1. Anie ke Jesus edi?

Jesus odu ke heaven; enye enen̄erede enyene odudu. Jesus ke Jehovah Abasi ekebem iso obot. Oro anam ẹkot enye “akpan ke otu kpukpru edibotn̄kpọ.” (Colossae 1:15) Bible okot Jesus “ikpọn̄-ikpọn̄ edibon Eyen” Abasi, sia Jesus kpọt ke Jehovah akada ubọk esie obot. (John 3:16) Ekem Jesus ama adiana ye Ete esie Jehovah anam utom, an̄wam enye obot kpukpru n̄kpọ eken. (Kot Mme N̄ke 8:30.) Jesus enen̄ede ekpere Jehovah Abasi. Bible okot enye “Ikọ,” sia enye edi etịn̄ikọ ke ibuot Abasi ke ata ediwak isua, esinyụn̄ anam ẹdiọn̄ọ se Abasi oyomde.​—John 1:14.

Nsọn̄ibuot Adam ye Eve edi ntak idiọkn̄kpọ ye ufen ye n̄kpa emi ọyọhọde ererimbot emi.a Edi n̄kpọ iditiehe ntem ke nsinsi. Jehovah ama ọnọ Jesus Christ Eyen esie edi man edinyan̄a nnyịn osio ke ufụn idiọkn̄kpọ ye n̄kpa. Bible etịn̄ ke Jesus ama akpa ke ibuot nnyịn​—ọnọ uwem esie nte ufak ibuot nnyịn. Ufak edi n̄kpọ ekededi emi ẹnọde man ẹsana owo oro ẹkemụmde ẹyak. Jesus ama ọnọ mfọnmma uwem esie ke ibuot nnyịn. (Kot Matthew 20:28.) Enye ama enyịme ndiyak mfọnmma uwem emi enye okpokodude ke isọn̄ ke nsinsi atak, man nnyịn ifiak inyene kpukpru se Adam ye Eve ẹkenamde atak nnyịn. Jesus ama owụt n̄ko adan̄a nte enye ye Jehovah ẹmade nnyịn. Se edikụtde ke ukpepn̄kpọ emi ayanam fi enen̄ede okụt se n̄kpa Jesus anamde ọnọ fi.

1. Nso ke ikpanam man n̄kpa Jesus enyene ufọn ọnọ nnyịn?

Sia nnyịn mîfọnke ima, imesinam se Jehovah mîmaha. Edi ikpatua n̄kpọfiọk ofụri esịt, iben̄e Jehovah ite efen ọnọ nnyịn ke ntak Eyen esie Jesus Christ, inyụn̄ inam se ikekeme man nnyịn idifiak inam idiọkn̄kpọ oro, Jehovah oyokot nnyịn adian idem. (1 John 2:1) Bible ọdọhọ ete: “Christ ama akpa ini kiet kpọt kaban̄a mme idiọkn̄kpọ, edinen owo ke ibuot mmọ eke mînenke, man enye akpada mbufo ọsọk Abasi.”​—1 Peter 3:18.

2. Nso ke n̄kpa Jesus edinam nnyịn inyene ke ini iso?

Jehovah ọkọnọ Jesus edikpa “man owo ekededi eke ọbuọtde idem ye [Jesus] okûtak edi enyene nsinsi uwem.” (John 3:16) Jehovah ayanam ifiak inyene kpukpru se Adam akanamde atak nnyịn ke ntak nsọn̄ibuot esie. Jehovah edinam kpukpru oro ke ntak emi Jesus akakpade ọnọ nnyịn. Ikọ ọwọrọ ke ikpanam se isiwụtde ke imọbuọt idem ye Jesus, ke iyekeme ndisịne ke otu mbon oro ẹdidude uwem ke Paradise mi ke isọn̄ ke nsinsi!​—Isaiah 65:21-23.

SỊN IDEM KPEP

3. N̄kpa Jesus osio nnyịn ke ufụn idiọkn̄kpọ ye n̄kpa

VIDIO: Ntak Emi Jesus Akakpade?​—Ikpehe 1 (2:01)

• Nso ke Adam akanam atak nnyịn ke ntak nsọn̄ibuot esie?

Kot Rome 5:12, ekem ẹbọrọ mbụme emi ẹnyụn̄ ẹneme ẹban̄a enye:

• Nso ke idiọkn̄kpọ Adam anam fi?

Kot John 3:16, ekem ẹbọrọ mbụme emi ẹnyụn̄ ẹneme ẹban̄a enye:

• Nso ikanam Jehovah ọnọ Eyen esie edi isọn̄?

1. Adam ama ọfọn ama. Edi enye ama ọsọn̄ ibuot ye Abasi onyụn̄ anam idiọkn̄kpọ ye n̄kpa esịm kpukpru nnyịn

2. Jesus ama ọfọn ama. Edi enye ama okop uyo Abasi onyụn̄ anam mme owo ẹdori enyịn ndidu uwem ke nsinsi

4. N̄kpa Jesus ekeme ndinyene ufọn nnọ kpukpru owo

VIDIO: Ntak Emi Jesus Akakpade?​—Ikpehe 2 (2:00)

• Didie ke n̄kpa owo kiet ekeme ndinyan̄a kpukpru owo?

Kot 1 Timothy 2:5, 6, ekem ẹbọrọ mbụme emi ẹnyụn̄ ẹneme ẹban̄a enye:

• Adam ye Jesus ẹma ẹfọn ẹma, edi Adam ama ọsọn̄ ibuot ye Abasi onyụn̄ anam idiọkn̄kpọ ye n̄kpa esịm kpukpru nnyịn. Edi Jesus ama edinọ uwem esie ke ibuot nnyịn. Nso inam uwem Jesus edi n̄kemn̄kem ufak ibuot nnyịn?

5. Jehovah ọkọnọ Jesus edifak fi

Mbon emi ẹmade Jehovah Abasi ẹsida ufak emi Jesus ekekpede ke ibuot nnyịn nte san̄asan̄a enọ emi ẹnọde mmimọ. Ke uwụtn̄kpọ, kot Galatia 2:20, ekem ẹbọrọ mbụme emi ẹnyụn̄ ẹneme ẹban̄a enye:

• Nso ke apostle Paul eketịn̄ emi owụtde ke enye akada ufak emi Jesus ekekpede nte san̄asan̄a enọ emi ẹnọde imọ?

Idiọkn̄kpọ Adam ama anam n̄kpa esịm enye ye kpukpru nnyịn emi ẹtode ubon esie. Edi Jehovah ama ọnọ Eyen esie edikpa man afo ekeme ndidu uwem ke nsinsi.

Nte osụk okotde mme itie Bible emi ẹtienede mi, kere nte eketiede Jehovah ini ẹkenọde Eyen esie ufen. Kot John 19:1-7, 16-18, ekem ẹbọrọ mbụme emi ẹnyụn̄ ẹneme ẹban̄a enye:

• Esitie fi didie ama eti se Jehovah ye Jesus ẹkenyịmede ndinam ke ntak fo?

SE IKPEPDE

N̄kpa Jesus esinam Jehovah efen idiọkn̄kpọ nnyịn, onyụn̄ anam nnyịn idori enyịn ndidu uwem ke nsinsi.

Se M̀mê Emeti

• Ntak emi Jesus akakpade?

• Nso inam mfọnmma uwem Jesus emi Jesus akadade ekpe ufak ibuot nnyịn edi n̄kemn̄kem ufak?

• Nso ke akpanam man n̄kpa Jesus enyene ufọn ọnọ fi?

KPEP N̄KPỌ EN̄WEN

Se ntak emi ẹkotde mfọnmma uwem Jesus oro Jesus ọkọnọde ke ibuot nnyịn ufak.

“Didie ke N̄kpa Jesus ‘Afak Ediwak Owo’?” (Odu ke jw.org)

Se se anade inam man ibọhọ idiọkn̄kpọ ye n̄kpa.

“Didie ke Jesus Anyan̄a Ubonowo?” (Odu ke jw.org)

Ndi Jehovah ekeme ndifen ikpọ idiọkn̄kpọ?

“Mme Mbụme Bible Oro Ẹbọrọde” (Enyọn̄-Ukpeme, May 1, 2013)

Se nte ndidiọn̄ọ ke Christ ekedikpa ọnọ nnyịn anamde ete kiet okpụhọde.

“Ndịghe Aba Owo Ntịme” (Odu ke jw.org)

1. Nso ke ikpanam man iwụt ke imama se Abasi ye Christ ẹkenamde ẹnọ nnyịn?

Bible ọdọhọ ke “owo ekededi eke ọbuọtde idem ye [Jesus]” eyenyene nsinsi uwem. (John 3:16) Didie ke ikpowụt ke imọbuọt idem ye Jesus? Inaha inyụn̄ inenịm Jesus ke akpanikọ kpọt. Ana se isibierede ndinam ye se isinamde owụt ke imọbuọt idem ye Jesus. (James 2:17) Edieke isitịn̄de inyụn̄ isinamde n̄kpọ emi owụtde ke imenen̄ede ibuọt idem ye Jesus, iyenen̄ede ikpere Jesus ye Ete esie, Jehovah.​—Kot John 14:21.