Bible etịn̄ ediwak n̄kpọ aban̄a Obio Ubọn̄ Abasi. Obio Ubọn̄ oro ke Jehovah Abasi edida inam n̄kpọ ọfọn ama ke isọn̄ emi nte enye okoyomde. Nso idi Obio Ubọn̄ Abasi? Inam didie idiọn̄ọ ke Obio Ubọn̄ oro ama ọtọn̄ọ? Nso ke enye anam? Nso ke enye edinam ke ini iso? Ke ukpepn̄kpọ emi ye ukpepn̄kpọ iba oro etienede, iyokụt ibọrọ ofụri mbụme oro.

1. Nso idi Obio Ubọn̄ Abasi, ndien anie idi Edidem esie?

Obio Ubọn̄ Abasi edi ukara emi Jehovah Abasi ọkọtọn̄ọde. Jesus Christ edi Edidem esie; enye etie ke heaven akara. (Matthew 4:17; John 18:36) Bible ọdọhọ ke Jesus “ayakara . . . nte Edidem ke nsinsi.” (Luke 1:32, 33) Jesus edikara kpukpru owo ke isọn̄ sia enye edi Edidem Obio Ubọn̄ Abasi.

2. Jesus akara ye mmanie?

Jesus ikarake ikpọn̄. Mme owo emi ẹtode “kpukpru esien ye usem ye obio ye idụt . . . ẹyekara isọn̄ nte ndidem.” (Ediyarade 5:9, 10) Owo ifan̄ iditiene Christ ikara? Ediwak miliọn owo ẹkabade ẹdi mme Christian tọn̄ọ Jesus ekedi isọn̄. Edi owo 144,000 kpọt ke otu mmọ ẹdika heaven iketiene Jesus ikara. (Kot Ediyarade 14:1-4.) Kpukpru mme Christian eken ẹdidu uwem mi ke isọn̄, ukara Abasi ama edisịm ofụri isọn̄.​—Psalm 37:29.

3. Nso ye nso inam ukara Abasi ọfọn akan ukara owo?

Ediwak owo emi ẹmade nti n̄kpọ isikemeke inam nti n̄kpọ emi mmọ ẹyomde mmọ ẹma ẹda ukara. Ndusụk ini mbon emi ẹsibọde mmọ ukara nte ini akade ẹsiyom ufọn eke idemmọ kpọt. Edi idụhe owo emi edibọde Jesus ukara. “Obio ubọn̄ eke owo mîdisoboke ifep tutu amama” ke Abasi ọnọ enye akara. (Daniel 2:44) Jesus edikara ofụri isọn̄; enye idinyụn̄ inamke asari. Enye enen̄ede ama mme owo onyụn̄ ọfọn ido; enye isinyụn̄ ikpehe ukwan̄ikpe. Enye eyekpep kpukpru owo ndida owo nte owo​—mma mme owo, mfọn ido, nnyụn̄ ntre asari.​—Kot Isaiah 11:9.

4. Ukara Abasi eyedisịm ofụri isọn̄

Jesus Christ enyene odudu akan kpukpru mme andikara. Kot Matthew 28:18, ekem ẹbọrọ mbụme emi ẹnyụn̄ ẹneme ẹban̄a enye:

• Nso inam odudu Jesus okpụhọde ye odudu mme andikara mi ke isọn̄?

Ẹsima ndikpụhọ ukara owo, ndien ediwak mmọ ẹsinyụn̄ ẹkara ndusụk itie kpọt ke isọn̄. Nso kaban̄a ukara Obio Ubọn̄ Abasi? Kot Daniel 7:14, ekem ẹbọrọ mbụme emi ẹnyụn̄ ẹneme ẹban̄a mmọ:

• Nso inam enem fi ndidiọn̄ọ ke tutu amama n̄kpọ ndomokiet idinamke ukara Abasi?

• Nso inam enem fi ndidiọn̄ọ ke ukara Abasi eyedisịm ofụri isọn̄?

5. Ntak emi anade ẹtre ukara owo

Ntak emi ọfọnde Obio Ubọn̄ Abasi edida itie ukara owo? Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.

VIDIO: Nso Idi Obio Ubọn̄ Abasi?​—Ekpri Esie (1:41)

• N̄kpọ etie didie tọn̄ọ mme owo ẹketọn̄ọ ndikara?

Kot Ecclesiastes 8:9, ekem ẹbọrọ mbụme emi ẹnyụn̄ ẹneme ẹban̄a mmọ:

• Ndi emekere ke ọfọn ukara Abasi edida itie ukara owo? Nso inam ọdọhọ ntre?

6. Mbon emi ẹkarade Obio Ubọn̄ Abasi ẹnen̄ede ẹdiọn̄ọ nte n̄kpọ etiede ye nnyịn

Jesus edi Edidem nnyịn; enye ekeme “nditua nnyịn mbọm ke mmemidem nnyịn” sia enye ama odu mi ke isọn̄. (Mme Hebrew 4:15) Jehovah emek owo 144,000, iren ye iban, “osion̄o ke kpukpru esien ye usem ye obio ye idụt” ete ẹditiene Jesus ẹkara.​—Ediyarade 5:9.

• Ndi enem fi ndidiọn̄ọ ke Jesus ye kpukpru mbon emi ẹditienede enye ikara ẹnen̄ede ẹdiọn̄ọ nte n̄kpọ etiede ye nnyịn? Nso inam ọdọhọ ntre?

7. Ibet Obio Ubọn̄ Abasi enen̄ede ọfọn akan ibet ukara owo

Ukara ẹsibọp ibet emi mmọ ẹkerede ke ọyọfọn ye mbon emi mmọ ẹkarade onyụn̄ an̄wam mmọ. Obio Ubọn̄ Abasi onyụn̄ enyene ibet emi anade mbon emi ẹsụkde ibuot ẹnọ ukara Abasi ẹtiene. Kot 1 Corinth 6:9-11, ekem ẹbọrọ mbụme emi ẹnyụn̄ ẹneme ẹban̄a mmọ:

• Ekere ke ererimbot editie didie ini kpukpru owo ẹdisinamde se Abasi ọdọhọde?a

• Ndi emekere ke Jehovah odot ndinịm ibet nnọ mbon oro ẹdude ke ukara esie? Nso inam ọdọhọ ntre?

• Nso iwụt ke owo emi mîsinịmke ibet Abasi ekeme ndikpụhọde?​—Se ufan̄ikọ 11.

SE IKPEPDE

Ukara Abasi ke heaven ke ẹkot Obio Ubọn̄ Abasi; ukara oro eyedisịm isọn̄ emi.

Se M̀mê Emeti

• Mmanie ikara Obio Ubọn̄ Abasi?

• Nso ye nso inam ukara Abasi ọfọn akan kpukpru ukara owo?

• Nso ye nso ke Jehovah oyom mbon emi ẹdude ke ukara esie ẹnam?

KPEP N̄KPỌ EN̄WEN

Se se Jesus eketịn̄de aban̄a ebiet emi Obio Ubọn̄ Abasi odude.

“Ndi Obio Ubọn̄ Abasi Odu Owo ke Esịt?” (Odu ke jw.org)

Nso inam Mme Ntiense Jehovah ẹma ndisụk ibuot nnọ ukara Abasi ẹkan ndisụk ibuot nnọ ukara owo?

Mmọ Ẹda Ẹnọ Obio Ubọn̄ Abasi (1:43)

Se se Bible etịn̄de aban̄a owo 144,000, emi Jehovah emekde ete ẹditiene Jesus ẹkara.

“Mmanie Ẹdika Heaven?” (Odu ke jw.org)

Nso ikanam n̄wan kiet ke ufọk-n̄kpọkọbi okụt ke Abasi kpọt edinam ufịk etre ererimbot?

“Nte N̄kasan̄ade Ndiọn̄ọ Se Idinamde Ufịk Etre” (g-E 11/11)

Jesus ọkọdọhọ ke mme mbet imọ ‘idịghe ubak ererimbot.’ (John 15:19) Ọwọrọ n̄kpọ kiet emi anade mbet Jesus ẹnam edi ndida san̄asan̄a​—isịnke idem ke pọlitik m̀mê ke ekọn̄. Edi esisọn̄ ndida san̄asan̄a ndusụk ini. Mme owo ẹkeme ndisio inua nnọ nnyịn ke ntak emi idade san̄asan̄a. Edi nso idin̄wam nnyịn ida san̄asan̄a inyụn̄ isọn̄ọ ida ye Jehovah Abasi?

1. Mme ata Christian ẹda didie ukara?

Mme ata Christian isin̄wanake ye ukara. Imesinam ikọ Jesus emi: “Ẹnọ Caesar se inyenede Caesar”​—imesinịm ibet ukara, utọ nte enye emi aban̄ade ukpe tax. (Mark 12:17) Bible ọdọhọ ke ukara owo ẹdu ke ntak emi Jehovah enyịmede mmọ ẹsụk ẹka iso ẹdu. (Rome 13:1) Emi owụt ke odudu oro ukara owo ẹnyenede enyene adan̄a, ke odudu mmọ ikponke nte eke Abasi. Nnyịn idori enyịn ke Abasi ye ukara esie emi odude ke heaven, sia n̄kukụre se idikọkde mfịna ererimbot emi edi oro.

2. Nso ke ikpanam man iwụt ke ida san̄asan̄a?

Ọfọn itie nte Jesus, ikûsịn idem ke pọlitik. Enyene utịben̄kpọ emi Jesus akanamde isan̄ kiet ini enye osụk odude mi ke isọn̄, mme owo ẹma ẹyom ndimek enye edidem ke ntak oro. Edi enye ikoyomke. (John 6:15) Nso ikanam enye okûyom? Enye ama etịn̄ ntak nte ini akade; enye ọkọdọhọ ete: “Obio ubọn̄ mi idịghe ubak ererimbot emi.” (John 18:36) Sia idide mbet Jesus, enyene mme n̄kpọ emi ikpanamde man iwụt ke ida san̄asan̄a. Ke uwụtn̄kpọ, inaha itiene in̄wana ekọn̄. (Kot Micah 4:3.) Kpa ye oro nnyịn mîsisehe idiọn̄ọ idụt nnyịn​—utọ nte flag​—ke mbio, inaha inọ mmọ ukpono emi ikpọnọde Abasi. (1 John 5:21) Nnyịn idinyụn̄ idaha inọ n̄ka ubre pọlitik m̀mê owo ekededi emi oyomde ukara. Ikpanam ofụri emi ye mme n̄kpọ eken emi Abasi amade, iwụt ke ida inọ ukara Abasi​—ke ida inọ Obio Ubọn̄ esie.

SỊN IDEM KPEP

3. Mme ata Christian ẹsida san̄asan̄a

Jesus ye mme mbet esie ẹma ẹnịm ata eti uwụtn̄kpọ ẹnọ nnyịn. Kot Rome 13:1, 5-7 ye 1 Peter 2:13, 14. Ama okot ama, se VIDIO emi. Ekem ẹbọrọ mbụme emi ẹnyụn̄ ẹneme ẹban̄a mmọ.

VIDIO: Mme Ata Christian Ẹsida San̄asan̄a​—Akpa Ikpehe (4:28)

• Ntak emi ikpokponode ukara?

• Nso ye nso idiwụt ke imosụk ibuot inọ mmọ?

Ke ini ekọn̄ asiahade, ndusụk idụt ẹsidọhọ ke mmimọ itieneke in̄wana ekọn̄ oro. Edi mmọ ẹsin̄wam n̄kan̄ emi m̀mê n̄kan̄ oko en̄wana. Nso ke owo ndida san̄asan̄a enen̄ede ọwọrọ? Kot John 17:16. Ama okot ama, se VIDIO emi. Ekem ẹbọrọ mbụme emi ẹnyụn̄ ẹneme ẹban̄a enye.

VIDIO: Mme Ata Christian Ẹsida San̄asan̄a​—Ọyọhọ Ikpehe Iba (3:11)

• Nso isiwụt ke owo ada san̄asan̄a?

Nso ke owo akpanam edieke ukara ẹdọhọde ẹnam se ibet Abasi akpande? Kot Utom 5:28, 29. Ama okot ama, se VIDIO emi. Ekem ẹbọrọ mbụme emi ẹnyụn̄ ẹneme ẹban̄a mmọ.

VIDIO: Mme Ata Christian Ẹsida San̄asan̄a​—Ọyọhọ Ikpehe Ita (1:18)

• Ukara ẹkpenọ ibet ẹte ẹnam ntem, edi ibet Abasi ete ẹnam ntem​—ewe ke ana inam?

• Ekere ke ini ewe ye ini ewe ke Christian mîkpanamke se ukara ẹdọhọde?

4. Yak se esikerede ye se esinamde owụt ke ada san̄asan̄a

Kot 1 John 5:21. Ama okot ama, se VIDIO emi. Ekem ẹbọrọ mbụme emi ẹnyụn̄ ẹneme ẹban̄a mmọ.

VIDIO: Ntak Emi Anade Mme Christian Ẹnyene Uko​—Man Ẹka Iso Ẹda San̄asan̄a (2:49)

• Ke vidio oro, nso ikanam Ayenge okûma nditiene ndụk n̄ka ubre pọlitik m̀mê nditiene n̄kọm utọ n̄kpọ nte flag?

• Ndi emekere ke nnennen n̄kpọ ke enye akanam oro?

Ndi emeti n̄kpọ en̄wen ekededi emi ediyomde ida san̄asan̄a? Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.

VIDIO: Se Ikpepde Ito Enyọn̄-Ukpeme​—Ka Iso Ndida San̄asan̄a ke Ererimbot Oro Mîdianake Kiet Mi (5:16)

• Nso idiwụt ke ida san̄asan̄a ke ini isede mbuba emi mbon idụt kiet ẹbrede ye mbon idụt en̄wen?

• Didie ke ikpowụt ke ida san̄asan̄a idem ke ini se mbon ukara ẹnamde anamde uwem ọsọn̄ ye nnyịn?

• Didie ke ndụk emi idụkde m̀mê se ikụtde ke TV m̀mê ke Intanet ekeme ndinam ọsọn̄ nnyịn ndida san̄asan̄a?

SE IKPEPDE

Mme ata Christian ẹsinam se ẹkekeme man se mmọ ẹsikerede, ẹtịn̄de, ẹnyụn̄ ẹnamde owụt ke mmọ ẹda san̄asan̄a.

Se M̀mê Emeti

• Nso ke ikpanam inọ ukara owo?

• Ntak emi nnyịn mîkpesịnke ubọk ke pọlitik?

• Nso ye nso ikeme nditịbe emi ediyomde ida san̄asan̄a?

KPEP N̄KPỌ EN̄WEN

Nso ye nso ke ekere ke ekeme ndiyom iyak atak man ida san̄asan̄a?

Jehovah Ikpọn̄ke Nnyịn Akpa (3:14)

Nso ke ubon kiet kiet ẹkpenam man ẹben̄e idem ẹnọ n̄kpọ emi editịbede, emi ediyomde mmọ ẹda san̄asan̄a?

Da San̄asan̄a ke Ini Odude ke Mme Itie Edinam Ererimbot (4:25)

Ntak emi owo ndin̄wana ekọn̄ nnọ idụt mmọ mîdịghe akakan n̄kpọ ukpono emi owo ekemede ndinam?

“Abasi Ekeme Ndinam Kpukpru N̄kpọ” (5:19)

Se idin̄wamde fi man utom idinam fi edi ubak ererimbot.

“Owo Kiet Kiet Oyobiom Mbiomo Idemesie” (Enyọn̄-Ukpeme, March 15, 2006)