Ata Ima Akama Utịp
“Abasi ikwan̄ake nte efrede utom mbufo ye ima enyịn Esie eke mbufo ẹwụtde.”—MME HEBREW 6:10.
1, 2. Ntak emi ata ima akamade utịp ọnọ nnyịn owo kiet kiet-e?
IMA unana ibụk edi n̄kpon n̄kan, ata n̄wọrọnda, ata ọsọn̄urua edu oro nnyịn ikemede ndiwụt. Ima emi (Greek, a·gaʹpe) kpukpru ini esiyom ediwak n̄kpọ oto nnyịn. Edi sia edide Abasi unenikpe ye ima okobot nnyịn, nnyịn imokụt nte ke ima unana ibụk ke akpanikọ akama utịp. Ntak emi edide ntre-e?
2 Ntak kiet oro ata ima akamade utịp abuana edumbet ukeren̄kpọ, kpa odudu oro ekikere ye ntụk ẹnyenede ke ikpọkidem nnyịn. N̄wed kiet etịn̄de n̄kpọ aban̄a mfụhọ ọkọdọhọ ete: “ ‘Ma mbọhọidụn̄ fo’ edi kiet ke otu ubak item ibọkusọbọ oro esịnede ifiọk akan oro akanam ẹnọde.” Ih, “owo mfọnido anam se ifọnde ye ukpọn̄ esiemọ.” (Mme N̄ke 11:17) Ke ukem afan̄ oro edi ikọ ẹmi: “Ukpọn̄ eke ọfọnde ido eyetịm oyụhọ; ndien edi andinọ mmọn̄ edikụt mmọn̄.”—Mme N̄ke 11:25; men Luke 6:38 domo.
3. Didie ke Abasi anam n̄kpọ man anam ata ima akama utịp?
3 Ima akama utịp n̄ko koro Abasi esinọ edu unana ibụk utịp. Nnyịn ikot: “Atua ubuene mbọm ọbuọt Jehovah n̄kpọ, ndien [Abasi] eyenọ enye usiene utom esie.” (Mme N̄ke 19:17) Mme Ntiense Jehovah ẹnam n̄kpọ ke n̄kemuyo ye ikọ emi ke ini mmọ ẹtan̄ade eti mbụk Obio Ubọn̄ Abasi. Mmọ ẹfiọk ẹte ke ‘Abasi ikwan̄ake nte efrede utom oro mmimọ inamde ye ima enyịn̄ esie oro mmimọ iwụtde.’—Mme Hebrew 6:10.
Mfọnn̄kan Uwụtn̄kpọ Nnyịn
4. Anie ọnọ mfọnn̄kan uwụtn̄kpọ nte ke ata ima akama utịp, ndien didie ke enye anam oro?
4 Anie ọnọ mfọnn̄kan uwụtn̄kpọ nte ke ata ima akama utịp? Kamse, idụhe baba owo kiet efen oro anamde emi akan Abasi ke idemesie! Enye “akamama ererimbot [ubonowo] ntem, tutu Enye osio ikpọn̄îkpọn̄ Eyen emi Enye obonde ọnọ.” (John 3:16) Edinọ Eyen esie man mmọ oro ẹnyịmede uwa ufak oro ẹkpenyene nsinsi uwem ke akpanikọ ama akpa Jehovah akamba n̄kpọ, onyụn̄ owụt in̄wan̄în̄wan̄ nte ke enye enyene ima ye mbọm. Ẹwụt emi n̄ko ye akpanikọ oro nte ‘ke ofụri ukụt nditọ Israel ke Egypt, ama anam enye okop ubiak.’ (Isaiah 63:9) Akabiak Jehovah didie ntem akan oro ndikụt nte Eyen esie ọbọde ufen ke eto ndutụhọ onyụn̄ okopde nte enye ofioride ete: “Abasi Mi, Abasi Mi, nsinam Afo ọkpọn̄de Mi?”—Matthew 27:46.
5. Nso ida itie koro Abasi amade ubonowo ata etieti tutu enye ọnọ Eyen esie nte uwa?
5 Ndi Jehovah ama okụt ata ima oro enye owụtde nte akamade utịp? Anaedi enye ama okụt. Ke n̄wọrọnda usụn̄, nso ibọrọ ke Abasi ekenyene ntem ndinịm Devil ke iso koro Jesus akanamde akpanikọ kpa ye ofụri se Satan ekekemede ndinam enye! (Mme N̄ke 27:11) Ke akpanikọ, ofụri se Obio Ubọn̄ Abasi edinamde ke ndimen esuene mfep ke enyịn̄ Abasi, ndifiak n̄wụk Paradise ke isọn̄ emi, nnyụn̄ nnọ ediwak million owo nsinsi uwem edida itie koro Abasi akamade ubonowo ntem tutu enye ọnọ n̄kpọuto oro esịt esie amade akan nte uwa.
Eti Uwụtn̄kpọ Jesus
6. Ima okonụk Jesus ndinam nso?
6 Eti uwụtn̄kpọ efen oro ọsọn̄ọde nte ke ata ima akama utịp edi eke Eyen Abasi, Jesus Christ. Enye ama Ete esie eke heaven, ndien ima oro onụk Jesus ndinam uduak Abasi ke kpukpru idaha. (John 14:31; Philippi 2:5-8) Jesus ama akaiso ndiwụt ima oro enye amade Abasi idem okposụkedi oro ndusụk ini ọkọwọrọde ete enye ekpe Ete esie ubọk “ye ọkpọsọn̄ eseme ye mmọn̄eyet.”—Mme Hebrew 5:7.
7. Ke mme usụn̄ ewe ke Jesus okowụt ata ima oro akamade utịp?
7 Nte ẹma ẹnọ Jesus utịp ke ntak utọ ima uwaidem oro? Ke akpanikọ ẹma ẹnọ enye utịp. Kere ban̄a idatesịt oro enye ekenyenede oto kpukpru n̄kpọ oro enye akanamde ke ini utom esie eke isua ita-ye-ubak. Enye akan̄wam mme owo didie ntem ke n̄kan̄ eke spirit ye eke obụk! Akande kpukpru, ke ndiwụt nte ke mfọnmma owo ekeme ndimụm nsọn̄ọnda ye Abasi n̄kama ke mfọnmma usụn̄ kpa ye ofụri se Satan ekemede ndida mbiọn̄ọ enye, Jesus ama okop uyụhọ ke ndiwụt Devil nte osu nsu. Akande oro, nte anam-akpanikọ asan̄autom Abasi, Jesus ama ọbọ akwa utịp edide uwem oro mîkemeke ndikpa ke enye esetde odụk uwem eke heaven. (Rome 6:9; Philippi 2:9-11; 1 Timothy 6:15, 16; Mme Hebrew 1:3, 4) Ndien nso utịbe utịbe ifet ẹna enye ntem ke iso ke Armageddon ye ke Tọsịn Isua Ukara esie, ke ini ẹdifiakde ẹwụk Paradise ke isọn̄ ẹnyụn̄ ẹnam ediwak million mme akpan̄kpa ke mme itie tọsịn ẹset. (Luke 23:43) Mbụme idụhe nte ke Jesus ama okụt ata ima nte akamade utịp.
Uwụtn̄kpọ Paul
8. Nso ikedi ifiọk n̄kpọntịbe Paul ke ntak emi enye ekenyenede ata ima ọnọ Abasi ye ekemmọ owo?
8 Apostle Peter ama obụp Jesus inikiet ete: “Sese, nnyịn ikọkpọn̄ kpukpru n̄kpọ itiene fi; nso ndien ke nnyịn idinyene?” Ke ubak ubak, Jesus ọkọbọrọ ete: “Kpukpru owo ẹmi ẹkekpọn̄de ufọk, m̀mê nditọeka iren, m̀mê nditọeka iban, m̀mê ete, m̀mê ẹka, m̀mê nditọ, m̀mê isọn̄, kaban̄a enyịn̄ Mi, ẹyebọ utịp utịm ikikie, ẹyenyụn̄ ẹnyene nsinsi uwem.” (Matthew 19:27-29) Imenyene ediye uwụtn̄kpọ aban̄ade emi ke apostle Paul, emi ọkọbọde ediwak edidiọn̄, nte Luke ewetde akpan akpan ke n̄wed Utom Mme Apostle. Ata ima oro enye akamade Abasi ye ekemmọ owo ama anam Paul ọkpọn̄ ubọkọkọ esie nte enyene ukpono owo Pharisee. Kere, n̄ko, se Paul ọkọyọde ke usụn̄ eke edibọ ufen, edikpere n̄kpa, edikụt afanikọn̄, ye unana—kpukpru ẹmi ke ntak ata ima oro akamade Abasi.—2 Corinth 11:23-27.
9. Didie ke ẹkenọ Paul utịp ke ntak okowụtde ata ima?
9 Nte Jehovah ama ọnọ Paul utịp ke ntak edide utọ eti uwụtn̄kpọ ntre ke ndiwụt ata ima? Ọfọn, nti nte utom Paul okon̄wụmde mfri. Enye ama ekeme nditọn̄ọ mbufa esop Christian. Ndien Abasi ọkọnọ enye odudu ndinam mme utịben̄kpọ didie ntem! (Utom 19:11, 12) Paul ama enyene ifet n̄ko ndibọ n̄kukụt ẹmi ẹkande ukeme owo ndinyụn̄ n̄wet n̄wed 14 ẹmi idahaemi ẹdide ubak N̄wed Abasi mme Christian usem Greek. Ke ndida ofụri ẹmi n̄kọyọhọ, ẹma ẹnọ enye utịp uwem oro mîkemeke ndikpa ke heaven. (1 Corinth 15:53, 54; 2 Corinth 12:1-7; 2 Timothy 4:7, 8) Paul ke akpanikọ ama okụt ete ke Abasi esinọ ata ima utịp.
Ata Ima Akama Utịp ke Eyo Nnyịn
10. Nso ikeme nditak ke ndidi mbet Jesus nnyụn̄ n̄wụt ima nnyịn nnọ Jehovah?
10 Mme Ntiense Jehovah ukem oro mfịn ẹkụt ke ata ima akama utịp. Ndiwụt ima oro imade Jehovah ke nnyịn ndida ke n̄kan̄ esie nnyụn̄ n̄kabade ndi mme mbet Jesus ekeme idem ndikpa nnyịn uwem nte mbon nsọn̄ọnda. (Men Ediyarade 2:10 domo.) Ntak edi oro Jesus ọdọhọde ke nnyịn inyene ndibat se iditakde. Edi nnyịn inamke oro ndibiere m̀mê edidi mbet akama utịp m̀mê ikamake. Utu ke oro, nnyịn inam ntre ndiben̄e idem ndikpe sededi oro edidi mbet editakde.—Luke 14:28.
11. Ntak emi ndusụk owo ẹtrede ndiyak idemmọ nnọ Abasi?
11 Mfịn, ediwak owo—nte eyịghe mîdụhe, ediwak million owo—ẹmenịm etop otode Ikọ Abasi emi Mme Ntiense Jehovah ẹsidade ẹsọk mmọ. Edi mmọ ẹmefiak edem ẹkpọn̄ ediyak idemmọ nnọ Abasi nnyụn̄ nna baptism. Nte emi ekpekeme ndidi ntre koro mmọ ẹnanade ata ima ẹnọ Abasi oro mmọ efen ẹnyenede? Ediwak owo ẹtre ndinam usio-ukot eke ediyak idem nnọ nnyụn̄ nna baptism koro mmọ ẹyomde ndidu ke idak uma nsan̄andọ oro mînịmke ke akpanikọ. Mmọ eken iyomke ndisan̄a n̄kpere Abasi koro mmọ ẹnyenede edu anam mbubehe kiet oro ọkọdọhọde Ntiense kiet ete: “Ami mmama idiọkn̄kpọ.” Nte an̄wan̄ade, utọ mme owo oro iwụtke esịtekọm iban̄a se Abasi ye Christ ẹnamde ẹnọ mmọ.
12. Nso ke magazine emi eketịn̄ oro osiode owụt mme utịp emi ifiọk oro odụride nnyịn ekpere Abasi ke ata ima enyenede?
12 Edieke nnyịn inyenede ata esịtekọm iban̄a kpukpru se Jehovah Abasi ye Jesus Christ ẹnamde ẹnọ nnyịn, nnyịn iyewụt emi ke ndikpe sededi editakde unyịme unyịme man inam n̄kpọ Ete nnyịn eke heaven inyụn̄ idi kiet ke otu mbet Jesus. Ke ntak ata ima oro ẹmade Abasi, iren ye iban ke kpukpru idaha ke uwem—mbon mbubehe, mme ọwọrọiso owo ke n̄ka mbre mbuba, ye ntre ntre eken oro ẹkekụtde unen—ẹma ẹkpụhọ ubọkọkọ edide eke ufọn idemowo ye utom Christian, ukem nte apostle Paul akanamde. Ndien mmọ idibọhọ n̄kpọ baba kiet ke ibuot utịp edifiọk nnyụn̄ nnam n̄kpọ Abasi. Ke afan̄ emi, Enyọn̄-Ukpeme (Ikọmbakara) inikiet ọkọdọhọ ete: “Nnyịn ke ndusụk ini ima ibụp ite, Nditọete ifan̄ ẹkpenyịme ndibọ tọsịn dollar kiet ke se mmọ ẹfiọkde ẹban̄a akpanikọ? Owo ikekwe ubọk ndomokiet! Anie ọkpọbọ tọsịn dollar duop? Ndomo owo kiet! Anie ọkpọbọ million dollar kiet? Anie edibọ ofụri ererimbot ke ukpụhọ ye se enye ọdiọn̄ọde aban̄a edu Abasi ye Ndutịm Abasi? Baba owo kiet! Do nnyịn ima idọhọ ite, Ndima ufan, mbufo idịghe otuowo oro mîka-ikopke uyụhọ. Edieke mbufo ẹkụtde ẹte ke mmimọ imenyene n̄kpọ tutu mbufo ibọhọ n̄kpọ ndomokiet ke ukpụhọ ye ifiọk Abasi oro mbufo ẹnyenede, do mbufo ẹmekụt ke imenyene n̄kpọ ukem nte nnyịn.” (December 15, 1914, page 377) Ih, nnennen ifiọk Abasi ye mme uduak esie odụri nnyịn ekpere enye ke ata ima oro akamade utịp ke akpanikọ.
13. Didie ke nnyịn ikpese ọkpọ ọkpọ ukpepn̄kpọ?
13 Edieke nnyịn imade Abasi, nnyịn iyedomo ukeme ndifiọk nnyụn̄ nnam uduak esie. (1 John 5:3) Nnyịn iyeda ọkpọ ọkpọ ukpepn̄kpọ, akam, ye edidụk mme mbonoesop Christian nte ata akpan n̄kpọ. Kpukpru ẹmi oyom uwaidem, koro edinam ẹmi ẹbuana edibiat ini, odudu, ye mme inyene eken. Ẹkeme ndiyom nnyịn imek edise edinam television m̀mê ndibuana ke ọkpọ ọkpọ ukpepn̄kpọ Bible. Edi nte nnyịn isọn̄de idem ke n̄kan̄ eke spirit ikan, ntre ke ikeme ndinọ mmọ en̄wen ikọ ntiense ọfọn̄ akan, ntre ke inyụn̄ itotịm ibọ ufọn ito mme mbonoesop Christian ke idade utọ ukpepn̄kpọ oro nte akpan n̄kpọ inyụn̄ isiode ini oro ekemde inịm inọ enye!—Psalm 1:1-3.
14. Akam ye eti itie ebuana ye Jehovah Abasi edi akpan n̄kpọ adan̄a didie?
14 Nte nnyịn imesidara nditịn̄ ikọ ye Ete nnyịn eke heaven kpukpru ini ke ‘edikọbọ ke edibọn̄ akam’? (Rome 12:12) Mîdịghe nte nnyịn imesinana ifet ikaha ndida ọsọn̄urua ifet emi nnam n̄kpọ nte ọfọnde? ‘Nditre ndidop akam’ edi akpan usụn̄ kiet ndinam ebuana nnyịn ye Jehovah Abasi ọsọn̄ idem. (1 Thessalonica 5:17) Ndien n̄kpọ ndomokiet idụhe ndin̄wam nnyịn ke ini isobode idomo nte eti itie ebuana ye Jehovah. Nso ikan̄wam Joseph ndisọn̄ọ nda ke ini n̄wan Potiphar okodomode enye. Ndien ntak emi Daniel mîkodopke ndibọn̄ akam ke ini ibet mbon Media ye Persia akakpande enye ndikpe Jehovah ubọk-ọ? (Genesis 39:7-16; Daniel 6:4-11) Kamse, eti itie ebuana ye Abasi akan̄wam iren oro ndikan, kpasụk nte enye an̄wamde nnyịn ndinam ntre!
15. Didie ke nnyịn ikpese mme mbonoesop Christian, ndien ntak-a?
15 Ndien, nnyịn ise edidụk mme mbonoesop ition eke urua ke urua ke akpan n̄kpọ adan̄a didie? Nte nnyịn imesiyak mba, ekpri ubiakidem, m̀mê idiọkenyọn̄ ẹbiọn̄ọ mbiomo nnyịn edide edisop idem ọtọkiet ye ekemmọ mme andinịm ke akpanikọ? (Mme Hebrew 10:24, 25) Owo America kiet emi esidiọn̄de ukwakutom, emi ẹsikpede okụk ọfọn ama okụt ke utom imọ ndien ndien esibiọn̄ọ imọ ndidu ke mme mbonoesop Christian. Ntre enye ama okpụhọ utom esie, onyịmede okụk atak man ekeme ndidụk kpukpru mbonoesop ofụri ini. Mme mbonoesop nnyịn ẹsin̄wam nnyịn ndikop inem nsịnudọn̄ edem mbiba ndinyụn̄ nsọn̄ọ mbuọtidem kiet eken. (Rome 1:11, 12) Ke kpukpru n̄kpọ ẹmi, ndi nnyịn ikwe nte ke owo “eke ọtọde ke ntatubọk, uwak uwak ke enye eyenyụn̄ ọdọk”? (2 Corinth 9:6) Ih, ndiwụt ata ima ke mme utọ usụn̄ emi enen̄ede akama utịp.
Ata Ima ye Utom Ukwọrọikọ Nnyịn
16. Ekeme ndisụn̄ọ ke nso edieke ima onụkde nnyịn ndinọ ikọ ntiense ido nneme?
16 Ima onụk nnyịn ndikwọrọ eti mbụk nte ikọt Jehovah. Ke uwụtn̄kpọ, ima onụk nnyịn ndibuana ke unọ ikọ ntiense ido nneme. Nnyịn imekeme ndimen̄e ndinọ ikọ ntiense ido nneme, edi ima eyenụk nnyịn nditịn̄ ikọ. Ke akpanikọ, ima eyenam nnyịn ikere iban̄a mme usọ usọ usụn̄ utọn̄ọ nneme ndien ekem iwọn̄ọrede enye ikọn̄ ke Obio Ubọn̄. Ke ndinam an̄wan̄a: Ke esịt ubomofụm, ebiowo Christian kiet ama okụt idemesie inikiet etiede ke n̄kan̄ oku Roman Catholic. Ke akpa, ebiowo emi ama obụp oku oro mbụme ẹmi mîdaha eneni idi. Etisịm ini emi oku oro ọkọwọrọde ke ubomofụm oro, nte ededi, udọn̄ esie ama onụk enye ndibọ n̄wed iba. Nso eti utịp ke ndinọ ikọ ntiense ido nneme!
17, 18. Ima edinụk nnyịn ndinam nso kaban̄a utom Christian?
17 Ata ima n̄ko onụk nnyịn ndibuana kpukpru ini ke utom ukwọrọikọ eke ufọk ke ufọk ye ke mme orụk utom Christian eken. Ke udomo oro ikemede ndinyene mme nneme Bible, nnyịn iyeda ukpono isọk Jehovah Abasi iyenyụn̄ in̄wam mbon mbieterọn̄ ndisan̄a ke usụn̄ adade osịm nsinsi uwem. (Men Matthew 7:13, 14 domo.) Idem edieke nnyịn mîkemeke ndinyene mme nneme Bible, ukeme nnyịn ididịghe ikpîkpu. Edidu nnyịn kpọt ke ufọk mme owo edi n̄kpọ ntiense, nnyịn ke idem nnyịn imonyụn̄ ibọ ufọn ito utom oro, koro nnyịn ikemeke nditan̄a mme akpanikọ Bible ye unana edisọn̄ọ mbuọtidem nnyịn. Ke akpanikọ, oyom nsụhọdeidem ndisan̄a ke ufọk ke ufọk, ‘inamde kpukpru n̄kpọ kaban̄a eti mbụk, man nnyịn ye mbon en̄wen ikpekeme ndinyene udeme ke esịt.’ (1 Corinth 9:19-23) Edi ke ntak ima oro imade Abasi ye ekemmọ owo, nnyịn ke nsụhọdeidem imesisịn ukeme inyụn̄ ibọ utịp ye uwak edidiọn̄.—Mme N̄ke 10:22.
18 Oyom ata ima n̄ko ke n̄kan̄ mme asan̄autom Jehovah ndisịn ifịk ke ndifiak mbịne mbon oro ẹnyenede udọn̄ ke akpanikọ Bible. Edinịm ukpepn̄kpọ Bible ke urua ke urua ye ke ọfiọn̄ ke ọfiọn̄ edi ediwụt ima oro imade Abasi ye mbọhọidụn̄, koro utom emi oyom ẹbiat ini, ukeme, ye inyene obụkidem. (Mark 12:28-31) Edi, ke ini nnyịn ikụtde kiet ke otu nditọ ukpepn̄kpọ ẹmi anade baptism, idem iso-ọfọn onyụn̄ odụkde utom uyọhọ-ini, nte nnyịn isinịmke nte ke ata ima akama utịp.—Men 2 Corinth 3:1-3 domo.
19. Nso ebuana ke ima enyene ye utom uyọhọ-ini?
19 Ima unana ibụk onụk nnyịn ndiwa mme inem inem n̄kpọ obụkidem ke ntak utom uyọhọ-ini edieke nnyịn ikemede ndibuana ke utọ utom oro. Mme Ntiense ke ediwak tọsịn ẹkeme ndisọn̄ọ nte ke ndiwụt ima mmọ n̄kosịm udomo ntre ama otịm akama utịp. Edieke mme idaha ẹyakde fi ndibuana ke utom uyọhọ-ini edi afo udaha mmọ unam n̄kpọ, afo n̄kukụre ufiọkke mme edidiọn̄ oro afo atabade.—Men Mark 10:29, 30 domo.
Utịp ke Mme Usụn̄ En̄wen
20. Didie ke ima an̄wam nnyịn ndifen nnọ owo?
20 Usụn̄ en̄wen emi ata ima akamade utịp edi nte ke enye an̄wam nnyịn ndifen nnọ owo. Ih, ima “ikamake udu.” Ke akpanikọ, ‘ima ofụk ekese idiọkn̄kpọ.’ (1 Corinth 13:5; 1 Peter 4:8) Nte “ekese” iwọrọke ediwak idiọkn̄kpọ? Ndien ndifen nnọ owo akama utịp didie ntem! Ke ini afo efende ọnọ owo, emi anam fi ye owo emi akanamde fi idiọkn̄kpọ ẹkop inem ẹkan. Edi se itịmde idi akpan n̄kpọ ikan edi akpanikọ oro nte ke ibọhọke nnyịn ima ifefen inọ mmọ oro ẹnamde nnyịn idiọkn̄kpọ, nnyịn ikemeke ndidori enyịn Jehovah ndifen nnyịn.—Matthew 6:12; 18:23-35.
21. Didie ke ata ima an̄wam nnyịn ndisụk ibuot?
21 Adianade do, ata ima akama utịp koro enye an̄wamde nnyịn ndisụk ibuot. Edieke nnyịn imade Jehovah, nnyịn iyesụhọde idem ke idak ọkpọsọn̄ ubọk esie. (1 Peter 5:6) Ima oro imade enye n̄ko eyenụk nnyịn ndisụk ibuot nnọ n̄kpọutom oro enye emekde, kpa “asan̄autom emi anamde akpanikọ, onyụn̄ enyenede ọniọn̄.” Emi esịne ndisụk ibuot nnọ mbon oro ẹdade usụn̄ ke esop. Emi akama utịp koro edikpu ndinam ntre “mîdorike udori” inọ nnyịn. (Matthew 24:45-47; Mme Hebrew 13:17) Ke akpanikọ, edumbet usụkibuot emi abuana n̄ko ndutịm ubon. Utọ usụn̄uwem oro akama utịp koro enye anamde ima, emem, ye edidianakiet ubon ọkọri ke adan̄aemi ọnọde nnyịn uyụhọ oro asan̄ade ye edifiọk nte ke nnyịn ke inem Abasi esịt.—Ephesus 5:22; 6:1-3.
22. Didie ke nnyịn ke akpanikọ ikeme ndikop inemesịt?
22 Nte an̄wan̄ade, ndien, n̄kpon n̄kan edu oro nnyịn ikemede ndikọri edi a·gaʹpe, kpa orụk ima edumbet oro ananade ibụk. Ndien eyịghe ndomokiet ikemeke ndidu nte ke ata ima akama utịp. Ntem, ke akpanikọ nnyịn iyekop inemesịt edieke nnyịn ikọride inyụn̄ iwụtde edu emi ke udomo oro okponde akan nte akanam edide ke itoro ima ima Abasi nnyịn, Jehovah.
Didie ke Afo Ọkpọbọrọ?
◻ Ke mme usụn̄ ewe ke Jehovah Abasi owụt ata ima?
◻ Didie ke Jesus Christ okowụt ima?
◻ Nso uwụtn̄kpọ ke apostle Paul okonịm ke ndiwụt ata ima?
◻ Didie ke Mme Ntiense Jehovah ẹwụt ima?
◻ Ntak emi afo ekemede ndidọhọ ke ata ima akama utịp-e?
[Ndise ke page 16]
Ima oro Jehovah amade ubonowo ama onụk enye ndinọ Eyen esie man ẹkpekeme ndinyene nsinsi uwem. Nte afo omowụt esịtekọm ọnọ utọ ima emi?
[Ndise ke page 18]
Ata ima oro imade Jehovah eyenụk nnyịn ‘ikûdop ndibọn̄ akam’