Spirit Jehovah Ada Ikọt Esie Usụn̄
“Spirit fo ọmọfọn, yak enye ada mi aka ke isọn̄ edinen ido.”—PSALM 143:10.
1, 2. Nso ikeme ndida mfụhọ nsọk mme anam-akpanikọ asan̄autom Jehovah?
‘AMI mmokop mfụhọ ata etieti! M̀mọ̀n̄ ke n̄keme ndikụt ndusụk ndọn̄esịt? Ndi Abasi ọmọkpọn̄ mi?’ Ndi akanam etie fi ke idem ntre? Ke edide ntre, idịghe ye afo ikpọn̄. Okposụkedi mme anam-akpanikọ asan̄autom Jehovah ẹdude ke eti paradise eke spirit, mmọ ndusụk ini ẹsisobo mme mfịna oro ẹkamade mfụhọ, mme mfịna, ye mme idomo oro ẹdide ọsọ n̄kpọ ọnọ ubonowo.—1 Corinth 10:13.
2 Eyedi mfịna eke ebịghide ke anyanini ọnọmọ fi mîdịghe n̄kpọ emi adade akwa mfụhọ etiene fi. Ekeme ndidi afo ofụhọ aban̄a n̄kpa owo ima onyụn̄ enen̄ede okop ndobo. Mîdịghe esịt ekeme nditịmede fi mban̄a edima ufan fo emi ọdọn̄ọde. Mme utọ idaha ntre ẹkeme ndibọ fi idatesịt ye emem onyụn̄ akam ekeme ndisịn mbuọtidem fo ke itiendịk. Nso ke afo akpanam?
Ben̄e Abasi Spirit Esie
3. Edieke edide odu n̄kpọ emi ọbọde fi mme utọ edu nte emem ye idatesịt, nso ikpowụt ọniọn̄ ndinam?
3 Edieke edide odu n̄kpọ emi ọbọde fi emem, idatesịt, m̀mê ndusụk edu Abasi eken, ọkpọfọn ndibọn̄ akam mben̄e edisana spirit, m̀mê anamutom odudu Abasi. Ntak-a? Koro spirit Jehovah osion̄o nti mfri oro an̄wamde Christian ndisak iso nse n̄kpọsọn̄ idaha, mme mfịna, ye mme idomo. Ke ama okodụri owo utọn̄ ọbiọn̄ọ “ubọkutom obụkidem,” apostle Paul ama ewet ete: “Edi mbun̄wụm spirit edi ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem; baba ibet kiet ibiọn̄ọke orụk edu emi.”—Galatia 5:19-23.
4. Ke ini owo osobode ndusụk mfịna m̀mê idomo, ntak emi okpodotde owo ndisio akpan n̄kpọ n̄wụt ke akam esie?
4 Ke ntak orụk mfịna emi afo osobode, afo emekeme ndikụt ke imọ idu ke itiendịk editaba ifụre ifụre ido, m̀mê sụn̄sụn̄ ido imọ. Do sio akpan n̄kpọ emi wụt ke ndibọn̄ akam nnọ Jehovah Abasi mben̄e ifụre ifụre ido emi edide mbun̄wụm spirit. Edieke afo osobode ndusụk idomo, oyom afo akpan akpan enyene mbun̄wụm edide mfara ke idem. Nte ededi, okpodot n̄ko ndibọn̄ akam mben̄e un̄wam Abasi ke ndikan idomo, ndibọhọ Satan, nnyụn̄ nnyene eti ibuot oro ẹyomde man ọyọ mfịna.—Matthew 6:13; James 1:5, 6.
5. Edieke mme idaha ẹnen̄erede ẹtie mfụhọ mfụhọ tutu afo ufiọkke m̀mê ewe mbun̄wụm spirit ke ọkpọbọn̄ akam eben̄e, nso ke ekeme ndinam?
5 Nte ededi, ke ndusụk ini mme idaha ẹkeme ndinen̄ede ntie mfụhọ mfụhọ m̀mê ntịme ntịme tutu afo ufiọkke m̀mê ewe mbun̄wụm spirit ke oyom afo enyene. Ke akpanikọ, idatesịt, emem, ifụre ifụre ido, ye mme edu Abasi eken ẹkeme ndidu ke itiendịk. Nso ndien? Ntak mûben̄eke Abasi edisana spirit esie unyụn̄ uyak enye anam mbun̄wụm ẹmi afo oyomde ẹdu barasuene ẹnọ fi? Mbun̄wụm ẹmi oyomde ẹkeme ndidi ima m̀mê idatesịt m̀mê emem m̀mê mbun̄wụm spirit ke ẹtan̄de ẹdian kiet. Bọn̄ akam n̄ko ete Abasi an̄wam fi ndinyịme ndausụn̄ spirit esie, sia enye adade emi ndida ikọt esie usụn̄.
Jehovah Onyịme Ndin̄wam
6. Didie ke Jesus ọkọsọn̄ọ owụt mme anditiene enye ufọn edibọn̄ akam kpukpru ini?
6 Ke ini mme mbet Jesus Christ ẹkeyomde item kaban̄a akam, ke ubak ubak enye ama akpak mmọ ete ẹbọn̄ akam ẹben̄e spirit Abasi. Jesus ama ebemiso otop n̄ke emi uduak ekedide ndinụk mmọ ẹbọn̄ akam kpukpru ini. Enye ọkọdọhọ ete: “Anie ke otu mbufo edinyene ufan, edinyụn̄ adaha etiene enye ke ufọt okoneyo, onyụn̄ ọdọhọ enye ete, Ufan, buọt mi uyo ita; koro ufan mi kiet, emi asan̄ade isan̄, ama edi ke ufọk mi, ndien nnyeneke se nnịmde enye ke iso: ndien enyeemi odude ke esịt ufọk edibọrọ ete, Kûnọ mi afanikọn̄: mmesesịn usụn̄; ami ye nditọ mi imodụk; n̄kemeke ndidaha nnọ fi. Ndọhọ mbufo nte, okposụkedi nte enye mîdidahake inọ enye ke ntak ufan, edi koro owo eyịrede, enye eyedaha ke enyọn̄ ọnọ enye adan̄a nte enye oyomde.”—Luke 11:5-8.
7. Nso idi ata akpan n̄kpọ ke mme ikọ Jesus oro ke Luke 11:11-13, ndien nso ke mmọ ẹsọn̄ọ ẹtịn̄ ẹnọ nnyịn ẹban̄a Abasi ye spirit esie?
7 Jehovah onyịme ndin̄wam kpukpru owo ke otu mme anam-akpanikọ asan̄autom esie ẹmi ẹyakde idem ẹnọ, ndien enye esikpan̄ utọn̄ ke mme eben̄e mmọ. Edi edieke utọ owo oro ‘akade iso ndiben̄e,’ nte Jesus akakpakde, emi owụt udọn̄ ofụri esịt onyụn̄ edi ediwụt mbuọtidem. (Luke 11:9, 10) Christ ama adian do ete: “Ewe ete odu ke otu mbufo eke edinọde eyen itiat, ke ini eyen eben̄ede enye uyo; m̀mê edinọde eyen urụkikọt ke ibuot iyak ke ini eyen eben̄ede enye iyak; m̀mê edinọde eyen ikpeyen, ke ini eyen eben̄ede enye nsenunen? Mmọdo edieke mbufo ẹmi ẹdiọkde ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mmọ eke ẹben̄ede Enye?” (Luke 11:11-13) Edieke ete m̀mê eka eke isọn̄, okposụkedi ọdiọkde ke ntak ndammana idiọkn̄kpọ, esinọde eyen esie nti n̄kpọ, ke akpanikọ Ete nnyịn eke heaven eyekaiso ndida edisana spirit esie nnọ owo ekededi ke otu mme anam-akpanikọ asan̄autom esie emi eben̄ede ke nsụhọdeidem.
8. Didie ke Psalm 143:10 enyene n̄kpọ ndinam ye David, Jesus, ye mme asan̄autom Abasi eke eyomfịn?
8 Man ibọ ufọn ito spirit Abasi, ana nnyịn inyịme nditiene ndausụn̄ esie kpa nte David okonyịmede. Enye ọkọbọn̄ akam ete: “Teme mi ndinam se afo amade: koro afo edide Abasi mi: spirit fo ọmọfọn, yak enye ada mi aka ke isọn̄ edinen ido.” (Psalm 143:10) David, emi Saul edidem Israel akamiade ufen, ama oyom spirit Abasi ada enye usụn̄ man enye okpokụt ete ke usụn̄uwem imọ ekedi edinen. Nte ini akakade Abiathar ama asan̄a ye ephod oku edi oro ẹsidade ẹfiọk uduak Abasi. Nte andida ke ibuot mme oku Abasi, Abiathar ama eteme David usụn̄ emi enye edinamde n̄kpọ man enem Jehovah esịt. (1 Samuel 22:17–23:12; 30:6-8) Ukem nte David, spirit Jehovah ama ada Jesus usụn̄, emi onyụn̄ edi ntre n̄ko ye mme anditiene Christ oro ẹyetde aran nte otu. Ke 1918-1919, n̄kaowo akabat mmọ nte mbon mbịn-mfep, ndien mme asua mmọ ẹdide mbon ido ukpono ẹkekere ke mmimọ imekeme ndisobo mmọ mfep. Mbon oro ẹyetde aran ẹma ẹbọn̄ akam ẹyom usụn̄ ndiwọrọ ke idaha unana edinam utom mmọ, ndien ke 1919, Abasi ama ọbọrọ akam mmọ, anyan̄a mmọ, onyụn̄ afiak ọnọ mmọ odudu ke utom esie. (Psalm 143:7-9) Ke akpanikọ, spirit Jehovah ama an̄wam onyụn̄ ada ikọt esie usụn̄ ini oro, kpa nte enye anamde tutu osịm usen nte mfịn.
Nte Spirit An̄wamde
9. (a) Didie ke edisana spirit anam n̄kpọ nte “andin̄wam”? (b) Nnyịn isan̄a didie ifiọk ite ke edisana spirit idịghe owo? (Se ikọ idakisọn̄.)
9 Jesus Christ okokot edisana spirit “andin̄wam.” Ke uwụtn̄kpọ, enye ama asian mme anditiene enye ete: “Nyenyụn̄ mben̄e Ete, ndien Enye eyenọ mbufo ibetedem [“andin̄wam,” NW] efen, man enye edidu ye mbufo ke nsinsi; kpa spirit akpanikọ, emi ererimbot mîkemeke ndida, koro mmọ mîkwe enye mînyụn̄ idiọn̄ọke enye: edi mbufo ẹmediọn̄ọ enye, koro enye ododụn̄ ye mbufo, eyenyụn̄ odu mbufo ke esịt.” Ke adianade ye mme n̄kpọ efen, “andin̄wam” oro edidi andikpep, koro Christ ọkọn̄wọn̄ọde ete: “Ibetedem [“andin̄wam,” NW], kpa edisana spirit, emi Ete edinọde edi ke enyịn̄ Mi, enye eyekpep mbufo kpukpru n̄kpọ, onyụn̄ anam mbufo ẹti kpukpru se Ami n̄ketịn̄de nnọ mbufo.” Spirit n̄ko eyetie ntiense aban̄a Christ, ndien enye ama ọn̄wọn̄ọ ọnọ mme mbet esie ete: “Edinyọn̄ Mi eyefọn ye mbufo: koro edieke mmenyọn̄ke, ibetedem [“andin̄wam,” NW] iditieneke mbufo; edi mma nnyọn̄, nyedọn̄ enye etiene mbufo.”—John 14:16, 17, 26; 15:26; 16:7.a
10. Ke mme usụn̄ ewe ke edisana spirit owụt nte idide andin̄wam?
10 Ke heaven, Jesus ama an̄wan̄a edisana spirit oro ẹken̄wọn̄ọde ọduọk mme anditiene enye ke usen Pentecost eke 33 E.N. (Utom 1:4, 5; 2:1-11) Nte andin̄wam, spirit oro ama ọnọ mmọ n̄kaiso ifiọk uduak Abasi onyụn̄ anam ntịn̄nnịm Ikọ esie an̄wan̄a mmọ. (1 Corinth 2:10-16; Colossae 1:9, 10; Mme Hebrew 9:8-10) Andin̄wam oro n̄ko ama ọnọ mme mbet Jesus odudu ndidi mme ntiense ke ofụri isọn̄. (Luke 24:49; Utom 1:8; Ephesus 3:5, 6) Mfịn, edisana spirit ekeme ndin̄wam Christian oro ayakde idem ọnọ ndikọri ke ifiọk edieke enye ọbọde ufọn oto mme enọ n̄kpọ eke spirit oro Abasi ọnọde ebe ke “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Spirit Abasi ekeme ndinọ un̄wam ebe ke ndinọ uko ye odudu oro iyomde man inọ ikọ ntiense nte mme asan̄autom Jehovah. (Matthew 10:19, 20; Utom 4:29-31) Nte ededi, edisana spirit n̄ko an̄wam ikọt Abasi ke mme usụn̄ efen.
“Ye Mmụm eke Owo Mîkemeke Nditịn̄”
11. Edieke idomo etiede nte akan owo ubọk, nso ke Christian akpanam?
11 Edieke Christian osobode mfịna oro etiede nte akan enye ubọk, nso ke enye akpanam? Kamse, bọn̄ akam ben̄e edisana spirit, nyụn̄ yak enye anam utom esie! Paul ọkọdọhọ ete, “Spirit onyụn̄ anyan̄a mmemidem nnyịn: koro nnyịn mîfiọkke ndibọn̄ akam nte nnyịn ikpọbọn̄de: edi spirit ke idemesie anam n̄kpeubọk ọnọ nnyịn ye mmụm eke owo mîkemeke nditịn̄. Enyeemi odụn̄ọrede esịt owo omonyụn̄ ọdiọn̄ọ se ekikere spirit edide, koro spirit anamde n̄kpeubọk ọnọ ikọt Abasi nte ekemde ye uduak Abasi.”—Rome 8:26, 27.
12, 13. (a) Didie ke N̄wed Mbon Rome 8:26, 27 enyene n̄kpọ ndinam ye mme akam oro ẹkebọn̄de ke mme akpan idaha oro ẹketiede idomo idomo? (b) Nso ke Paul ye mme nsan̄a esie ẹkenam ke ini mmọ ẹkedude ke ọkpọsọn̄ mfịghe ke n̄kann̄kụk Asia?
12 Ikọt Abasi oro spirit Abasi anamde n̄kpeubọk ọnọ ẹdi mme anditiene Jesus oro ẹyetde aran, ẹmi ẹnyenede idotenyịn uka heaven. Edi edide afo enyene ikot uka heaven m̀mê idotenyịn eke isọn̄, nte Christian afo emekeme ndinyene un̄wam edisana spirit Abasi. Jehovah ndusụk ini esinọ nnennen ibọrọ ke akpan akam. Ke ndusụk ini, nte ededi, afo emekeme ndinen̄ede n̄kop mfụhọ tutu afo ukemeke nditịn̄ nte etiede fi ke idem onyụn̄ ekeme n̄kukụre ndinam n̄kpeubọk nnọ Jehovah ye mmụm eke owo mîkemeke nditịn̄. Ke akpanikọ, ekeme ndidi afo ufiọkke se ifọnde ikan inọ fi ndien emekeme ndikam mben̄e n̄kpọ oro afo mûkpoyomke ibọhọke afo ọbọn̄ akam eben̄e edisana spirit. Abasi ọfiọk ete ke afo omoyom ẹnam uduak imọ, ndien enye ọfiọk se afo enen̄erede oyom. Akande oro, ebede ke edisana spirit esie, enye ama anam ẹwet ediwak akam ẹnịm ke Ikọ esie, ndien mmọemi ẹnyene n̄kpọ ndinam ye mme idaha oro ẹtiede idomo idomo. (2 Timothy 3:16, 17; 2 Peter 1:21) Ntem, Jehovah ekeme ndida ndusụk ekikere oro ẹwụtde ke mme utọ akam eke odudu spirit oro nte ẹdide mme ikọ oro afo okpoyomde nditịn̄ nte kiet ke otu mme asan̄autom esie, ndien enye ekeme ndinọ ibọrọ ke ufọn fo.
13 Ekeme ndidi Paul ye mme nsan̄a esie ikọfiọkke se ẹkpebọn̄de akam ẹyom ke ini ẹkedude ke ukụt ke n̄kann̄kụk Asia. Ke ‘ẹsọn̄ọde ẹfịk mmọ etieti, akan nte mmọ ẹkekemede ndibiom, esịt mmọ ama etịn̄ ọnọ mmọ ete mmọ ẹyekpa.’ Edi mmọ ẹma ẹben̄e ẹyom n̄kpeubọk mmọ en̄wen ẹnyụn̄ ẹbuọt idem ke Abasi, emi ekemede ndinam mme akpan̄kpa ẹset, ndien enye ama anyan̄a mmọ. (2 Corinth 1:8-11) Edi n̄kpọ ndọn̄esịt didie ntem nte ke Jehovah Abasi esikop onyụn̄ eyere akam mme anam-akpanikọ asan̄autom esie!
14. Nso eti n̄kpọ ikeme ndisụn̄ọ edieke Jehovah ayakde idomo akaiso ke ndusụk ini?
14 Ikọt Abasi ediwak ini ẹsisobo mme idomo nte esop. Nte ẹkewụtde ke mbemiso, ẹma ẹkọbọ mmọ ke ini Ekọn̄ Ererimbot I. Okposụkedi mmọ ini oro mîkenyeneke in̄wan̄în̄wan̄ ifiọk iban̄a idaha mmọ ndien ke ntre mîkọfiọkke nnennen se ẹkpebọn̄de akam ẹyom, Ikọ Jehovah ọdọn̄ọ mme ntịn̄nnịm akam oro enye ọkọbọrọde ke ibuot mmọ. (Mme Psalm 69, 102, 126; Isaiah, ibuot 12) Edi nso edieke Jehovah ayakde idomo akaiso ke ndusụk ini? Emi ekeme ndisụn̄ọ ke edinọ ikọ ntiense, ẹkeme ndinụk ndusụk owo ndinyịme akpanikọ, onyụn̄ ọnọ mme Christian ifet ndiwụt ima nditọete ke ndibọn̄ akam mban̄a ekemmọ mme andinịm ke akpanikọ oro ẹsobode ndutụhọ m̀mê ndin̄wam mmọ ke usụn̄ efen. (John 13:34, 35; 2 Corinth 1:11) Ti ete ke Jehovah ada ikọt esie usụn̄ ebe ke edisana spirit esie, anam se ifọnde ye mmọ, ndien kpukpru ini esinam n̄kpọ ke usụn̄ oro edikponode onyụn̄ anam edisana enyịn̄ esie asana.—Exodus 9:16; Matthew 6:9.
Kûyat Spirit Esịt
15. Mme Christian ẹkeme ndiberi edem ke spirit Jehovah ndinam nso ke ibuot mmọ?
15 Edieke afo edide asan̄autom Jehovah, ke ntre, bọn̄ akam ben̄e edisana spirit ke ini idomo ye ke mme ini efen. Ekem kut ete imetiene ndausụn̄ esie, koro Paul ekewet ete: “Ẹkûnyụn̄ ẹyat edisana spirit Abasi esịt, emi edi ke enye ke ẹma ẹfịk mbufo idiọn̄ọ eben̄e usen edifak.” (Ephesus 4:30) Spirit Abasi ekedi onyụn̄ edi ufịkn̄kpọ, m̀mê ‘idiọn̄ọ kaban̄a se ikenyenede ndidi,’ ọnọ mme anam-akpanikọ Christian oro ẹyetde aran—oro edi, uwem eke heaven oro n̄kpa mîdụhe. (2 Corinth 1:22; Rome 8:15; 1 Corinth 15:50-57; Ediyarade 2:10) Mme Christian oro ẹyetde aran ye mbon oro ẹnyenede idotenyịn eke isọn̄ ẹkeme ndiberi edem ke spirit Jehovah ndinam ekese ke ibuot mmọ. Emi ekeme ndida mmọ usụn̄ ke uwem edinam akpanikọ onyụn̄ an̄wam mmọ ndifep mme utom idiọkn̄kpọ oro ẹdade ẹsịm unana edinyene unyịme Abasi, editaba edisana spirit esie, ye edikpu ndinyene nsinsi uwem.—Galatia 5:19-21.
16, 17. Didie ke Christian ekeme ndiyat spirit esịt?
16 Didie ke Christian, edide ọfiọk m̀mê ifiọkke, ekeme ndiyat spirit esịt? Ọfọn, Jehovah esida spirit esie ndinam edidianakiet akaiso odu onyụn̄ emek irenowo ẹmi ẹdotde ke esop. Ke ntre, edieke andibuana ke esop osụkde mbiowo oro ẹmekde uyo, asuande edidọk edidọk ikọedem, ye ntre ntre eken, enye ikpetieneke ndausụn̄ spirit Abasi emi anamde n̄kpọ oyom emem ye edidianakiet. Ke ofụri ofụri, enye akpayat spirit esịt.—1 Corinth 1:10; 3:1-4, 16, 17; 1 Thessalonica 5:12, 13; Jude 16.
17 Ke ewetde n̄wed ọnọ ẹsọk mme Christian ke Ephesus, Paul ama odụri owo utọn̄ aban̄a edinyene ntụhọ usu nsu, iyatesịt eke ebịghide, uyịpinọ, ndek ndek ikọ, ebeubọk udọn̄ use, mbubiam ido, ye ikọ idiọk mbubru. Edieke Christian esịnde idem ke mme utọ n̄kpọ oro, enye akpanam n̄kpọ atuaha ye item Bible eke odudu spirit. (Ephesus 4:17-29; 5:1-5) Ih, ndien ke ndusụk udomo enye ke ntem akpayat spirit Abasi esịt.
18. Nso ikeme nditịbe nnọ Christian ekededi emi ọtọn̄ọde ndifụmi item Ikọ Abasi eke odudu spirit?
18 Ke akpanikọ, Christian ekededi emi ọtọn̄ọde ndifụmi item Ikọ Jehovah eke odudu spirit ekeme nditọn̄ọ ndikọri mme edu ye ido oro ẹkemede ndisụn̄ọ ke n̄koinnam idiọkn̄kpọ ye editaba mfọn Abasi. Okposụkedi ekemede ndidi enye inamke idiọkn̄kpọ idahaemi, enye ekeme ndinam n̄kpọ mbịne afan̄ oro. Utọ Christian oro anamde n̄kpọ ke ntuaha ye ndausụn̄ spirit akpayat enye esịt. Enye ke ntem n̄ko ọkpọbiọn̄ọ onyụn̄ ayat Jehovah esịt, kpa Ebiet oro edisana spirit otode. Andima Abasi ikpedehede iyom ndinam oro!
Kaiso Ndibọn̄ Akam Mben̄e Edisana Spirit
19. Ntak emi ikọt Jehovah ẹyomde spirit esie mfịn akpan akpan?
19 Edieke afo edide asan̄autom Jehovah, kaiso ndibọn̄ akam mben̄e edisana spirit esie. Akpan akpan ke “ukperedem ini” ẹmi, ye ndiọkeyo mmọ, ke oyom mme Christian ẹnyene un̄wam spirit Abasi. (2 Timothy 3:1-5) Devil ye mme demon esie, ẹmi ẹkebịnde ẹfep ke heaven ẹnyụn̄ ẹdude idahaemi ke n̄kann̄kụk isọn̄, ke ẹn̄wana ye esop Jehovah. Ntem, idahaemi ke akande nte akanam edide, ikọt Abasi ẹyom edisana spirit esie man ada mmọ usụn̄, m̀mê ekpeme mmọ, onyụn̄ an̄wam mmọ ndiyọ nsọn̄ọn̄kpọ ye ukọbọ.—Ediyarade 12:7-12.
20, 21. Ntak emi etienede ndausụn̄ Ikọ, spirit, ye esop Jehovah?
20 Kpukpru ini wụt esịtekọm ke un̄wam oro Jehovah Abasi ọnọde ebe ke edisana spirit esie. Tiene ndausụn̄ Ikọ esie eke odudu spirit, kpa Bible. Bere ọyọhọ ọyọhọ ye esop Abasi eke isọn̄ oro spirit adade usụn̄. Kûdede usịk ukodụk usụn̄uwem emi mîkemke ye N̄wed Abasi emi ekpedide ukem ye ediyat edisana spirit esịt, koro emi ke akpatre ekemede ndida n̄kosịm edidụri enye nda ndien ke ntre adade osịm afanikọn̄ eke spirit.—Psalm 51:11.
21 Ndidi se spirit Jehovah adade usụn̄ edi n̄kukụre usụn̄ ndinem enye esịt nnyụn̄ nnyene emem emem, uwem idatesịt. Ti, n̄ko, ete ke Jesus okokot edisana spirit “andin̄wam,” m̀mê “andinọ ndọn̄esịt.” (John 14:16, ikọ idakisọn̄ NW) Ebede ke enye, Abasi esidọn̄ mme Christian esịt onyụn̄ ọsọn̄ọ mmọ idem ndisak iso nse mme idomo mmọ. (2 Corinth 1:3, 4) Spirit emi esinọ ikọt Jehovah odudu ndikwọrọ eti mbụk onyụn̄ an̄wam mmọ nditi mme akpan n̄kpọ eke N̄wed Abasi oro ẹyomde man ẹnọ eti ikọ ntiense. (Luke 12:11, 12; John 14:25, 26; Utom 1:4-8; 5:32) Ebede ke akam ye ndausụn̄ spirit, mme Christian ẹkeme ndisobo mme udomo mbuọtidem ye eti ibuot eke otode enyọn̄. Ke kpukpru idaha ke uwem, ke ntre, mmọ ẹsikaiso ndibọn̄ akam mben̄e edisana spirit Abasi. Nte utịp, spirit Jehovah esida ikọt esie usụn̄.
[Mme Ikọ idakisọn̄]
a Okposụkedi ẹtịn̄de ẹban̄a “andin̄wam” nte owo, edisana spirit idịghe owo, koro ẹda adaitienyịn̄ usem Greek oro mîwụtke eren m̀mê n̄wan (emi ẹkabarede “enye”) ẹtịn̄ ẹban̄a spirit. Ukem ntre ẹda mme adaitienyịn̄ usem Hebrew oro ẹwụtde n̄wan ẹtịn̄ ẹban̄a eti ibuot nte owo. (Mme N̄ke 1:20-33; 8:1-36) Akande oro, ẹma ‘ẹn̄wan̄a’ edisana spirit ẹduọk, emi owo mîkemeke ndinam ye owo.—Utom 2:33.
Nso Ẹdi Mme Ibọrọ Fo?
◻ Ntak emi ọbọn̄de akam oyom edisana spirit Jehovah?
◻ Didie ke edisana spirit edi andin̄wam?
◻ Nso ke ọwọrọ ndiyat spirit esịt, ndien didie ke nnyịn ikeme ndifep ndinam ntre?
◻ Ntak emi akade iso ndibọn̄ akam mben̄e edisana spirit onyụn̄ etienede ndausụn̄ esie?
[Ndise ke page 15]
Kpa nte ima ima ete esinọde eyen esie nti n̄kpọ, ntre ke Jehovah esida edisana spirit ọnọ mme asan̄autom esie ẹmi ẹbọn̄de akam ẹben̄e
[Ndise ke page 17]
Nte afo ọmọfiọk nte spirit Abasi esinamde n̄kpeubọk ọnọ mme Christian oro ẹkọbọde ke edibọn̄ akam?