Di Ufan Abasi ke Nsinsi!

Oyom ukeme man ẹnam ufan; oyom ukeme man ufan ebịghi. Ẹyenen̄ede ẹdiọn̄ ukeme fo ndikabade ndi ufan Abasi ndinyụn̄ n̄ka iso mmụm itie ufan oro n̄kama. Jesus ọkọdọhọ mbon oro ẹkenịmde enye ke akpanikọ ete: ‘Akpanikọ ayanam mbufo ẹwọrọ ufụn.’ (John 8:32) Nso ke oro ọwọrọ?

Afo emekeme ndibọhọ ufụn idahaemi. Afo emekeme ndibọhọ ufụn nsunsu ukpepn̄kpọ ye nsu oro Satan asuande. Afo emekeme ndibọhọ idaha unana idotenyịn emi ọyọhọde ke uwem ediwak miliọn owo oro mîdiọn̄ọke Jehovah. (Rome 8:22) Mme ufan Abasi ẹkam ẹbọhọ ufụn “ndịk n̄kpa.”—Mme Hebrew 2:14, 15.

Afo emekeme ndinyene ifụre ke obufa ererimbot Abasi. Nso utịbe utịbe ifụre ke afo ekeme ndinyene ntem ke ini iso! Ke Paradise isọn̄, ẹyebọhọ ekọn̄, udọn̄ọ, ye ubiatibet. Ẹyebọhọ unana ye biọn̄. Ẹyebọhọ usọn̄ ye n̄kpa. Ẹyebọhọ ndịk, ufịk, ye ukwan̄ikpe. Bible etịn̄ aban̄a Abasi ete: “Afo atat ubọk fo, onyụn̄ ọnọ kpukpru mme andidu uwem se mmọ ẹmade, ẹyụhọ.”—Psalm 145:16.

Mme ufan Abasi ẹdidu uwem ke nsinsi. Nsinsi uwem edi ọsọn̄urua enọ oro Abasi edinọde kpukpru mbon oro ẹyomde itie ufan ye enye. (Rome 6:23) Kam kere se anana-utịt uwem ediwọrọde ọnọ fi!

Afo eyenyene ini ndinam ediwak n̄kpọ. Ndusụk afo edima ndikpep nte ẹbrede ndido ikwọ. Mîdịghe ekeme ndidi afo ediyom ndikpep ndiwet mme ndise m̀mê ndidi anamusọ eto. Ekeme ndidi afo edima ndikpep mban̄a mme unam m̀mê mme eto. Mîdịghe eyedi afo ediyom ndika isan̄ n̄kese nsio nsio idụt ye mme owo. Ndinyene nsinsi uwem ayanam ekeme ndinam kpukpru n̄kpọ ẹmi!

Afo eyenyene ini ndinam ediwak ufan. Ndidu uwem ke nsinsi ayanam afo ekeme ndidiọn̄ọ ediwak mbon efen ẹmi ẹkabarede ẹdi mme ufan Abasi. Afo ọyọdiọn̄ọ mme ndammana ukeme ye nti edu mmọ, ndien mmọ n̄ko ẹyedi mme ufan fo. Afo ayama mmọ, ndien mmọ ẹyema fi. (1 Corinth 13:8) Ndinyene anana-utịt uwem ọyọnọ fi ini ndinam ufan ye kpukpru owo ke isọn̄! Ke ọfọnde akan kpukpru, nte mme isua ẹbede itie ufan fo ye Jehovah ọyọdọdiọn̄ ọkọri ọsọn̄ idem. Afo akpakam edi ufan Abasi ke nsinsi!