17. Anie edi Andifak Zion, ndien ini ewe ke enye afak Zion?

¹⁷ Ke idak Ibet Moses, andifak ama ekeme ndifiak ndep eyen Israel oro akanyamde idemesie esịn ke itie ufụn nsio ke ufụn. Ke n̄wed ntịn̄nnịm ikọ Isaiah, ẹma ẹbebem iso ẹwụt Jehovah nte Andifak mbon oro ẹkabarede esịt. (Isaiah 48:17) Idahaemi ẹfiak ẹtịn̄ ẹban̄a enye nte Andifak mbon oro ẹkabarede esịt. Isaiah ewet un̄wọn̄ọ Jehovah ete: “Ndien andifak eyedi ke Zion, onyụn̄ etiene mmọ eke ẹkabarede ẹkpọn̄ mme idiọk ido ke Jacob: emi edi uyo Jehovah.” (Isaiah 59:20) Ọnọ-nsọn̄ọ unwọn̄ọ emi osu ke 537 M.E.N. Edi enye enyene edisu efen efen. Apostle Paul okokot mme ikọ emi oto edikabade eke Septuagint onyụn̄ ada mmọ etịn̄ aban̄a mme Christian. Enye ekewet ete: “Ndien ke usụn̄ emi ke ẹyenyan̄a ofụri Israel; kpa nte ẹwetde ẹte, Andinyan̄a oyoto ke Zion edi, Enye oyosio ukwan̄ido efep ke Jacob: Ndien emi edi ediomi Mi ye mmọ, ke adan̄aemi ndimende mme idiọkn̄kpọ mmọ mfep.” (Rome 11:26, 27) Ke akpanikọ, ntịn̄nnịm ikọ Isaiah enen̄ede enyene ntatara ebuana—enye oro asan̄ade edisịm eyo nnyịn onyụn̄ akande oro. Didie ke edi ntre?

19. Nso ediomi ke Jehovah anam ye Israel Abasi?

¹⁹ Idahaemi Jehovah anam ediomi ye Israel Abasi. Nnyịn ikot ite: “Ndien Jehovah ọdọhọ ete, Ama edi ami, emi edi ediomi mi ye mmọ: spirit mi emi odorode fi ke idem, ye ikọ mi emi nsịnde fi ke inua, idikpọn̄ke inua fo, ye inua nditọ fo, ye inua nditọ nditọ fo, ke emi ye ke nsinsi: emi edi uyo Jehovah.” (Isaiah 59:21) Edide mme ikọ emi ẹma ẹnyene ebuana ye Isaiah ke idemesie m̀mê ikenyeneke, mmọ ke akpanikọ ẹma ẹsu Jesus ke idem, oro ẹkesọn̄ọde ẹnọ ẹte ke “enye oyokụt [nditọ, NW] esiemmọ.” (Isaiah 53:10) Jesus eketịn̄ mme ikọ oro enye ekekpepde oto Jehovah, ndien spirit Jehovah ama odoro enye ke idem. (John 1:18; 7:16) Nte odotde, nditọete ye ekemmọ mme adiakpa esie, kpa mme andibuana ke Israel Abasi, ẹbọ edisana spirit Jehovah n̄ko ẹnyụn̄ ẹkwọrọ etop oro mmọ ẹkebọde ẹto Ete mmọ eke heaven. Kpukpru mmọ ẹdi mmọ eke Jehovah ‘etemede.’ (Isaiah 54:13; Luke 12:12; Utom 2:38) Edide ebe ke Isaiah m̀mê ke Jesus, emi Isaiah adade aban̄a ke ntịn̄nnịm ikọ, Jehovah odiomi idahaemi nditre ndisịn owo ke itie mmọ tutu amama edi ada mmọ anam n̄kpọ ke nsinsi nte mme ntiense esie. (Isaiah 43:10) Nte ededi, mmanie ẹdi “nditọ” mmọ oro ẹbọde ufọn n̄ko ẹto ediomi emi?