaiso ido ukpono mmọ ke ẹkebem iso ẹkot. Ata ediwak mmọ ẹma ẹsịn ikot oro ke ini Jesus ọkọkwọrọde ikọ. Edi idịghe mmọ ikpọn̄ ke ẹkot. Se Jesus eketịn̄de owụt nte ke ini iso, ke ẹyekot mme Jew eken emi owo mîdaha ke n̄kpọ ẹnyụn̄ ẹkot mme okpono Abasi ke ido mme Jew. Ke oro ebede, ẹyenọ akpatre ikot emi edide ọyọhọ ikata, ndien ẹdikot mbon idụt emi mme Jew ẹkerede ke Abasi idaha-da nte n̄kpọ ndomokiet.—Utom 10:28-48.