• Mme Utịp Ukwọrọikọ—‘N̄kpọ Ẹdat Se Ẹkpen̄ede ke In̄wan̄’
    Obio Ubọn̄ Abasi Akara!

    • 1, 2. (a) Ntak emi idem akpade mme mbet? (b) Nso utọ ukpen̄e ke Jesus etịn̄ aban̄a?

      IDEM akpa mme mbet. Jesus ọdọhọ mmọ ete: “Ẹmenede enyịn ẹse in̄wan̄, ẹte n̄kpọ ẹdat se ẹkpen̄ede.” Mmọ ẹse n̄kan̄ oro Jesus anyande ubọk, edi n̄kukụre se mmọ ẹkụtde edi in̄wan̄ emi barley ẹtịbede obufa, emi ẹdide awawa sia mîsọn̄ke kan̄a. Anaedi mmọ ẹkere ẹte, ‘Nso ke ẹdikpen̄e? Ediwak ọfiọn̄ ẹyebe mbemiso ini ukpen̄e.’—John 4:35.

      2 Edi Jesus itịn̄ke iban̄a ata ukpen̄e. Utu ke oro enye ada ifet emi ekpep mme mbet esie akpan ukpepn̄kpọ iba aban̄a ndamban̄a ukpen̄e, oro edi, ndinam mme mbet. Nso idi n̄kpọ iba oro enye ekpepde? Ẹyak idụn̄ọde ofụri mbụk emi man ifiọk.

      Ẹnọ Mmọ Utom Ẹnyụn̄ Ẹn̄wọn̄ọ ke Mmọ Ẹyekop Idatesịt

      3. (a) Etie nte nso ikanam Jesus ọdọhọ ete: ‘N̄kpọ ẹdat se ẹkpen̄ede ke in̄wan̄’? (b) Didie ke Jesus akanam se enye eketịn̄de an̄wan̄a?

      3 Jesus akada ekpere Sychar ke Samaria enyene nneme ye mme mbet esie ke utịt utịt isua 30 eyo esie. Ke mme mbet Jesus ẹma ẹkedaha ẹdụk obio, enye ama ebet ke mben obube mmọn̄ eneme ikọ Abasi ye n̄wan kiet, ndien se enye ekekpepde ama ọsọsọp an̄wan̄a n̄wan oro. Ke ini mme mbet Jesus ẹkenyọn̄de ẹdi, n̄wan oro ama ọsọsọp adaha odụk obio Sychar ndiketịn̄ mme utịben̄kpọ oro enye ekekpepde nnọ mme mbọhọidụn̄ esie. Mme owo ẹma ẹnen̄ede ẹma se enye eketịn̄de, ediwak mmọ ẹnyụn̄ ẹfen̄e ẹka obube mmọn̄ oro man ẹkesobo ye Jesus. Etie nte ini oro ke Jesus akada okụt otu mbon Samaria ẹsan̄ade ẹdi, onyụn̄ ọdọhọ ete: “Ẹmenede enyịn ẹse in̄wan̄, ẹte n̄kpọ ẹdat se ẹkpen̄ede.” Ekem, man anam an̄wan̄a ke itịn̄ iban̄a ndamban̄a ukpen̄e, Jesus ama adian do ete: “Andikpen̄e ukpen̄e . . . atan̄ mfri obon ọnọ nsinsi uwem.”—John 4:5-30, 36.

      4. (a) Nso n̄kpọ iba ke Jesus ekekpep aban̄a idọk? (b) Mme mbụme ewe ke idineme?

      4 Nso akpan n̄kpọ iba ke Jesus ekekpep aban̄a ndamban̄a ukpen̄e? Akpa, utom emi edi usọp usọp. Enye ọkọdọhọ ke ‘n̄kpọ ẹdat se ẹkpen̄ede ke in̄wan̄,’ man mme anditiene enye ẹsịn ifịk ẹnam utom. Man anam mme mbet esie ẹdiọn̄ọ ke oyom ẹsọsọp ẹnam utom emi, enye ama adian do ete: “Andikpen̄e ukpen̄e ke ọbọ n̄kpọ eyenutom.” Ke ini ukpen̄e emi ọtọn̄ọde—ini ididụhe ndibiat! Ọyọhọ iba, mme anamutom ẹdara. Jesus ọkọdọhọ ke mme andisuan ye mme andikpen̄e ‘ẹyedara ọtọkiet.’ (John 4:35b, 36) Kpa nte Jesus ke idemesie akadarade ke “ediwak mbon Samaria [ndibuọt] idem ye enye,” ntre ke mme mbet esie ẹdinyene akwa idatesịt ke ini mmọ ẹnamde utom ukpen̄e ke ofụri esịt. (John 4:39-42) Mbụk utom eyo mme apostle emi enen̄ede edi akpan n̄kpọ koro enye owụt se ẹnamde mfịn ke akakan ndamban̄a ukpen̄e emi. Ini ewe ke ukpen̄e eyomfịn emi ọkọtọn̄o? Mmanie ẹnam enye? Nso idi utịp ukpen̄e emi?