Uwem ye Utom Jesus

Udia Mbubịteyo

KE JESUS eyetde mme apostle esie ukot okụre, enye okot oto n̄wed Abasi ke Psalm 41:9, ọdọhọde ete: “Adia udia Mi osio ukot atịgha Mi.” Ekem, ke spirit otịmerede enye, enye anam an̄wan̄a ete: “Owo kiet ke otu mbufo eyeda Mi ọnọ.”

Mme apostle ẹtọn̄ọ ndifụhọ, owo kiet kiet onyụn̄ ọdọhọ Jesus ete: “Ndi ami ke edi?” Idem Judas Iscariot etiene obụp. John, oro odude ekpere Jesus ke okpokoro, ebere Jesus ke ikpanesịt onyụn̄ obụp ete: “Ọbọn̄ anie edi oro?”

Jesus ọbọrọ ete, “Edi owo kiet ke otu mbufo mboduopeba, owo emi edebịde udia ke usan ye Mi. Koro Eyen Owo ọmọn̄ ọnyọn̄ kpa nte ẹkewetde ẹban̄a Enye; edi eyedọdiọk ọnọ owo oro adade Eyen Owo ọnọ; ọkpọfọn ye owo oro ke enye mîkamanake.” Ke oro ebede, Satan afiak odụk Judas esịt, adade esịt esie emi ama akabade ọdiọk anam n̄kpọ. Ke ukperedem ke okoneyo oro, Jesus nte odotde okot Judas “eyen nsobo.”

Jesus idahaemi ọdọhọ Judas ete: “Wara nam se aduakde ndinam.” Mme apostle eken ndomokiet idiọn̄ọke se ikọ Jesus ọwọrọde. Ndusụk mmọ ẹkere ke sia Judas edide akama ekpatokụk, ke Jesus asian enye ete: “Dep se iyomde inọ usọrọ,” mîdịghe yak enye aka ọkọnọ mme ubuene n̄kpọ.

Ke Judas ama ọkọwọrọ, Jesus ọtọn̄ọ ata obufa usọrọ, m̀mê editi, ye mme anam-akpanikọ apostle esie. Enye emen uyo, ọnọ ekọm, obụn̄, ọnọ mmọ, ọdọhọde ete: “Ẹbọ, eta.” Enye anam an̄wan̄a ete: “Emi edi ikpọkidem Mi eke ẹnọde kaban̄a mbufo: ẹnam emi nditi Mi.”

Ke owo kiet kiet ama akata uyo oro, Jesus emen cup wine, nte an̄wan̄ade ọyọhọ cup inan̄ oro ẹkekamade ke usọrọ Passover. Enye n̄ko ọnọ ekọm, ayak ọnọ mmọ, ete mmọ ẹn̄wọn̄, onyụn̄ ọdọhọ ete: “Cup emi edi obufa ediomi ke iyịp Mi, emi ẹduọkde kaban̄a mbufo.”

Ntre emi, ke editịm ntịn̄, edi editi n̄kpa Jesus. Isua kiet kiet ke Nisan 14 ẹnyene ndifiak nnịm enye, nte Jesus ọdọhọde, ke editi imọ. Enye eyeti mme andidia usọrọ ẹmi se Jesus ye Ete esie eke heaven ẹkenamde ke ndisio usụn̄ ubọhọ ubiomikpe n̄kpa nnọ ubonowo. Ye mme Jew oro ẹkabarede ẹdi mme anditiene Christ, usọrọ emi eyeda itie Passover.

Obufa ediomi, emi ẹdade iyịp Jesus oro ẹduọkde ẹsọn̄ọ, ada itie akani Ibet ediomi. Jesus Christ edi esịne-ufọt ke ufọt otu iba​—ke n̄kan̄ kiet, Jehovah Abasi, ndien ke n̄kan̄ eken, mme Christian 144,000 ẹmi ẹbonde ke spirit. Ke adianade ye edinam ufan̄ nnọ edifen mme idiọkn̄kpọ, ediomi emi anam ẹtọn̄ọ idụt ndidem-oku ke heaven. Matthew 26:21-29; Mark 14:18-25; Luke 22:19-23; John 13:18-30; 17:12; 1 Corinth 5:7.

◆ Prọfesi Bible ewe ke Jesus okot oto kaban̄a nsan̄a, ndien enye ada emi abuan ye nso?

◆ Ntak emi mme apostle ẹfụhọde ata etieti, ndien nso ke owo mmọ kiet kiet obụp?

◆ Nso ke Jesus ọdọhọ Judas ete anam, edi didie ke mme apostle eken ẹkabade ntọt ẹmi?

◆ Nso usọrọ ke Jesus ọtọn̄ọ ke Judas ama ọkọwọrọ, ndien nso idi uduak usọrọ emi?

◆ Mmanie ẹdu ke obufa ediomi, ndien nso ke ediomi oro ọyọhọ?