UKPEPN̄KPỌ 21
Nte Ẹnamde Mme Owo Ẹkop Eti Mbụk
Ibịghike ukara Abasi eyedisịm ofụri isọn̄, ndien kpukpru mfịna nnyịn oyokụre. Ọfọn yak kpukpru owo ẹkop n̄kpọ emi sia ata eti mbụk edi emi. Jesus okoyom mme mbet esie ẹnam kpukpru owo ẹkop eti mbụk emi! (Matthew 28:19, 20) Didie ke Mme Ntiense Jehovah ẹnam se Jesus okoyomde emi?
1. Didie ke ẹnam se idude ke Matthew 24:14 mfịn?
Jesus ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄.” (Matthew 24:14) Esinenem Mme Ntiense Jehovah ndinam oro. Usem emi ikwọrọde ikọ idahaemi ke ofụri ererimbot ebe usem 1,000! Utọ akamba utom emi enen̄ede oyom ini ye odudu ye edidianakiet. Edi idịghe odudu idem nnyịn ke ida inam utom emi—Jehovah an̄wam nnyịn.
2. Nso ke isinam man ikwọrọ ikọ inọ mme owo?
Imesika ebiet ekededi ikụtde mme owo ikọkwọrọ ikọ inọ mmọ. Imesisan̄a “ke ufọk ke ufọk” ikwọrọ ikọ ukem nte mme Christian eyo mme apostle. (Utom 5:42) Nte isinamde ikwọrọ ikọ inọ ata ediwak miliọn owo kpukpru isua edi oro. Edi sia ndusụk owo mîsiwakke ndidu ke ufọk, imesika ikọkwọrọ ikọ n̄ko ke itie mme owo ẹsiwakde. Imesinyụn̄ ida ufan̄ ekededi emi ikụtde inam mme owo ẹdiọn̄ọ ẹban̄a Jehovah ye se enye aduakde ndinam.
3. Edi utom mmanie ndikwọrọ mban̄a nti n̄kpọ emi Abasi edinamde?
Edi utom mme ata Christian ndikwọrọ mban̄a nti n̄kpọ emi Abasi edinamde. Nnyịn idaha utom oro ibre mbre. Imesisịn idem ikwọrọ ikọ nte ikekeme sia imọdiọn̄ọ ke oro ekeme ndinyan̄a owo. (Kot 1 Timothy 4:16.) Isinam utom emi ke mfọn sia Ikọ Abasi ọdọhọ ete: “Mbufo ẹkebọ ke mfọn, ẹnọ ke mfọn.” (Matthew 10:7, 8) Idịghe kpukpru owo ẹsima ndikop ukwọrọikọ nnyịn, edi kpa ye oro nnyịn isụk ikaka iso ikwọrọ ikọ sia utom ukwọrọikọ emi enem Jehovah onyụn̄ owụt ke ikpono enye.
SỊN IDEM KPEP
Se mme n̄kpọ en̄wen emi Mme Ntiense Jehovah ẹnamde man ẹkwọrọ ikọ ke ofụri ererimbot, ye nte Jehovah an̄wamde nnyịn.
Ke ẹkwọrọ ikọ ke ofụri ererimbot: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Imesinam se ikekeme man ikwọrọ ikọ inọ mme owo
Mme Ntiense Jehovah ẹsinam se ẹkekeme man ẹkwọrọ ikọ ẹnọ mme owo ke kpukpru ebiet. Se VIDIO emi, ekem ẹbọrọ mbụme emi ẹnyụn̄ ẹneme ẹban̄a enye.
Ke ofụri se Mme Ntiense Jehovah ẹnamde man ẹnen̄ede ẹkwọrọ ikọ, ewe ye ewe ke afo ama akan?
Kot Matthew 22:39 ye Rome 10:13-15, ekem ẹbọrọ mbụme emi ẹnyụn̄ ẹneme ẹban̄a mmọ:
Didie ke ukwọrọikọ nnyịn owụt ke imama mme mbọhọidụn̄ nnyịn?
Jehovah ada didie mbon oro ẹnamde mme owo ẹdiọn̄ọ nti n̄kpọ oro enye aduakde ndinam?—Se ufan̄ikọ 15.
5. Nnyịn inam utom ye Abasi
N̄kpọ emi owụtde ke Jehovah Abasi ke an̄wam nnyịn ke utom ukwọrọikọ emi idịghe kiet, idịghe iba. Ke uwụtn̄kpọ, uwemeyo usen kiet ke New Zealand, brọda nnyịn kiet—brọda oro esikere Paul—ama okokụt mma kiet ini enye osụk asan̄ade ke ufọk ke ufọk ọkwọrọ ikọ. Usenubọk oro ke mma oro ọkọbọn̄ akam okot enyịn̄ Abasi, Jehovah, onyụn̄ eben̄e enye ete ọnọ owo edin̄wam imọ idiọn̄ọ enye. Ndien hour ita kpọt ke enye ama ọkọbọn̄ akam oro, Paul ama aka ufọk esie.
Kot 1 Corinth 3:9, ekem ẹbọrọ mbụme emi ẹnyụn̄ ẹneme ẹban̄a enye:
Didie ke se isitịbede, utọ nte eke New Zealand oro, owụt ke Jehovah ke an̄wam nnyịn ke utom emi?
Kot Utom 1:8, ekem ẹbọrọ mbụme emi ẹnyụn̄ ẹneme ẹban̄a enye:
Ntak emi iyomde Jehovah an̄wam nnyịn ke utom ukwọrọikọ emi?
Ndi ọmọdiọn̄ọ?
Kpukpru urua ke mbono esop nnyịn, ẹsinam ẹwụt nte ikpọkwọrọde ikọ. Ekpedi omodụk mboho ikọ Abasi nnyịn emi akpa, okụt didie mme n̄kpọ ẹsinamde do?
6. Ikwọrọ ikọ sia Abasi ọdọhọ ikwọrọ
Ke eyo mme apostle, mme asua ẹma ẹsidomo ndinam mbet Jesus ẹtre ukwọrọikọ. Edi mme Christian ini oro ẹma ẹsida ibet ukara ẹwụt ke imenyene unen ndikwọrọ ikọ. (Philippi 1:7) Mme Ntiense Jehovah ẹsinyụn̄ ẹnam ntre.a
Kot Utom 5:27-42, ekem ẹbọrọ mbụme emi ẹnyụn̄ ẹneme ẹban̄a enye:
Ntak emi nnyịn mîsitreke ndikwọrọ ikọ?—Se ufan̄ikọ 29, 38, ye 39.
NDUSỤK OWO ẸKEME NDIBỤP: “Nso isinam Mme Ntiense Jehovah ẹsisan̄a ke ufọk ke ufọk ẹkwọrọ ikọ?”
Nso ke ọkpọbọrọ utọ owo oro?
SE IKPEPDE
Jesus ọkọdọhọ mbet esie ẹkwọrọ ikọ ke ofụri ererimbot. Jehovah ke an̄wam ikọt esie ẹnam utom oro.
Se M̀mê Emeti
Nso ye nso ke isinam man ikwọrọ eti mbụk ke ofụri ererimbot?
Didie ke ukwọrọikọ nnyịn owụt ke imama mme mbọhọidụn̄ nnyịn?
Ndi emekere ke utom ukwọrọikọ esinam owo okop inemesịt? Nso inam ọdọhọ ntre?
KPEP N̄KPỌ EN̄WEN
Se nte Mme Ntiense Jehovah ẹkwọrọde ikọ ẹnọ mme owo ke ikpọ obio.
Nso ke Mme Ntiense Jehovah ẹnam man ẹn̄wam mbon itọk ekọn̄?
Kop nte esinemde owo, owo ama ada ofụri uwem esie anam utom Abasi
Se se esop ẹkebierede emi anamde emem utom ndikwọrọ eti mbụk.
“Mme Ọkwọrọ Obio Ubọn̄ Ẹda Ikọ Mmọ Ẹka Esop” (Obio Ubọn̄ Abasi Akara!, ibuot 13)
a Abasi ọdọhọ ikwọrọ iko. Ntre ufọn idụhe Mme Ntiense Jehovah ndikọbọ odudu nto owo m̀mê ukara ndomokiet mbemiso ẹkwọrọde ikọ.