6. Nọ uwụtn̄kpọ ke nte Jesus eketịn̄de mme ikọ oro ẹkedide mmemmem edi oro ẹkenen̄erede ẹnyene se ẹwọrọde.

⁶ Jesus ama esiwak ndida mbio mbio ikọ oro ẹken̄wan̄ade owo ntịn̄ ikọ oro ẹkedide mmemmem edi oro ẹkenen̄erede ẹnyene se ẹwọrọde. Ke eyo oro n̄wed oro ẹmịn̄de-mịn̄ mîkodụhe ndin̄wam nditọ ufọkn̄wed nditi se ẹkekpepde mmọ, emi ekedi usụn̄ oro Jesus akadade ndisịn etop esie ke ekikere ye esịt mme andikpan̄ utọn̄ nnọ enye ke usụn̄ oro mmọ mîdisọpke ifre. Tịm fiọk ndusụk uwụtn̄kpọ: “Baba owo kiet ikemeke ndisan̄a utom mme ete iba: . . . mbufo ikemeke ndisan̄a utom Abasi ye eke mammon.” “Ẹkûsion̄o owo ndo, mbak ẹdision̄o mbufo ndo.” “Mbufo ẹdida mfri mmọ ẹfiọk mmọ.” “Mmọ emi ẹnyenede nsọn̄idem iyomke abia-ibọk, edi mmọ emi ẹdọn̄ọde ẹyom.” “Kpukpru owo eke ẹmende ofụt ẹyekpan̄a ke ofụt.” “Ẹnọ Caesar se inyenede Caesar, ẹnyụn̄ ẹnọ Abasi se inyenede Abasi.” “Ọfọn ndinọ akan ndibọ.”c (Matthew 6:24; 7:1, 20; 9:12; 26:52; Mark 12:17; Utom 20:35) Tutu esịm mfịn emi, se ikperede ndisịm isua 2,000 ke Jesus ama eketịn̄ mme ikọ oro, ẹsisọp nditi mme utọ okopodudu ikọ emi.