Nte Emana Jesus Adade Emem Edi
EMEM oro ẹketan̄ade ẹte ‘odu ke otu mme owo emi ẹnyịmede’ ikedịghe n̄kukụre ntịn̄nnịm ikọ oro ekenyenede n̄kpọ ndinam ye emana Jesus. Ke adianade ye se mme angel ẹketobode mme ekpemerọn̄ emi ẹkekopde n̄kpaidem mi, mme angel ẹma ẹtatan̄a etop otode Abasi ẹnọ Mary ye Joseph ebe esie, ẹban̄a nsekeyen mmọ, Jesus. Ndidụn̄ọde mme etop emi ayan̄wam nnyịn inen̄ede inyene ifiọk iban̄a emana Jesus ye se un̄wọn̄ọ mme angel oro aban̄ade emem ndidu ke otu mme owo enen̄erede ọwọrọ.
Mbemiso emana Jesus, idem mbemiso Mary okoyomode, angel emi Bible okotde Gabriel ama aka ekese enye. Angel emi ọkọkọm enye ntem: “Mmọkọm fi, afo emi ẹfọnde akwa mfọn, Jehovah odu ye afo.” Nte eyịghe mîdụhe, ekọm oro ama etịmede Mary esịt onyụn̄ enyek enye idem. Nso ke utọ ekọm oro ọkpọwọrọ?
Gabriel ama anam ekọm oro an̄wan̄a enye ete: “Sese! afo oyoyomo idịbi onyụn̄ aman eyeneren, ndien afo enyene ndisio enye enyịn̄ Jesus. Enye oyokpon, oyonyụn̄ ekere eyen Ata Edikon̄; ndien Jehovah Abasi ọyọnọ enye ebekpo ete esie David, ndien enye ayakara ufọk Jacob nte edidem ke nsinsi, obio ubọn̄ esie idinyụn̄ inyeneke utịt.” Mary ama obụp nte emi edikemede ndisu, sia akanam imọ mînyeneke ebuana ye erenowo. Gabriel ọkọdọhọ ke edisana spirit edinam enye oyomo. Eyen oro ididịghe ikpîkpu eyen.—Luke 1:28-35.
Edidem Emi Ẹkebemde Iso Ẹtịn̄ Ẹban̄a
Anaedi ikọ Gabriel ama anam Mary ọfiọk ke ẹma ẹbebem iso ẹtịn̄ ẹban̄a eyen emi enye edimande ke mme ntịn̄nnịm ikọ ko ke eset. Ndisian Mary ke Jehovah ọyọnọ eyen oro enye edimande ‘ebekpo ete esie David’ ama anam Mary—ye eyen Jew efen ekededi oro emehede ye N̄wed Abasi—ekere aban̄a un̄wọn̄ọ oro Abasi akanamde ọnọ Edidem David eke Israel.
Jehovah ama ada prọfet Nathan ọdọhọ David ete: “Ntre ke ufọk fo ye ubọn̄ fo ẹdisọn̄ ẹda ke iso fo ke nsinsi: ebekpo fo oyowụhọ ke nsinsi.” (2 Samuel 7:11, 16) Jehovah eketịn̄ aban̄a David ete: “Nyonyụn̄ nnịm ubon esie ke nsinsi, ye ebekpo esie nte mme usen heaven. Ubon esie oyodu ke nsinsi; ebekpo esie eyebịghi nte utịn ke iso mi.” (Psalm 89:20, 29, 35, 36) Ke ntre, Mary ye Joseph ikotoho ufọk David ke mbuari.
Idịghe mmọ emi kpọt ẹdi n̄kukụre ntịn̄nnịm ikọ ke N̄wed Abasi Usem Hebrew oro ẹban̄ade eyen David ndidi edidem. Eyedi Mary ama emehe n̄ko ye ntịn̄nnịm ikọ Isaiah emi: “Koro eyen amanade ọnọ nnyịn, ẹnọ nnyịn eyen eren: ubọn̄ onyụn̄ odoro enye ke afara; ẹnyụn̄ ẹsio enye enyịn̄, Utịbe, Ọnọ-item, Ọkpọsọn̄ Abasi, Nsinsi Ete, Ọbọn̄ Emem. Ubọn̄ ye emem ididopke ndikọri ke ebekpo David, ye ke itie ubọn̄ esie, man enịm enye, onyụn̄ ọsọn̄ owụk enye ke ikpe ye ke edinen ido, ke emi ye ke nsinsi. Ufụp Jehovah mme udịm ayanam n̄kpọ emi.”—Isaiah 9:6, 7.
Mmọdo, etop oro Gabriel okotobode Mary ikedịghe ikpîkpu utịbe utịbe emana nsekeyen. Eyen esie ekenyene ndidi adiakpa ufọk ubọn̄ Edidem David—kpa nsinsi adiakpa Obio Ubọn̄ emi Abasi ekemekde. Ntịn̄nnịm ikọ Gabriel aban̄ade se Jesus edinamde ke ini iso enen̄ede enyene se ọwọrọde ọnọ kpukpru nnyịn.
Ke ini Joseph ọkọfiọkde ke n̄wan oro imọ ididọde ama oyomo, enye ama ebiere ndibiat ediomi ndọ mmọ. Enye ama ọfiọk ke idịghe imọ ikenyene eyen oro sia akanam enye ye n̄wan emi enye akaduakde ndidọ mîkenyeneke ebuana. An̄wan̄a ntak emi ọkọsọn̄de Joseph ndinịm se Mary eketịn̄de aban̄a idịbi esie. Mbụk Gospel ọdọhọ ete: “Angel Jehovah ọbiọn̄ọde enye ke iso ke ndap onyụn̄ ọdọhọ ete: ‘Joseph, eyen David, kûfehe ndịk ndida Mary n̄wan fo nnyọn̄ ufọk, koro idịbi oro enye oyomode oto ke edisana spirit. Enye ayaman eyeneren, ndien afo enyene ndisio enye enyịn̄ Jesus, koro enye edinyan̄ade ikọt esie osio ke mme idiọkn̄kpọ mmọ.’”—Matthew 1:20, 21.
Bible itin̄ke adan̄a nte akan̄wan̄ade Joseph nte eyen oro “edinyan̄ade ikọt esie osio ke mme idiọkn̄kpọ mmọ.” Kpa ye oro, etop emi ama ekem ndinam Joseph enịm ke n̄wan idịbi emi ikeduehe. Enye ama anam nte angel eketemede onyụn̄ ada Mary ọnyọn̄ ufọk, kpa edinam emi ekedide ukem ye udianndọ.
Se N̄wed Abasi etịn̄de ke ebiet en̄wen anam nnyịn ifiọk se ikọ angel oro ọkọwọrọde. Esisịt ini ke ẹma ẹkebot owo, angel oro ọkọsọn̄de ibuot ama ọdọhọ ke ukara Jehovah ifọnke. N̄wed Abasi Usem Hebrew owụt ke ọsọn̄ibuot angel emi ọkọdọhọ ke nte Abasi akarade inenke ye nte ke owo ndomokiet idisọn̄ọke ida inam n̄kpọ Jehovah ke ini osobode idomo. (Genesis 3:2-5; Job 1:6-12) Ke uwụtn̄kpọ, Adam ikọsọn̄ọke ida. Ke ntak idiọkn̄kpọ esie, kpukpru owo ẹda idiọkn̄kpọ emana, ndien utịp idiọkn̄kpọ oro edi n̄kpa. (Rome 5:12; 6:23) Nte ededi, Jesus ama ọfọn ama sia enye mîkenyeneke ete ke isọn̄. Sia Jesus ekenyịmede ndinọ mfọnmma uwem esie nte ufak oro ekemde ye se Adam ọkọduọkde, enye ama ekeme ndinyan̄a ubonowo nsio ke idiọkn̄kpọ mmọ nnyụn̄ nnọ mmọ idotenyịn nsinsi uwem.—1 Timothy 2:3-6; Titus 3:6, 7; 1 John 2:25.
Ke ini utom ukwọrọikọ esie ke isọn̄, Jesus ama owụt nte uwem editiede ke ini ẹditrede mme utịp idiọkn̄kpọ. Enye ama ọkọk mme owo kpukpru orụk udọn̄ọ onyụn̄ akam anam mme akpan̄kpa ẹset. (Matthew 4:23; John 11:1-44) Mme utịben̄kpọ oro ẹkenyan ubọk ẹwụt se enye edinamde ke ini iso. Jesus ke idemesie ọkọdọhọ ete: ‘Ini ke edi eke kpukpru mme andidu ke udi editi ẹdikopde uyo mi ẹnyụn̄ ẹwọn̄ọ ẹdi.’—John 5:28, 29.
Jesus ndikọn̄wọn̄ọ ke mme owo ẹyeset ke ini iso anam an̄wan̄a ntak emi emana ye n̄kpa esie akpan akpan, edide ata akpan n̄kpọ ọnọ nnyịn. John 3:17 ọdọhọ ke Abasi okosio eyen esie ọdọn̄ ke ererimbot “man okpoto ke enye ẹnyan̄a ererimbot.” Utịbe utịbe mbụk emi anam nnyịn iti etop emi ẹketobode mme ekpemerọn̄ oro ekekpemede erọn̄ mmọ okoneyo oro Jesus akamanade.
“Eti Mbụk Akwa Idatesịt”
Ke akpanikọ, etop oro mme angel ẹkenọde ẹban̄a emana “Andinyan̄a emi edide Christ Ọbọn̄” ekedi “eti mbụk akwa idatesịt” ọnọ ubonowo. (Luke 2:10, 11) Akana eyen emi edi Messiah, kpa akwa Prọfet ye Andikara oro ikọt Abasi ẹketiede ẹbet ke anyan ini. (Deuteronomy 18:18; Micah 5:2) Uwem ye n̄kpa esie ke isọn̄ ama owụt ke Jehovah enyene unen ndikara ofụri ekondo, ntre emi akanam mme angel ẹdọhọ ẹte: “Ubọn̄ enyene Abasi ke ata enyọn̄.”—Luke 2:14.
Jesus, emi Bible okotde “akpatre Adam,” ama owụt ke owo ekeme ndinam akpanikọ nnọ Jehovah kpa ye ọkpọsọn̄ idomo. (1 Corinth 15:45) Ke ntem, enye ama owụt ke Satan edi ata idiọk osu nsu. Emi ama anam mme anam-akpanikọ angel ke heaven ẹdat esịt.
Nte ededi, ẹyak ifiak ibịne mbụme oro, “Nte idotenyịn enen̄ede odu ke se mme angel oro ẹketịn̄de okoneyo oro Jesus akamanade oyosu?” Ibọrọ edi ih! Emem edi akpan ubak uduak Abasi emi edisude ke isọn̄, ndien emi esịne edifiak nnam isọn̄ akabade edi Paradise. Ke ẹma ẹkenam emi, kpukpru owo ẹdinam n̄kpọ ke ima ẹnyụn̄ ẹnam akpanikọ. Ntre, uduak Jehovah ndisu ọwọrọ n̄ko ndimen kpukpru se ibiọn̄ọde ukara esie mfep. Emi idịghe eti mbụk inọ mbon emi ẹdianade ye Satan ẹdọhọ ke mme edumbet Jehovah inenke. Emi ediwọrọ nsobo ọnọ mmọ.—Psalm 37:11; Mme N̄ke 2:21, 22.
Mbọk tịm fiọk ke mme angel oro ikọdọhọke mme ekpemerọn̄ ke kpukpru owo ẹyenyene emem, ke ẹyenyụn̄ ẹnyịme kpukpru owo. Utu ke oro, mmọ ẹkedọhọ “emem onyụn̄ odu ke isọn̄ ke otu mme owo emi enye enyịmede,” oro edi mbon oro Abasi enyịmede. Mbon oro ẹnen̄erede ẹbuọt idem ke Jehovah ẹkabade ẹdi mme anditiene Jesus oro ẹnamde akpanikọ ẹnyụn̄ ẹkpebede enye. Utọ iren ye iban oro ẹnyịme nditat ubọk nnyụn̄ n̄kere mban̄a mbon en̄wen, idịghe ke usen ifan̄ kpọt ke isua, edi kpukpru usen.
Ndi Ẹsiwụt Edu Christian Kpukpru Ini?
Eti mbụk oro Jesus ọkọkwọrọde omotụk uwem ata ediwak owo. Ediwak owo ẹda mme edumbet Christian ẹsịn ke edinam ke ofụri uwem mmọ. Mme owo oro ẹkesitiede ibụk ibụk ẹtọn̄ọ ndikere mban̄a se Jesus akpanamde edieke enye okpodude ke idaha oro mmimọ idude. Ndusụk owo oro inyene ye unọ idem inemesịt ẹkedide ata akpan n̄kpọ ke uwem mmọ, ẹdi ẹdifiọk mme ufọn n̄kpọ eke spirit idahaemi ye ufọn edibuana mme n̄kpọ emi ye mme mbọhọidụn̄ mmọ. Mbon oro ẹnamde emi ẹdomo nditat ubọk nnyụn̄ mfọn ido kpukpru ini. Ndi idịghe se afo okpoyomde oto ata mme Christian edi oro?
Edieke kpukpru mbon oro ẹnyenede esịt akpanikọ ẹkpedade ini ẹkere nte etop emem oro mme angel ẹketobode edide akpan n̄kpọ ye se enye ọwọrọde, ẹnyụn̄ ẹnam n̄kpọ ekekem ye oro, ererimbot emi ekpenen̄ede ọfọn akan emi.
Mme ntịn̄nnịm ikọ ẹban̄ade emana Jesus ẹnam mbon oro ẹnyenede unyịme Abasi ẹnịm ke mmimọ imekeme ndinyene ata emem ke nsinsi. Nte idịghe se afo oyomde edi oro? Nnyịn imekeme ndinịm ke utịbe utịbe ntịn̄nnịm ikọ emi aban̄ade emem, oro mme angel ẹketịn̄de ke ini Jesus akamanade, iditreke ndisu. Utu ke emem ndidi ikpîkpu ikọ ini Christmas, iyenen̄ede inyene ata emem ke nsinsi.
[Mme ndise ke page 7]
Ẹkeme, ẹkpenyụn̄ ẹnyene ndiwụt edu Christian kpukpru ini