Tiene Uwụtn̄kpọ Jesus eke Uten̄e Abasi
“Owo ikemeke ndineni ete [uten̄e] Abasi edi akwa ndịben̄kpọ; edi Enyeemi [Jesus] akayararede Idemesie ke obụkidem.”—1 TIMOTHY 3.16.
1. (a) Nso mbụme ke owo mîkọbọrọke ke se iwakde ikan isua 4,000? (b) Ini ewe, n̄ko didie ke ẹkebọrọ?
MBỤME kiet ama odu oro owo mîkọbọrọke ke se iwakde ikan isua 4,000. Tọn̄ọ nte akpa owo oro, Adam, okokpu ndimụm nsọn̄ọnda n̄kama, mbụme oro ekedi: Didie ke ẹkeme ndiyarade uten̄e Abasi n̄wụt ke otu ubonowo? Ke akpatre, ke akpa isua ikie C.E., ye Eyen Abasi ndidi ke isọn, ẹma ẹbọrọ mbụme emi. Ke kpukpru ekikere, ikọ, ye edinam, Jesus Christ ama ayarade ọkpọ ọkpọ ebuana esie ye Jehovah owụt. Enye ke ntem ama ayarade ‘edisana ndịben̄kpọ uten̄e Abasi,’ owụtde usụn̄ odude ọnọ mbon oro ẹyakde idem ẹnọ ndisọn̄ọ mmụm utọ uten̄e oro n̄kama.—1 Timothy 3:16.
2. Ke ndibịne uten̄e Abasi, ntak emi nnyịn ikpesede uwụtn̄kpọ Jesus ket-ket?
2 Ke ndibịne uten̄e Abasi nte mme Christian oro ẹyakde idem ẹnọ ẹnyụn̄ ẹna baptism, nnyịn iyenam ọfọn ‘ndise’ uwụtn̄kpọ Jesus ket-ket. (Mme Hebrew 12:3) Ntak-a? Ke ntak iba. Akpa, uwụtn̄kpọ Jesus ekeme ndin̄wam nnyịn ikọri uten̄e Abasi. Jesus ama ọfiọk Ete esie ọfọn akan owo en̄wen ekededi. (John 1:18) Ndien Jesus ama otịm ekpebe mme usụn̄ ye mme edu Jehovah ket-ket tutu enye ekekeme ndidọhọ: “Owo eke okokụtde Mi okokụt Ete.” (John 14:9) Otode uwem ye utom Jesus, ndien, nnyịn imekeme ndifiọk ntotụn̄ọ ntotụn̄ọ mban̄a nti edu Jehovah, ke ntem anamde ọkpọ ọkpọ ebuana nnyịn ye ima ima Andibot nnyịn ọsọn̄ idem. Udiana, uwụtn̄kpọ Jesus ekeme ndin̄wam nnyịn ndiyarade uten̄e Abasi n̄wụt. Enye ama onịm mfọnmma uwụtn̄kpọ ke edu oro ayararede uten̄e Abasi owụt. Nnyịn ke ntem iyenam ọfọn ke ndineme nte ikemede ‘ndimen Christ nsịne,’ oro edi, ndida enye nte uwụtn̄kpọ, ikpebede uwụtn̄kpọ esie.—Rome 13:14.
3. Ndutịm ọkpọ ọkpọ ukpepn̄kpọ Bible nnyịn ekpesịne nso, ndien ntak-a?
3 Idịghe kpukpru n̄kpọ oro Jesus eketịn̄de onyụn̄ anam ke ẹketịm ẹnịm ke uduot ẹwetde-wet. (John 21:25) Ntre, mme n̄kpọ ẹkewetde ẹnịm ke ndausụn̄ odudu Abasi ẹkpenyene ndidi akpan n̄kpọ oro ebehede nnyịn. Ndutịm ọkpọ ọkpọ ukpepn̄kpọ Bible ke ntre ekpenyene ndisịne edikot mbụk Gospel ofụri ini oro aban̄ade uwem Jesus. Edi edieke anade utọ edikot n̄wed oro an̄wam nnyịn ke edibịne oro ibịnede uten̄e Abasi, ana nnyịn ida ini ndikere ye esịtekọm mban̄a se nnyịn ikotde. Ana nnyịn n̄ko idu ke edidemede ndise mbe se ẹkụtde ke enyịn.
Eyen Mbiet Ete
4. (a) Nso iwụt nte ke Jesus ekedi owo oro enyenede ima ye ntotụn̄ọ udọn̄? (b) Nso ke Jesus ekebemiso anam ye mbon eken?
4 Kere ban̄a uwụtn̄kpọ kiet. Jesus ekedi owo esịt-ima ye ntotụn̄ọ udọn̄. Tịmfiọk ke Mark 10:1, 10, 13, 17, ye 35 ete ke mme owo ke kpukpru isua emana ye idaha ke uwem ẹma ẹkụt enye nte edide se ẹkemede ndisan̄a n̄kpere. Ke se iwakde ikan ini kiet, enye ama emen nditọn̄wọn̄ akama. (Mark 9:36; 10:16) Ntak emi mme owo, idem nditọn̄wọn̄ ẹkedude ifụre ifụre ntre ye Jesus-e? Ntak ekedi ata udọn̄ esịt akpanikọ oro enye ekenyenede ke idem mmọ. (Mark 1:40, 41) Emi ama owụt idem sia enye ekesiwakde ndibemiso nsan̄a n̄kpere mmọ eken oro ẹkeyomde un̄wam. Ntem, nnyịn ikot nte enye “ok[ok]ụtde” ebeakpa eke Nain oro ẹkemende eyeneren esie oro akakpade ẹwọrọ. Do enye ama “asan̄a ekpere” onyụn̄ anam eyeneren oro eset, owo itịn̄ke ndomokiet nte ke owo ekededi ama eben̄e enye ndinam ntre. (Luke 7:13-15) Enye n̄ko, ke owo mîka-iben̄eke enye ndinam ntre, ama ebemiso ọtọn̄ọ ke ndikọk n̄wan oro ekedide mbụn̄ọ ye eren oro ọkọdọn̄ọde akpamfia.—Luke 13:11-13; 14:1-4.
5. Nso ke mbụk aban̄ade utom Jesus ekpep nnyịn aban̄a mme edu ye usụn̄ Jehovah?
5 Ke ini okotde aban̄a mme utọ n̄kpọntịbe ntre, tuak da nyụn̄ bụp idemfo ete: ‘Sia Jesus ekekpebede Ete esie ke mfọnmma usụn̄, nso ke mbụk emi ekpep mi aban̄a mme edu ye usụn̄ Jehovah?’ Mmọ ẹkpenyene ndifiak nsọn̄ọ nnọ nnyịn nte ke Jehovah edi Abasi ima ye ntotụn̄ọ udọn̄. Akwa ubom nsinsi ima oro enye amade ubonowo akanam enye ebemiso ọtọn̄ọ ke ndinam n̄kpọ ye mmọ. Enye ikedịghe se ẹnyịkde-nyịk mbemiso ọnọde Eyen esie “ndifak ediwak owo.” (Matthew 20:28; John 3:16) Enye oyoyom mme ifet ‘ndima’ mbon oro ẹdinamde n̄kpọ esie ke ima. (Deuteronomy 10:15) Nte Bible ọdọhọde: “Enyịn Jehovah [asasan̄a] ke ofụri ererimbot, ete isọn̄ọ imụm mmọ eke ofụri esịt mmọ odude ye enye ikama.”—2 Chronicles 16:9.
6. Nso isidi utịp ke ini nnyịn ikerede iban̄a ima ye ntotụn̄ọ udọn̄ Jehovah nte Eyen esie ọkọnọde uwụtn̄kpọ?
6 Ndikere n̄kpọ ke usụn̄ emi mban̄a ima ye ntotụn̄ọ udọn̄ Jehovah, nte Eyen esie ọkọnọde uwụtn̄kpọ, eyetụk fi esịt, anamde esịt fo ọyọhọ ye n̄kpon n̄kan ekọm kaban̄a nti ye ndiye edu Esie. Emi, ndien, eyedụri fi adian enye. Eyenam fi asan̄a ekpere enye ifụre ifụre ke akam kpukpru ini ye ke kpukpru idaha. (Psalm 65:2) Emi eyenam ọkpọ ọkpọ ebuana fo ye enye ọsọn̄ idem.
7. Ke ama ekekere aban̄a ima ye ntotụn̄ọ udọn̄ Jehovah, nso ke afo okpobụp idemfo, ndien ntak-a?
7 Ti ete, okposụkedi, ke uten̄e Abasi esịne se ikponde akan sụk ntụk utuakibuot. Nte eyen ukpepn̄kpọ Bible oro, R. Lenski ọdọhọde, enye “abuana ofụri ukpono nnyịn, edu utuakibuot nnyịn, ye mme edinam ẹtode enye.” (Sịghisịghi ubọkn̄wed edi eke nnyịn) Ntre ke ama ekekere aban̄a ima ye ntotụn̄ọ udọn̄ Jehovah nte Jesus ọkọnọde uwụtn̄kpọ, bụp idemfo ete: ‘Didie ke ami n̄keme nditịm mbiet Jehovah ke afan̄ emi? Nte mbon eken ẹkụt nte ami ndide se ẹsan̄ade ẹkpere?’ Edieke afo edide ete m̀mê eka, ana afo edi se nditọ fo ẹkemede ndisan̄a n̄kpere. Ndien edieke afo edide ebiowo esop, ke akpanikọ afo ekpenyene ndidi se ẹkemede ndisan̄a n̄kpere. Nso, ndien idinam afo ototịm edi se ẹsan̄ade ẹkpere? Esịt-ima ye ntotụn̄ọ udọn̄. Ana afo ọkọri ata udọn̄ esịt akpanikọ ke idem mbon en̄wen. Ke ini afo enen̄erede ekere aban̄a mmọ en̄wen onyụn̄ onyịmede ndiyak idemfo nnọ ke ufọn mmọ, mmọ ẹyefiọk ẹban̄a emi ẹnyụn̄ ẹkụt nte odụride mmimọ adian idem fo.
8. (a) Nso ke afo ekpenyene ke ekikere nte afo okotde mbụk Bible aban̄ade Jesus? (b) Nso ke nnyịn ikpep iban̄a Jehovah ito mbụk ẹsiakde ke ikọ idakisọn̄?
8 Ntre nte afo okotde mbụk Bible aban̄ade Jesus, nyene ke ekikere ete ke imọ imekeme ndikpep ekese mban̄a Jehovah nte owo, oto mme n̄kpọ oro Jesus eketịn̄de onyụn̄ anamde.a Ndien ke ini esịtekọm oro afo enyenede aban̄a mme edu Jehovah, nte Jesus okowụtde, onụkde fi nditịm mbiet Enye, afo ke ọnọ uyarade uten̄e Abasi fo.
Ndinanam Uten̄e Abasi ye Mbon Ufọk
9, 10. (a) Didie ke ima ye edikere oro Jesus ekekerede aban̄a eka esie, Mary, akayarade owụt idem ibio ibio ini mbemiso enye akpade? (b) Nte an̄wan̄ade, ntak emi Jesus akayakde Mary esịn apostle John ke ubọk ndikpeme mînyụn̄ idịghe kiet ke otu nditọeka esie?
9 Uwem ye utom Jesus Christ ẹyarade ekese ẹban̄a nte ẹkpewụtde uten̄e Abasi. Ewet uwụtn̄kpọ kiet oro otụkde owo esịt ke John 19:25-27, ke ebiet emi nnyịn ikotde ite: “Eka Jesus, ye eyeneka Esie, Mary n̄wan Clopas, ye Mary Magdalene ke ẹda ẹkpere [eto ndutụhọ] Jesus. Ke ini Jesus okụtde eka Esie ye mbet [John] emi Enye amade nte ẹdade do, Enye ọdọhọ eka Esie, ete, N̄wan, sese, eyen fo do. Ekem Enye onyụn̄ ọdọhọ mbet oro, ete, Sese, eka fo do. Toto ke ini oro mbet oro ada Mary ọnyọn̄ ufọk esiemọ.”
10 Kere ban̄a oro! Ke esisịt ini mbemiso enye ayakde uwem esie eke isọn̄ ọnọ, ima ye edikere oro Jesus ekekerede aban̄a ama anam enye ayak eka esie, Mary, (oro nte an̄wan̄ade idahaemi ekedide ekpeakpa) esịn edima apostle John ke ubọk ndikpeme. Ntak ekedide John mînyụn̄ idịghe kiet ke otu nditọeka Jesus? Koro Jesus ikekereke iban̄a sụk n̄kpọ obụkidem oro ananade Mary edi ekekere akpan akpan aban̄a mfọnọ n̄kpọ esie eke spirit. Ndien apostle John (etiede nte ekedi eyen eyeneka eka Jesus) ama ọsọn̄ọ mbuọtidem esie owụt, ke adan̄aemi idiọn̄ọ ndomokiet mîdụhe nte ke nditọeka Jesus, mi kan̄a, ẹkedi mme andinịm ke akpanikọ.—Matthew 12:46-50; John 7:5.
11. (a) Nte Paul ọdọhọde, didie ke Christian ekeme ndinanam uten̄e Abasi ke esịtufọk esiemọ? (b) Ntak emi ata Christian anamde ndutịm ọnọ ete ye eka esie oro ẹsọn̄de?
11 Idahaemi, didie ke emi ekedi ediyarade uten̄e Abasi n̄wụt? Apostle Paul anam an̄wan̄a ete: “Kpono mme ebeakpa ẹmi ẹdide mme ebeakpa ke akpanikọ. Edi edieke ebeakpa enyenede nditọ m̀mê nditọ-nditọ, yak mmọ oro ẹkpep ndibem nnam se idotde ye mbon ufọk, nnyụn̄ nsio usiene nnọ mme [ete ye] eka mmọ [ye mme eteete ye ekaeka]; koro emi ọfọnde Abasi ke enyịn.” (1 Timothy 5:3, 4) Owo ndikpono ete ye eka esie ke ndinọ un̄wam n̄kpọ obụkidem ke ini oro edide se ẹyomde, nte Paul ọdọhọde, edi ediwụt uten̄e Abasi. Didie ke edi ntre? Jehovah, Anditọn̄ọ ndutịm ubon, ọnọ nditọ ewụhọ ndikpono mme ete ye eka mmọ. (Ephesus 3:14, 15; 6:1-3) Ntem, ata Christian ọdiọn̄ọ ete ke edibiom orụk mbiomo mbon oro iwụtke ima ikpọn̄îkpọn̄ oro owo amade ete ye eka esie edi owụt n̄ko ukpono oro ẹkponode Abasi ye nsụkibuot nnọ mme ewụhọ esie.—Men Colossae 3:20 domo.
12, Didie ke afo ekeme ndinanam uten̄e Abasi ye ete ye eka oro ẹsọn̄de, ndien nso ikpedi uduak?
12 Didie, ndien, ke afo ekeme ndinanam uten̄e Abasi ye mbon ufọk? Emi ke akpanikọ abuana edinam ndutịm ndinọ n̄kpọ eke spirit ye eke obụkidem oro ananade mme ete ye eka oro ẹsọn̄de, nte Jesus akanamde. Ndikpu ndinam emi ayarade unana uten̄e Abasi. (Men 2 Timothy 3:2, 3, 5 domo.) Christian oro ayakde idem ọnọ ese aban̄a ete ye eka oro ẹdude ke unana idịghe n̄kukụre ke ntak mfọnido m̀mê sia adade emi nte isoutom edi ke ntak enye amade ubon esie, enye onyụn̄ ọdiọn̄ọ nte Jehovah abatde orụk mbiomo oro ke akwa ukpono. Ntem, enye ndise mban̄a ete ye eka oro ẹsọn̄de edi ediwụt uten̄e Abasi.b
13. Didie ke ete oro edide Christian ekeme ndinanam uten̄e Abasi ye ubon esie?
13 Ẹkeme ndinanam uten̄e Abasi ke ufọk ke mme usụn̄ en̄wen. Ke uwụtn̄kpọ, ete oro edide Christian enyene mbiomo ndinọ ubon esie n̄kpọ obụkidem, ye n̄kpọ eke spirit. Ntre, ke adianade ye edinọ un̄wam eke obụkidem, enye ke ima anam ndutịm ndinyene ukpepn̄kpọ Bible eke ubon kpukpru ini. Enye odiomi ini ndibuana kpukpru ini ke an̄wautom ye ubon esie. Enye ada ukem ukem, ọdiọn̄ọde udọn̄ mmọ ndinyene nduọkodudu ye mbre n̄ko. Ndien enye ke ọniọn̄ osio mme ebeiso n̄kpọ onịm akpa, iyakke utom esop anam enye ofụmi ubon esie. (1 Timothy 3:5, 12) Ntak emi enye anamde kpukpru ẹmi-e? Idịghe ikpîkpu ke ntak abatde emi nte iso-utom edi ke ntak ima oro enye amade ubon esie. Enye ọdiọn̄ọ nte ke Jehovah abat owo ndise mban̄a ubon esie ke akpan n̄kpọ. Ke ndiyọhọ mbiomo esie nte ebe ye ete, enye ke ananam uten̄e Abasi.
14. Didie ke n̄wanndọ Christian ekeme ndinanam uten̄e Abasi ke ufọk?
14 Ibanndọ Christian ẹnyene mbiomo ndinanam uten̄e Abasi ke ufọk. Didie? Bible ọdọhọ ke n̄wanndọ ekpenyene ‘ndisụk idem’ nnọ ebe esie, ekpenyene ndiwụt enye ‘ntotụn̄ọ ukpono.’ (Ephesus 5:22, 33) Idem edieke ebe esie mînịmke ke akpanikọ, n̄wan enyene ‘ndisụk idem’ nnọ enye. (1 Peter 3:1) N̄wanndọ Christian owụt utọ nsụkibuot eke an̄wanndọ oro ke ndin̄wam ebe esie ke mme ubiere oro ebe anamde adan̄a nte mmọemi mîtuahake ye mme ibet Abasi. (Utom 5:29) Ndien ntak emi n̄wan onyịmede ndinam emi-e? Idịghe n̄kukụre sia enye amade ebe esie edi akpan akpan sia enye ọdiọn̄ọde nte emi “odotde ke Ọbọn̄”—oro edi, nte ke emi edi ndutịm oro Abasi anamde ọnọ ubon. (Colossae 3:18) Unyịme unyịme nsụkibuot esie nnọ ebe esie ke ntem edi ediwụt uten̄e Abasi.
“N̄kọwọrọ Ndi ke Ntak Emi”
15. N̄wọrọnda usụn̄ ewe ke Jesus akayarade uten̄e Abasi owụt?
15 Kiet ke otu n̄wọrọnda usụn̄ oro Jesus okowụtde uten̄e Abasi ekedi ‘ndikwọrọ eti mbụk Obio Ubọn̄ Abasi.’ (Luke 4:43) Ke baptism esie okụrede ke Jordan ke 29 C.E., Jesus ama abiat isua ita ye ubak oro ẹketienede ke ndisịn idem ifịk ifịk ke akakan utom emi. Enye ama anam an̄wan̄a ete, “N̄kọwọrọ ndi ke ntak emi.” (John 18:37) Edi didie ke emi ekedi ediwụt uten̄e Abasi esie?
16, 17. (a) Nso ikonụk Jesus ndisịn idem ifịk ifịk ke utom ukwọrọikọ ye edinọ ukpep? (b) Ntak emi utom ukwọrọikọ ye edinọ ukpep eke Jesus ekedide ediwụt uten̄e Abasi esie?
16 Ti ete ke uten̄e Abasi esịne edidu uwem ke usụn̄ oro enemde Abasi esịt sia afo amade enye onyụn̄ owụtde esịtekọm ntotụn̄ọ ntotụn̄ọ ke ndiye edu esie. Ndien nso idi n̄kpọ oro okonụkde Jesus ndibiat mme ukperedem isua esie eke isọn̄ ndisịn idem ifịk ifịk ke ukwọrọikọ ye edinọ ukpep? Ndi ikpîkpu edibat emi nte iso-utom m̀mê mbiomo? Mbụme idụhe nte ke enye ikekereke iban̄a mme owo. (Matthew 9:35, 36) Ndien enye ama ọdiọn̄ọ ọyọhọ ọyọhọ nte ke ediyet imọ aran ke edisana spirit ama emek onyụn̄ owụk imọ ndinam utom imọ n̄kụre. (Luke 4:16-21) Edi, mme uduak esie ẹma ẹka anyan ntotụn̄ọ ntotụn̄ọ.
17 Jesus ama etịn̄ in̄wan̄în̄wan̄ ọnọ mme apostle esie ke akpatre okoneyo oro enye okodude uwem ke isọn ete, “[Ami] mmama Ete.” (John 14:31) Ima oro ọkọn̄ọ ke ata ntotụn̄ọ ifiọk oro otịmde ọfiọk mme edu Jehovah. (Luke 10:22) Ke anamde n̄kpọ oto esịt oro ntotụn̄ọ ifiọk edemerede enye, Jesus ama okop idatesịt ke ndinam uduak Abasi. (Psalm 40:8) Emi ekedi “udia” esie—edide se ẹyomde ke uwem, otịmde enyene inem. (John 4:34) Enye ama onịm mfọnmma uwụtn̄kpọ ‘edibemiso nyom Obio Ubọn̄’ utu ke ndimen idemesie nnịm akpa. (Matthew 6:33) Se ikanamde utom ukwọrọikọ ye unọ ukpep esie ẹdi ediwụt uten̄e Abasi ikakam idịghe se enye akanamde m̀mê idem adan̄a uwak n̄kpọ oro enye akanamde edi ntak emi enye akanamde.
18. Ntak emi edinyene ndusụk ebuana ke utom ukwọrọikọ mînen̄ekede idi ediwụt uten̄e Abasi?
18 Didie ke nnyịn ikeme nditiene “uwụtn̄kpọ” oro, Jesus, ke afan̄ emi? (1 Peter 2:21) Kpukpru mbon oro ẹnyịmede ikot oro Jesus ọnọde ete ‘ẹdi mme anditiene mi’ ẹnyene utom otode Abasi ndikwọrọ eti mbụk Obio Ubọn̄ nnyụn̄ nnam mme mbet. (Luke 18:22; Matthew 24:14; 28:19, 20) Nte emi ọwọrọ ete ke ndinyene ndusụk ebuana ke edikwọrọ eti mbụk, nnyịn ke ibịne uten̄e Abasi? Inen̄eke idi ntre. Edieke nnyịn ikpanamde utom emi enyọn̄ enyọn̄ m̀mê ido idiọn̄ọ, m̀mê n̄kukụre man ikpenem mbon ufọk nnyịn m̀mê mbon en̄wen esịt, owo ikpekeme-keme ndibat emi nte ‘edinam uten̄e Abasi.’—2 Peter 3:11.
19. (a) Nso inyene ndidi akpan ntak ke se nnyịn inamde ke utom ukwọrọikọ? (b) Nso idi utịp ke ini ntotụn̄ọ ima oro imade Abasi edemerede nnyịn esịt?
19 Nte ekedide ye Jesus, ana mme uduak nnyịn ẹka anyan ntotụn̄ọ ntotụn̄ọ. Jesus ọkọdọhọ ete: “Afo nyụn̄ ma Jehovah Abasi fo ke ofụri esịt fo [mme ntụk, uduak, ye se owo edide ke esịt esịt], ye ke ofụri ukpọn̄ fo [uwem fo ye ofụri se afo edide], ye ke ofụri ekikere fo [ukeme ifiọk fo], ye ke ofụri odudu fo.” Kaban̄a emi, ọfiọkn̄kpọ owo scribe ama adian do ete: “Emi . . . omotịm okpon akan kpukpru edifọp enọ ye uwa.” (Mark 12:30, 33, 34) Ntre idịghe se nnyịn inamde ikpọn̄îkpọn̄ edi n̄kpọ, edi n̄ko ntak nnyịn inamde enye. Ata ntotụn̄ọ ima oro imade Abasi oro abuanade ofụri ikpehe uwem nnyịn ana edi akpan ntak ke se nnyịn inamde ke utom ukwọrọikọ. Ke ini oro edide ntak, nnyịn idiyụhọke ye ikpîkpu idiọn̄ọ ebuana, edi ẹyedemede nnyịn esịt ndiwụt nte uten̄e Abasi nnyịn otụn̄ọde ke ndisịn ofụri ukeme nnyịn. (2 Timothy 2:15) Ke ukem ini oro, ke ini ima oro imade Abasi edide ntak, nnyịn idisụkke uyo, idimenke utom nnyịn idomo ye eke mbon en̄wen.—Galatia 6:4.
20. Didie ke nnyịn ikeme ndibọ ufọn ọyọhọ ọyọhọ nto editiene uwụtn̄kpọ Jesus ke ndibịne uten̄e Abasi?
20 Nnyịn iwụt esịtekọm didie ntem nte ke Jehovah amayarade edisana ndịben̄kpọ aban̄ade uten̄e Abasi ọnọ nnyịn! Ke ndida ini n̄kpep mme n̄kpọ oro Jesus eketịn̄de onyụn̄ anamde, ndinyụn̄ ndomo ndikpebe enye, ẹyen̄wam nnyịn ndikọri nnyụn̄ nyarade uten̄e Abasi n̄wụt ke ata ọyọhọ udomo. Jehovah eyediọn̄ nnyịn uwak uwak nte nnyịn itienede uwụtn̄kpọ Jesus ke ndibịne uten̄e Abasi nte mme Christian oro ẹma ẹkeyak idem ẹnọ ẹnyụn̄ ẹna baptism.—1 Timothy 4:7, 8.
[Mme Ikọ Idakisọn̄]
a Man enyene ndusụk uwụtn̄kpọ efen, kere ban̄a se nnyịn ikpepde iban̄a Jehovah ke mbụk ẹtienede mi: Matthew 8:2, 3; Mark 14:3-9; Luke 21:1-4; ye John 11:33-36.
b Ke oyomde ọyọhọ ntọt ke se ibuanade edinanam uten̄e Abasi, se Enyọn̄-Ukpeme eke June 1, 1987, page 13-18.
Nte Afo Emeti?
◻ Ke ndibịne uten̄e Abasi, ntak emi ikpesede uwụtn̄kpọ Jesus ket-ket?
◻ Nso ke nnyịn ikpep iban̄a Jehovah oto ima ye ntotụn̄ọ udọn̄ oro Jesus ọkọnọde uwụtn̄kpọ?
◻ Didie ke nnyịn ikeme ndiwụt mbon ufọk nnyịn uten̄e Abasi?
◻ Nso inyene ndidi uduak nnyịn man utom ukwọrọikọ nnyịn ekpedi ediwụt uten̄e Abasi?
[Ndise ke page 21]
Ete oro edide Christian enyene mbiomo ndinọ ubon esie n̄kpọ obụkidem, ye n̄kpọ eke spirit
[Ndise ke page 23]
‘Edi edieke ebeakpa enyenede nditọ m̀mê nditọ-nditọ, yak mmọemi . . . ẹkaiso ẹsio usiene ẹnọ mme ete ye eka ye eteete ye ekaeka mmọ.’