N̄wan Isua 105 Emi Uwem Esie Enyenede Se Ọwọrọde
ELIN edi kiet ke otu owo 60 ke Sweden emi ẹbatde ndondo emi ẹsịn ke otu mbon oro ẹsịmde m̀mê ẹbede isua 105. Enye ke idemesie edi isua 105. Okposụkedi oro enye mîkemeke ndiwọrọ ke ufọk mbonusọn̄ oro enye odude, idem esie ikpanke enye ndika iso nnam utom nte ọsọn̄idem Ntiense Jehovah, kpa se enye ekemekde ndinam toto ke isua 60 emi ẹkebede.
Elin esikwọrọ ikọ nte emi apostle Paul ekesikwọrọde ke ini enye okodude ke n̄kọbi-ntem. Paul ekesikwọrọ ikọ ọnọ kpukpru mbon oro ẹkedide ẹdise enye. (Utom 28:16, 30, 31) Kpasụk ntre, Elin esida kpukpru ifet oro ẹbererede ọkwọrọ eti mbụk a-Bible ọnọ mme akamaufọk mbonusọn̄, mbiausọbọ, mme anamidet, mme nurse, ye owo ekededi oro enye okụtde do. Ke ini ke ini, mbon esop mmọ ẹsidọhọ nditọ ukpepn̄kpọ Bible mmọ ẹka ẹkese Elin man ẹkpekpep n̄kpọ ẹto enye.
Mbon esop mme Elin ẹma nte enye esitiede imam imam, esinyụn̄ amade ndibụp owo nte n̄kpọ etiede. Owo kiet ke esop mmọ ọdọhọ ete: “Ayan̄a owo ifiọk nte enye esisan̄ade ọfiọk se ikade iso ke esop. Enye esiti enyịn̄ kpukpru nditọwọn̄ ye mbon oro ẹwọrọde ẹdi esop nnyịn obufa.” Elin esinen̄ede akama owo esen, anam owo asak imam, onyụn̄ enen̄ede okop idatesịt.
Nso inam Elin aka iso adat esịt onyụn̄ aka iso odu uwem oro enyenede se ọwọrọde? Idụhe usen oro enye mîdaha ekpri n̄wed Ẹdụn̄ọde N̄wed Abasi ke Usen ke Usen, emi Mme Ntiense Jehovah ẹsiode, idụn̄ọde N̄wed Abasi. Enye n̄ko esikama akrasi oro anamde n̄kpọ ẹnen̄ede ẹkponi okot Bible kpukpru usen. Elin esidụn̄ọde se ẹyomde ndikpep ke mme mbono esop oro Mme Ntiense Jehovah ẹsinịmde kpukpru urua. Okposụkedi oro enye mîsikemeke ndidụk mme mbono esop emi, enye esida kaset akpan̄ utọn̄ okop se ẹkenamde. Ndikot Bible ye mme n̄wed Bible kpukpru ini nnyụn̄ ndụk mme mbono esop Christian kpukpru ini ayanam nnyịn ikop inem uwem onyụn̄ anam uwem nnyịn enyene se ọwọrọde, inamke n̄kpọ m̀mê idi isua ifan̄.—Psalm 1:2; Mme Hebrew 10:24, 25.