Syracuse—Ebiet Emi Paul Akawahade ke Isan̄ Mmọn̄ Mmọn̄
KE N̄KPỌ NTE isua 59 E.N., ubom ama osio ke Malta isuo Mediterranean aka Italy. Ubom oro ama enyene idiọn̄ọ “Nditọ Zeus,” kpa mme abasi emi ẹdade nte mme andikpeme mme awatinyan̄. Luke emi eketienede ewet Bible ọdọhọ ke ubom oro ama adian “ke itie mbehe Syracuse” ke usụk n̄kan̄ usiahautịn Sicily, onyụn̄ odu “do ke usen ita.” (Utom 28:11, 12) Aristarchus ama etiene esịne ke ubom oro ye Luke, ọkọrọ ye apostle Paul, emi ẹkedade ẹka ikpe ke Rome.—Utom 27:2.
Nnyịn ifiọkke m̀mê ẹma ẹyak Paul ọwọrọ ke Syracuse. Edieke enye m̀mê mme nsan̄a esie ẹkewọrọde, anaedi mmọ ẹkekụt nso?
Ke eyo Greece ye Rome, Syracuse ama ekpere ndiwọrọ etop ukem nte Athens ye Rome. Nte mbụk ọdọhọde, mbon Corinth ẹkesiak enye ke isua 734 M.E.N. Enyene ini emi Syracuse ekenen̄erede ọwọrọ etop ndien do ke ediwak owo oro ẹkenen̄erede ẹwọrọ etop ke eset ẹkemana, utọ nte Epicharmus emi ekesiwetde mbre ye Archimedes emi ekedide ata ibat. Mbon Rome ẹma ẹkan Syracuse ke isua 212 M.E.N.
Edieke akade ekese Syracuse eyomfịn, emi ayanam fi ọfiọk nte enye eketiede ke eyo Paul. Ẹkebaharede obio emi ke ikpehe iba—ikpehe kiet odu ke ekpri Isuo Ortygia, ndien etie nte ubom emi Paul okodụkde akadian do, ikpehe enye eken odu ke obot.
Mfịn, emekeme ndikụt ke isuo emi, n̄kani temple emi ẹkebọpde ke ido mbon Greece ke Sicily—oro edi, temple Apollo, emi ẹkebọpde ke ọyọhọ isua ikie itiokiet M.E.N. Mme adaha temple emi ẹkebọpde ẹnọ Athena ẹdu n̄ko, ndien ẹkebọp mmọ emi ke ọyọhọ isua ikie ition M.E.N, edi mmọ ẹdidi ubak akwa ufọkederi.
Ufọt ufọt obio emi odu idahaemi ke obot, emi afo ekemede ndika n̄kese itie emi ẹsibonde n̄kpọeset oro ẹdọkde ẹsion̄o ke isọn̄, ke Neapolis. Ufọkmbre Greece ada ekpere inuaotop esie. Enye edi kiet ke otu akakan usọ ubọpn̄kpọ mbon Greece oro odude esịm emi. Enye edi ata eti itie edinam sia adade ekpere inyan̄. Akwa an̄wambre emi mbon Rome ẹkebọpde ke ọyọhọ isua ikie ita E.N. odu ke ata usụk usụk itie ubon n̄kpọeset oro. Enye etie nte nsenunen, ọniọn̄ mita 140 onyụn̄ abara mita 119, ndien enye edi ọyọhọ an̄wambre ita emi okponde akan ke Italy.
Edieke afo enyenede ifet ndika Syracuse, afo emekeme nditie ke anyan n̄kpọitie mbenesụk ke Ortygia, okụbọrede Bible fo aka Utom 28:12, onyụn̄ ada enyịn ikike okụt nte Paul esịnede ke ubom emi ẹkewatde ẹdidian ke esụk emi.
[Ndise/Ndise obio ke page 30]
(Ama oyom ndikụt nte enye enen̄erede etie, se n̄wed)
Malta
Sicily
Syracuse
ITALY
Rhegium
Puteoli
Rome
[Ndise ke page 30]
Ndon efembre Greece ke Syracuse