‘Sịn Idem Ifịk Ifịk’ ke Utom Ukwọrọikọ Fo
1 Ke ini nnyịn ikotde ite ke apostle Paul akanam utom ubọp ufọk-ọfọn̄ ke ini okodude ke Corinth, nnyịn imekeme ndibiere nte ke emi ama osụhọde ifet esie ndikwọrọ ikọ. Nte ededi, Utom 18:5 ọdọhọ ete: “Ukwọrọikọ Abasi efịk Paul, enye onyụn̄ etịm asian mme Jew ete Jesus edi Christ.” (Sịghisịghi ubọkn̄wed edi eke nnyịn.) Ntak emi Paul ekesịnde ifịk ntre ke utom ukwọrọikọ? Idem okposụkedi ediwak owo ke Corinth ẹma ẹkekakabade ẹdi mme andinịm ke akpanikọ, Ọbọn̄ ama ọsọn̄ọ ete ke ediwak owo efen efen ẹkesụk ẹdodu emi ẹdinamde ẹdi mbet ke obio oro. (Utom 18:8-11) Nte nnyịn imenyene ukem ntak oro ndisịn ifịk ke utom ukwọrọikọ nnyịn? Ih. Ẹkeme ndikụt mme owo efen efen ẹnyụn̄ ẹkpep mmọ akpanikọ.
2 Da Ini Efen Efen Nam Utom ke April: Eyedi utịtmbuba fo edi ndika iso nyọhọ ye utom edikwọrọ eti mbụk kpukpru ọfiọn̄. Edi ndusụk ọfiọn̄ akpan akpan ẹsinọ nnyịn ifet ‘ndisịn ifịk’ ke utom emi. Mmọ emi ẹsịne ọfiọn̄ April, ke ini Editi. Nte idaha fo ayak fi anam utom usiakusụn̄ unọ un̄wam m̀mê ndisịn n̄kaiso ukeme ke utom ukwọrọikọ ke ini emi? Ediwak asuanetop oro ẹnamde ntre ẹbọ uwak edidiọn̄. (2 Cor. 9:6) Edieke anamde ofụri se ekemede, ti ete ke Jehovah enem esịt ke utom ofụri ukpọn̄ fo. (Luke 21:2-4) Se ededi emi idaha fo edide, nam edi utịtmbuba fo ‘ndisịn idem ifịk ifịk’ ke utom ukwọrọikọ fo ke April. Ndien kûfre ndinọ ibatutom an̄wautom fo ke utịtọfiọn̄ emi man ẹbat ukeme fo ẹdian ye eke ikọt Jehovah eken.
3 Ka Kese Mbufa Owo Emi Ẹkedụkde Editi: Isua oko ke Nigeria, mme andidụk Editi ẹkedi 575,530. Owo ifiọkke kan̄a ofụri ibat mme andidụk eke isua emi. Edi, ntọt owụt nte ke utịbe utịbe idotenyịn odu ọnọ “idọk” oro okponde akan. (Matt. 9:37, 38) Ke ntre, nam ndutịm usọp usọp nte ekekeme ndika n̄kese mbon oro ẹnyenede udọn̄ emi ẹkedụkde Editi man an̄wam mmọ ke n̄kan̄ eke spirit. Ndisịk utọ edika n̄kese oro nnịm ekeme ndiyak ‘andidiọk atan̄ ikọ Obio Ubọn̄ oro ẹkesuande ke esịt mmọ.’ (Matt. 13:19) Usọp usọp edika n̄kese oyowụt nte ke afo ke akpanikọ ‘emesịn ifịk’ ke utom ukwọrọikọ fo.
4 Ka Iso Ndin̄wam Mbon Emi Mînamke Utom Aba: Ke February ẹma ẹsịn akpan ukeme nditọn̄ọ ndin̄wam mbon emi mînamke utom aba. Edieke odude mbon emi owo mîkanamke utom ubọk erọn̄ inọ mmọ kan̄a, mbiowo ẹkpenyene ndinam ndutịm ndika n̄kese mmọ mbemiso April okụrede. Mbiowo ẹyedomo ndidiọn̄ọ akpan ntak mfịna mmọ ye nte ẹkpenọde mmọ mfọnn̄kan un̄wam ndifiak nnam n̄kpọ Jehovah ifịk ifịk. Ima ima un̄wam emi owụt nte ke mbiowo ẹda mbiomo mmọ nte mme ekpeme “udịm-erọn̄ Abasi” ke akpan n̄kpọ. (1 Pet. 5:2; Utom 20:28) Nsiondi Enyọn̄-Ukpeme eke September 15, 1993, page 22-23, ọnọ ata nti ekikere emi mbiowo ẹkemede ndida nnam n̄kpọ ke ini ẹsede ẹban̄a ekededi ke otu ata mfịna ition emi ẹkemede ndifịna mbon emi mînamke utom aba. Nte ido edide, ẹkeme ndinam ndusụk ẹfiak ẹnam utom an̄wautom ke April.
5 N̄wam Ediwak Owo Efen Ẹkabade Ẹdi Mme Asuanetop Oro Mînaha Baptism: Nte nditọ fo ẹdot ndidi mbufa asuanetop eti mbụk? Nso kaban̄a mbon efen oro afo ekpepde Bible? Edieke mbiowo ẹnyịmede utọ mbon emi, nte April ikpedịghe utịbe ini inọ mmọ nditọn̄ọ ukwọrọikọ? Edieke owo anamde n̄kọri ke ama ekekpep ediye uduot ekpri n̄wed Oyom ye n̄wed Ifiọk, ẹkeme ndika iso nnịm ukpepn̄kpọ Bible ke udiana n̄wed—edide n̄wed Ata Emem m̀mê n̄wed Ndidiana Kiet ke Utuakibuot. Utịtmbuba fo edi ndin̄wam eyen ukpepn̄kpọ enyene ifiọk oro enen̄erede okpon aban̄a akpanikọ, odot nte asuanetop oro mînaha baptism, onyụn̄ akabade edi Ntiense Jehovah emi ayakde idem ọnọ onyụn̄ anade baptism.—Eph. 3:17-19; 1 Tim. 1:12; 1 Pet. 3:21.
6 Afo ndinyene iwụk nnyụn̄ n̄wụt ata udọn̄ ke idem nditọ ukpepn̄kpọ Bible fo ekeme ndin̄wam mmọ nte ini akade ndinam akpanikọ edi eke mmọ. Ntiense kiet ama osobo ebe ye n̄wan emi ẹma ẹkesọn̄ ke emana emi ke idatesịt ẹkenyịmede ukpepn̄kpọ Bible. Edi ebe ye n̄wan emi ikekpepke n̄kpọ ke urua ita ke adiana ke adiana. Ke akpatre ẹma ẹtọn̄ọ ukpepn̄kpọ oro. Ekem, ama ekpere ndidi ke urua kiet ebede, urua efen ebe ye n̄wan emi ẹyesịk ukpepn̄kpọ emi ẹnịm. Nte ededi, ke akpatre n̄wan ama ọkọri esịm idaha edina baptism. Eyenete oro eti ete: “Ke enye ama akana baptism, mmọn̄eyet idatesịt ama asiaha enye ke enyịn, emi akanamde mmọn̄eyet idatesịt asiaha mi ye n̄wan mi ke enyịn.” Ih, ‘ndisịn idem ifịk ifịk’ ke eti mbụk ada akwa idatesịt edi!
7 Ntịn̄nnịm ikọ Bible ye mme n̄kpọntịbe ererimbot ẹwụt nte ke nnyịn idu uwem ke ata utịt ini. Idahaemi edi ini emi oyomde kpukpru ikọt Abasi ‘ẹsịn idem ifịk ifịk’ ndinam mbon efen ẹdiọn̄ọ eti mbụk. Apostle Paul ọnọ nsọn̄ọ ete ke utọ utom emi ke akpanikọ “idiwọrọke idi ikpîkpu ke Ọbọn̄.”—1 Cor. 15:58.