Nso ke Bible Etịn̄ Aban̄a Oto-obot Afanikọn̄?
Se Bible ọdọhọde
Idịghe Abasi esinam oto-obot afanikọn̄ etibe. Esikam ababiak enye ndikụt nte mme owo ẹbọde ufen ke ntak oto-obot afanikọn̄. Obio Ubọn̄ Abasi ayanam kpukpru se isinamde mme owo ẹbọ ufen etre, esịnede oto-obot afanikọn̄. Abasi esidọn̄ mbon oro ẹbọde ufen idahaemi ke ntak oto-obot afanikọn̄ esịt.—2 Corinth 1:3.
Ndi Bible ekeme ndin̄wam owo eben̄e idem ọnọ oto-obot afanikọn̄?
Mme itie Bible emi esidọn̄de mbon emi oto-obot afanikọn̄ esịmde esịt
Nso inam inịm ke oto-obot afanikọn̄ itoho Abasi?
Bible anam nnyịn idiọn̄ọ ke Abasi ama esida mme n̄kpọ oro enye okobotde osobo mme idiọkowo, edi nte enye ekesinamde emi enen̄ede okpụhọde ye oto-obot afanikọn̄.
Oto-obot afanikọn̄ esibiomo owo ekededi ndo onyụn̄ owot owo ekededi. Edi Bible anam idiọn̄ọ ke Abasi esisobo mme idiọkowo kpọt. Ke uwụtn̄kpọ, ke ini Abasi okosobode Sodom ye Gomorrah, enye ikosoboke Lot ye nditọ iban esie iba, sia Lot ekedi eti owo. (Genesis 19:29, 30) Abasi ama ọdiọn̄ọ se ikesịnede ke esịt mbon oro ẹkedude uwem ini oro, enye okonyụn̄ osobo sụk mbon oro enye okokụtde ke ẹdi ndiọi owo.—Genesis 18:23-32; 1 Samuel 16:7.
Oto-obot afanikọn̄ isidọhọke owo ke imọn̄ itịbe. Edi Abasi ama esibem iso ọdọhọ ndiọi owo ẹkabade esịt—mbon mîkamaha ndikabade esịt ke enye ekesida n̄kpọ emi enye okobotde osobo. Enye ikesisoboke mbon emi ẹkekabarede esit.—Genesis 7:1-5; Matthew 24:38, 39.
Mme owo ẹsitiene ẹnam ndusụk oto-obot afanikọn̄ etịbe. Didie ke mmọ ẹsinam emi? Mme owo ẹbiat ndusụk n̄kpọ emi Abasi okobotde ke isọn̄ emi, ẹnyụn̄ ẹbọp ufọk ke ebiet emi ẹdiọn̄ọde ke unyekisọn̄, ukwọ, m̀mê mme oto-obot afanikọn̄ eken ẹkeme ndisọp ntịbe. (Ediyarade 11:18) Ntre ikpanaha ẹduọhọ Abasi ke ini mme owo ẹmekde ndinam n̄kpọ emi adade afanikọn̄ edi.—Mme N̄ke 19:3.
Ndi oto-obot afanikọn̄ owụt ke idu ke mme akpatre usen?
Ih, nsio nsio prọfesi ke Bible ama owowụt ke ediwak afanikọn̄ eyetịbe ke “akpatre ini editịm n̄kpọ emi,” m̀mê “ke mme akpatre usen.” (Matthew 24:3; 2 Timothy 3:1) Ke uwụtn̄kpọ, se se Jesus eketịn̄de aban̄a eyo nnyịn emi, enye ọkọdọhọ ete: “Akan̄ ye unyekisọn̄ ẹyedu ke nsio nsio ebiet.” (Matthew 24:7) Ibịghike Abasi ayanam kpukpru se inamde mme owo ẹbọ ufen, esịnede oto-obot afanikọn̄, etre ke ofụri ison̄.—Ediyarade 21:3, 4.
Didie ke Abasi esin̄wam mbon emi oto-obot afanikọn̄ esịmde?
Abasi esida Ikọ esie ọdọn̄ mmọ esịt. Bible anam inen̄ede inịm ke Abasi enen̄ede ekere aban̄a nnyịn, ke isinemke-nem enye ndikụt nnyịn ibọde ufen. (Isaiah 63:9; 1 Peter 5:6, 7) Bible onyụn̄ anam idiọn̄ọ ke Abasi ọn̄wọn̄ọ ke ini ke edi emi imọ idinamde oto-obot afanikọn̄ etre ke nsinsi.—Se “Mme itie Bible emi esidọn̄de mbon emi oto-obot afanikọn̄ esịmde esịt.”
Abasi esida ikọt esie an̄wam mbon emi oto-obot afanikọn̄ esịmde. Abasi esinam ikọt esie mi ke isọn̄ ẹnam se Jesus ẹkesinamde. Ẹma ẹtịn̄ ke prọfesi ke Jesus ọyọdọn̄ “mbon oro esịt obụn̄ọde” ye “mbon mfụhọ” esịt. (Isaiah 61:1, 2) Ikọt Abasi mfịn ẹsidomo ndinam ntre n̄ko.—John 13:15.
Abasi esinyụn̄ ada ikọt esie ọnọ mbon emi oto-obot afanikọn̄ esịmde nsio nsio n̄kpọ emi mmọ ẹyomde.—Utom 11:28-30; Galatia 6:10.
Mme Ntiense Jehovah ke ẹdiọn̄ ufọk owo ke Puerto Rico
Ndi Bible ekeme ndin̄wam owo eben̄e idem ọnọ oto-obot afanikọn̄?
Ih. Kpa ye oro owo mîkewetke Bible man ẹda ẹnam mme owo ẹdiọn̄ọ se ẹkpenamde mbemiso oto-obot afanikọn̄ etịbede, Bible ọdọn̄ọ item emi ekemede ndin̄wam owo eben̄e idem. Ke uwụtn̄kpọ:
Bem iso biere se edinamde mbemiso afan̄ikọn̄ etịbede. Bible ọdọhọ ke “owo mbufiọk ada okụt afanikọn̄ ndien edịbe.” (Mme N̄ke 22:3) Enen̄ede owụt eti ibuot ndiben̄e idem nnọ afanikọn̄. Imekeme ndibiere nditan̄ akpan n̄kpọ ifan̄ emi idinen̄erede iyom ndọn̄ ke ekpri ekpat kiet emi ikemede ndimen mfehe ini ekededi emi afanikọn̄ etịbede, inyụn̄ inanam iwụt nte nnyịn ye ubon nnyịn idifehede m̀mê nte idisan̄ade isobo ke ebiet emi ibierede.
Kûma inyene ukan uwem. Bible ọdọhọ ete: “Nnyịn ikadaha baba n̄kpọ kiet idụk ererimbot, idinyụn̄ ikemeke ndida baba n̄kpọ kiet n̄wọrọ.” (1 Timothy 6:7, 8) Ana inyịme ndifehe n̄kpọn̄ ufọk ye inyene nnyịn man ikeme ndibọhọ afan̄ikọn̄. Ọfọn iti ke uwem nnyịn edi akpan n̄kpọ akan n̄kpọ ekededi emi inyenede.—Matthew 6:25.