Uwem ye Utom Jesus
Nsụhọdeidem ke Akpatre Passover
PETER ye John, ke item oro Jesus ọkọnọde mmọ, ẹma ẹdibebehe ke Jerusalem nditịm n̄kpọ mben̄e Passover. Jesus, nte an̄wan̄ade asan̄ade ye mme apostle duop eken, ebehe ke uwemeyo oro. Utịn ke osụhọrede ke utịt enyọn̄ nte Jesus ye nsan̄a esie ẹsụhọrede ẹdi ke Obot Olive ẹnyụn̄ ẹbede Itịghede Kidron. Emi edi akpatre ini Jesus okụtde obio emi ke uwemeyo ibọhọke tutu ke enye ama ekeset ke n̄kpa.
Ibịghike Jesus ye nsan̄a esie ebehe ke obio oro ẹnyụn̄ ẹnam isan̄ ẹka ufọk emi mmọ ẹdinịmde Passover. Mmọ ẹsan̄a ke udịghi-ukot ẹdọk akamba ubet enyọn̄, emi mmọ ẹkụtde nte ẹma ẹketịm kpukpru n̄kpọ ẹben̄e ọkpọ ọkpọ usọrọ Passover mmọ. Jesus akakam etetie ebet edinam emi, nte enye ọdọhọde ete: “Ke ọkọdọn̄ Mi ọkpọsọn̄ ndidia passover emi ye mbufo, ndien ndikpa n̄kpa.”
Nte ido edide, mme andidụk usọrọ Passover ẹsin̄wọn̄ cup wine inan̄. Ke ama ọkọbọ ọyọhọ cup ita nte an̄wan̄ade, Jesus ọnọ ekọm onyụn̄ ọdọhọ ete: “Ẹda emi ẹdeme ke otu idem mbufo: koro mmọdọhọ mbufo nte, ọtọn̄ọde kemi ndin̄wọn̄ke aba mfri vine tutu Ubọn̄ Abasi edi.”
Ekem ke ini udia oro, Jesus adaha ke enyọn̄, osio ọfọn̄idem esie onịm n̄kan̄ kiet, ada ukwọhọdeidem, onyụn̄ esịn mmọn̄ ke besịn. Nte ido edide, enyeneufọk enyene ndikụt nte ke ẹyet isenowo ukot. Edi sia enyeneufọk mîdụhe ke edinam emi, Jesus ese aban̄a ọkpọ ọkpọ utom emi. Owo kiet ekededi ke otu mme apostle emi akpakada ifet eberede mi ndinam emi; edi, nte an̄wan̄ade, sia ndusụk ndomoidem osụk odude ke otu mmọ, owo mmọ baba kiet inamke emi. Idahaemi bụt anam mmọ nte Jesus ọtọn̄ọde ndiyet mmọ ukot.
Ke ini Jesus osịmde enye, Peter afan̄a ete: “Uduyetke mi ukot.”
Jesus ọdọhọ ete, “Edieke mmenyetke fi, afo usan̄ake n̄kpọ ye Ami.”
Peter ọbọrọ eta, “ọbọn̄, kûyet mi ukot ikpọn̄, edi yet mi ubọk ye ibuot kọrọ do.”
Jesus ọbọrọ ete, “Owo ama ekeyere mmọn̄, enye inyeneke nditọn̄ọ ntak nyere, ibọhọke ndiyet ukot esie, edi asana ofụri ofụri: ndien mbufo ẹmesana, edi idịghe kpukpru mbufo.” Enye etịn̄ emi sia enye ọfiọkde ete Judas Iscariot ke aduak ndida enye nnọ.
Ke Jesus ama ekeyet kpukpru mmọ owo 12 ukot okụre, ẹsịnede ukot Judas, andida enye nnọ, enye afiak emen ọfọn̄idem esie esịne onyụn̄ osụhọde etie ke okpokoro. Ekem enye obụp ete: “Nte mbufo ẹ[me]fiọk se n̄kanamde ye mbufo? Mbufo ẹkot Mi Andikpep ye ọbọn̄, ndien ẹmetịm ẹkot, koro ndidi se ẹdọhọde. Edieke Ami ndien, emi ndide ọbọn̄ ye Andikpep, n̄keyetde mbufo ukot, mbufo nde ẹkpeyet kiet eken ukot. Koro mmọnọ mbufo uwụtn̄kpọ nte, mbufo nde ẹnam kpa nte Ami n̄kanamde mbufo. Ke akpanikọ ke ndọhọ mbufo, asan̄autom ikponke ikan eteufọk, isụn̄utom inyụn̄ ikponke ikan andidọn̄ enye utom. Edieke mbufo ẹfiọkde mme n̄kpọ ẹmi, ọfọfọn ọnọ mbufo ke mbufo ẹnamde mmọ.”
Nso ediye ukpepn̄kpọ ke utom nsụkidem! Mme apostle ẹmi ikpenyeneke ndiyom akpa itie, ẹkerede ẹte ke mmimọ idi ata n̄wọrọnda, ke mmọ en̄wen kpukpru ini ẹkpenyene ndinanam n̄kpọ nnọ mmimọ. Oyom mmọ ẹtiene uwụtn̄kpọ oro Jesus onịmde. Emi idịghe ido edinam uyet-ukot. Baba, edi edi utom unyịmesịt ndisan̄a utom ye unana asari, ọkpọkọm utom oro ekpri didie mînyụn̄ inemke. Matthew 26:20, 21; Mark 14:17, 18; Luke 22:14-18; 7:44; John 13:1-17.
◆ Nso idi anana-mbiet n̄kpọ ke usụn̄ nte Jesus adade okụt Jerusalem nte enye odụkde ndinịm Passover?
◆ Ke ini Passover, nte an̄wan̄ade ewe cup ke Jesus ọkọnọ mme apostle 12 ke ama ọkọnọ ekọm?
◆ Nso ọkpọ ọkpọ utom ke nte ido edide, ke ẹkesinam ẹnọ isenowo ke ini Jesus okodude ke isọn̄, ndien ntak emi owo mîkanamke enye ke ini Jesus ye mme apostle ẹkenịmde Passover?
◆ Nso ikedi uduak Jesus ke ndinam usụhọde utom uyet mme apostle esie ukot?