Uwem ye Utom Jesus

Ndikop Inem N̄kpet N̄kpet Ebuana

KE USỌRỌ editi okụrede, Jesus ke ekesịn udọn̄ ọnọ mme apostle esie ye ata nneme esịt-akpanikọ. Ekeme ndidi ebe ufọt okoneyo. Ntre Jesus ọdọhọ ete: “Ẹdaha ke enyọn̄, ẹdi iwọn̄ọ.” Nte ededi, mbemiso mmọ ẹdahade, Jesus, sia ima oro enye amade mmọ onụkde enye, akaiso nditịn̄ ikọ, ọnọde uwụtn̄kpọ oro edemerede owo esịt.

“Ami ndi ata vine, Ete Mi onyụn̄ edi ọdiọn̄-in̄wan̄,” ntre ke enye ọtọn̄ọ. Akwa Ọdiọn̄-in̄wan̄, Jehovah Abasi, ọkọtọ ndamban̄a vine emi ke ini enye ekeyetde Jesus aran ke edisana spirit ke baptism esie ke ini ndaeyo eke 29 C.E. Edi Jesus akaiso ndiwụt nte ke idịghe imọ ikpọn̄ ke vine oro ada aban̄a, ọdọhọde ete:

“Kpukpru n̄kọk ke idem Mi eke mîn̄wụmke mfri, Enye osịbe efep; ndien kpukpru n̄kọk eke on̄wụmde mfri, Enye ọdiọn̄, man on̄wụm mfri awak akan. . . . Nte n̄kọk mîkemeke ndin̄wụm mfri ke idemesie, ibọhọke enye odụn̄ ke vine, kpasụk ntre ke mbufo ikemeke ndin̄wụm mfri, ibọhọke mbufo ẹdụn̄ Mi ke idem. Ami ndi vine, mbufo edi mme n̄kọk.”

Ke Pentecost, usen 51 ke ukperedem, mme apostle ye mmọ eken ẹkabade ẹdi mme n̄kọk vine oro ke ini ẹn̄wan̄ade edisana spirit ẹduọk mmọ ke idem. Ke akpatre, owo 144,000 ẹkabade ẹdi mme n̄kọk ndamban̄a vine emi. Adianade ye eto vine oro, Jesus Christ, mmọemi ẹnam ndamban̄a vine oro ẹn̄wụmde mme mfri Obio Ubọn̄ Abasi.

Jesus anam akpan n̄kpọ oro adade edin̄wụm mfri emi edi an̄wan̄a ete: “Owo eke odụn̄de Mi ke idem, Ami nnyụn̄ ndụn̄de enye ke idem, kpa enye on̄wụm mfri ekese: koro [ke] ẹsiode Mi ẹfep, mbufo ikemeke ndinam baba n̄kpọ kiet.” Nte ededi, edieke owo okpude ndin̄wụm mfri, Jesus ọdọhọ ete, “esio enye ẹfep nte n̄kọk, enye onyụn̄ akabade asat; ndien ẹtan̄ mme n̄kọk oro ẹsịn ke ikan̄, ẹnyụn̄ ẹfọp mmọ.” Ke n̄kan̄ eken, Jesus ọn̄wọn̄ọ ete: “Edieke mbufo ẹdụn̄de Mi ke idem, ikọ Mi onyụn̄ odụn̄de mbufo ke esịt, ẹben̄e se ẹyomde, ndien ẹyenam ẹnọ mbufo.”

Jesus akaiso ndiwụt mme apostle esie se inọde Ete ubọn̄, oro edi, “edin̄wụm emi mbufo ẹn̄wụmde mfri ekese; ntem ke mbufo ẹdidi mbet Mi.” Mfri oro Abasi oyomde oto n̄kọk ẹmi edi mmọ ndiwụt mme edu ẹbietde eke Christ, akpan akpan ima. Akande oro, sia Christ ekedide anditan̄a Obio Ubọn̄ Abasi, mfri oro ẹyomde mi esịne n̄ko utom mmọ ke ndinam mme mbet nte enye akanamde.

Jesus akpak mmọ idahaemi ete, “Ẹsụk ẹdụn̄ ke ima Mi.” Edi, didie ke mme apostle esie ekeme ndinam ntre? Enye ọdọhọ ete, “Edieke mbufo ẹnịmde mbet Mi, mbufo ẹyedụn̄ ke ima Mi.” Ke akade iso, Jesus anam an̄wan̄a ete: “Ibet Mi edi ntem, ete, mbufo ẹma kiet eken, kpa nte n̄kamade mbufo. Baba owo kiet inyeneke ima eke okponde akan enyeemi, owo ndikpayak uwem esie nduọk kaban̄a mme ufan esie.”

Ke hour ifan̄, Jesus eyewụt akakan ima emi ke ndinọ uwem esie ke ibuot mme apostle esie, ye kpukpru mbon eken oro ẹdinyenede mbuọtidem ke enye. Uwụtn̄kpọ esie ekpenyene ndinụk mme anditiene enye ndiwụt kiet eken ukem ima n̄waidem oro. Ima emi eyenam ẹdiọn̄ọ mmọ, nte Jesus ekebemde iso etịn̄ ete: “Mbufo ẹma ẹma kiet eken, kpukpru owo ẹyeda oro ẹfiọk ete mbufo ẹdi mbet Mi.”

Ke anamde ẹdiọn̄ọ mme ufan esie, Jesus ọdọhọ ete: “Mbufo edi mme ufan Mi edieke mbufo ẹnamde n̄kpọ eke ntemede mbufo. N̄kotke aba mbufo mme asan̄autom, koro asan̄autom mîfiọkke se eteufọk esie anamde; edi n̄kot mbufo mme ufan, koro mma mmen kpukpru se n̄kokopde ke inua Ete Mi nyarade nnọ mbufo.”

Nso ọsọn̄urua ebuana ke edi ntem ndinyene​—ndidi mme ata ufan Jesus! Edi man ẹkaiso ẹkop inem ebuana emi, ana mme mbet esie “ẹka ẹken̄wụm mfri.” Jesus ọdọhọ ete, edieke mmọ ẹn̄wụmde, “Ete [eyenọ] mbufo n̄kpọ ekededi eke ẹdiben̄ede Enye ke enyịn̄ Mi.” Ke akpanikọ, oro edi akwa utịp ke ndin̄wụm mfri Obio Ubọn̄!

Ke ama ọkọtọn̄ọ ntak akpak mme apostle emi ete “ẹma kiet eken,” Jesus anam an̄wan̄a ete ke ererimbot eyesua mmọ. Edi, enye ọdọn̄ mmọ esịt ete: “Edieke ererimbot asuade mbufo, mbufo ẹmefiọk ẹte, enye ama ebemiso asua Mi, ndien edisua mbufo.” Ekem Jesus ayarade ntak emi ererimbot asuade mme mbet esie, ọdọhọde ete: “Sia mbufo mîdịghe mbon ererimbot, edi Ami n̄kemekde mbufo nsio ke ererimbot, ke ntak oro ererimbot asua mbufo.”

Ke akade iso anam ntak usua ererimbot emi an̄wan̄a, Jesus akaiso ete: “Mmọ eyenam mbufo kpukpru n̄kpọ ẹmi ke ntak enyịn̄ Mi, koro mmọ mîfiọkke [Jehovah Abasi] Andidọn̄ Mi.” Mme utịbe utịbe utom Jesus, nte utịp, obiom mbon oro ẹsuade enye ikpe, nte enye ọdọhọde ete: “Edieke mmen̄kpesịneke ke ufọt mmọ nnam mme utom eke akanam owo efen mînamke, mmọ ikpenyeneke idiọkn̄kpọ: edi kemi mmọ ẹkokụt ẹnyụn̄ ẹsua Mi ye Ete Mi.” Ntre, nte Jesus ọdọhọde, n̄wed Abasi osu: “Mmọ ẹkesua Mi ke unana ntak.”

Nte enye akanamde akpa, Jesus afiak ọdọn̄ mmọ esịt ke ndin̄wọn̄ọ ndinọ ibetedem ẹsọk mmọ, kpa edisana spirit, emi edide ata okopodudu anamutom Abasi. “Enye eyedi ntiense ọnọ Mi: mbufo ẹyenyụn̄ ẹtiene ẹdi ntiense ẹnọ Mi.” John 14:31-15:27; 13:3, 35; Galatia 6:16; Psalm 35:19; 69:4.

▪ Ini ewe ke Jehovah ọkọtọ ndamban̄a vine oro, ndien ini ewe, n̄ko didie ke mmọ eken ẹkabade ẹdi ubak vine oro?

▪ Ke akpatre, n̄kọk ifan̄ ke ndamban̄a vine oro enyene?

▪ Nso mfri ke Abasi oyom oto mme n̄kọk oro?

▪ Didie ke nnyịn ikeme ndidi mme ufan Jesus?

▪ Ntak emi ererimbot asuade mme anditiene Jesus?