UKPEPN̄KPỌ 17

Nso Utọ Owo ke Jesus Edi?

Printed Edition

Ke ini ikpepde n̄kpọ iban̄a se Jesus eketịn̄de onyụn̄ anamde ini enye odude mi ke isọn̄, imesikụt mme n̄kpọ emi anamde inen̄ede ima enye ye Ete esie, Jehovah. Ndi ọmọdiọn̄ọ ndusụk n̄kpọ oro? Didie ke ikeme ndikpebe Jesus?

1. Didie ke Jesus ebiet Ete esie?

Jesus ama odu ye edima Ete esie ke heaven ke ediwak biliọn isua. Enye ama esise nte Ete esie esinamde n̄kpọ, onyụn̄ ekpebe Ete esie. Emi anam Jesus esikere n̄kpọ onyụn̄ anam n̄kpọ ukem ukem nte Ete esie. (Kot John 5:19.) Jesus ekpebe Ete esie ke kpukpru n̄kpọ; oro akanam enye ọdọhọ: “Owo eke okụtde mi okụt Ete n̄ko.” (John 14:9) Nte afo enen̄erede ọdiọn̄ọ utọ owo emi Jesus edide, ntre ke afo edinen̄ede ọdiọn̄ọ utọ owo emi Jehovah edide. Ke uwụtn̄kpọ, nte Jesus ekesinamde n̄kpọ ye mme owo owụt ke Jehovah ekere aban̄a fi.

2. Nso iwụt ke Jesus enen̄ede ama Jehovah?

Isan̄ kiet Jesus ama ọdọhọ ete: “Man ererimbot ọfiọk ete ke ami mmama Ete, idem kpa nte Ete ọkọnọde mi ewụhọ ete nnam, kpa ntre ke ami nnam.” (John 14:31) Ini Jesus okodude mi ke isọn̄, enye ama esinam se Ete esie ọdọhọde, idem ke ini ọsọn̄de enye. Jesus ama esinen̄ede ama nditịn̄ mban̄a Ete esie nnyụn̄ n̄n̄wam mme owo ẹnen̄ede ẹkpere Ete esie.—John 14:23.

3. Nso iwụt ke Jesus enen̄ede ama mme owo?

Bible ọdọhọ ke “se ikọnọde [Jesus] idatesịt ekedi nditọ owo.” (Mme N̄ke 8:31) Jesus ama owụt ke imọ imama mme owo, sia enye ama esinyịme ndiyak n̄kpọ atak enye man an̄wam mme owo. Utịben̄kpọ oro Jesus ekesinamde ama owụt ke enye enen̄ede enyene odudu, edi utịben̄kpọ oro ama owụt n̄ko ke mbọm mme owo esinen̄ede anam enye. (Mark 1:40-42) Jesus ama esifọn ido ye kpukpru owo, inyụn̄ inamke asari. Ikọ esie ama esidọn̄ mbon emi ẹmade Abasi esịt onyụn̄ ọsọn̄ọ mmọ idem. Enye ama enyịme ndibọ ufen nnyụn̄ n̄kpa ke ntak emi enye amade mme owo. Edi mbon oro Jesus amade akan edi mbon emi ẹnamde se enye ekesikpepde.—Kot John 15:13, 14.

SỊN IDEM KPEP

Kpep n̄kpọ en̄wen ban̄a utọ owo emi Jesus edide. Nyụn̄ se nte afo ekemede ndikpebe ima esie ye nte enye ekesitatde ubọk ọnọ mme owo n̄kpọ.

4. Jesus enen̄ede ama Ete esie

Se Jesus ekesinamde ekpep nnyịn nte ikpowụtde ke imama Abasi. Kot Luke 6:12 ye John 15:10; 17:26. Ama okot itie kiet ama, ẹtuak ẹda kan̄a ẹbọrọ mbụme emi ẹnyụn̄ ẹneme ẹban̄a enye:

Nso n̄kpọ idiwụt ke imama Jehovah nte Jesus amade?

Jesus ke ọbọn̄ akam. — Jesus ama enen̄ede ama Ete esie eke heaven onyụn̄ esima ndibọn̄ akam nnọ enye

5. Jesus esikere aban̄a mme owo

Jesus esiyom ufọn mbon en̄wen utu ke ufọn idemesie. Enye ama esida ini ye odudu esie an̄wam mme owo, idem ke ini idem ememde enye. Kot Mark 6:30-44, ekem ẹbọrọ mbụme emi ẹnyụn̄ ẹneme ẹban̄a mmọ:

Ke mbụk emi, nso ye nso ke Jesus akanam emi owụtde ke enye ekere aban̄a mme owo?—Se ufan̄ikọ 31, 34, 41, ye 42.
Nso ikanam Jesus esin̄wam mme owo?—Se ufan̄ikọ 34.
Ndidiọn̄ọ ke Jesus esinam n̄kpọ nte Ete esie Jehovah ekpep fi nso aban̄a Jehovah?
Nso ye nso idiwụt ke imekere iban̄a mme owo ukem nte Jesus?

Jesus ada uyo ition ye nkpri iyak iba anam ekem ediwak tọsịn owo. Mbet esie ke ẹdeme uyo ye iyak oro ẹnọ irenowo ye iban ye nditọwọn̄.

6. Jesus esima ndinọ owo n̄kpọ

Jesus ama esinọ owo n̄kpọ kpa ye oro enye mîkedịghe imọ owo. Enye ọkọdọhọ yak isinọ mme owo n̄kpọ. Kot Utom 20:35, ekem ẹbọrọ mbụme emi ẹnyụn̄ ẹneme ẹban̄a enye:

Ikọ Jesus ke itie Bible oro owụt ke nso ikeme ndinam owo okop inemesịt?

Se VIDIO emi, ekem ẹbọrọ mbụme emi ẹnyụn̄ ẹneme ẹban̄a enye.

VIDIO: “Inemesịt Odu ke Ndinọnọ”—Ekpri Esie (4:00)

Nso ye nso ke ikeme ndinọ owo ekpededi nnyịn inyeneke n̄kpọ?

Ndi ọmọdiọn̄ọ?

Bible ọdọhọ isibọn̄ akam inọ Jehovah ke enyịn̄ Jesus. (Kot John 16:23, 24.) Ima ibọn̄ akam ke enyịn̄ Jesus, iwụt ke imọdiọn̄ọ se Jesus akanamde man nnyịn ikeme ndikpere Jehovah Abasi.

NDUSỤK OWO ẸSIDỌHỌ ẸTE: “Abasi ikereke iban̄a ofụri ufen emi nnyịn ibọde.”

Sia Jesus esinamde n̄kpọ nte Ete esie, Jehovah, didie ke oro owụt ke Jehovah ekere aban̄a nnyịn?

SE IKPEPDE

Jesus enen̄ede ama Jehovah ye mme owo. Enye onyụn̄ enyene ido ukem nte Ete esie. Nte osụk esịnde idem ekpep n̄kpọ aban̄a Jesus, ntre ke edinen̄ede ọdiọn̄ọ utọ owo emi Jehovah edide.