UKPEPN̄KPỌ 29
Nso Isitịbe Inọ Owo ke Owo Ama Akakpa?
Ndi akananam owo emi afo amade akpa? Ekeme ndidi n̄kpa oro ama abiak fi tutu afo ọtọn̄ọ ekere: ‘Nso isitịbe inọ owo ke owo ama akakpa? Ndi iyafiak ikụt mbon nnyịn emi ẹkekpade?’ Ukpepn̄kpọ 29 emi ye ke Ukpepn̄kpọ 30 oro etienede ayan̄wam fi okụt ibọrọ mbụme oro ke Bible—ibọrọ mmọ eyenen̄ede ọdọn̄ fi esịt.
1. Nso isitịbe inọ owo ke owo ama akakpa?
Jesus ọkọdọhọ ke n̄kpa etie nte ọkpọsọn̄ idap. Owo ama ede ata ọkpọsọn̄ idap, isidiọn̄ọke se ikade iso. Didie ke n̄kpa ebiet idap? Owo ama akpa, enye isidiọn̄ọke se ikade iso aba—enye isidiọn̄ọke ke imọkpọn̄ mbon mmimọ, inamke n̄kpọ m̀mê enye akama mmọ didie. Bible ọdọhọ ete: “Amaedi mme akpan̄kpa, mmọ ifiọkke baba n̄kpọ kiet.”—Kot Ecclesiastes 9:5.
2. Ntak emi ọfọnde inen̄ede idiọn̄ọ se isitịbede inọ owo ke owo ama akakpa?
Ediwak owo ẹfehe n̄kpa ye mme akpan̄kpa etieti! Edi se Bible etịn̄de aban̄a n̄kpa ekeme ndinam idem okûnyek fi. Jesus ọkọdọhọ: “Akpanikọ oyonyụn̄ anam mbufo ẹwọrọ ufụn.” (John 8:32) Ndusụk ufọkabasi ẹsidọhọ ke owo enyene ukpọn̄, ke ukpọn̄ oro esika iso odu uwem ke owo ama akakpa, edi idịghe se Bible ekpepde edi oro. Mme akpan̄kpa idiọn̄ọke se ikade iso aba, mmọ inyụn̄ ikemeke ndinam nnyịn ibak. Owo ama akpa, enye isibọhọ ufen ndomokiet aba. Ntre ufọn idụhe ndibọn̄ akam nte n̄kpọ ọfọn mme akpan̄kpa, ndituak ibuot nnọ mmọ, m̀mê ndinam n̄kpọ ite inem akpan̄kpa esịt.
Ndusụk owo ẹsidọhọ ke mmimọ imekeme ndineme nneme ye mme akpan̄kpa. Idịghe mme akpan̄kpa ke mmọ ẹsineme nneme oro. Ti ke mme akpan̄kpa “ifiọkke baba n̄kpọ kiet.” Mbon emi ẹsikerede do ke ineme nneme ye mbon mmimọ oro ẹma ẹkekpa, ẹsineme nneme ye mme demon emi ẹsinamde nte idi mbon mmọ oro ẹkekpade. Omokụt do ke ndinen̄ede ndiọn̄ọ se isitịbede inọ owo ke owo ama akakpa, idiyakke imen idem ikesịn mme demon ke ubọk. Jehovah odụri nnyịn utọn̄ ete ikûdedei udomo ndineme nneme ye mme akpan̄kpa, sia enye ọdiọn̄ọ ke mme demon ẹkeme ndida ufan̄ oro nnam nnyịn n̄kpọ.—Kot Deuteronomy 18:10-12.
SỊN IDEM KPEP
Se se isitịbede inọ owo ke owo ama akakpa, ye se idinamde fi enen̄ede okụt ke Abasi ikemeke-keme nditụhọde owo ke owo ama akakpa.
3. Ata n̄kpọ emi esitịbede ọnọ owo ke owo ama akakpa
Ke ofụri ererimbot, mme owo ẹnịm nsio nsio n̄kpọ ẹban̄a se isitịbede inọ owo ke owo ama akakpa. Imọdiọn̄ọ ke kpukpru se mme owo ẹnịmde oro ikemeke ndidi akpanikọ.
Ke obio emi afo odude, mme owo ẹsidọhọ ke nso isitịbe inọ owo ke owo ama akakpa?
Okpoyom se Bible etịn̄de aban̄a mme akpan̄kpa enen̄ede an̄wan̄a fi, se VIDIO emi.
Kot Ecclesiastes 3:20, ekem ẹbọrọ mbụme emi ẹnyụn̄ ẹneme ẹban̄a mmọ:
Itie Bible oro owụt ke nso isitịbe inọ owo ke owo ama akakpa?
Ndi itie oro owụt ke enyene se isiwọrọde akpan̄kpa ke idem aka iso odu uwem?
Mbụk Lazarus ufan Jesus odu ke Bible. Kûbụhọde Bible kot John 11:11-14, nyụn̄ se se Jesus eketịn̄de aban̄a Lazarus ke Lazarus ama akakpa. Ekem ẹbọrọ mbụme emi ẹnyụn̄ ẹneme ẹban̄a mmọ:
Jesus ekemen n̄kpa odomo ye nso?
Nso ke oro anam nnyịn idiọn̄ọ iban̄a mme akpan̄kpa?
Afo ada se Bible etịn̄de oro aban̄a n̄kpa didie?
4. Ndidiọn̄ọ ata n̄kpọ emi esitịbede ọnọ owo ke owo ama akakpa esin̄wam nnyịn
Ndidiọn̄ọ ata n̄kpọ emi esitịbede ọnọ owo ke owo ama akakpa isiyakke ifehe mme akpan̄kpa. Kot Ecclesiastes 9:10, ekem ẹbọrọ mbụme emi ẹnyụn̄ ẹneme ẹban̄a enye:
Ndi owo emi ama akakpa ekeme ndinam nnyịn n̄kpọ?
Se Bible ekpepde nnyịn aban̄a n̄kpa anam yak idiọn̄ọ ke ufọn idụhe ndinam n̄kpọ man inem mme akpan̄kpa esịt, m̀mê ndituak ibuot nnọ mmọ. Kot Isaiah 8:19 ye Ediyarade 4:11, ekem ẹbọrọ mbụme emi ẹnyụn̄ ẹneme ẹban̄a enye:
Ekere ke Jehovah ada didie owo emi oyomde mme akpan̄kpa ẹn̄wam enye, ye owo emi atuakde ibuot ọnọ mme akpan̄kpa?
Ndidiọn̄ọ se isitịbede inọ owo ke owo ama akakpa oyosio nnyịn ke ufụn n̄kpọ emi Jehovah asuade
5. Ndidiọn̄ọ ata n̄kpọ emi esitịbede ọnọ owo ke owo ama akakpa esidọn̄ nnyịn esịt
Ediwak owo ẹnịm ke ima ikpa ke iyọkọbọ ufen idiọkn̄kpọ mmimọ, sia se ẹsikpepde mmọ edi oro. Edi enem ndidiọn̄ọ ke akpan̄kpa isibọhọ ufen ndomokiet—ekpededi enye ekesidi idiọkowo. Kot Rome 6:7, ekem ẹbọrọ mbụme emi ẹnyụn̄ ẹneme ẹban̄a enye:
Bible ọdọhọ ke owo ama akpa, ke ẹtebe enye ikpe idiọkn̄kpọ esie. Edieke edide ntre, ndi emekere ke akpan̄kpa ke ọbọ ufen idiọkn̄kpọ emi ẹma ẹkebiat ẹfep do aba?
Nte inen̄erede idiọn̄ọ Jehovah, ntre ke idikụt ke enye ikemeke-keme nditụhọde mme akpan̄kpa. Kot Deuteronomy 32:4 ye 1 John 4:8, ekem ẹbọrọ mbụme emi ẹnyụn̄ ẹneme ẹban̄a mmọ:
Ndi emekere ke utọ Abasi emi ekeme ndisọn̄ esịt ntụhọde owo ke owo ama akakpa?
Ndi enem fi ndidiọn̄ọ ata n̄kpọ emi esitịbede ọnọ owo ke owo ama akakpa? Nso inam ọdọhọ ntre?
NDUSỤK OWO ẸSIDỌHỌ ẸTE: “Esitie mi nte mme akpan̄kpa ẹkeme ndinam mi n̄kpọ.”
Itie Bible ewe ye ewe ke akpada ọdọn̄ utọ owo oro esịt?
SE IKPEPDE
Owo ama akpa, akpa. Enye isikaha ikodu ke ebiet en̄wen. Mme akpan̄kpa isikaha ikọbọhọ ufen, mmọ inyụn̄ ikemeke ndinam owo n̄kpọ ndomokiet.
Se M̀mê Emeti
Nso isitịbe inọ owo ke owo ama akakpa?
Didie ke ndidiọn̄ọ ata n̄kpọ emi esitịbede ọnọ owo ke owo ama akakpa esin̄wam nnyịn?
Didie ke ndidiọn̄ọ ata n̄kpọ emi esitịbede ọnọ owo ke owo ama akakpa esidọn̄ nnyịn esịt?
KPEP N̄KPỌ EN̄WEN
Se se Bible ọdọhọde ke edi ukpọn̄.
Se m̀mê edi akpanikọ ke Abasi esitụhọde mme owo ke hell.
Ndi ufọn osụk odu ndifehe mme akpan̄kpa?
Se nte esịt ekenemde ete kiet ini enye ekedide edidiọn̄ọ ata n̄kpọ emi esitịbede ọnọ owo ke owo ama akakpa.
“Mma Mma Nte Bible Ọkọbọrọde Mme Mbụme Mi” (Enyọn̄-Ukpeme, February 1, 2015)