UKPEPN̄KPỌ 30
Owo Mbufo Oro Akakpade Ekeme Ndiset!
N̄kpa anam ediwak owo ẹfụhọ ẹnyụn̄ ẹtuan̄a. Imosụk ise Bible okotde n̄kpa asua. (1 Corinth 15:26) N̄kọ ama okụt ke Ukpepn̄kpọ 27, ke Jehovah ayanam n̄kpa etre? Edi nso iditịbe inọ mbon oro ẹkpade mbemiso ini oro? Ke ukpepn̄kpọ emi, oyokụt utịben̄kpọ en̄wen emi Jehovah edinamde. Enye ayanam ediwak biliọn owo oro ẹkpade ẹset, ẹfiak ẹdidu uwem! Ndi osụk edi akpanikọ ke Jehovah ayanam mme akpan̄kpa ẹset? Ndi mmọ ẹdiset ika heaven m̀mê ẹdiset ididu mi ke isọn̄?
1. Nso ke Jehovah oyom ndinam nnọ mbon nnyịn emi ẹkpade?
Jehovah Abasi enen̄ede oyom ndinam mbon emi ẹkpade ẹset. Owo Abasi kiet emi ekekerede Job ama enen̄ede enịm ke Abasi idifreke imọ ke udi. Enye ọkọdọhọ ete: “Afo oyokot, ndien ami nyeyere fi [ke udi].”—Kot Job 14:13-15.
2. Nso iwụt ke ẹkeme ndinam owo emi ama akakpa eset?
Ini Jesus okodude mi ke isọn̄, Abasi ama ọnọ enye odudu anam mme owo ẹset. Enye ama anam ekpri eyenan̄wan isua 12 ye eyen ebekpa kiet ẹset. (Mark 5:41, 42; Luke 7:12-15) Jesus ama onyụn̄ anam Lazarus ufan esie eset. Lazarus ama akpa ẹnyụn̄ ẹbụk enye usen inan̄, edi Jesus ama edinam enye eset. Jesus ama ọbọn̄ akam ọnọ Abasi, ekem ọdọhọ ete: “Lazarus, wọrọ di!” Ndien “owo oro akakpade mi ọwọrọ edi” ye uwem! (John 11:43, 44) Esịt ama enem nditọeka Lazarus ye mme ufan esie utọ oro idụhe!
3. Nso iditịbe inọ mbon mbufo oro ẹkpade?
Bible ọdọhọ ke mme owo “ẹyeset ke n̄kpa.” (Utom 24:15) Mbon oro Jesus akanamde ẹset do ikesetke ika heaven. (John 3:13) Mmọ ẹkeset ẹdidu uwem mi ke isọn̄; esịt ama onyụn̄ enem mmọ tutu. Ibịghike Jesus ayafiak anam ukem n̄kpọ oro, enye ayanam ediwak biliọn owo ẹset ẹdidu ata uwem ke nsinsi mi ke isọn̄. Ini oro isọn̄ edidi Paradise. Jesus ọkọdọhọ ke “kpukpru mme andidu ke udi editi” ẹyeset—idem mbon emi mme owo ẹma ẹkefre, edi emi Abasi mîfreke, ẹyeset.—John 5:28, 29.
SỊN IDEM KPEP
Se nte Bible owụtde ke ẹkeme ndinam mme akpan̄kpa ẹset, ye nte Bible owụtde ke oro eyetịbe. Se n̄ko nte ediset ke n̄kpa ekemede ndidọn̄ fi esịt nnyụn̄ nnọ fi idotenyịn.
4. Se Jesus akanamde owụt ke enye ekeme ndinam mme akpan̄kpa ẹset
Kpep n̄kpọ en̄wen ban̄a se Jesus akanamde ọnọ Lazarus ufan esie. Kot John 11:14, 38-44, ekem ẹbọrọ mbụme emi ẹnyụn̄ ẹneme ẹban̄a mmọ:
Nso iwụt ke edi akpanikọ ke Lazarus ama akpa?—Se ufan̄ikọ 39.
Ekpedi Lazarus akakpa aka heaven, ndi emekere ke Jesus akpakanam enye eset ọkpọn̄ heaven afiak edidu ke isọn̄ emi?
5. Ẹyenam ata ediwak owo ẹset!
Kot Psalm 37:29, ekem ẹbọrọ mbụme emi ẹnyụn̄ ẹneme ẹban̄a enye:
Ediwak biliọn owo emi ẹdisetde ẹdidu ke m̀mọ̀n̄?
Jesus ayanam ata ediwak owo emi ẹkpade ẹset, edi idịghe mbon oro ẹkponode Jehovah kpọt ke enye edinam ẹset. Kot Utom 24:15, ekem ẹbọrọ mbụme emi ẹnyụn̄ ẹneme ẹban̄a enye:
Anie ke afo enen̄ede oyom ndikụt ẹma ẹnam mme owo ẹset?
Ti ke isọn̄ke Jesus ndinam owo emi ama akakpa eset, onyụn̄ etie nte ete ndidemede eyen ke idap
6. Ndidiọn̄ọ ke ẹyenam mme akpan̄kpa ẹset ekeme ndidọn̄ fi esịt onyụn̄ ọnọ fi idotenyịn
Mbụk eyen Jairus ke Bible ọdọn̄ ediwak owo emi mbon mmọ ẹkpade esịt, onyụn̄ ọsọn̄ọ mmọ idem. Kot ata mbụk oro ke Luke 8:40-42, 49-56.
Jesus ama ọdọhọ Jairus mbemiso anamde eyen esie eset ete: “Kûfehe ndịk, kam buọt idem.” (Se ufan̄ikọ 50.) Didie ke ndidiọn̄ọ ke ẹyenam mme akpan̄kpa ẹset ekeme ndin̄wam fi . . .
ke ini owo emi amade akpade?
ke ini okụtde n̄kpa ke enyịn?
Se VIDIO emi, ekem ẹbọrọ mbụme oro etienede ẹnyụn̄ ẹneme ẹban̄a enye.
Didie ke ndidiọn̄ọ ke mme akpan̄kpa ẹyeset ọkọdọn̄ ete ye eka Phelicity esịt onyụn̄ ọsọn̄ọ mmọ idem?
NDUSỤK OWO ẸSIDỌHỌ ẸTE: “N̄kereke ke ẹyenam mme akpan̄kpa ẹset.”
Afo ekere didie?
Itie Bible ewe ke akpada anam utọ owo oro ọdiọn̄ọ ke ẹyenam mme akpan̄kpa ẹset?
SE IKPEPDE
Bible owụt ke ẹyenam ediwak biliọn owo ẹset. Enen̄ede ọdọn̄ Jehovah ndinam mmọ ẹset, ndien enye ọnọ Jesus odudu ndinam oro.
Se M̀mê Emeti
Ekere ke etie Jehovah ye Jesus didie ndinam mme owo ẹset?
Ediwak biliọn owo oro ẹdinamde ẹset ẹdidu ke m̀mọ̀n̄—ke heaven m̀mê ke isọn̄? Nso inam ọdọhọ ntre?
Nso inam fi enen̄ede enịm ke ẹyenam mme akpan̄kpa ẹset?
KPEP N̄KPỌ EN̄WEN
Se se ikemede ndin̄wam fi ke ini owo fo akpade.
“Se Idin̄wamde Mbon Emi Ẹfụhọde N̄kpa Owo Mmọ” (Ẹdemede! No. 3 2018)
Ndi item Bible osụk ekeme ndin̄wam owo emi owo esie akpade?
Nso ikeme ndin̄wam nditọwọn̄ ke ini owo emi mmọ ẹmade akpade?
Ndi owo ndomokiet eyeset aka heaven? Mmanie ke owo mîdinamke ẹset?