Uwem ye Utom Jesus

Item Unyọn̄ Efen Efen

JESUS ye mme apostle esie ẹtịm idem ndikpọn̄ ubetenyọn̄. Enye akaiso ete: “Ntịn̄ mme ikọ ẹmi nnọ mbufo, mbak oro ẹdisịn mbufo ẹduọ.” Ekem enye otịm odụri mmọ utọn̄ ete: “Mmọ ẹyebịn mbufo ẹsio ke mme synagogue; ini ke onyụn̄ edi eke owo ekededi eke ediwotde mbufo eyese ete imọ inam n̄kpọ inọ Abasi.”

Ntọt emi otịm otịmede mme apostle ekikere. Okposụkedi Jesus ke mbemiso ọkọdọhọde ke ererimbot eyesua mmọ, enye ikọdọhọke ke eyewot mmọ. Enye anam an̄wan̄a ete, “N̄kasianke mbufo mme n̄kpọ ẹmi ke editọn̄ọ, sia nsụk ndodu ye mbufo.” Edi, eye didie ntem ndibemiso ntịm mmọ idem ye ntọt emi mbemiso enye ọnyọn̄de!

Jesus akaiso ete, “Edi m̀mọ̀n̄ ndinyọn̄ ke emi ntiene Enyeemi ọkọdọn̄de Mi; mbufo baba owo kiet inyụn̄ ibụpke Mi ite, Aka m̀mọ̀n̄?” Mbemiso ke mbubịteyo oro, mmọ ẹma ẹbụp ẹban̄a ebiet eke enye akade, edi idahaemi se enye asiande mmọ otịm enyek mmọ idem tutu mmọ ibụpke aba iban̄a emi. Nte Jesus akade iso ete, “Edi mfụhọ ọyọhọ mbufo ke esịt koro nnemede mme n̄kpọ ẹmi nnọ mbufo.” Mme apostle ẹkop mfụhọ idịghe n̄kukụre koro mmọ ẹfiọkde ẹte ke mmimọ iyekụt ọkpọsọn̄ ukọbọ ẹnyụn̄ ẹwot mmimọ edi koro Eteufọk mmọ ọkpọn̄de mmọ.

Ntre Jesus anam an̄wan̄a ete: “Edinyọn̄ Mi eyefọn ye mbufo koro edieke mmenyọn̄ke, ibetedem iditieneke mbufo; edi mma nnyọn̄, nyedọn̄ enye etiene mbufo.” Jesus ekeme ndidu n̄kukụre ke ebiet kiet ke ini kiet, edi ke ini enye odude ke heaven, enye ekeme ndinọ ibetedem, kpa edisana spirit Abasi, ẹsọk mme anditiene enye ke ebiet ekededi oro mmọ ẹkemede ndidu ke isọn̄. Ntre Jesus ndinyọn̄ eyeda ufọn edi.

Jesus ọdọhọ ete ke edisana spirit “eyemen ifiọk aban̄a idiọkn̄kpọ, ye edinen ido, ye ikpe, otụk ererimbot esịt.” Eyeyarade idiọkn̄kpọ ererimbot, kpa enye ndikpu ndinyene mbuọtidem ke Eyen Abasi. Adianade do, ẹyewụt uyarade oro oyụhọde owo ẹban̄a edinen ido Jesus ke enye ndidọk mbịne Ete esie. Ndien edikpu oro Satan ye idiọk ererimbot esie ẹkpude ndiwụri nsọn̄ọnda Jesus edi uyarade oro oyụhọde owo nte ke ẹma ẹbiom ọbọn̄ ererimbot emi ikpe.

Jesus akaiso ete, “Mmenyene ediwak n̄kpọ kan̄a ndineme ye mbufo, edi mbufo ikemeke ndiyọ mmọ kemi.” Ntre Jesus ọn̄wọn̄ọ ete ke ini imọ idin̄wan̄ade edisana spirit iduọk, emi edide anamutom odudu Abasi, enye eyeda mmọ usụn̄ ndifiọk mme n̄kpọ ẹmi nte ekemde ye ukeme mmọ ndimụm mmọ.

Mme apostle ẹkpu akpan akpan ndifiọk nte ke Jesus eyekpa ndien ekem owụt mmọ idem ke enye ama ekeset. Ntre mmọ ẹbụp kiet eken ẹte: “Nso ke Enye ọdọhọ nnyịn ẹmi ntem, ete, Ke ekpri ibio ini mbufo idikwe Mi; ke ekpri ibio ini n̄ko mbufo ẹyekụt Mi: n̄ko, koro nnyọn̄de ntiene Ete?”

Jesus ọfiọk ete ke mmọ ẹyom ndibụp imọ mbụme, ntre enye anam an̄wan̄a ete: “Ke akpanikọ ke ndọhọ mbufo nte, mbufo ẹyetuan̄a ẹnyụn̄ ẹseme, edi ererimbot eyedara: mbufo ẹyefụhọ, edi mfụhọ mbufo eyekabade edi idara.” Ke uwemeyo edem usen, ke ini ẹwotde Jesus, mme adaiso ido ukpono ererimbot ẹdara, edi mme mbet ẹfụhọ. Mfụhọ mmọ akabade idara, nte ededi, ke ini Jesus esetde! Ndien idara akaiso ke ini enye ọnọde mmọ odudu ke Pentecost ndidi mme ntiense esie ke ndin̄wan̄a edisana spirit Abasi nduọk mmọ ke idem!

Ke emende idaha mme apostle odomo ye eke n̄wan ke ini ubiak uman esie, Jesus ọdọhọ ete: “Ke ini uman otụkde n̄wan, enye odu ke mfụhọ koro ekemde ini esie.” Edi kpa nte enye mîkaha iso aba iti ndutụhọ esie ke adan̄aemi eyen esie amanade, Jesus ọdọhọ ete: “Mmọdo mbufo ẹdude ke mfụhọ kemi; edi nyetọn̄ọ ntak n̄kụt mbufo [ke ini nsetde], esịt eyenyụn̄ adat mbufo, ndien baba owo kiet idibọhọ mbufo idatesịt mbufo.”

Tutu osịm ini emi, mme apostle akananam iben̄eke n̄kpọ ke enyịn̄ Jesus. Edi enye kemi ọdọhọ ete: “N̄kpọ ekededi eke ẹdiben̄ede Ete, Enye eyenọ mbufo ke enyịn̄ Mi. . . . koro Ete ke Idemesie amama mbufo, sia mbufo ẹkemade Mi, ẹnyụn̄ ẹnịmde ke akpanikọ ẹte Ami n̄koto ke ọtọ Ete ndi. N̄koto ke ọtọ Ete ndi ke ererimbot: nnyụn̄ m̀mọ̀n̄ n̄kpọn̄ ererimbot nnyọn̄ ntiene Ete.”

Mme ikọ Jesus ẹdi akwa n̄kpọ nsịnudọn̄ ẹnọ mme apostle. Mmọ ẹdọhọ ete, “Imada ẹmi inịm ke akpanikọ ite Afo oto Abasi edi.”

“Nte mbufo ẹmonịm ndien ke akpan ikọ?” Jesus obụp. “Sese, ini ke edi, onyụn̄ ededi ama, eke mbufo ẹdisuanade, kpukpru mbufo ẹdinyụn̄ ẹnyọn̄de ke ebiet mbufo, ẹdinyụn̄ ẹkpọn̄de Mi ikpọn̄.” Ọkpọkọm oro enye etiede nte se owo mîkponịmke ke akpanikọ, emi otịbe mbemiso eyo esiere!

Jesus eberi ete, “Ntịn̄ mme n̄kpọ ẹmi nnọ mbufo, man mbufo ẹnyene emem ke Idemmi. Mbufo ẹyekụt ukụt ke ererimbot: edi ẹsọn̄ esịt; Ami n̄kakan ererimbot.” Jesus akakan ererimbot ke ndinam uduak Abasi mma ke edinam akpanikọ kpa ye kpukpru se Satan ye ererimbot esie ẹkedomode ndinam man ẹwụri nsọn̄ọnda Jesus. John 16:1-33; 13:36.

▪ Nso ntọt Jesus itịmerede mme apostle esie ekikere?

▪ Ntak emi mme apostle mîkobụpke Jesus ebiet emi enye akade?

▪ Nso akpan akpan mîkan̄wan̄ake mme apostle?

▪ Didie ke Jesus akanam an̄wan̄a nte ke mfụhọ mfụhọ idaha mme apostle eyekabade edi idara?

▪ Nso ke Jesus ọdọhọ ke mme apostle ẹyenam ke mîbịghike?

▪ Didie ke Jesus akan ererimbot?