Nnyịn Imekeme Ndinam Utom eke Okponde Akan
1 Ẹkeda mme n̄wọrọnda edinam ẹdiọn̄ọ utom Jesus Christ. Enye ama ọnọ ediwak tọsịn owo udia ke utịbe utịbe usụn̄, ọkọk ediwak owo udọn̄ọ, onyụn̄ anam ndusụk owo ẹset ke n̄kpa. (Matt. 8:1-17; 14:14-21; John 11:38-44) Utom esie ama omụm ntịn̄enyịn ofụri idụt. Edi, ke akpatre mbubịteyo mbemiso n̄kpa esie, enye ama ọdọhọ mme anam-akpanikọ anditiene enye ete: “Owo eke ọbuọtde idem ye Ami oyonyụn̄ anam utom eke Ami nnamde; enye oyonyụn̄ anam utom eke okponde akan oro.” (John 14:12) Didie ke nnyịn ikeme ndinam utom eke “okponde akan”?
2 Ebe ke Ndikụre Efakutom Efen Efen: Ikpehe oro Jesus akanamde utom eketre ke Palestine, ke adan̄aemi ẹkedọhọde mme akpa mbet esie ẹdi ntiense “tutu esịm utịt ererimbot,” enen̄erede ebe ebiet emi Jesus ke idemesie ọkọkwọrọde ikọ. (Utom 1:8) Utom ukwọrọikọ oro enye ọkọtọn̄ọde esịm ofụri ererimbot idahaemi, esịmde idụt 232. (Matt. 24:14) Nte afo ke enyene ọyọhọ ebuana ke ndinam utom ke efakutom oro ẹbaharede ẹnọ esop fo?
3 Ebe ke Ndisịm Mme Owo Efen Efen: Jesus ọkọnyọn̄ ọkpọn̄ ibat ibat mme mbet ndika iso ke utom ukwọrọikọ. Nte ededi, nte utịp ifịk ifịk ikọ ntiense oro mmọ ẹkenọde ke Pentecost 33 E.N., mbon oro ẹkenyịmede akpanikọ ẹnyụn̄ ẹnade baptism ke usen oro ẹma ẹsịm n̄kpọ nte owo tọsịn ikie ita. (Utom 2:1-11, 37-41) Editan̄ mbon ẹmi “ẹkenịmde ẹnọ nsinsi uwem” mbok osụk akaka iso tutu esịm ke eyo nnyịn, ke adan̄aemi inịmde se ibede owo 1,000 baptism ke usen ke ẹbaharede ukem ukem. (Utom 13:48) Ndi afo ke anam kpukpru se ekemede ndisịm mbon esịt akpanikọ ke ebiet ekededi oro ekemede ndikụt mmọ onyụn̄ afiak ebịne udọn̄ oro ẹwụtde usọp usọp nte ekekeme?
4 Ebe ke Ndikwọrọ Ikọ ke Ata Anyan Ini: Utom ukwọrọikọ Jesus eke isọn̄ ekedi ke isua ita ye ubak. Ata ediwak ke otu nnyịn ẹkwọrọ ikọ ke anyan ini ẹkan oro. Inamke n̄kpọ m̀mê ẹdiyak nnyịn ika iso ke utom emi ebịghi adan̄a didie, nnyịn imokop inemesịt ndin̄wam obufa mbet kiet kiet ọtọn̄ọ ndisan̄a ke usụn̄ emi adade esịm uwem. (Matt. 7:14) Ndi afo ke ọyọhọ kpukpru ọfiọn̄ ke utom Ọbọn̄?—1 Cor. 15:58.
5 Nnyịn imekeme ndika iso nnyene mbuọtidem nte ke ye un̄wam Jesus, nnyịn idisụk inanam utom okponde nte mme ata mbet esie.—Matt. 28:19, 20.