Ni Ndiyom Abasi
NDISE oro odude ke page emi edi eke Acropolis mbon Athens, emi inikiet ekedide iwụk ebiet utuakibuot ediwak abasi ye mme abasi-an̄wan. Ke isọn̄ isọn̄ Acropolis edi Areopagus, emi ẹdọhọde ke ekedi ebiet emi esopikpe okodude ke eyo eset. Ekedi ke ebiet emi, ke se ikperede ndisịm isua 2,000 ẹmi ẹkebede, ke apostle Paul akadaha ada onyụn̄ ọnọ utịn̄ikọ emi edide ata n̄wọrọnda. Se itienede mi edi ndusụk se enye eketịn̄de:
“[Abasi] anam kpukpru mme idụt ẹto ke ekpụk kiet ẹwọrọ ẹdidụn̄ ke ofụri iso isọn̄: onyụn̄ edi Enye onịm iduọk ini uwem mmọ ye adan̄a ebietidụn̄ mmọ; kpan̄ mmọ ẹyom Abasi, ẹte ndusụk ifiọn̄ọ ubọk in̄wana ndisịm Enye, nnyụn̄ n̄kụt Enye; okposụkedi nte Enye mîyomke usụn̄ ye baba nnyịn owo kiet. Koro nnyịn idodu ke Enye, inyụn̄ isan̄a ke Enye, inyụn̄ inyene uwem nnyịn ke Enye.”—Utom 17:26-28.
Mbụk ekpedi isio didie ntem edieke ubonowo ke ofụri ofụri akpadade mme ikọ Paul ẹmi ke akpan n̄kpọ! Ẹkpekpan ediwak ekọn̄, ekese ndutụhọ, didie ntem edieke mme owo ẹkpediọn̄ọde ọsọ udọn̄ mmọ nte nditọ owo kiet emi Ọbọn̄ Andikara, kpa Jehovah okobotde.
Mfịn, ufre-idụt, ubahade ke n̄kaowo, usua ekpụk, ye ukwan̄ikpe ke n̄kaowo amabahade ubonowo. Edi, mme ikọ Paul ẹsụk ẹnyenyene ufọn. Kpukpru nnyịn idi mme andito ubon owo kiet oro Abasi okobotde. Kpukpru nnyịn, ke usụn̄ifiọk oro, idi nditọeka iren ye iban. Ndien ini isụk ibehe ikaha ndiyom Abasi ke adan̄aemi ẹkemede ndikụt enye.
Mme ikọ Paul ẹtịm ẹdi akpan n̄kpọ ẹkan ke ini nnyịn ikerede iban̄a mme akpatre ikọ eke nneme esie. Enye ọkọdọhọ ete: “[Abasi] omonịm usen eke Enye edikpede ikpe ọnọ ererimbot ke edinen ido, ke ubọk Owo emi Enye ekemekde; Enye onyụn̄ ada edinam emi Enye anamde Owo oro eset ke n̄kpa ayarade owụt kpukpru owo ete edidi ntem.”
Ediset ke n̄kpa Jesus edi mbụk akpanikọ, ndien nte Paul owụtde, enye edi ubiọn̄ nte ke usen ikpe eyedu ọnọ ubonowo. Ini ewe? Ọfọn, nnyịn imọfiọk ite ke ada n̄kpọ nte se ikperede ndisịm isua 2,000 ekpere akan ini emi Paul akadahade ada ke Areopagus onyụn̄ etịn̄ mme ikọ ẹmi. Ke akpanikọ, edisu oro prọfesi Bible osude omowụt ete ke enye otịm ekpere. Nso akpan n̄kpọ ndikere mban̄a! Edi usọp usọp n̄kpọ adan̄a didie ntem ete nnyịn iyom Abasi ke ofụri esịt, sia, nte Paul akasiande mbon Athens, “kemi Enye owụk kpukpru owo ke kpukpru ebiet, ete mmọ ẹkabade esịt”!—Utom 17:30, 31.