“Ata N̄kpọsọn̄ Utom Abasi” Ẹdemede Nnyịn Udọn̄

“Nnyịn imokop mmọ ẹtịn̄de ata n̄kpọsọn̄ utom Abasi ke usem emana nnyịn.”—Utom 2:11.

1, 2. Nso n̄kpọ ndyọ eketịbe ke Jerusalem ke Pentecost isua 33 E.N.?

KE USENUBỌK utịt utịt ini utọ kiet ke isua 33 E.N., n̄kpọ ndyọ ama etịbe ọnọ otu iren ye iban, mme mbet Jesus Christ emi ẹkesopde idem ke ufọk owo ke Jerusalem. “Idaha kiet uyom oto ke enyọn̄ edi, ebiet uyom ata ọkpọsọn̄ oyobio eke efịmede, enye onyụn̄ ọyọhọ ofụri ufọk oro mmọ ẹtiede ke esịt. Mmọ ẹnyụn̄ ẹkụt mme edeme eke ẹsakde ikan̄. . . . Ndien Edisana Spirit ọyọhọ kpukpru mmọ ke idem, mmọ ẹnyụn̄ ẹtọn̄ọ ndisem nsio-nsio usem.”—Utom 2:2-4, 15.

² Akwa otuowo ẹma ẹsop idem ke iso ufọk oro. Mme Jew oro ẹkemanade ke esenidụt, ẹnyụn̄ ẹdide ‘mme okpono Abasi’ emi ẹkedide Jerusalem ndinịm usọrọ Pentecost, ẹma ẹdu ke otu mmọ. Idem ama akpa mmọ koro owo mmọ kiet kiet okokopde mme mbet ẹtịn̄de ikọ ke usem emana esie ẹban̄a “ata n̄kpọsọn̄ utom Abasi.” Didie ke oro ekpekeme nditịbe ke ini mbon oro ẹketịn̄de ikọ ẹkedide nditọ Galilee?—Utom 2:5-8, 11.

3. Nso etop ke apostle Peter ọkọnọ otuowo ke Pentecost?

³ Kiet ke otu nditọ Galilee oro ekedi apostle Peter. Enye ama anam an̄wan̄a ete ke urua ifan̄ ke mbemiso, mme idiọkowo ẹma ẹwot Jesus Christ. Nte ededi, Abasi ama anam Eyen esie eset ke n̄kpa. Ke oro ebede, Jesus ama owụt ediwak mbet esie idem, esịnede Peter ye mbon en̄wen oro ẹkedude do idahaemi. N̄kpasịp usen duop ke mbemiso, Jesus ama ọdọk ke heaven. Enye akan̄wan̄a edisana spirit ọduọk mme mbet esie. Ndi emi ama enyene se ọwọrọde ọnọ mbon oro ẹkenịmde usọrọ Pentecost oro? Ih, ama enyene. N̄kpa Jesus ama eberede usụn̄ ọnọ mmọ ndibọ edifen ke mme idiọkn̄kpọ mmọ nnyụn̄ mbọ “Edisana Spirit nte enọ” edieke mmọ ẹwụtde mbuọtidem ke enye. (Utom 2:22-24, 32, 33, 38) Ntre didie ke mme andida nse oro ẹkenam n̄kpọ ẹban̄a “ata n̄kpọsọn̄ utom Abasi” oro mmọ ẹkekopde ẹban̄a? Ndien didie ke mbụk emi ekeme ndin̄wam nnyịn ndidụn̄ọde utom nnyịn oro inamde inọ Jehovah?

Onụk Mmọ Ndinam N̄kpọ!

4. Ewe ntịn̄nnịm ikọ Joel okosu ke usen Pentecost isua 33 E.N.?

⁴ Ke ẹma ẹkebọ edisana spirit, mme mbet ke Jerusalem ẹma ẹsọsọp ẹtọn̄ọ ndibuana eti mbụk edinyan̄a ye mbon en̄wen, ẹtọn̄ọde ye otuowo emi ẹkesopde idem ke usenubọk oro. Ukwọrọikọ mmọ ama osu n̄wọrọnda ntịn̄nnịm ikọ oro Joel, eyen Pethuel ekewetde isua 800 ke mbemiso ete: “Nyan̄wan̄a spirit mi nnọ ofụri obụkidem; ndien nditọ-iren mbufo, ye nditọ mbufo iban ẹyetịn̄ prophecy, mbiowo mbufo ẹyedaba ndap, n̄kparawa mbufo ẹyekụt n̄kukụt. Nyonyụn̄ n̄n̄wan̄a spirit mi ke eyo oro nnọ ifịn-iren ye ifịn-iban mbufo . . . ke akwa usen Jehovah emi enyenede ndịk mîka-idịghe.”—Joel 1:1; 2:28, 29, 31; Utom 2:17, 18, 20.

5. Ke nso usụn̄ifiọk ke mme Christian akpa isua ikie ẹketịn̄ ntịn̄nnịm ikọ? (Se ikọ idakisọn̄.)

⁵ Ndi emi ọkọwọrọ ke Abasi okoyom ndinam ofụri emana edi mme prọfet, iren ye iban, ẹbietde David, Joel, ye Deborah, onyụn̄ ada mmọ ndibem iso ntịn̄ mban̄a mme n̄kpọntịbe ini iso? Baba. ‘Nditọ-iren ye nditọ-iban, ifịn-iren ye ifịn-iban’ Christian ẹma ẹtịn̄ ntịn̄nnịm ikọ ke usụn̄ifiọk oro nte ke spirit Jehovah ama onụk mmọ nditịn̄ “ata n̄kpọsọn̄ utom” oro Jehovah akanamde edinyụn̄ anamde. Ntre mmọ ẹma ẹnam n̄kpọ nte mme anditịn̄ ikọ ke ibuot Ata Edikon̄.a Nte ededi, didie, ke otuowo ẹkenam n̄kpọ?—Mme Hebrew 1:1, 2.

6. Ke ẹma ẹkekop utịn̄ikọ Peter, okonụk ediwak owo ke otuowo oro ndinam nso?

⁶ Ke otuowo ẹma ẹkekop utịn̄ikọ Peter, emi ama onụk ediwak mmọ ndinam n̄kpọ. Mmọ ẹma ‘ẹnyịme ikọ esie’ ẹnyụn̄ “ẹna baptism, ndien usen oro adan̄a nte thousand owo ita ẹdiana ye mmọ.” (Utom 2:41) Sia ẹkedide mme amanaisọn̄ Jew ye mme okpono Abasi ke ido mme Jew, mmọ ẹma ẹnyenyene akpan ifiọk N̄wed Abasi. Ifiọk oro, ọkọrọ ye mbuọtidem oro mmọ ẹkenyenede ke se mmọ ẹkekpepde ẹto Peter, ama anam mmọ ẹnyene ntak ndina baptism “ke enyịn̄ Ete ye Eyen ye Edisana Spirit.” (Matthew 28:19) Ke ẹma ẹkena baptism ‘mmọ ẹma ẹdọdiọn̄ ẹsịn ifịk ke edikpep ukpepn̄kpọ mme apostle.’ Ke ukem ini oro, mmọ ẹma ẹtọn̄ọ ndibuana obufa ido ukpono mmọ ye mbon en̄wen. Ke akpanikọ, “ke usen ke usen mmọ ẹnyene iwụk ẹdu ke temple ye esịt kiet, . . . ẹtoro Abasi; kpukpru owo ẹnyụn̄ ẹnen iso ye mmọ.” Nte utịp utom unọ ikọ ntiense emi, ‘Ọbọn̄ ama ada mmọ emi ẹnyan̄ade adian ye mmọ ke usen ke usen.’ (Utom 2:42, 46, 47) Ẹma ẹtọn̄ọ mme esop Christian usọp usọp ke ediwak idụt emi mbufa mme andinịm ke akpanikọ emi ẹkedụn̄de. Nte eyịghe mîdụhe, ke ndusụk udomo, n̄kọri emi okoto ifịk ifịk ukeme oro mmọ ẹkesịnde ndikwọrọ “gospel” ke mmọ ẹma ẹkefiak ẹnyọn̄ọ obio mmọ.—Colossae 1:23.

Ikọ Abasi Enyene Odudu

7. (a) Nso idụri mme owo ẹtode kpukpru idụt idi esop Jehovah mfịn? (b) Nso n̄kaiso n̄kọri oro ẹkemede ndinyene ke afo okụt ke an̄wautom ererimbot ye eke n̄kann̄kụk? (Se ikọ idakisọn̄.)

⁷ Nso kaban̄a mbon oro ẹnyenede udọn̄ ndikabade ndi mme asan̄autom Abasi mfịn? Oyom mmọ n̄ko ẹtịn̄ enyịn ẹkpep Ikọ Abasi. Nte mmọ ẹkpepde, mmọ ẹdi ẹdifiọk Jehovah nte Abasi “mbọm, ye mfọn, ye anyan ime, awak ima ye akpanikọ.” (Exodus 34:6; Utom 13:48) Mmọ ẹkpep ẹban̄a ima ima ndutịm Jehovah aban̄ade ufak ebe ke Jesus Christ, emi iyịp esie oro ẹkeduọkde ekemede ndiyet mmọ ẹsana ẹbọhọ kpukpru idiọkn̄kpọ. (1 John 1:7) Mmọ n̄ko ẹdi ẹdifiọk uduak Abasi nte ke “nti owo ye mme idiọk owo ẹyeset ke n̄kpa.” (Utom 24:15) Ima oro mmọ ẹnyenede ẹnọ Andinam “ata n̄kpọsọn̄ utom” emi ọyọhọ mmọ esịt, ndien onụk mmọ ndikwọrọ ọsọn̄urua akpanikọ emi. Ekem mmọ ẹkabade ẹdi mme asan̄autom Abasi oro ẹma ẹkeyak idem ẹnọ ẹnyụn̄ ẹna baptism, ẹnyụn̄ ẹka iso ‘ndikọri ke ifiọk Abasi.’b—Colossae 1:10b; 2 Corinth 5:14.

8-10. (a) Didie ke ifiọkutom Christian an̄wan kiet owụt ke Ikọ Abasi “enyene odudu”? (b) Nso ke ifiọkutom emi ekpep fi aban̄a Jehovah ye usụn̄ oro enye esinamde n̄kpọ ye mme asan̄autom esie? (Exodus 4:12)

⁸ Ifiọk oro mme asan̄autom Abasi ẹnyenede ẹto ukpepn̄kpọ Bible mmọ idịghe enyọn̄ enyọn̄ ifiọk. Uto ifiọk oro esidemede esịt mmọ, okpụhọde usụn̄ ukere n̄kpọ mmọ, onyụn̄ odu ye mmọ. (Mme Hebrew 4:12, NW) Ke uwụtn̄kpọ, ẹma ẹda n̄wan kiet ekerede Camille ke utom nte andise mban̄a mbonusọn̄. Kiet ke otu mbon oro enye ekesisede enyịn ekedi Martha, kiet ke otu Mme Ntiense Jehovah. Sia Martha ọkọdọn̄ọde udọn̄ọ ẹkotde dementia, ama esiyom ẹse enye enyịn kpukpru ini. Ẹkesinyene nditeti enye adia udia—idem ndimen udia ke ama akadia. Nte ededi, n̄kpọ kiet ama enen̄ede owụhọ ke ekikere Martha, nte nnyịn idikụtde.

⁹ Usen kiet, Martha ama okụt nte Camille atuade eyet ke ntak ukụt otode ndusụk ọkpọkpọ mfịna esie. Martha ama ada ubọk awan̄ Camille ke itọn̄ onyụn̄ ọdọhọ enye anam imọ ikpep enye Bible. Edi ndi owo nte Martha ekeme ndinịm ukpepn̄kpọ Bible? Ih, ekeme! Okposụkedi enye ama ekefre ekese n̄kpọ, Martha ikefreke ọkpọsọn̄ Abasi esie; m̀mê enye ndikefre ọsọn̄urua akpanikọ oro enye ekekpepde ke Bible. Ke ini ukpepn̄kpọ oro, Martha ama eteme Camille ete okot ikpehe ekikere kiet kiet, okot mme itie N̄wed Abasi oro ẹsiakde ẹsịn, okot mbụme oro odude ke idak page oro, ndien ekem ọbọrọ mbụme oro. Emi ama aka iso ke ndusụk ini, ndien kpa ye unana ukeme Martha, Camille ama anam n̄kọri ke ifiọk Bible. Martha ama ọfiọk ete ke ama oyom Camille abuana ye mbon en̄wen oro ẹkenyenede udọn̄ ndinam n̄kpọ Abasi. Ye emi ke ekikere, enye ama ọnọ eyen ukpepn̄kpọ esie ọfọn̄ ye ikpaukot, man Camille ekpenyene n̄kpọ oro odotde ndisịne ke ini enye odụkde akpa mbono esop esie ke Ufọkmbono Obio Ubọn̄.

¹⁰ Ima ima udọn̄, uwụtn̄kpọ, ye mbuọtidem Martha ama otụk Camille. Enye ama esịm ubiere nte ke se Martha okodomode ndikpep imọ ke Bible ekenen̄ede edi akpan n̄kpọ, sia Martha ama ekefre ke ekperede ndidi kpukpru n̄kpọ ke mîbọhọke se enye ekekpepde oto N̄wed Abasi. Ke ukperedem, ke ini ẹkenọde Camille aka itie efen oro ẹsede ẹban̄a mbonusọn̄, enye ama ọfiọk ete ke ini ama ekem imọ ndinam n̄kpọ. Ke akpa ifet oro enye ekenyenede, enye ama aka Ufọkmbono Obio Ubọn̄, esịnede ọfọn̄ ye ikpaukot oro Martha ọkọnọde enye, onyụn̄ eben̄e ukpepn̄kpọ Bible. Camille ama anam eti n̄kọri onyụn̄ ana baptism.

Ẹdemede Nnyịn Udọn̄ Ndiwụt Mme Idaha Jehovah

11. Ke adianade ye edinyene ifịk ke utom ukwọrọikọ, didie ke nnyịn ikeme ndiwụt ke etop Obio Ubọn̄ edemede nnyịn udọn̄?

¹¹ Mfịn, se iwakde ibe Mme Ntiense Jehovah miliọn itiokiet ẹdu emi, ukem nte Martha ndien idahaemi Camille, ẹkwọrọde “gospel Ubọn̄ Abasi” ke ofụri ererimbot. (Matthew 24:14; 28:19, 20) Ukem nte mme Christian akpa isua ikie, “ata n̄kpọsọn̄ utom Abasi” ẹnen̄ede ẹtụk mmọ. Mmọ ẹwụt esịtekọm nte ke mmimọ imenyene akwa ifet ndikere enyịn̄ Jehovah ye nte ke enye aman̄wan̄a edisana spirit esie ọduọk mmimọ. Nte utịp, mmọ ẹsịn ofụri ukeme ‘ndisan̄a ke ido nte odotde Ọbọn̄, nnem Enye esịt,’ ẹbuande mme idaha emi ke kpukpru ikpehe uwem mmọ. Ke adianade ye mme n̄kpọ eken, emi esịne edikpono mme idaha Abasi ẹban̄ade ọfọn̄ ye ukamaidem.—Colossae 1:10a; Titus 2:10.

12. Nso akpan item aban̄ade ọfọn̄ ye ukamaidem ke nnyịn ikụt ke 1 Timothy 2:9, 10?

¹² Ih, Jehovah enịm mme idaha kaban̄a ukamaidem nnyịn. Apostle Paul ama owụt ndusụk n̄kpọ oro Abasi oyomde ke afan̄ emi. “Nyom iban ẹsan̄a ke sụn̄-sụn̄ ido, ẹsịne n̄kpọ eke owụtde bụt ye eti ibuot: mmọ ẹkûbana idem ke edidọk idet, ye gold ye pearl ye ọsọn̄-urua edisịne-n̄kpọ, edi ẹda nti ubọk-utom ẹbana idem; koro oro odot ye iban emi ẹdọhọde ẹte imenyene uten̄e Abasi.”c Nso ke nnyịn ikpep ito mme ikọ emi?—1 Timothy 2:9, 10.

13. (a) Nso ke ‘ndisịne n̄kpọ eke owụtde bụt’ ọwọrọ? (b) Ntak emi ikemede ndidọhọ ke mme idaha Jehovah ẹwụt eti ibuot?

¹³ Mme ikọ Paul owụt nte ke mme Christian ẹkpenyene ‘ndisịne n̄kpọ eke owụtde bụt.’ Ukamaidem mmọ ikpetiehe mfụtmfụt mfuṭmfụt, mbumịn mbumịn, m̀mê nsuahade nsuahade. Kpukpru owo, idem mbon oro mînyeneke n̄kpọ ẹkeme ndisịm mme utọ idaha oro ẹwụtde eti ibuot mi ebe ke ndikụt nte ke edisịnen̄kpọ mmimọ asana, onyụn̄ eye. Ke uwụtn̄kpọ, kpukpru isua Mme Ntiense ke idụt kiet ke Edem Usụk America ẹsisan̄a ediwak kilomita ke akai ndien ekem ẹsan̄a ke ubom ke ediwak hour man ẹkedụk mbono district mmọ. Idịghe esen n̄kpọ owo ndiduọ ndụk akpa mmọn̄ m̀mê ọfọn̄ esie ndikọmọ ke n̄kpọ n̄waha nte enye anamde isan̄. Ntre ke ini mme andidụk mbono ẹsịmde ebiet oro ẹdinịmde mbono district, mmọ ke ndusụk udomo ẹsiwak nditie nsuahade nsuahade. Ke ntre mmọ ẹsida ini ndiyịri n̄kpaha ke ọfọn̄, ndisịn zip, ndiyet nnyụn̄ n̄kwọhọde mme ọfọn̄ oro mmọ ẹdisịnede ke mbono oro. Mmọ ẹda ikot oro ẹnọde mmọ ndidia udia ke okpokoro Jehovah ke ọsọn̄urua n̄kpọ, ndien mmọ ẹyom ndisịne n̄kpọ nte odotde.

14. (a) Nso ke ndisịne n̄kpọ eke “owụtde bụt ye eti ibuot” ọwọrọ? (b) Nnyịn ndisịne n̄kpọ ‘nte mbon oro ẹdọhọde ke imenyene uten̄e Abasi’ abuana nso?

¹⁴ Paul ama aka iso ndiwụt nte ke nnyịn ikpenyene ndisịne n̄kpọ eke “owụtde bụt ye eti ibuot.” Emi ọwọrọ ke ukamaidem nnyịn ikpetiehe n̄wụtidem n̄wụtidem, uwouwo uwouwo, ikpedemekede udọn̄ idan̄, ikposion̄oke owo ndido idem, m̀mê nditie n̄kon̄ine n̄kon̄ine. Ke adianade do, nnyịn ikpesịne n̄kpọ ke usụn̄ oro owụtde “uten̄e Abasi.” Nte emi inọhọ nnyịn n̄kpọ ndikere? Emi iwọrọke n̄kukụre ndisịne n̄kpọ nte odotde ke ini idụkde mme mbono esop ndien ekem isịne n̄kpọ nte imama ke mme ini eken. Kpukpru ini ukamaidem nnyịn ekpenyene ndiwụt edu uten̄e ye ukpono koro nnyịn idi mme Christian ye mme asan̄autom kpukpru ini. Ana in̄wan̄-in̄wan̄ nte ke ọfọn̄utom ye ọfọn̄ ufọkn̄wed nnyịn oyodot ye se nnyịn inamde. Nte ededi, nnyịn ikpenyene ndisịne n̄kpọ oro owụtde iso bụt onyụn̄ enyenede uku. Edieke usịnen̄kpọ nnyịn kpukpru ini owụtde mbuọtidem nnyịn ke Abasi, tutu amama nnyịn idimen̄eke ndinọ ikọ ntiense ido nneme ke ntak ikopde bụt iban̄a ukamaidem nnyịn.—1 Peter 3:15.

“Ẹkûma Ererimbot”

15, 16. (a) Ntak edide akpan n̄kpọ ete nnyịn ifep ndikpebe ererimbot ke mme n̄kpọ ẹban̄ade ọfọn̄ ye ukamaidem? (1 John 5:19) (b) Kaban̄a eti ntak ewe ke nnyịn ikpefep n̄kon̄ine ke ọfọn̄ ye ukamaidem?

¹⁵ Item oro ẹwetde ke 1 John 2:15, 16 ọnọ ndausụn̄ n̄ko ke ọfọn̄ ye ukamaidem oro nnyịn imekde. Nnyịn ikot ite: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt. Koro ofụri-ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot.”

¹⁶ Item oro edi ekemini didie ntem! Ke emana oro mfịghe ubọkn̄ka ọsọn̄de ubọk ntem, nnyịn ikpayakke ererimbot emek utọ ọfọn̄ oro nnyịn ikpesịnede. Usụn̄ usịne ọfọn̄ ye ukamaidem amabiara ke mme isua ndondo emi. Idem usụn̄ usịne n̄kpọ mme anam mbubehe ye mbon ikpọ ifiọk isiwakke ndinọ idaha oro ẹkemede ndiberi edem onyụn̄ odotde ye mme Christian. Emi edi ntak en̄wen oro nnyịn ikpodude ke ukpeme kpukpru ini nditre ‘ndibiet eyo emi’ edieke anade nnyịn idu uwem ekekem ye mme idaha Abasi ndien ke ntem ‘inamde ukpepn̄kpọ Abasi Andinyan̄a nnyịn enyene uku ke kpukpru usụn̄.’—Rome 12:2; Titus 2:10.

17. (a) Mme mbụme ewe ke ẹkpekere ẹban̄a ke ini ẹyomde ndidep ọfọn̄ m̀mê ndimek n̄kon̄ine? (b) Ntak emi mme ibuot ufọk ẹkpenyenede udọn̄ ke ukamaidem mbonubon?

¹⁷ Mbemiso ebierede ndidep ọfọn̄, owụt eti ibuot ndibụp idemfo: ‘Ntak usịnen̄kpọ emi ọdọn̄de mi? Ndi edi ata mbre oro ẹtịmde ẹdiọn̄ọ—owo oro ami mmade—esisịne utọ ọfọn̄ emi? Ndi enye edi usịnen̄kpọ mbon oro ẹbuanade ke n̄ka ntịme efak m̀mê eke n̄ka oro esịnde udọn̄ ọnọ edu nda-ke-idem ye nsọn̄ibuot?’ Nnyịn ikpenyene n̄ko nditịm nse ọfọn̄ oro. Edieke enye edide ewụra m̀mê isọn̄ọfọn̄, nso kaban̄a uniọn̄ esie? Ẹkịm enye didie? Ndi ọfọn̄ oro owụt iso o-bụt, odot, onyụn̄ enyene uku, mîdịghe nte enye edi ọfọn̄ oro ọbọpde owo akaha, edemerede udọn̄ idan̄, m̀mê etiede nsuahade nsuahade? Bụp idemfo, ‘Nte ami ndisịne ọfọn̄ emi ayanam owo atuak ukot ọduọ?’ (2 Corinth 6:3, 4) Ntak emi ekpebehede nnyịn? Koro Bible ọdọhọ ete: “Christ n̄ko ikenemke idem esịt.” (Rome 15:3) Ana mme ibuot ufọk Christian ẹwụk ntịn̄enyịn ke ukamaidem mbonubon. Ke ntak ukpono oro mmọ ẹnyenede ẹnọ ubọn̄ ubọn̄ Abasi oro mmọ ẹtuakde ibuot ẹnọ, mme ibuot ufọk ikpemen̄eke ndinọ enyene-iwụk, ima ima item ke ini ẹyomde.—James 3:13.

18. Nso inụk fi ndinen̄ede nnọ ntịn̄enyịn ke ọfọn̄ ye ukamaidem fo?

¹⁸ Etop oro nnyịn inọde oto Jehovah, emi edide ata uwụtn̄kpọ uku ye edisana idaha. (Isaiah 6:3) Bible esịn udọn̄ ọnọ nnyịn ndikpebe enye “nte ndima nditọ.” (Ephesus 5:1) Ọfọn̄ ye ukamaidem nnyịn ẹkeme ndinam ẹtịn̄ eti m̀mê idiọk ikọ ẹban̄a Ete nnyịn eke heaven. Ke akpanikọ nnyịn imoyom ndinam esịt esie adat!—Mme N̄ke 27:11.

19. Mme ufọn ewe ẹto edinam mbon en̄wen ẹfiọk “ata n̄kpọsọn̄ utom Abasi”?

¹⁹ Afo ekere didie aban̄a “ata n̄kpọsọn̄ utom Abasi” oro afo ekpepde? Ke akpanikọ, nso edidiọn̄ ke nnyịn inyene ntem ke ndikpep akpanikọ! Ke ntak nnyịn ibuọtde idem ke iyịp Jesus Christ oro ẹkeduọkde, ẹfen mme idiọkn̄kpọ nnyịn. (Utom 2:38) Nte utịp, nnyịn imenyene ifụre utịn̄ikọ ke iso Abasi. Nnyịn ifeheke ndịk n̄kpa nte mbon oro mînyeneke idotenyịn ẹfehede. Utu ke oro, nnyịn imenyene nsọn̄ọ Jesus emi nte ke usen kiet ‘kpukpru mme andidu ke udi ẹyekop Enye uyo ẹwọn̄ọ ẹdi.’ (John 5:28, 29) Jehovah ọfọn ido ke ndiyarade kpukpru n̄kpọ emi nnọ nnyịn. Ke adianade do, enye aman̄wan̄a spirit esie ọduọk nnyịn. Ke ntre, akpana esịtekọm oro inyenede iban̄a kpukpru nti enọ emi onụk nnyịn ndikpono mme n̄kokon̄ idaha esie ndinyụn̄ ntoro enye ye ifịk, itan̄ade “ata n̄kpọsọn̄ utom” emi inọ mbon en̄wen.

[Mme Ikọ idakisọn̄]

Didie ke Afo Ọkpọbọrọ?

• “Ata n̄kpọsọn̄ utom” ewe ke mme owo ẹkekop ẹban̄a ke Pentecost isua 33 E.N., ndien didie ke mmọ ẹkenam n̄kpọ?

• Didie ke owo akabade edi mbet Jesus Christ, ndien edidi mbet abuana nso?

• Ntak edide akpan n̄kpọ ndinọ ntịn̄enyịn ke ọfọn̄ ye ukamaidem nnyịn?

• Mme n̄kpọ ewe ke ẹkpekere ẹban̄a ke ini ẹbierede ọfọn̄ m̀mê n̄kon̄ine emi odotde?

[Ndise ke page 15]

Peter ama atan̄a nte ke ẹma ẹnam Jesus eset ke n̄kpa

[Mme ndise ke page 17]

Ndi ukamaidem fo etịn̄ eti ikọ aban̄a Abasi emi afo okponode?

[Mme ndise ke page 18]

Ana mme ete ye eka ẹdide Christian ẹwụk ntịn̄enyịn ke ukamaidem mbonubon