N̄kpọ nte ọfiọn̄ itiokiet kpọt ke Jesus ama ọkọtọn̄ọ utom ukwọrọikọ esie ke isọn̄, Nicodemus ọfiọk Jesus nte “Andikpep emi Abasi osiode ọdọn̄.” Ke okopde n̄kpaidem aban̄a mme utịben̄kpọ oro Jesus akanamde ndondo emi ke Jerusalem ke Passover eke 30 E.N., Nicodemus edi, ke okoneyo, ndidọhọ ke imọ imenịm Jesus ke akpanikọ ndinyụn̄ n̄kpep n̄kpọ efen efen mban̄a andikpep emi. Mmọdo, Jesus etịn̄ ntotụn̄ọ akpanikọ ọnọ Nicodemus aban̄a ufọn ‘editọn̄ọ ntak mmana’ man owo odụk Obio Ubọn̄ Abasi. Ke ini emi, Jesus etịn̄ n̄ko mme ikọ emi: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—John 3:1-16.

Nso utịbe utịbe idotenyịn ina Nicodemus ntem ke iso! Enye ekeme ndikabade ndi n̄kpet n̄kpet nsan̄a Jesus, ekemede ndida enyịn n̄kụt nsio nsio ikpehe uwem Jesus ke isọn̄. Nte andikara mme Jew ye andikpep ke Israel, Nicodemus enyene ndusụk ifiọk Ikọ Abasi. Enye n̄ko enen̄ede enyene ikike, nte ẹkemede ndikụt ke enye ndifiọk Jesus nte andikpep emi Abasi okosiode ọdọn̄. Nicodemus enyene udọn̄ ke mme n̄kpọ eke spirit, ndien enye enen̄ede osụhọde idem. Anaedi ọsọn̄ didie ntem andibuana ke n̄kponn̄kan esopikpe mme Jew ndinyịme usụhọde eyen anamusọ eto nte owo emi Abasi osiode ọdọn̄! Kpukpru utọ edu oro ẹdi akpan n̄kpọ ke owo ndidi mbet Jesus.

Akpa kan̄a, John ama osio owụt nte ke ọbọn̄ Jew oro ekedi “etiene Jesus ke okoneyo.” (John 3:2) Eyen ukpepn̄kpọ Bible kiet ọnọ ekikere ete: “Nicodemus ikedịghe ke okoneyo ke ntak ndịk, edi man efep otuowo oro ẹkpekebiọn̄ọde enye ndibụp Jesus mbụme.” Edi, John eketịn̄ aban̄a Nicodemus nte ‘owo emi ekedide ke editọn̄ọ edisobo ye Jesus ke okoneyo’ ke ukem udọn̄ikọ oro enye eketịn̄de aban̄a Joseph owo Arimathea nte ‘edide mbet Jesus ke ndịbe ọnọ ndịk mme Jew.’ (John 19:38, 39) Mmọdo, etie nte Nicodemus akaka etiene Jesus ke okoneyo ke ntak “ndịk mme Jew,” kpa nte mbon eyo esie eken ẹkefehede ndịk edinyene ebuana ekededi ye Jesus.—John 7:13.