Ọyọhọ Otu 127 Ẹkụre Ukpep Ke Gilead
Ẹnọ Mme Isụn̄utom Ẹka “Tutu Esịm ke Ata Utịt Ikpehe Isọn̄”
JESUS okowụk mme mbet esie ete ẹdi ntiense imọ “tutu esịm ke ata utịt ikpehe isọn̄.” (Utom 1:8) Mme Ntiense Jehovah ẹda ewụhọ emi ke ata akpan n̄kpọ.
Ke nditịm ntịn̄, ke isua 65 emi ẹbede, mme isụn̄utom emi ẹnọde ukpep ke Ufọkn̄wed Enyọn̄-Ukpeme Ukpep Bible Eke Gilead ẹmen̄wam ẹda usụn̄ ke utom ukwọrọikọ emi ke se ibede idụt 200. Ke Saturday, September 12, 2009, mme asan̄autom 56 en̄wen emi ẹnyenede mbufiọk ẹma ẹkụre ukpep emi ẹkebọde ke ọfiọn̄ ition ke ufọkn̄wed isụn̄utom emi odude ke Patterson ke New York, U.S.A.
Odudu Oro Ekikere Enyenede
Stephen Lett, owo Otu Ukara Mme Ntiense Jehovah, emi okonyụn̄ edide etieibuot okpokoro edinam oro, eketịn̄ ikọ ọnọ otu oro ke ibuotikọ emi “Ẹkere N̄kpọ Ọniọn̄ Ọniọn̄.” Enye ama ebem iso odụri mme andikụre ukpep oro utọn̄ aban̄a n̄kpọ inan̄ oro mmọ mîkpekereke. N̄kpọ ita oro enye ekebemde iso asiak ẹkedi: (1) Kûkere ke inyene ekeme ndikpeme owo ke nsinsi; (2) kûkere oburobụt n̄kpọ; ye (3) kûtịmede esịt ukaha ukere nte n̄kpọn̄ edidiọkde. (Mme N̄ke 18:11; Matthew 5:28; 6:34) Etịn̄ikọ ọkọdọhọ ntem ke ini ekenemede ọyọhọ usụn̄ ita oro, ete ke owo emi esitịmerede esịt akaha esimen editịmede esịt n̄kpọn̄ emi ekebede adian ye eke mfịn onyụn̄ ebe ekemen eke n̄kpọn̄ emi edisierede osụk edidian ye eke mfịn ekere. Brọda Lett ọkọdọhọ ete: “Ata ndodobi mbiomo edi oro.” Nso ndien idi ọyọhọ usụn̄ inan̄? Ẹma ẹnọ otu nditọ ufọkn̄wed oro item ẹte mmọ ẹkûkere ke n̄kpọ ama ọfọn mmimọ akan ke ini oro mmimọ mîkọtọn̄ọke utom isụn̄utom. Ndinam ntre idiyakke mmọ ẹkop idatesịt ke mbufa ebiet oro mmọ ẹdikade.
Ekem, Brọda Lett ama esịn udọn̄ ọnọ mmọ ete ẹkere nti n̄kpọ inan̄ emi. Enye ọkọdọhọ ete: (1) Fiọk mme n̄kpọ emi ẹkemede ndibiat itie ufan fo ye Abasi m̀mê nsọn̄idem fo, nyụn̄ fep utọ afanikọn̄ oro; (2) da enyịn ikike kụt mme n̄kpọ oro okotde ke Bible nyụn̄ nam nte ke afo do ke ebiet oro n̄kpọ oro eketịbede; (3) kere ke kpukpru owo emi afo ọkwọrọde ikọ ọnọ ke obufa efakutom fo ẹdidi mme andituak ibuot nnọ Jehovah; ye (4) domo ndinịm idemfo ke itie mbon oro afo ọkwọrọde ikọ ọnọ man enyene esịtmbọm.—Mme N̄ke 22:3.
Ufọn Edinọ Mbon En̄wen Ukpep
David Splane, emi edide owo Otu Ukara, ọkọnọ utịn̄ikọ emi ibuotikọ edide ‘Yak Mme Ikọ Emi Sịn ke Ubọk Mbon Akpanikọ,’ emi ẹdade ẹto 2 Timothy 2:2. Ke ini apostle Paul eketemede Timothy ete ọnọ mbon akpanikọ ukpep, enye okoyom Timothy ekpep mme owo emi akpanikọ onyụn̄ esịn udọn̄ ọnọ mmọ ẹnọ mbon en̄wen ukpep. Etịn̄ikọ ama ọdọhọ otu oro ke ẹnen̄ede ẹyom irenowo man ẹda usụn̄ ke mme edinam esop Mme Ntiense Jehovah. Ini ewe ke ẹdinọ irenowo emi ukpep, ndien didie ke ẹdinam emi? Brọda Splane ama esịn udọn̄ ọnọ otu nditọ ufọkn̄wed oro ete ẹtọn̄ọ ndinọ irenowo emi ukpep tọn̄ọ ke akpa ini emi mme isụn̄utom emi ẹtọn̄ọde ndikpep Bible ye mmọ.
Nso idi ata akpan usụn̄ emi mme isụn̄utom ẹkemede ndinọ nditọ ukpepn̄kpọ Bible ukpep man mmọ ẹnịm eti uwụtn̄kpọ ẹnọ mbon en̄wen? Etịn̄ikọ ama asiak ediwak usụn̄. Mme isụn̄utom ẹnyene ndikpep mmọ ẹnen̄ede ẹtịm idem ẹnọ ukpepn̄kpọ Bible mmọ. Ekem, ke ini nditọ ukpepn̄kpọ emi ẹtọn̄ọde ndidụk mbono esop, ẹnyene ndikpep mmọ nte mmọ ẹkpesikpepde mme n̄wed ukpep Bible oro ẹdikpepde ke mme mbono esop mbemiso ẹdide mbono esop. Etịn̄ikọ ama asian mmọ ete: “Edieke owo mîkemeke ndikpep Bible ke idemesie, tutu amama enye idikemeke ndikpep mbon en̄wen.” Brọda Splane ama onyụn̄ ọdọhọ ete ke mme isụn̄utom ẹkeme ndin̄wam mbufa owo ẹsika n̄kpọ ke ini, ẹtiene ẹtịp okụk ẹda ẹnam utom ukwọrọikọ, ẹnyụn̄ ẹsụk ibuot ẹnọ mbon oro ẹdade usụn̄ idahaemi. Enye ọkọdọhọ ke ndinịm eti uwụtn̄kpọ edi mfọnn̄kan usụn̄ ndikpep mmọ mme n̄kpọ emi.
Ndidi Ntiense Edi Akwa Ifet
Guy Pierce, emi onyụn̄ edide owo Otu Ukara, ọkọnọ utịn̄ikọ ke ibuotikọ emi ẹkedade ẹto ikọ Jesus emi odude ke Utom 1:8, “Mbufo Ẹyedi Mme Ntiense Mi.” Enye ama eti otu nditọ ufọkn̄wed oro ke idụt Israel ẹma ẹtaba ifet emi mmọ ẹkpekenyenede ndidi mme ntiense Jehovah ke eyo mme apostle. Ẹma ẹbọ mmọ ifet oro ẹyak ẹnọ idụt oro okon̄wụmde mfri Obio Ubọn̄. (Matthew 21:43) Esop mme Christian oro ẹyetde aran ekedi idụt oro. Etịn̄ikọ ama okot oto ikọ apostle Peter emi ọkọdọhọde ke “edisana idụt” emi edide mme Christian oro ẹyetde aran ‘ẹyetan̄a’ nti ido Jehovah. (1 Peter 2:6-9) Ntre, Jesus ikọdọhọke ke mme Christian ẹdidi ntiense imọ kpọt idịghe aba ntiense Jehovah. Idem n̄kpọ, n̄kọ ẹkot Jesus “Anam-Akpanikọ Ntiense.” (Ediyarade 1:5; 3:14) Enye edi akakan Ntiense Jehovah onyụn̄ edi uwụtn̄kpọ nnyịn.—1 Peter 2:21.
Etịn̄ikọ ama ọdọhọ otu nditọ ufọkn̄wed oro ete ke ikọ Jesus oro odude ke Utom 1:8 enen̄ede enyene se ọwọrọde mfịn. Ntak-a? Akpan ntịn̄nnịm ikọ oro odude ke Ediyarade 11:15 omosu! Obio Ubọn̄ Messiah Abasi ọtọn̄ọ ndikara. Idahaemi, ẹkwọrọ ikọ “tutu esịm ke ata utịt ikpehe isọn̄” ke ata ata usụn̄. (Utom 1:8) Brọda Pierce ama ọsọn̄ọ etịn̄ ke mme isụn̄utom ẹsikwọrọ ẹban̄a Jehovah ye Obio Ubọn̄ esie, ikwọrọke iban̄a idemmọ m̀mê akani usụn̄ uwem mmọ, ido obio mmọ, ye idụt mmọ. Enye ama esịn udọn̄ ọnọ otu nditọ ufọkn̄wed oro ete ẹkpep “adan̄a ediwak owo nte ẹkekeme ke ini emi osụhọde mi.”
Mme N̄kpọ En̄wen Oro Ẹkenemede ke Edinam Oro
Alex Reinmueller, emi esin̄wamde Kọmiti Usio N̄wed, ama ọnọ utịn̄ikọ ke ibuotikọ emi, “Jehovah Ọyọnọ Fi Uko.” Enye ama ọdọhọ ke edieke mme isụn̄utom ẹben̄ede Jehovah an̄wam mmimọ, ke Jehovah ayan̄wam mmọ ẹfiọk se mmọ ẹkemede ndinam ye se mmọ mîkemeke ndinam, ẹkan ndịk, ẹnyụn̄ ẹda ofụri ukeme mmọ ẹnam n̄kpọ Abasi.
Sam Roberson ye William Samuelson, emi ẹdide mme andikpep ke Itieutom Emi Esede Aban̄a Mme Ufọkn̄wed Ukara Abasi ẹma ẹtiene ẹnọ utịn̄ikọ. Brọda Roberson ọkọnọ utịn̄ikọ ke ibuotikọ emi, ‘Ami Ndodu ye Afo,’ emi ẹdade ẹto Isaiah 41:10. Enye ama ọdọhọ ke ediwak n̄kpọ ẹyenọ mme isụn̄utom oro idatesịt. Ke mmọ ẹyenyụn̄ ẹnyene mfịna n̄ko. Ke mmọ ẹyekeme ndiyọ mme n̄kpọ emi edieke mmọ ẹkpebede Edidem David, emi akatuade ọnọ edima Ete esie ke akam. (Psalm 34:4, 6, 17, 19) Utịn̄ikọ emi Brọda Samuelson ọkọnọde ama owụt ke oyom mmọ ẹka iso ẹkere n̄kpọ ọfọn. Mme isụn̄utom oro ẹdinamde emi ẹyekeme ndimụm idem n̄kama ke ini owo etịn̄de ikọ oro mmọ mîmaha inyụn̄ isọpke iyatesịt.—Mme N̄ke 2:10, 11.
Jim Mantz, emi esin̄wamde Kọmiti Uwetn̄wed, ama anam ndụn̄ọde ye andibuana ke Kọmiti N̄kọk Itieutom emi otode Republic of Georgia, ye en̄wen emi otode Honduras, ye andibuana ke Kọmiti Idụt emi otode Republic of Tajikistan. Nditọete oro ẹnyenede mbufiọk mi ẹma ẹteme mme isụn̄utom oro nte mmọ ẹkpenamde ufan ye mbon oro ẹkpebiọn̄ọde mmọ ke ‘ndida nti n̄kpọ n̄kan idiọk ubọk.’ (Rome 12:21) Mark Noumair, emi eketienede ekpep nditọ ufọkn̄wed oro n̄kpọ, ama enyene inem inem nneme aban̄a ifiọkutom oro nditọ ufọkn̄wed oro ẹkenyenede ke an̄wautom ke ini oro mmọ ẹkebọde ukpep ke Ufọkn̄wed Gilead. Ibuotikọ nneme oro ekedi, “Mmenyịme, Nnam Nso Man N̄n̄wam?”
Etieibuot okpokoro ama ada edinam oro ekeberi ke ndikot ikọ obufa ikwọ emi, “See Yourself When All Is New.” Owo 6,509 oro ẹkedụkde edinam oro ẹma ẹnyọn̄ọ ye ọyọhọ ubiere ndinen̄ede ntie ntiense mban̄a Jehovah ye Eyen esie “tutu esịm ke ata utịt ikpehe isọn̄.”
[Chart/Ndise obio ke page 31]
IDAHA OTU
idụt oro ẹtode 8
nditọ ufọkn̄wed 56
ebe ye n̄wan 28
isua emana ke ẹbaharede ukem ukem 33.6
isua ifan̄ tọn̄ọ ẹkena baptism ke ẹbaharede ukem ukem 18.3
isua oro ẹdude ke utom uyọhọ ini ke ẹbaharede ukem ukem 13.6
[Ndise Obio]
(Ama oyom ndikụt nte enye enen̄erede etie, se idem n̄wed)
Ẹnọ otu oro ẹka idụt 22 oro ẹdude ke idak emi
IDỤT ORO ẸNỌDE MME ISỤN̄UTOM ẸKA
JAMAICA
NICARAGUA
COSTA RICA
PANAMA
PERU
CHILE
HAITI
CURAÇAO
GUYANA
CÔTE D’IVOIRE
BOLIVIA
PARAGUAY
SERBIA
ALBANIA
CONGO, DEM. REP.
MOLDOVA
UGANDA
BURUNDI
TANZANIA
MOZAMBIQUE
NEPAL
CAMBODIA
[Ndise ke page 31]
Ọyọhọ Otu 127 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible Eke Gilead
Ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.
(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.
(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.
(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.
(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.
(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.
(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.
(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.